যোহন 2
2
কান্না ম্রোমা মাংগলা ছংখ্রাং পুওয়ি
1ন্হৈ রাক নক গালিল প্রি কান্না ম্রোমা মাংগলা ছংখ্রাং পুওয়েঃ ফ্রইতিখা থুঃউ পুয়িইমা যীশু মিখাংচা হিকলিরে। 2থুঃউ পুয়িইমা যীশুনা তিবিরোগুলি পাংলিরে। 3নক্কা তাখা আলুং চব্যরিঃচা কুংলাঃখারি, য়াংখা যীশু মিঃখাংচা যীশুগো প্রলিরি, “দিঃসুরোমা চব্যরিঃ মিহিকব্যা।”
4যীশুচা কোঃ মিঃখাংগো প্রলিরি, “দিঃ আক্রংগো য়ুউরো, নাংনা ঙানা যালিঃ? ঙামা আখিং আগুলিঃ মফ্রসিই।”
5য়াংখা যীশু মিঃখাংচা ক্যুয়েংসিরোগু প্রলিরি, “দিঃসু নাংরোগু যা লুকফুঃ প্ররিলি, য়াংচারা লুককে।”
6দিহূদী বাসা থুংজৈং অাতৈং সেংস্যাংস চাংক্রিখ্রাং কিজু য়াং আঃরামা ক্যক খ্রকলুং ওখাক তিঃ হিকলিরি। য়াংচারো তুখু মক্যুয়েং প্রফুছুগি লিঃছি ঙাসঃচিই রিঃই ছেংরিঃ। 7যীশুচা য়াং ক্যুয়েংরোগু প্রলিরি, দিঃ ওখাকরোমা রিঃই ফ্রিলঃকে। ক্যুয়েংরোচা য়াংখা ওখাকরোমা আব্রিচুং প্যাংরো রিঃই ফ্রিগেলিরি। 8য়াংনক যীশু য়াংসুউরোগু প্রলিরি, “আগু য়াংচাগা তেঃকে য়ুউরো আঃচা য়াংসা আস্যাংদুঃ য়ুউ লাঃরি।” ক্যুয়েংরো য়াংচারা লুককেরিব্যা।
9থুউ চব্যরিঃ যাচা রিইগা ফ্রলিরি, ইংস্যাংচা য়াংচাগো সক ক্রিলিরি। ছুগি য়াং আঃরিচা যাচাগা লাঃরিলি, য়াংচাগো য়াংসুউচা মিসিক; য়িগিলি যা ক্যুয়েংরো রিই খেঃকেরি য়াংসুউরো সিকরি। য়জংকিজু ইংস্যাংচা মাঙ্গালা তাং য়ক্ক্যাগো খঃরো প্রলিইরি, 10“পাথামা আলুংসোগু আকং চব্যরিঃ সকফু পিইরি। য়াংনক লুঃউরোচা চিই তগ্র চাঃব্রিঃরি, য়াংখা যা আঃরি পিইরিলি, য়াংচাচা হ্রিইগাথাকপাং তেঃকে মকং। য়িগিলি নাং আগুতয়ং আকং চব্যরিঃ থাঃরিসিই।”
11যীশুচা গালীল প্রিনিমা কান্না রুওয়ামা লাকখানা আতুওয়ক পাথামা দিঃ এংঅফুয়ি অলুক লুকরো কুঃ তেংখুংগো প্রালিইরি। য়জংছুখা যীশু তিবিরোচা, যীশু আপমা ক্যুংগেলিরি।
12য়াংনক যীশু, কোঃ মিঃখাং, কোঃ ঞিংরোনা তিবিরোচা কফরনাহূম ম্রুদুঃ লাঃখাগেতি, য়িগিলি আম্যা রাক য়াংসুউরো য়াংদেমা মিনিংগেলি।
আস্যাং যীশু যিরুশালেং ক্যংমা
13যিহুদীরোমা ক্যুয়েম্রক পুয়িই পারিখা যীশুচা যিরুশালেংদুঃ লাঃখারি। 14যীশুচা য়াংদেমা ম্রাংলিরি, লুঃউরোচা ওয়িপানাসা ক্যংমা নুওয়া, সাংফ ছুয়িই অর খঃ রংগেতি অরলি টেংগা ফাঃসা লুঃউরোলি থৈংরো হিকরি। 15দিঃচারো ম্রাংরো যীশুচা ক্রুনা ক্রু দুক তুখু লুকলিইরি, অর য়াংচানা হিকচা নুওয়া, সাংফ ছুয়িই অর লুঃউরোগুলি য়াংচাগা লৈই রুওয়েলৈতি। যাসুরো টেংগা ফাগেতি, য়াং লুঃউরো টেংগা-পৈস্যারোগু ক্রাংরো, যীশুচা য়াংসুউরো খুংগু প্রেং বৈলিরি।
16যাসুরো খঃ রংগেতি, যীশু য়াংসুউরোগু প্রলিইরি, “দিঃ আঃরাগা দিঃচারোগু য়ুউ লাঃলি। ঙাক ফাখাং ইংগো কুং প্রুকচা ইং মাপ্যাংগেকি।” 17য়জংছুগি সেংস্যাংস কেইং চাউমা হিচা চাঃগাগো তিবিরোচা তুওয়করাগেরি:
অ ফুরা কোবাং ক্যং কিজু, ঙামা যা আখ্য চিদানা হিকরি,
য়াং চিদানা আখ্যচা, ঙাক চিইদানাগু তুতাংমিঃ।
18য়াংখা যিহূদী গংখ্যুকরোচা যীশুগো মিংগেলিরি, “ছুগি দিঃচারো লুকফু তাওয়েং, আম্হেং চাংজ নাকমা হিকরিছুগি, তাওয়েং গুংধগো প্রাফুকিজু তুখুমাসা এংঅফুয়িই অলুক প্রানৈফু লঃ?”
19আফ্রিমা যীশু য়াংসুউরোগু প্রলিইরি, “থাওরা ফুরা ক্যংগু নাংরো ফ্রুবলৈকে, সুংরাক আতুওয়ংমা ঙা প্রেংরো লুক প্রামি।”
20দিঃচারোগু ক্রারো যিহূদী গংখ্যুকরো যীশুগো প্রগেলিরি, “দিঃ ওয়িপাসা ক্যংগো লুকফু লিঃছি ক্রকন্হ লুকলিইরি, অর নাং সুংরাক আতুওয়ংমা লুকপ প্রাফু?”
21ছুগি যীশুচা থাওরা ফুরা ক্যং ছুচাগা, কুঃদৈং কাইংথাগো প্রলিরি। 22য়জংকিজু যীশু আঃসিইগা আহ্রাং ফ্রইরো থাঃরি নক, যীশু তিবিরোচা তুওয়ক রাঃগেলিচাগা, যীশুচা থুউ চাঃগাগুরা প্রলিইরি। য়াংখা তিবিরোচা সেংস্যাংস কেইং চাঃগা অর যীশু যা চাঃগা প্রলিইরি, য়াংচাগো ক্যুংগেলিরি।
23ক্যুয়েম্রক পুয়িই আখিংখা যীশু যিরুশালেংমা, যাচারো এংঅফুয়িই অলুক লুকলিইরি, য়াংচাগো ম্রাংরো তেকে লুঃউম্যারোচা যীশুগো ক্যুংগেলিরি। 24য়িগিলি যীশুচা য়াংসুউরোবামা কোগু আতাং মাপ্রালি, আক্রংগা যীশু আলুংসোগু সিকরি। 25লুঃউ আক্রংলিলাগো য়ুউরো, তয়কলি সাকসি পিইফু আঃলুলি যীশুবামা মিহিক, আক্রংগা লুঃউরো চিইমা যা হিকরি যীশু য়াংচাগো সিকরি।
Արդեն Ընտրված.
যোহন 2: BBSRMZ
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք