Mata 9
9
Membəl ta nda mahahalɓa
(Mar 2.1-12; Luk 5.17-26)
1Ara nesey, Yesu ka tapata pa kaslkaslah, ka zlaŋ yam mafayakfayak ana saya, ke dey pa wunam tata mazlakava. 2Ara nesey, ac ka hwadana nda mahahalɓa ana ɓa, aŋga manaha fe gədegəde. Masa Yesu a wala makəsparav teceŋ sə, ka gwaɗa nda mahahalɓa sə, gege: «Wat aɗaw, təhaza rav, mebər takaa hay mapəla cay.» 3Anjəkar ndah mesesərekecen ma majawa kad ndana hay mekele faŋga ɓa, ece gweɗ da hwaɗ da hwaɗ, gege: «Nda ana naa a ŋgə sə, a laf Zlavay#Lev 24.16.!» 4Yesu ka səna mawulak yaŋ tec sə, avəda, mafay ana, gege: «Akwa wulak jə masa e teh teh bay dapa rav takwar ara nesey sə, mafay te mey? 5Ma masa gədaŋ dapa aabay te megweɗey sə, wula: “Mebər takaa hay mapəla”, geyey, daha aabay, “Zleftek daɗay”? 6Yaw, e tehey, afa akwar da səna, Wut ta nda aŋga ava gədaŋ ɓa te mepəl mebər ta ndana hay dapa vavara. Ka gwaɗa nda mahahalɓa sə, gege: “Zleftek, kəs gədegəde takaa, daɗ kad a wunam takaa.”» 7Nda sə, pərtakaɗ e zleftek, a daɓa kad a wunam tata. 8Masa miya hay aca wala ara nesey sə, zidaw ke ŋgec mabay, ac ka hahəm Zlav masa ke vec gədaŋ ana ara nesey kad ndana hay.
Yesu a zal Mata
(Mar 2.13-17; Luk 5.27-32)
9Ara masa Yesu e dey, dapa medə tata, ka wala ndana ɓa mezel Mata aŋga manjaha dapa way ta macəkal budaw. Ka gwaɗa, gege: «Cəpiyey» Mata pərtakaɗ! E zleftek a cəpiya. 10Pas ɓa Yesu va ndah masasəraka jene tata aca ndə ɗaf da way ta Mata, ndah macəkala budaw hay mabay va ndah maŋga mebər hay ec ke dek ka ta ndə ɗaf fa slam ana eve eceŋ. 11Farisa hay aca wala sə, ece nəkefec ndah masasəraka jene tata ana, gege: «Nda masasərakakwar a ndə ɗaf fa slam ana ava ndah macəkala budaw va ndah te mebər hay sə, memey?» 12Amaa Yesu masa a cəna ma ana nesey sə, gege: «Ndah masa ac werwer sə, ma tec vara daɓtar aabay, say ndah gwabay. 13Madaɗay ma ta sasərak masəna ma da yaŋ ma masa e gweɗ, gege: “Ya wal sə, metekweney, bəna maŋgə kwakwas bay”, afa ye ke dek ka ta zal ndah maŋgana jə mambəla ana hay sə, aabay, amaa ka ta zal ndah maŋga jə mambəla ana aabay.»
Manək ma da yaŋ dalyama, jə mava va waya
(Mar 2.18-22; Luk 5.33-39)
14Ara nesey, ndah masasəraka jene ta Zaŋ Baatis ac ka ŋgucafa vaw Yesu, ac ka nəkafa, gege: «Andaw va Farisa hay anda ŋgə dalyama, amaa ta ndah masasəraka jene takaa aca ŋgiya aabay sə, mafay te mey?» 15Yesu ke vehecen, gege: «Ndah mazala kad pa macunam ta madəmay, aca zlafa manjah dapa matakwa pas masa makəsa madəmay ana aŋga verec hel geyey? Amaa pas ana hay ec te dekey, masa ac te kəsecen makəsa madəmay ana avəda, dapa pas ana hay ŋgesey, ac te ŋgə dalyama.»
16Yaw, ndana maɗapa rəkwat waya kad fa rəkwat mava sə, aabay, afa rəkwat waya maɗapa sə, a ŋgara rəkwat mava sə, avəda mahwalhwala ana. 17Maɗah wuzam dedeɗek pe kwenekwene mava sə, aabay. Daha aabay sə, kwenekwene hay aca təhata, wuzam ana a cəhata va kwenekwene ana hay ece zəceŋ. Da lada sə, maɗah wuzam dedeɗek sə, pe kwenekwene hay waya, ara nesey, wuzam va kwenekwene ana hay ec te nes aabay.
Membəl ta ŋgwaz magəja bembez va mepərek te dəm ta Jayrus
(Mar 5.21-43; Luk 8.40-56)
18Masa Yesu e gweɗec ara nesey, nda mazlakava te Zuwef hay ɓa ka ŋgucafa vaw, ka kakəradana, ke gweɗ, gege: «Dəm aɗaw ɓa ka məcata təlam nesey, dekey ta pafa ha, ara nesey, a ta njahata eve ndey.» 19Yesu pərtakaɗ! E zleftek, ka cəp nda ana ava ndah masasəraka jene tata. 20Dapa ŋgesey ana, ŋgwaz ɓa faŋga, a sə marga ta magajə bembez mavay kuraw dapa yaŋ ana ecew. Ka ŋgucafa vaw Yesu jaka ava dəɓa, ka ɓəla ma ta rəkwat tata. 21Ka wulakaw, gege: «Daha ya ka ŋgat mapafa ha ma ta rəkwat tata war sə, ya ta mbəlata.» 22Amaa Yesu pəla ka ŋgwad ma kad ava dəɓa, ka wala, ka gwaɗa, gege: «Təhaza rav dəm aɗaw, makəsparav takaa ka mbəlakaa avəda.» Faŋga faŋga ana, ŋgwaz sə, ka mbəlata. 23Mahusa tata a way ta mazlakava te Zuwef hay sə, ka wala ndah mafəta slərem hay va megərev ta miya, gege: 24«Mahway fana, dəm ana ka məc aabay, a njawaŋ. Ara nesey, ndah ana aca sasarafa. 25Masa ac ke mbesekec miya kad a vəda cay sə, Yesu ke sehw kad way ana, ka təhaz dəm ana pa ha. Dəm sə, pərak! A pərakata.» 26Labara ana, ka kwakwacata dapa vavara ana fakwanay.
Membəl ta mahazlaw hay ecew
27Masa Yesu a daɓa faŋga, mahazlaw hay ecew ɓa aca cəpiya ava macə lalaw, gege: «Ŋgafandaw metekweney, wut te Deevet.» 28Mahusa te Yesu a wunam, mahazlaw hay ecew sə, ac ka ŋgucafa vaw. Yesu ke nəkefec, gege: «Akwar kəsaw pa rav takwar jə masa akwa nəkiya nesey sə, ya zlafa maŋgana avəda geyey?» Ac ka vahan, gege: «Aŋga, Bay Mazlakava.» 29Ara nesey, Yesu ka pafa ha ndey teceŋ, gege: «E de ŋgey ara masa akwar ta kəsiya.» 30Ndey tec pəlac ka wunata. Yesu ke ɓeɓəcec, gege: «Mapə leŋgesl! A lada kwa ndana da səna bay!» 31Amaa mahazlaw hay sə, aca ŋgəla vaw kusetke fa slam ana, aca kar maɗay ana dapa vavara ana fakwanay.
Membəl ta nda ɓaɓa masa aŋga ava damkwaw
(Luk 11.14-15)
32Dapa masa Yesu va ndah masasəraka jene tata ece də kad a vəda sə, ndana hay ac ka hwadana nda ɓaɓa. 33Ava dəɓa ta mambas ta damkwaw, nda ɓaɓa ana ka zlar megweɗey. Ara nesey, miya hay ec ke rəzleceŋ, ec ke gweɗ, gege: «Jeŋ ana ara na kwa andə ka walakwaɗ dapa vavara te Isreyel hay aabay.» 34Amaa ta Farisa hay ec ke gweɗ, gege: «A mbas damkwaw hay sə, ava gədaŋ ta bay ta damkwaw ana hay.»
Yesu va miya hay masa gwala jene tec aabay
(Mar 6.6b, 34; Luk 10.2)
35Yesu ka ŋgway dapa berne hay fakwanay va wunam hay dapa səɓak. Dərŋga sə, ke sesərekec ndana hay dapa Way ta macə mbahw te Zuwef hay, ka bəzad Labara mambəla ana da yaŋ Meŋgə bay ta Zlavay. Ka mbəl ndana hay dapa mehecey hay fakwanay va ndah masa gəva ta vaw hay maməca fakwanay. 36Masa Yesu a wala miya hay sə, metekwen ka ŋgana fe eceŋ, afa ec ke yəveceŋ, gədaŋ tec ɓasabay ara təmak hay masa gwala jene tec aabay. 37Ke gweɗec ndah masasəraka jene tata, gege: «Jene hay ke ŋgə de ley mabay, amaa ndah te meŋgek kad a wunam pahata. 38Macana mbahw kad nda masa aca ŋgan jeŋ ana kad aŋga, e de zlərek ndah te mezlər hay ke te ŋgek jene hay tata.»
Արդեն Ընտրված.
Mata 9: CUVnt
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2022 CABTAL