Matyu 10
10
Yeso Ro Ti Hure Mulang Apil
1Mwen nin, Yeso lai fe i ro ames hure mulang apil, ɗak fas mbaitat i re' ti rin mafwashi ya, hu fati ɗufal cala si som mwatanan akat-akat. 2Asumam i fe muro hure mulang apilali mai,
i bya', Siman, ima si lai ii Pita,
hu Andru nusus i Siman,
hu Jemis al i Zebedi
hu nusus Jwon,
3hu Filip,
hu Batolomi,
hu Toma,
hu Matyu ma mati cef i wufen,
hu Jemis al i Alfyus,
hu Tadyus,
4hu Siman (ima si laiyus ii ma nadon),
hu Judas, maɗufal i Iskaryot
ima ta takfai cu han i Yeso.
5Yeso ro hure mulang apili, fas aɗeng i masi, ni, “Ka hu wa ta saa ti Ramam ahun hu lang ta ashwa i Samarya kwa. 6Ɓu kyel i tutwai i Isar'ila ima si fot. 7Myan ima hu wa, mbahun findel mai, hu ni, ‘Kaitat i kyel fit her anggasi.’ 8Fahun som i mwatanan cala, ima si mot hu luktus fit, hu sapa nggeterai ya, hu re' rin mafwashani ya. Hu mat kaciwa' tali, fahun ya kaciwa' tali.
9“Ka hu zan cef i ugbwirik mujuwi, ahun a ugbwirik mupeli, ta mala yuti kwa. 10Ka hu zan rukul i ma'at, ahun a fagin ti sheni kwa, ahun a kpakasak, ahun a cwang ti ɗa'at kwa. Maro ɗat u cu mwai i ro ames.
11“Myan ima hu lang ta ashwa nin, ahun a hwen nin, far hun ma mat ti ɗufal ta ashwai, hu ɗorkyel ta wur ames yes myan ima hu wa honti ashwai. 12Myan ima hun murang ta wuri, hu ni, cala ti wisu na wur mai. 13Na wuri mat tu arak, cala asu ti wis arak ta wuri, na awet, cala asu ti humut kyel. 14Na ɗeng mat tu ahun hal findel amu kwa, hu tabwat ɓura ya ta sisai yuti, myan ima hun honti wuri, ahun a ashwai. 15I laksu mwawei, mwen ti tot ti ɓur si wa ɓin ti ɗing ti shum ti ta' ti Sodom hu Gomora si ashwa moti. 16I ma rosu fota tutwai ta saa ti ambalal wi. Ɓurti andi, tehun ti shingat fota ɗamafwashi, hu te kaciwa' anggo fota gurguta.
17“Tehun ti shingat ta ɗufal wi, si wa kolsu ta wei i kaya i ɓur, si saramu ta mareha ames. 18Si wa kolsu ta wei i mbayai i ashwa hu kaya ɓurti hun a som koltifai asuni. Mai ma wa mute ii fisel tima ti maɓu i mba Muro Maɗesi amen ta wei yusti, hu ta wei i Ramam hwak. 19Shak ta andi, myan ima si ka'u, ka hu tirim si aɗeng ima hu wa laki, ahun angga' ima hu wa laki ta kwa. Ta si myani si wa fasu aɗeng ima ɓa hu lak. 20A hun hu wa findel kwa, a Rin i Deemu ma wa findel ta fo yuti.
21“Nusus ma wa cwai ti han i nusus ɓa si for ya, dee u cu i al ames, fe si wa zan ti wei ti hu dees, si fa si fwar ya. 22Shak ɗufal si wa munggwya tu ɓursun, shak maɗufal ima te mangra ti njeng wa dala, ma wa mupwet. 23Myan ima si fu shum na mai ashwai, tital hun hu wu ta nin ashwai. I ma laksu mwawei, kaciwa' ti hu nggar ashwaha i Isar'ila shak, Al i Maɗufal ma wa yes.
24“Al ima ma ɗambe', ɓyan makofsus ti kwa, yere ɓyan mawur ames kwa. 25Ndok al ima ma ɗambe' u te fota makofsus ti, yere u te fota mawur ames. Nasi lai dee mawuri ii Ba'alzabul, si wa lai ti som wur ames ii mi ya?
26“Ka hu mwenus fo kwa. Shak aɗeng ima ma mavo, ahun mata mufot wi, si wa ɓwaiya? Ahun ami i maɗengi ima mata mufot wi, si hon ta kaciwa' shangi ya? 27Aɗeng ima i laku na maɓing wi, lak hun ta kweneng wi. Aɗeng ima si laku ta mwal wi, ɗu hun ta si ndung hai hu tutol ti.
28“Ka hu mwen som i for ti lo' kwa, ɓurti si ndok si for rin amu ya kwa. Yis ima hu wa myanatsus fo, ii ma mati njeng i for ti shak lo' hu rin amu ya ta wur i man. 29Ka nyai a manjangkala' apilal si juwyal ya ti cef ndyong hoo? Shak ta andi, andek ti wa mufur fisha kaciwa' shangi i Deemu kwa. 30Shak syahai amu hwak ti si mbe'. 31Ɓurti andi, ka hu mwen kwa. Hu ɗat hu ɓin hu manjangkala' hyang.
32“Shak maɗufal ima koftun ta wei i ɗufal, yin hwak i wa koftus ta wei i Deen ima mata fit. 33Shak maɗufal ima nggwetun ta wei i ɗufal, yin hwak i wa munggwetus ta wei i Deen ima mata fit.
34“Ka hu mbe' nyai i yes ti mute cala na naya kwa. I yes ti mute cala kwa, i yes ti awal. 35I yes ɓa i shuk,
“ ‘Maɗufal u zan wei ti dees,
al mumbori ti zan wei ti nasut,
munza ti zan wei ti kasut hwak.
36Som zan ti wei ti maɗufal
si wa mute ii ta wii wur ames.’#10:36 Ɗing huni hwak: Mik 7:6.
37“Shak maɗufal ima ɓin ɓweti dees ta nasussi u ɓin ngga' ima ɓwetun ta, ndok ima ɓa u te ii amen kwa. Shak maɗufal ima ɓin ɓweti al ames hu al asus u ɓin ngga' ima ɓwetun ta, ndok ima ɓa u te ii amen kwa. 38Shak maɗufal ima nggwes i zan ti shanggami u koltifai asuni, ndok ɓa u te ii amen kwa hwak. 39Shak maɗufal ima wis mupwet ames, ma wa duni. Shak maɗufal ima dun mupwet ames ɓursun, ma wa wisi.
40“Shak maɗufal ima matu, matun ayin. Shak maɗufal ima matun, mat ii ma rohun. 41Shak maɗufal ima mat mashit ɓurti yis a mashit, ma wa wis ti mal i mashit. Shak maɗufal ima mat maɗufal manderei ɓurti yis a mandere, ma wa wis ti mal i maɗufal manderei. 42Shak maɗufal ima fa andek na saa ti fe muyayi mii cunjo i ham macerei, ɓurti yis a makoltifai asuni, i laksu mwawei, ma wa wis ti mal.”
Արդեն Ընտրված.
Matyu 10: AlisIRonNT
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Wycliffe Bible Translators, Inc. and © The Nigeria Bible Translation Trust 2018