MATEO 19
19
Manunekanati Jesús kɨtɨpɨ axɨbama poso sɨroma peese
(Mc 10.1-12; Lc 16.18)
1Naukiche tɨnanti nanaiña axɨba sane, sɨrotitɨ Jesús auki Galilea iñataiti au axɨmanu kɨx Judea axɨna ane ɨmo tansɨrɨ pɨnanaki Jordán. 2Sɨrɨmanama sɨromatɨ isiuti, akamanu uxiankama tato uiti axɨbama maunxokono.
3Axɨmanuma fariseos sɨromatɨ esati Jesús nauki aiñama ñakokotoxɨma ɨmoti, ñankitioma pɨnanakiti:
–¿Ensapɨ uxia uiñana oñɨ peese pɨnanaki nokɨposɨ ityopiki chɨtamampatai?
4Aiñumuti Jesús nuraxɨma:
–¿Chamastaipɨ Nikorox naki uiche aisamunuti año aukiapae tɨkañe, ‘axti ñoñɨnx ichepe paɨx uxiantema uiti’? 5Sane nanti: ‘Sane naukiche naki ñoñɨnx onkonoti yaɨtoti uiti ichepe nipiakɨtoti nauki asaratitɨ tyaku nikɨpostoti, axɨmanuma toxɨma kaɨma takanati naki taman nakaxɨma.’ 6Sane naukiche chɨtoxɨpɨmainki, ta kunauntañati kaɨma nakaxɨma. Saneityo naukiche axti ñoñɨnx tapɨ iñatati peese axɨna uiti Tupax sɨroma chepe nakaxɨma.
7Axɨma ñankitioma pɨnanakiti:
–¿Kausanemo, bakɨpuruti Moisés atoxi ɨmo axɨna poso taman nikorox uiche atusi ta onkono uiti ikiana, sane peneko uiti?
8Nanti Jesús ɨmoma:
–Tyopikiapae axɨna sane chauxiankapɨ amonkoi nuraxti, sane naukiche chebo aume uiti Moisés apiñoko naukɨposɨ. Tapɨ aukiapae tɨkañe chɨsanempɨ. 9Sukanañɨ aume axti naki iñokotati nikɨpostoti, axtɨ chɨposotipɨ aɨbu, axtɨ posoti tato aɨbu kiatax, ane nipɨnatenti.
10Namatɨ ɨmoti axɨmanuma nesaxti apóstoles:
–Axtɨ sane ñakionkoxti ñoñɨnx aɨbu nikɨpostoti, chuxiampɨ apoti.
11Aiñumuti Jesús nuraxɨma:
–Chɨtɨpɨ ɨmo namanaiña aye uimia axɨna sane, kunauntañamantai axɨbama samamekanama uiti Tupax aye uimia. 12Sɨrɨmana axɨba yotopikiche chɨposopɨma mañoñɨnka: aboma axɨbama aukiapae mamesoma uixh kaɨma chɨposopɨma, aboma axɨbama mamesoma ui makiataka, tapɨ makiataka aboma takana axɨbama mamesoma ityopiki nɨriakax au napes. Naki iyebo uiti axɨna sane, tari aipiati ɨmo.
Kurusɨoma masiomanka uiti Jesús
(Mc 10.13-16; Lc 18.15-17)
13Yebomatɨ aɨbu masiomanka esati Jesús, nauki aiñanti ne'esti kɨtɨpɨma naukityo eanti tyakuma. Tapɨ axɨmanuma nesaxti apóstoles kuasoma uimia axɨmanuma sɨromatɨ aɨbuma. 14Auki nanti Jesús:
–Asioma sane tari yebamatɨ masiomanka tauna yesañɨ, tapɨ chichebopɨ aboi, ityopiki nɨriakax au napes tyone ɨmo axɨbama takana nakaxɨma.
15Iñatati ne'esti kɨtɨpɨ masiomanka, auki sɨrotitɨ auki axɨmanu kɨx.
Tamanti ñoñɨnx taruku nenaxixhti manityanati aɨbuti Jesús
(Mc 10.17-31; Lc 18.18-30)
16Tamanti yaɨx yebotitɨ asarati Jesús, ñankitioti pɨnanakiti:
–Maestro, ¿isane axɨna uxia isamune nauki aye sobi nisɨboriki champɨ nityakɨrux?
17Aiñumuti Jesús nuraxti:
–¿Kausane ankirio xhopɨnanakiñɨ yokɨtɨpɨ axɨba omixhia? Kunauntañantai axɨna uxia. Axtɨ axianka aye obi au napes, aikokosio axɨmanio bakɨpukux.
18–¿Ñakusabe? –ñankitioti maniki yaɨx.
Nanti Jesús ɨmoti:
–‘Tapɨ atabaikia, tapɨ axianka ɨmo kiatax paɨx, tapɨ akusɨpɨka, tapɨ apanka kɨtɨpɨti kiatax, 19akuasɨrɨti aemo aɨma ichepe napakɨma, akuasɨrɨtityo aemo asɨborisapa takana nakuasɨrɨkɨ aemoantoe.’
20–Nanaiña axɨmanio chauki tisamukio–nanti maniki yaɨx–. ¿Isane axɨna sɨrotiki isamune?
21Aiñumuti Jesús nuraxti:
–Axtɨ axianka uxia nasɨboriki, akosi, aipiabentekasio nenaxi nikuax aityoximia ɨmo axɨbama taruku nityakisɨrɨkɨxɨma. Sane ane nenaxi au napes. Auki kaɨma ariaku isiuñɨ.
22Naukiche axti maniki yaɨx onkoiti axɨmanu sane, sɨrotitɨ tato aɨbu taruku nisuchekixhti, tyopiki taruku nenaxixhti.
23Auki nanti Jesús ɨmo axɨbama nesaxti apóstoles:
–Ñemanauntu sukanañɨ aume naki ane nenaxixhti takisɨrɨti nauki aye uiti nɨriakax au napes. 24Sukanañɨ tatityo aume sɨnanaunx taman camello auki nisɨto kɨmes, pɨnanakiti naki taruku nenaxixhti aye uiti esati Tupax.
25Naukiche onkoimia, axɨmanuma nesaxti apóstoles taruku nikɨtobɨxɨma uixh, namatityo:
–Axtɨ sane, ¿ñakutipɨ naki añekana?
26Axti Jesús asaratitɨ ɨmoma auki aiñumuti nuraxɨma:
–Ɨmo mañoñɨnka axɨna sane chisamutempɨma, tapɨ ɨmoti Tupax nanaiña uxiante.
27Auki nanti Peru ɨmoti:
–Axɨsomɨ sopiñokota nanaiña axɨna ane soboi, nauki sobetɨ asiukɨ. ¿Isane axɨna toxiobo suiñemo?
28Aiñumuti Jesús nuraxɨma:
–Ñemanauntu sukanañɨ aume axtɨ iñatai ñana axɨmanu nanenes auche nanaiña mukampiabo ityobo pikiataka, auche axti Aɨtoxti ñoñɨnx tɨmonsoti au nityɨmoxti, axaño axɨbama amonkaño isiuñɨ autɨmokaityo au doce tɨmoka nauki amasarai ɨmoma axɨbama doce aɨtoxti Israel. 29Namanaiña axɨbama ichopikiñɨ iñokotama nipoxɨma, yarukityoxɨma, nikiasixhimia, yaɨtoxɨma, nipiakɨtoxɨma, aɨtoxɨma, niyoxɨma, yasutiuma ñana cien yopɨrɨkɨ, yasutiumaintyo nisɨborikixhimia champɨ nityakɨrux. 30Sɨrɨmanama axɨbama kaɨma kusɨrɨboma, tyonema ñana axɨbama sɨsioma tyakɨru. Sɨrɨmanamaintyo axɨbama kaɨma aboma au nityakɨrux, tyonema ñana axɨbama kusɨrɨboma.
Արդեն Ընտրված.
MATEO 19: CHIQB
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Nuevo Testamento en Chiquitano © Sociedad Bíblica Boliviana 2002.