Luka 17
17
Belen a tara masharra neng obuza masharra
(Mat 18.6-7; 21-22; Mar 9.42)
1Oye odara Yeso ma gon ano yemasang rrome, “Epegeme se enan ngona ono a ngona masharra, eyara da mantarra ne. Ono ogome se mana ngona orona oran masharram me maning nǝrǝ. 2Tego woi we vana vento ayima biya a bate bate agina ma we masharra ne, gara atare mi olanjo owarreda ayemelo a vati mi ayimo orawa. 3A nyi wankǝli a topana tonyi.
“Inga owanomokoi woi masharra, obukara a me, Inga ma garre ma deke obuza me. 4Inga masharra a ngo ka sunare odara vento, nze ma kuru ka sunare a ngo ma go, ‘Buzan,’ obuza me da mantarra ne.”
Vati do o ngona biruwa
5Nze A toma me ngo Achakura Yeso, “Malado vati o wuna biruwa Ogomo Asharri dede.”
6Nze Achakura ma gara ma gon nye, “Inga nyi zen o wuna biruwa, se odenye sakama bewo be oyis, egemese ekirra ebate ayimi esana zal, eya iya gunan otiti okuyǝng ogina, ‘Muku ayina oka tore ayimi orawa osaru,’ nze owe nane se nyi na guna owe.
Ochǝkǝnǝ orere o ngoma
7“Inga, woi ayima ka nyi ma zen orere se maya wuza rrome avara, ne owankǝli akame etan. Inga orere me maka suru uja, maya gunan me, ‘Chonno, ora ochǝkǝnǝ owucu emo wucu’? 8Ma zema buku nane me ne, maya gunan me, ‘Ngame ka gorro emete, o gorro apana a kai, o den tan, se mina masa tuwucu, abate oka wuza tuwucu toi’? 9Maya gode orere, baka mana wuza etoma egemese iyǝnkǝnǝ mata wuza eme? Mama bukumi ne. 10Nane ze, inga nyi wuza zal eme geme se ana gunan nyi ewe, nze nyi go, woro arere ze base, ‘Woro dan we eyabo se enakera eme geme se ana guna a woro wuza ne.’ ”
Yeso ma ngona ano yekutu biturru a ngamo
11Ni se Yeso me orona a ngame a Urshalima, nze ma tarse birrangu be in nyanga ma Samariya neng Galili. 12Maya pete oye ugwere ogemme, nze aye ano kwene o rrepung yebero nye biturru arawa me nze nga tore ayiyau. 13Nze nga nyiza rremelo nga go, “Achakura Yeso, kuna ogwengwene okodo.”
14Ni se Yeso nǝrǝ nye, nze ma gon nye, “Ngame ne a Urshalima a tupiris a nyi wonko nye apun kǝ nyi.”
Nga yo runa a ngame geme, nze okwene o bero rrepung yeme odeke nye.
15Ni se ono vento ayima ka nye manarǝ mana ngamo, nze ma kuru marawa Yeso maya tongara Ogomo Asharri neng rremelo ya a gata. 16Ma ra ma girwǝnǝ a ji Yeso, magon me koka. Ono me ono Samariya ze.
17Yeso ma sanngarra ma go, “Dan ano biturru zen ana ngona nye a ngamo ne? Odangara ano turai miyu? 18Baka eyaze woi dan rai ma tongarra Ogomo Asharri ne se ogeng oginna?” 19Nze Yeso gong ono ogonme, “Wera nga na emekei, o wuna biruwa boi na ngonai a ngamo.”
Ocha ogome se togomo to Ogomo Asharri to ya ra
(Mat 24.23-28,37-41)
20Oye odara tuFarisi nga sangarra Yeso nze nga go, “In shiyu ze togomo to Ogomo Asharri to ya ra?” Nze ma gon nye, “Togomo to ogomo Asharri, tomaran neng eyabo se anan nǝrǝ a ji ni. 21Woi ze ma nu se, ‘Maya guna togena,’ ne ‘Tunini ni.’ Baka togomo to Ogomo Asharri tuya zata akanyi.”
22Yeso gon ano yemasanga ma me, “Ocha ya ra se nyi neng narra o nǝrǝmi odara vento ayimi todara to Vana Ono, nye ze ma nǝrǝ mi ni. 23Ano ya gunan nyi ‘Magina ayina!’ ne ‘Ma nini a nini!’ Tego nyi kuna nye ne, tego itarse nye ne. 24Iya chǝkǝnǝ sakama omalma se oya malmaza a suru owulu onini angame owulu ogina daro ogome se Vana Ono maya kuru ma ra. 25Kamo ogona epegina binja Maya kuna kwaiye dede, ano masano magina, nga ya nyame na me.
26“Sakama nane se ama we ocha Nuhu, nane ze a ya wuza me ocha ogome se mi Vana Ono ya ra. 27Ocha ogomme se ono maze a tuwucu, neng o wuza a nya, nze nga ya teza agalla nye, a ngame odara ogome se Nuhu ma pete okonggo manyi, a ngame a dara ogome se manyi ma chebete ma rai ma woze odangara ano me zal.
28“Nane ze ama wuza ocha Lot, ano maze a tuwucu, nga maze akweja neng urǝsǝ to gogorro, a ya tobirra neng aseseko totitau. 29Nze odara ogome se Lot ma deke Sodom, nze orra neng atantane urun sakama bura a sura sharri, nze a wuza ano ape me zal.
30“Nane ze eya chǝkǝnǝ odara se mi Vana Ono ya wonko.
31“Odara gon me, ono ogeme se maya a tara ogora atogoro tome ayima atitǝu tego ma tuni ma go maya woro me ne. Nane ze ano ogome se mana ngame uja, tego ma kuru atitǝu ne. 32A nyi donza neng owai Lot. 33Zal ano ogome se maya narra odera rroma rrome, maya dera yeme. Zal ano ogome se ma nya rroma rrome, maya morra yeme. 34Miya gosan nyi, atiyǝ a gemme a ya morra An ka repo a tete a gadu vento, Ogomo Asharri maya yeta ano vento ma deke ano vento. 35A ya morra awai repo a ware ida ara vento, Ogomo Asharri maya yita ano vento ma deke ano vento. [36Ano An ka repo nga ya ngame uja, Ogomo Asharri maya yita ano vento ma deke ano vento.”]
37Nze ano yemasanga rrome nga sanngarame, nga go, “Achakura, abaze epegina ya binja?”
Nze ma gon nye, “Ara geme se ekeze yanu, ayemme ze tugǝtapu to ya binja.”
Արդեն Ընտրված.
Luka 17: JER
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
©️2022 Luke Initiative for Scripture Translation