Tatanigaina 33
33
Zekopu Ne Dufui Iso
1Ka ia ghahe kave laona Zekopu, manei neke finini Iso la meha taremehadira ira 400 nona mane, neke fotari ghu manei ira rekaha ta la sopai au taremehadira ira nodi uke: Lea, Reseli nia ira palu nona ghaseriva, e ghua. 2Manei neke nakai va kenu laori ira ghaseboro irogha nia ira tuudi, nia leghudi maneri mu Lea nia ira tuuna, nia Reseli ghe Zosepu dike va nonoghana ka leghudi mo maneri, dike ghua. 3Ianimu tuna ghe neke ghahe kenu lao nga Zekopu neke la maimanihi hinae ghu ka kavao vitu fafata ka kenuna Iso.
4Ghe Iso neke purudu mala la dufuina manei neke la abai ghu la angohina. Maneri palu haro dike vari nakelei ghedi. 5Ka ia mato lilohona Iso, neke finirio ghu ira fotati nia ira rekaha, manei neke notoho, “?Heiri mu noni ta au taremehau irahi agho?” neke ghua.
“Irahi mu ira rekaha ka ara ia nou noniriva neke vanaguro God ka ia nona varisute,” neke ghua Zekopu ungene tughuna.
6Ianimu tuna ghe dike ghahe kenu lao nga ira ghaseboro irogha taremehadira ira tuudi, dike la maimanihihi hinae ghu ka kenuna manei. 7Ianimu tuna ghe dike la meha nga Lea nia ira tuuna, nia va nonoghanana gedi ke meha ghu Zosepu ghe Reseli dike ghua, dike la maimanihi hinae haro ghu ka kenuna manei.
8Iso neke notoho, “?Heve mu va fafahakana ka agho ka ia va meha vanagu hoghara tagukava nake dufuriro ara?”
“Mala boka hio veha ghu ara ka agho, nake ghua” neke ghua Zekopu.
9Ghe Iso neke kahe ghua iahi, “Ara to kusu tehiau fuludu tahiguo. O sute vananigho taghou heve ta kuruigho iramu agho.”
10“!Deo!” neke ghua Zekopu tuufunana. “Noto vanagu veha la agho, o hioi ko namaha iahi ka ara. Ta fininina ara hihiliu nia mu taghe na finini ia hihilina God e ghua, vununa tato ke veha nia agho ka ara ghatunaina. 11O hio tagu ko namaha nake hio vananigho meha idi. God neto ke namaha ka ara neke vanagu ghu vahina leghutau ta malanga ghidi nga ara,” neke ghua ghini. Zekopu neke va ohiohini ma neke vuhai hio tana ghu Iso ira namaha ka Zekopu.
12Kahe ghua tuna iahi neke ghua Iso, “Va tana dato ghahe ghu. Ara ta va nunumaighona ghatu.”
13Ghe Zekopu neke kahe ghua iahi, “O boka finini mo faghinagu agho, ta paekera ira rekaha, a toraina kopuna ghidi ghu ara ira ghasedi sipisipi nia bulumakau ta va putiri nga ira tuudi. Geta kaike ravata ma ghu ta aho vai kenurira ara leghu tagukava idi nga ghe, maneri edi age leme ghatu. 14Agho o kusu kenu age mo ka ara, a tokeni ma a leghuigho ghu ara leleghuna ka rizudi tagukava idi nia rekaha idi e ghua, a vuhai age dufuigho ghu ara ani Seia.#33:14 Seia mu keha babaolonana Idomu” 15“Veha mo,” neke ghua Iso, “ghe va malumuau ta nai hinaerira ara kehara ka nogu mane idi mala babatu ghini ghauna nia kagara ghini ghauna, e ghua.”
Ghe Zekopu neke ungene tughui, “Mala heve ghe ge ghua nga iamu, vununa ara mu na kabai hioi ma ia veha ka agho.”
16Ka ravata ianimu Iso neke tatanigai ghahe leghu lao ghu ka ia kavana Seia. 17Nga Zekopu mu, neke lao Sakoti ka neke la riva vananio taghonai kaike suga nia ira sugadi ira nona bulumakau e ghua. Ne ghua mamu ghe neke va kudo ghini Sakoti#33:17 Sakoti fafahakanana mu,Ira suga. nga malau ani.
18Ka ia vai leghuna Zekopu sipana ani Padani Aramu ka ia malau fafaana Labani, manei neke la sabara va veha ka ia malau leghaha Sekemu ka ia kavana Kenani, neke la riva ghini ghu ia malau tei ka manei ka kaike galahena kava sare ka gheremena malau leghaha ani. 19Manei neke tabari ka 100 kunegeledi siliva#33:19 Hiburu ghobi kesita, kesita mu kaike rongo neke deo ge avohi ghu tahunana, nia niha ghu gigimanana. keha pelona galahena kava sare ianimu ka ira pagusuna Hamoa ia nona mama Sekemu. 20Manei neke la riva ghini vona kaike sopebeana aianimu, neke va kudo ghini Ele-Elohe-Isiraeli #33:20 Ele-Elohe-Isiraeli fafahakanana mu God ia God na Isiraeli ba e torai mana mu ia God na Isiraeli. ghu.
Արդեն Ընտրված.
Tatanigaina 33: kji
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2022, Islands Bible Ministries. All rights reserved.