Luk 9
9
Zɛzi aloma batɔtu jonwu na mba
1Zɛzi asojɛ batɔtu beji jonwu na mba, na iwɛcɛ bango tuma na pizo ya ipepaka menkuku myahajɛ, na ihakaka bato na mempongo. 2Ya ango aloma bango ilwaka iyengaka myenje mya itandaka Itundu ja mbɛ ja Etomba ya Zambe, na ihakaka membɛlu. 3Ya ango asɔhɔ na bango te: «Usya byelwaka, teka kwa nemba nemba: na humbe, na ebɔmbɔ, na otɔbɛ, na lɔlɔ teka kwa, moto teka kwa mengɔhu meba. 4O masi mahajɛ ma bemyalaka bihi, jaka obelongwɛ mɛnɛ ngu na buya bwa bye manyaka okate. 5Nde, masi ma bato be benaka bihi, manyaka o betafɛlɛ mɛnɛ ete byakukwɛ ihululu ja mako ma bihi, ya bijaka isicɛ wa te bye amukumɛ okate.» 6Bayokwɛ te balwa, iyengaka myenje mya Itundu ja mbɛ o mamboka, na ihakaka membɛlu masi mahajɛ.
Elodi Antipasi ahakakasa iyɛnɛcɛ Zɛzi
7Elodi wa nɛni mwa Ngalile ayokakasa mambo ma yekanasa mahajɛ, muyebasa etɛ ya ango enyeni temanga, bosina te ibate bato basɔhɔkɔsɔ te: «Yɛ, Za batisi amuyemwa o malonga.» 8Ya ibate basɔhɔ te: «Yɛ, Eli wa ntɔci amupwa.» Ya ibate basɔhɔ te: «Yɛ, ntɔci mwa sondi ya ka mwa mulumya o malonga.» 9Elodi asɔhɔ te: «Imɛ mɛnɛ, majasa meloma iyuwaka cingo ya Za batisi. Nde wɛ moto wa mayoka kuma wɛ beza?» Ahakakasa iyɛnɛcɛ Zɛzi.
Zɛzi abongwa bandomana basini jonwu
10Ya batɔtu balumya, na ilazɛcɛ Zɛzi bemba byahajɛ bya bango ba bekasa. Ya Zɛzi amɛnɛ alwa na bango bopama bya kunakuna na betafɛlɛ ya Betayida. 11Usya lupu ja bato jayokasa, jango te jahinjɛ ango. Zɛzi te ahimɛ bango. Ya ango asɔhɔ na bango jambo ja Etomba ya Zambe, na iyonjɛcɛ bato bahakakasa te bayonjɛcɛ bango na bemba manganya byango. 12Usya buya bwa lwakasa iyindaka, batɔtu beji jonwu na mba bahinyana okuna eji na isɔhɔkɔ neji te: «Lomaka bato bahunwanace o mamboka na mepinji myaji kunakuna. Usɛ, bekumɛcɛ maja na masi ma inangaka. Bosina te, usetɛ teka bato baji okate.» 13Nde, asɔhɔ na bango te: «Bihi mɛnɛ wɛcɛ bango maja.» Ya batɔtu basɔhɔ neji te: «Bɛhɛ bajetɛ na bapɛmbɛ ba tanyi na bafɛ baba. Ohaka te bɛhɛ balwace ihombaka maja ma bato bahajɛ?» 14Usɛ, ba ndomana bajasa okate emba nda basini jonwu. Ya Zɛzi asɔhɔ na bayokwɛ beji te: «Sojɛcɛ bango o becita bya bato memboto metanyin, (15) ete byahulɛ bango mehinsi.» 15Ya bango abeka yumɛnɛ, bahulɛ bahajɛ mehinsi. 16Ya Zɛzi akwa bapɛmbɛ mɛnɛ ba tanyi na bafɛ baba, ya ango abesɛ minhɔn bya iko, na iwɛcɛ bango ipota ya ango abɔndɔ iwɛcɛ na bayokwɛ, ikabaka na lupu. 17Moto wahajɛ te aja na ihulwaka, masika mahisasa balozɛ belunga jonwu na mba.
Pyɛli atanda te Zɛzi aje Kilisite
18Ibwate buya, bwa Zɛzi ajasa bobɔndɔngɔkɔ iyate isi, na bayokwɛ beji bajasa okate. Ya Zɛzi ahimwa bango te: «Ya lupu jasɔhɔ ukwa imɛ nde?» 19Ya bayokwɛ bakalwɛ neji te: «Ibate basɔhɔ te, oje Za batisi. Ibate te, ɔbɛ Eli wa ntɔci. Ibate okayi batanda te ojɛ ntɔci mwa sondi ya ka mwa yenga o malonga.» 20Zɛzi ahimwa bango te: «Nde bihi, byasɔhɔ te, imɛ za?» Pyɛli te ahungwɛ neji te: «Oje Kilisite wa Zambe.»
Zɛzi atanda jambo ja ilɛlɛ jeji
21Zɛzi apɛmɛ bango te: «Teka tanda na moto nde moto, te maje Kilisite.» 22Ya ango ahunwana bosɔhɔkɔ te: «Anyɛ Mwana moto#9.22 Mwana moto Mwana moto aje Zɛzi amɛnɛ. ayɛnɛ mezuku buce. Anyɛ bakombo, na menɛni mya bawe ba bebuwa, na melɔnji mya Nceko babena ango. Anyɛ baboma ango. Nde, buya bwa hanto, eyemwaka.»
23Ombya mɛnɛ, asɔhɔ na bahajɛ te: «Wɛnɛ moto ahaka ihinjɛcɛ imɛ, ango teka micitemanga ibyeji amɛnɛ, abɛpɛce kuluwa eji minyan mahajɛ, na ihinjɛcɛ imɛ. 24Nde, moto nde moto ahaka ihakaka nyo eji, abilapɛcɛ yango. Nde ahaka ilapɛcɛ nyo eji na bosina bwamɛ, abikumɛcɛ yango. 25Wɛnɛ moto, akumɛ bokumani bwa mɔngɔ bwahajɛ, nde epɛpɛ nyo eji, na ihemaka nyo eji amɛnɛ, ya ango amukumɛ okate nde? 26Moto nde moto eyɛnɛcɛ hɔyi na namɛ, na mayɔkɔ mamɛ, na namɛ wa Mwana wa moto mabiyɛnɛcɛ hɔyi neji, usya meyaka na kuma amɛ, na kuma ya Zambe Hangwɛ amɛ na bangɛlɛ ba pu. 27Matanda bihi mombo, ibate bato baji usatɛ, baji wa teka yɛnɛ Etomba ya Zambe.»
Boho bwa Zɛzi bwayawa
28Usya Zɛzi ahijɛsɛ bosɔhɔkɔ nɛ, ya yekanasa okate emba nda minyan mwambi, akwa Pyɛli, Za, na Zaki, ya bango abeta ukwa ibete, ilwaka ibɔndɔngɔkɔ. 29Usya Zɛzi ajasa obobɔndɔkɔ, boho te bwayawa ango, menkanda myeji te myaya pu buce amɛnɛ. 30Ibu jɛkɔ, ngwɛnɛ bato baba baje o bosɔhɔkɔ na neji, yajasa Moyizi na Eli wa ntɔci. 31Bapwasa na kuma o lebebe ya moji, ba sɔhɔkɔsɔ ilwe jeji, je yekanaka bya Zɛluzalɛmi. 32Pyɛli, na ba bango ango baji, banangasa buce. Usya bango ayemwasa, bayɛnɛ kuma ya Zɛzi na bato baba bajasa bango neji. 33O elɔmɔ ya Moyizi na Eli bamanya o kuna Zɛzi, Pyɛli asɔhɔ neji te: «Lɔnji, yangwɛ bɔnhu te mini ajace usatɛ, bɛhɛ abekace me mbembe mehanto, mɔkɔ imwɔbɛ, mɔkɔ mwa Moyizi, na imwate mwa Eli.» Nde Pyɛli muyebasa emba ya ango asɔhɔkɔsɔ. 34Usya ango asɔhɔkɔsɔ nɛ, ngutu mwahula ukwa ango, na ikubaka bango. Bayokwɛ bayɛnɛ bɔngɔ, usya mbici mwakubasa bango. 35Okatɔ ya ngutu, ekɔlu ya punda, na ingɔkɔ te: «Otɛ, Mwana amɛ wa mamubɔnɔ, yokaka ango!» 36Usya ekɔlu yɛ yakangasa, Zɛzi ajasa amɛnɛ. Bayokwɛ beji, o minyan mɛnɛ mɛ, bakɔlɔkɔsɔ o melema myango eyaya ya bango ayɛnɛsɛ, bi tandasa na moto.
Zɛzi ahaka mwana aji na nkuku
37Zɛzi na bayokwɛ beji ba hanto bahula na ibete, ombya buya bwa bango bayɛnɛsɛ eyaya mɛnɛ. Ya bato buce baya itakanaka na neji. 38O lebebe ya bato, moto te apotanga te: «Lɔnji, soso bita imɛ mwana otɛ, aje icika! 39Yangwɛ na nkuku mwanjibanda ango ibyate bekusi. Ibu jɛkɔ, ya ango apotanga ya mwango mwapukwɛ ango na pizo. Usɛ, indɛzi te pwa mwana wɛ o honko. Nkuku mwɛ mwango abeka ango bobe buce amɛnɛ, mwamanya ango ka na buji. 40Mamuje himwa bayokwɛ bɔbɛ ipepaka mwango, nde bango teka koka.» 41Ya Zɛzi asɔhɔ te: «Bihi bato ba mwehe, byaje teka ibukwɛ Bihi byabeka bobe! Mejaka na bihi na ikoka bihi minyan kweya?» Okate, Zɛzi asɔhɔ na moto wɛ te: «Yaka na mwana ɔbɛ, biyetɛ.» 42O elɔmɔ ya mwana wɛ ahinyanakasa, nkuku mwɛ mwa fa ango o hehe, na ipukwɛcɛ ango na pizo. Usɛ, Zɛzi te apɛmɛ nkuku mwa ibebe na iyonjɛcɛ mwana, awɛ ango na hangwɛ. 43Bato bahajɛ bajasa boyoyamaka na bonɛnɛ bwa Zambe.
Zɛzi amici tanda jambo ja ilɛlɛ jeji
Bato bahajɛ bayecɛkɛsɛ bemba byahajɛ bya Zɛzi abekakasa. Bosina mɛnɛ, bwango asɔhɔkɔsɔ na bayokwɛ beji te: 44«Jibwaka malɔ ma ikɔlokɔ bemba bya metandaka bihi, na ikɔlɔkɔ byango o melema. Bewɛcɛ Mwana moto o mabɔ ma bato.» 45Nde, mayɔkɔ mɛ bayokwɛ biyokasa obwɛji. Bosina te, ma ajasa uswɛ na bango, ya bango bajasa na bɔngɔ bwa ihimwaka Zɛzi sina bekana byɛ. Bosina mɛnɛ, bwa bango ajasa teka yoka iyɔkɔ jɛ.
Moto aji bomɛnɛ za?
46Usɛ, bayokwɛ bajasa botatubaka o panga ango, na isɔhɔ te: «Aji bonɛnɛ o panga mini za?» 47Zɛzi ayebakasa matemange ma melema mya ango, ya ango akwa musiki, na itɛjɛcɛ ango o kuna eji. 48Ya ango asɔhɔ na bango te: «Wɛnɛ moto amyala epaka etɛ na bosina bwa jinɔ jamɛ, a myala imɛ mɛnɛ. Amyala imɛ, amyale amuloma imɛ. Nde, moto aji bosiki o panga bihi bahajɛ, ango aji bonɛnɛ.»
Moto aji teka mbyɔlɔ na bihi, aje o ngamo ya bihi
49Za, wa ntɔtu, akwa iyɔkɔ na isɔhɔkɔ na Zɛzi te: «Lɔnji, bɛhɛ beyɛnɛ moto apepa menkuku na jinɔ jɔbɛ. Bɛhɛ bamuhaka ihimbaka ango. Bosina te, aje habe moto wa mini.» 50Nde, Zɛzi ahungwɛ na bango te: «Teka himba ango. Na bosina te, moto aji teka mbyɔlɔ na bihi, aje o ngamo ya bihi.»
Iyate mboka ya Samali yabena imyalaka Zɛzi
51Usya minyan ma Zɛzi ilwaka bya iko mahinyanakasa, ya ango amɛmɛ mombo ilwaka bya Zɛlizalami. 52Ya ango aloma bohoboho bato o mboka yaji o njenja mɔngɔ ya Samali, ilwaka iyebɛcɛ ango isi. 53Nde, bihimɛsɛ bango na bosina bwa bango alwakasa bya Zɛlizalami. 54Usya, Zaki na Za, baji bayokwɛ beji, bayɛnɛsɛ nɛ, bango te basɔhɔ te: «Ku aho, o haka te bɛhɛ balomace weya ya iko ihulaka ukwa ango, na itumbaka bango?» 55Ya ango akalwana bya bango baji, a wɛ bango masicɛ. 56Ya bango balwa iyate mboka.
Bato bahaka ihinjɛcɛ Zɛzi
57Usya bango bajasa obojongaka, na pɛyi, iwate moto te asɔhɔ na Zɛzi te: «Mehinjɛcɛ ɔbɛ masi mahajɛ molwaka.» 58Zɛzi ahungwɛ na neji te: «Na banganya bangwɛ na mabonga ma inangaka, na bonyɔji bwa iko na malumbu. Nde, Mwana moto teka isi ya ango enanjɛcɛ molo.»
59Ya ango asɔhɔ na iwate moto te: «Hinjɛcɛ imɛ.» Nde moto wɛ asɔhɔ neji te: «Ku wamɛ, jikaka imɛ mabilwa boho ikonaka hangwɛ amɛ.» 60Zɛzi te akalwɛ neji te: «Djikaka becenje byakonace becenje byango. Nde ɔbɛ, lwaka itandaka itundu ja Etomba ya Zambe.»
61Iwate te ahuwana bosɔhɔkɔ te: «Ku wamɛ, mabihinjɛcɛ ɔbɛ. Nde bijika imɛ mabilwa iyangaka na yali amɛ.» 62Ya Zɛzi asɔhɔ na neji te: «Moto akona na ehanaka o mabɔ, ete amakata mbiya, wɛ habe moto wa Etomba ya Zambe.»
Արդեն Ընտրված.
Luk 9: KOQ
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES