Mata 10
10
Mezler ta ndah masasəraka jene kuraw dapa yaŋ ana ecew
(Mar 3.16-19; Luk 6.14-16)
1Yesu ke zelec ndah masasəraka jene tata kuraw dapa yaŋ ana ecew, ke vec gədaŋ da yaŋ mesfen hay maləza, afa ec de mbeseceŋ, ec de mbəlec ndah gwabay fakwanay va ndah masa gəva ta vaw maməca fakwanay.
2Mawala mezel ta maslaŋ hay kuraw dapa yaŋ ana ecew: Macaaca ana, Simaŋw, nda mezel Piyer va Endəre malamaŋ, Zak wut te Zebede va malamaŋ Zaŋ, 3Fəlep va Bartelemi, Tumas va Mata nda macəkala budaw, Zak wut ta Alfey va Taadey, 4Simaŋw#10.4 Simaŋw Nda ana nesey, aŋga nda Zuwef ana, aŋga deveŋ gəva ta ndah malaləka vavara te Zuwef hay fa ndah maslaayam hay masa ece dey ka ta dəm vavara teceŋ., nda masa a wal wunam tata elehey va Zudas Iskariyawt, nda ana ŋgesey, ma ta vana Yesu pa ha ta maslagəra tata hay.
(Mar 6.7-11; Luk 9.2-5; Luk 10.3-12)
5Maslaŋ ana hay nesey, Yesu e zlerdec kad pe mezlərey ava mamənak hay ara nesey: «Akwar ta kəs cəv te medə kad vara ndah masa Zuwef hay bay bay. Akwar te sehw pa wunam hay mazlakava ta Samariya hay bay. 6Sesəker madaɗ sə, kad vara Isreyel hay masa ac ke zeceŋ ara təmak hay. 7Dapa cəvey, megweɗec kad ndana hay: “Meŋgə bay ta Zlav da baymaləvaŋ hay sə, aŋga hukw cay”. 8Membəlec ndah gwabay, mepərekec ndah maməca, mepenec meskwelme hay, membesec damkwaw hay. Akwar ka ŋgataw taambəla, mavaw taambəla may.»
9Akwar ta kəs kwa gənaɓ, kwa səlay, kwa yam ta səlay pe jiibe bay, 10kwa bakatar ta maŋgway, kwa rəkwat hay ecew, kwa tahkar hay va gada bay, afa nda te mezlərey sə, aŋga eve cəv ta maŋgat jə ta mandə tata. 11Dapa berne daha aabay, dapa wunam wuje masa akwa husa pa, manəkaw, afa akwar da səna nda masa aŋga mak ta makəsakwar, manjahay faŋga kasl pa pas masa akwa wal madaɓa. 12Daha akwar te sehw kad way ta ndana sə, megweɗefeceŋ. 13Daha ndah da way ana ac mak ta maŋgat metehey ana sə, a lada meteh takwar ana de husefeceŋ, amaa daha aca husa bay sə, a lada meteh takwar ana da vahafakwar. 14Daha ac ka kəsakwar aabay, ac ka cənakwaɗ ma aabay, dapa madaɓa takwar da way ana, daha aabay dapa wunam ana sə, masləva melbelbe fe sek takwar avəda. 15Ya gwaɗakwar, pas ta matəɗ ma sə, matəɗ ma ta vavara ta Sawduma va ta Gwamara#10.15 Sawduma va ta Gwamara Wunam mazlakava ana hay nesey sə, Zlav ke pəlehec avəda cuweeney zleezle, mafay te mebər tec elehey. Mzj 18 va 19. sə, a ta ŋgata afəcaka da yaŋ matəɗ ma ta wunam ana ŋgesey.
Maslaf marga hay masa ec te ŋgey
(Mar 13.9-13; Luk 12.11-12; 21.12-19)
16Mawala, yey sə, ya zlardakwar ara təmak hay kad pa taɓa ta gəda te ley hay. Ara nesey, manjah wewer hay ara zezekw hay va makwaɗma hay ara mahwɗagwam hay.
17Map leŋgesl fa ndana hay, afa ac ta təhazakwar kad pa ha ta ndah mavən ma hay#10.17 Ndah mavən ma hay Nesey ndah maca mamənak te Zuwef hay 23 mapala ka ta vən ma ta ndana hay dapa taɓa teceŋ., ac da kəlapakwar dapa way hay ta macə mbahw te Zuwef hay. 18Ac ta hwadakwar kad fəma te gwevernel hay va fəma ta bay hay mafay taaɗaw. Faŋga akwar ta tə yaw fəma teceŋ va fəma ta ndah masa Zuwef hay bay. 19Daha ac ka hwadaɗakwar pa slam ta mambaɗ ma hay sə, akwar ta dəŋgazla yaŋ masa akwar te gweɗ gwagumaw daha akwar te gweɗek mey sə, bay, afa ma hay masa akwar ta gwaɗiya sə, akwar ta ŋgatiya faŋga faŋga ana ŋgesey, 20afa me te gweɗek sə, akwar bay, Mesfen ta Papaŋ takwar e te gweɗ dapa akwar. 21Dapa ŋgesey ana, nda amta a ta vana malamaŋ tec hay avəda ke te kəɗ ka macəhwandaw. Papaŋ ta wat a ta vana wudiya avəda ara aŋga ana may. Wudeh may, ec te beŋgeɗefec yaŋ papaŋ tec hay, ac ta vana Papaŋ tec hay avəda ke te kəɗey. 22Ndana hay fakwanay ac ta walakwar fe ndey bay mafay te mezel taaɗaw. Amaa nda masa ka ɓəsa avəda kasl pe memeɗey ana sə, a ta mbəlata. 23Daha aca mbasakwar dapa wunam leŋgeɗey, madaɓa pa wunam mekele. Ya gwaɗakwar, akwar ta zlafa matulaka wunam hay mazlakava te Isreyel wagaa Wut ta nda e te vehekey sə, aabay. 24Nda masasəraka jene a fəna nda masasərakan jene aabay. Nda maŋga mezlərey, a fəna bay ta way tata aabay may. 25Ta nda masasəraka jene, dapa rav tata sə, e de tər ara nda masasərakan jene. Ta nda maŋga mezlərey, dapa rav tata sə, e de tər ara bay ta way tata. Daha aca zal bay ta way, Belzebul sə, naa ac ta zal ndah da hwaɗ ta way tata mafəna ana aabay ŋgəɗa geyey?
Akwar te lel bay
(Mar 8.38; Luk 9.26; 12.2-9)
26Akwar te lel fa ndana hay bay. Jene maraɓa masa e te wel bay sə, aabay. Asaya, jə masa ndana a səniya bay e te sən bay sə, aabay. 27Masa ya gwaɗakwar dapa ləvaŋ nesey sə, magwaɗaw ta yaŋ pas. Masa akwa cəna dapa masasak ma sə, magwaɗaw ava gədaŋ da yaŋ way hay. 28Akwar te lel fa ndah makəɗa vaw bay, amaa aca zlafa makəɗa mesfen bay. Sesəker melel sə, fa nda masa a ta zana mesfeney va vaw takwar avəda dapa kwakwaw masa a ta məc aabay. 29Aca zlafa mahusamda ɗiyak titey hay ecew fa səlay amta aabay geyey? Anjəkar, kwa ɗiyak amta masa e te kezlek kad fa vara ka ta məcay daha Papaŋ takwar ta wayiya bay sə, aabay. 30Takwar, kwa ŋgwec ta yaŋ takwar hay, ac maŋgəfa fakwanay. 31Akwa ŋgə zidaw bay, akwar sə, akwar ka fəna ɗiyak ana hay fakwanay eve mehehəm aabay geyey? 32Mafay ana, kwa waawa masa a tə yaw fəma ta ndana hay, a səniyey sə, ŋgesey, yey may, ya ta tə yaw da yaŋ ana fəma ta Papa da baymaləvaŋ, 33amaa kwa waawa masa e te cefiyey ma fəma ta ndana hay, ya ta cafa ma fəma ta Papa da baymaləvaŋ may.
Metehey va vəram
(Luk 12.51-53)
34«Akwar ta kəsiya masa ye hwedek meteh kad pa vavara sə, ara na bay. Ye ke dek te mehwedek metehey sə, aabay, amaa vəram. 35Aŋga, ye dek sə, ka ta vən ndana ava papaŋ, dem ava mamaŋ, ŋgwaz ta wat ava mamaŋ ta mawula. 36Maslagəra ta ndana sə, ndah da hwaɗ ta way tata ana.»
Macəp Yesu
(Mar 8.34-35; Luk 14.26-27; 9.23-24)
37«Nda masa a wal papaŋ daha aabay mamaŋ ke fəniyey sə, a husa manjah ka nda aɗaw bay. Nda masa a wal wudiya daha aabay daŋgwaya ke fəniyey sə, a husa manjah ka nda aɗaw bay. 38Nda masa a zlafa mazaɓ hap tata mazləlawa va mecəpiyey bay sə, ŋgesey, a husa manjah ka nda aɗaw bay. 39Nda masa a wal ma ta raɓaɗ mesfen tata ha sə, a zana avəda. Nda mazana mesfen tata mafay taaɗaw sə, a ta ŋgata vəda.»
Makəsa nda
(Mar 9.37, 41; Luk 9.48; 10.16; Zaŋ 13.20)
40«Nda masa a kəsakwar sə, a kəs ŋga yey ana. Nda mekəsiyey, a kəs ŋgesey, nda mezlərekiyey. 41Nda makəsa nda mehwedek ma afa aŋga nda mehwedek ma sə, a ta ŋgat meyəv tata ara ta nda mehwedek ma ana. Ara aŋga ana, nda makəsa nda maŋga mezlər ara aŋga ana, afa aŋga nda maŋga mezlər ara aŋga ana sə, a ta ŋgat meyəv tata ara ta nda maŋga mezlər ara aŋga ana may. 42Kwa waawa mavana yam matasla kusetke pa gwagway ta yam amta kad nda kusetke ana amta, afa aŋga nda masasəraka jene, ya gwaɗakwar, a ta zana meyəv tata sə, aabay.»
Արդեն Ընտրված.
Mata 10: CUVnt
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2022 CABTAL