MATEO 6
6
Manunekanati Jesús kausane uxia osoi aɨbu makiataka
1Nantityo Jesús:
“Tapɨ apisamukio axɨba omixhia napachɨkoi sukarɨ makiataka nauki namanaiña asaramatɨ aume. Axtɨ apisamute sane, naki Aubaɨ anati au napes champɨ ñana toxiobo uiti aume ityobo. 2“Sane naukiche, axtɨ akumanaka ɨmo axɨbama takisɨrɨma, tapɨ asikia uraboi sukarɨ makiataka nauki atusi ɨmo namanaiña, takana isamutema axɨbama chisamutempɨma axɨna urapoimia ubau sinagogas yusiu kutubiuka nauki namanaiñantai uxia nuraxɨma ɨmoma. Ñemanauntu sukanañɨ aume oboi axɨmanio sane tɨtane toxiobo tato aume ityobo. 3Axtɨ akumanaka ɨmo axɨbama taruku nityakisɨrɨkɨxɨma, tapɨ urapoi sukarɨti naki aturapatoe. 4Aisamuse tapɨ anati tusiu ɨmoti. Axti Aɨma, naki astaiti nanaiña axɨna aisamute anekanatai, ane ñana toxiobo uiti aemo ityobo.
Manunekanati Jesús ɨmo meankax
(Lc 11.2-4)
5“Axtɨ axaño ameanka, tapɨ apisamute takana axɨmanuma chisamutempɨ axɨna nuraxɨma, axɨma uxiantai ɨmoma eama atɨraimia ubau sinagoga autyo nusuara nauki namanaiña asaramatɨ ɨmoma. Ñemanauntu sukanañɨ aume oboi axɨna sane tɨtane toxiobo aume ityobo. 6Tapɨ axɨkɨ, axtɨ eanka, akosipo au napo, aiñama tyurux auki eanka ɨmoti Aɨma tapɨ anati tusiu ɨmoti. Axti Aɨma, tusiu ɨmoti axɨna aisamute anekanatai, toxio ñana uiti aemo ityobo.
7“Axtɨ ameanka tapɨ abasikia amukanaño tatityo axɨna champɨ nɨmoche, takana yachɨkoimia axɨbama chɨriopɨma, axɨma au ñakionkoxɨma axtɨ abaityux nuraxɨma ikokotati Tupax. 8Tapɨ apisamute takana axɨma, ityopiki axti Aubaɨ axtɨ chapankitiokipɨ pɨnanakiti, tɨtusiu ɨmoti axɨna nauxiantɨmo. 9Axtɨ ameanka amukanaño sane:
‘Suiyaɨ aka au napes,
tari anaunu nɨri.
10Yebatɨ nɨriaka suiñemo.
Tari uxiante isiu naxianka auna akɨ,
takana au napes.
11Ache sumutuburibo naneneka.
12Aixhimiaka tato axɨba nomɨnantɨ soboi,
takana axɨsomɨ sopixhimiakata tato
ɨmo axɨbama chuxiampɨ uimia suiñemo.
13Tapɨ chebo obi suichapene au makokotox,
aityaesɨmunusu somɨ eanaki nomɨnantɨ.’
14“Tyopiki axaño axtɨ apixhimiakata tato ɨmoti kiatax axɨna nomɨnantɨ isamutenti aume, naki Aubaɨ anati au napes ixhimiakatatityo aume axɨna nomɨnantɨ aboi. 15Tapɨ axtɨ chapixhimiakatapɨ tato ɨmoti kiatax, isiutityo Aubaɨ chixhimiakatatipɨ axɨba nomɨnantɨ aboi.
Manunekanati Jesús ɨmo ayuno
16“Axtɨ axaño champɨ apakonte au nanenes, tapɨ oxonene nausu, takana axɨmanuma chisamutempɨma axɨna nuraxɨma, mapañama asuchema nauki namanaiña asaraimia axɨna champɨ ñakontema. Ñemanauntu sukanañɨ aume ui axɨmanu sane tɨtane toxiobo ñana aume ityobo. 17Axɨkɨ, axtɨ champɨ akonte, atasubi aikoñokosɨtyo nuxia, 18tapɨ tusiu ɨmo makiataka axɨna champɨ akonte. Tari axtiatai Aɨma atusi ɨmoti, naki chɨtusiupɨ kauta nakaxti, axti Aɨma tusiu ɨmoti axɨna anekana toxio aemo uiti ñana ityobo.
Oñenaxibo au napes
(Lc 12.33-34)
19“Tapɨ apakiamutuka namenaxi iku axɨna kɨx, kauta ane uiche aiñamesoko auki nanaiña champɨki nɨmoche uxia, kautaityo makusɨpɨka iyebo uimia akusɨpɨma. 20Apakiamutu tyone amenaxibo au napes, kauta champɨ uiche aiñamesoko kautaityo champɨ ensoro chiyebopityo ui makusɨpɨka akusɨpɨma. 21Saneityo axɨna kauta naka nenaxi, akamanuintyo naka nausasɨ.
Basarux ɨmo nokɨtɨpɨ
(Lc 11.34-36)
22“Axɨba nosɨto tyoneio basaruka ɨmo nokɨtɨpɨ. Saneityo, axtɨ nasɨto omixhia, nanaiña nakɨtɨpɨ ane basarux ɨmo. 23Tapɨ axtɨ chomixhampɨ nasɨto, nanaiña nakɨtɨpɨ ane au tomikianene. Tapɨ axtɨ axɨna basarux ane akɨtɨpɨkɨ tyone axɨna tomikianene, ¡tarukapae nityomikianenekixh axɨmanu tomikianene!
Axti Tupax yochepe axɨba noñenaxi
(Lc 16.13)
24“Champɨti kumanakax yebokati aserebiti ɨmo axɨbama toxɨma mayɨriabuka. Tyopiki tɨborikoti ɨmoti taman tapɨti kiatax kuasɨrɨti ɨmoti, axtɨ ɨmoti taman makokonaunxti tapɨ ɨmoti kiatax chɨmakokonauntipɨ. Champɨtityo naki yebokati aserebiti ɨmoti Tupax takanaintyo ɨmo monixh.”
Asaratitɨ Tupax tyaku axɨbama aɨtoxti
(Lc 12.22-31)
25“Sane naukiche, sukanañɨ aume: Tapɨ amonxɨka iyo axɨna amutuburibo axɨnaintyo autɨpobo nauki ausɨborikia, iyoityo axɨna abaibibo. Axɨna nausɨboriki taruku nikuax pɨnanaki axɨna amutuburibo, axɨnaintyo naukɨtɨpɨ pɨnanaki axɨna abaibibo. 26Amasasatɨ ñome nutaumanka axɨba bupasoro auki ape: chupankɨturupɨ champɨ niyupakiyox, champɨityo kauta apiñaɨbu niyupakiyox. Chabeataipɨ, axti Aubaɨ naki anati au napes, basaparati ñome. ¡Axaño taruku naukuasɨrɨkɨ ñopɨnanaki axɨmanio nutaumanka! 27Axtɨ sane aboi, tarukapae namontarabeki, ¿kausane aboi nauki abaityuxɨki tamantai horax pɨrɨkɨ nosɨboriki?
28“¿Kausane amonxɨkɨ iyo axɨna abaibibo? Amasasatɨ kausane niñusunaunx pɨsioka au xhoens: champɨ yupachɨkoi chupaiñanapɨ. 29Sukanañɨ aume, axti yɨriabux Salomón, aɨbu nanaiña nenaxixhti, chaibiotipɨ takana axɨmanio pɨsioka. 30Ta sane axtɨ aibio uiti Tupax naxchopɨro, axɨna kaɨma ane eana nɨunx tapɨ tyubaka omo ui pes, ¡axaño taruku ñana nikoñokokox nabaibi uiti ñopɨnanaki, tapɨ axaño champɨ napakokonaunku! 31Sane naukiche, tapɨ taruku namonxɨkɨ, apankitio amopɨnanakiapatoe: ‘¿Isanempɨ uñutuburibo?’ ‘¿Isanempityo otɨpobo?’ ‘¿Isanempɨ usaibibo?’ 32Nanaiña axɨba sane yubapa taruku nonxɨkɨxɨma axɨbama chɨriopɨma, tapɨ axaño anati taman Aubaɨ au napes tɨtusiu ɨmoti axɨba nauxiantɨmo. 33Sane naukiche, apapachesio nɨriakax auki napes apisamuse axɨna uxia sukarɨti Tupax, auki toxio aume nanaiña axɨna nauxiantɨmo. 34Tapɨ taruku namonxɨkɨ iyo axɨna nanenes tyubaka, ityopiki tyubaka kuatɨ uixh kiatax bachɨkoboibo. Taikiana taman nanenes kuatɨ aɨbu chɨtamampatai bachɨkoboibo.
Արդեն Ընտրված.
MATEO 6: CHIQB
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Nuevo Testamento en Chiquitano © Sociedad Bíblica Boliviana 2002.