Luke 17
17
Seghleghqelleqlu Seghevutilleqlu
1Jesus‑em maligsaaghteni pikii, “Seghleghqestinaqutkellghet quunpeng piyaghqaagut. Iwernga seghleghwaaghunaqnguuq taana seghleghqestinaqutkilghii yugneng. 2Taam yugem seghleghqestekagu naliit mekestaaghhaat ugpeqingalghiit whangamneng, itagnaghnayaghtuq yuget qaamqaghfikluku uyghagllagmeng uyaqghwakun miluusaqumegteggu kelliimun. 3Enkaam kelengalusi! Seghleghqesnaqutkegpenaki yuget.
“Ugpeqaalguten seghleghqegkan, aghyuughnaken. Enkaam avuteghqelluni seghleghqennaniqan, seghevunnaken. 4Ataasimi aghneghmi maaghraghvinlegneng seghletun pikangaten, tagiighaataqanllu elpenun maaghraghvinlegneng whaten pimaghmi, ‘Qivghukepigtamken seghletun piighaatallemneng’, seghevutepestaaghyaghqaqan.”
Ugpeqilleq
5Apostle‑et Ataneq pikaat, “Ugpeqilleghtughtaghaqaghqut!” 6Atanghem pikii, “Ugpeqillelguyaqufsi mustard‑em piitutangatun angkalghiimeng, una mulberry uqfik whaten pikufsigu, ‘Akughtuumaghpek iikluten, piisaghtaa kelliikun’, qaatkennayaghiisi.”
Qepghaghtem Qepghaghyaghqaa
7“Nalighsi qepghaghtelguyaqumi piitesighaghvigmi nunamun laagwaaghtemeng, nalighmeng penniighmeng aflengakikayugmeng, uteghniqan qepghaghvigmineng pinayaghsiguu, ‘Esnevaghaghlluten, neghi’? 8Nakaa! Itupill whaten pilleqan, ‘Yataaghqigu neghyaghqaqa. Simightughluten kepsiiqunga neghyaghqamneng, meghyaghqamneng. Neneghmeng taaqegkuma, neghumaghpek, meghumaghpek pilghaaten.’ 9Umiilgem iqamsiqayugviknaanghitaa qepghaghteni qayughllak taawaraaghinaq qelellghatun piiqelghii. 10Elpesillu tawatetusi. Apeghiighumakufsiki qamaglluki Kiyaghneghem qelghutkii, whaten pillequsi, ‘Qepghaghtenginaagukut; taawaraaghinaq qelghutkaghhiinaat piiqaput.’”
Jesus‑em Naallghuskangi Qulaghyaget Leprosy‑lget
11Jesus Jerusalem‑emun pitkelluku, igleghtekaq akulegkenkun Samaria‑nkuk Galilee‑nkuk. 12Nengiighhaghmun kaataquqlu, qulaghyaget yuget leprosy‑lget nallaqaat. Uyavaqaanlluteng 13akilghuukat, “Jesus! Yuguniiq! Nangllegyagutaghtikut!” 14Esghaghyamiki pikii, “Aglaghtek priest‑enun yuvghiighesqellusi.” Igleghsimaluteng naallghutkat, ukmangiitkat leprosy‑meggneng. 15Taagken ataasim esghaghluku naallghutelleni, Jesus‑mun uteghlluni, iglagtuluni usuqegkaa Kiyaghneq. 16Jesus‑em itegaan sivungakun sekelluni nunamun iqamsiqayugvikegkaa. Yuuk taana Samaria‑ghmiinguftuq. 17Taagken Jesus pikaq, “Qulanguyaghtut naallghutkanka. Naaki estamaneng inglulget yuget? 18Una nakumii, ellnginaawaa uteghlluni usuqiyaghtulghii Kiyaghneghmun?” 19Taagken Jesus‑em pikaa, “Nekevluten ighleghten, ugpeqilleghpek naallghutestaaten.”
Kiyaghneghem Ataneghpagullghan Tagillgha
20Ilangita Pharisees‑et aaptekaat Jesus qakun Ataneghpagullgha Kiyaghneghem tagiyaghqaatanga. Kiimsiqii, “Ataneghpagullgha Kiyaghneghem taginguuq iwernga yuget esghaghyaghqaqenghitaat qayughllak nalluniighusiilnguq. 21Enkaam kina alngunak whaten pinaanghituq, ‘Ii‑i, whaantuq!’ nalighmeng ‘Esgha tazigna!’ qayughllak Ataneghpagullgha Kiyaghneghem ilugpesinituq.”
22Taagken maligsaaghteni pikii, “Ukegkuni aghneghni tagilghiini whangamnisugllagllequsi, Ighneghani Yugem, waran ataasimun aghneghmun, iwernga taana aghneq esghaghnaanghitaghsi. 23Yuget ungipaalleqiisi, ‘Ii‑i, esgha tazigna Ighnegha Yugem!’ nalighmeng ‘Ii‑i, whaantuq!’ Iwernga takugpenaki, maligtegpenaki. 24Katam nighugpaguutellghem nighugtellghatun qilaga inglunganeng agavek inglunganun, tawatesaghqaaguq Ighnegha Yugem uteghniqumi nunamun. 25Iwernga sivukluni, Ighnegha Yugem uglalghiimeng ikfiqepestaaghyaghqaaguq, ighsaksaghqaqaatlu maaten kiyaghlleghhiit yuget. 26Sivungani uteghnilleghqaan Ighneghan Yugem, yuget kiyaghtaallghit tawatesaghqaagut yuget kiyaghtellghistun taagani aghneghni Noah kiyaghtengnguluku. 27Yuget neghaqluteng, meghaqluteng, nengughutaqluteng, aangꞌghutiiqluteng pikaagut kenlanga Noah‑m ark‑mun itellghanun. Taagken uleveghllagem tuququqaqii qamagtengngwaaghluki. 28Yuget kiyaghtaallghit tawatesaghqaagut yuget kiyaghtellghistun taagani aghneghni Lot kiyaghtengnguluku. Yuget neghaqluteng, meghaqluteng, tukfighiiqluteng, akikiiqluteng, piitesighaghaqluteng, nekeftiiqluteng pikaagut. 29Iwernga tawani aghneghmi Lot aghulaqsan Sodom‑emeng, qilagmeng eslallugughtekaaguq keneghmengllu sulphur‑mengllu, enkaam tuququqaqii qamagtengngwaaghluki.
30“Tawani aghneghmi Ighnegha Yugem aliightekan, yuget kiyaghtaallghat almesiqsaghqaqaa yuget kiyaghtaalqesaqangistun sivunghani. 31Taam aghneghani, yuuk mangtegham qaaynganilnguq ukifqaami pilghaaq mangteghami ilunganun saghyaqunaluni. Tawateghpigaq piitesighaghvigmelnguq mangteghaminun pifqaami pilghaaq. 32Neqamikiteggu sakaatanga Lot‑em nulighha! 33Enkaam kitum alngunak peggneghilkumigu unguvalleni Ataneghmun, iflayaghqaqaa. Iwernga kitum alngunak pegtekumigu unguvalleni Ataneghmun, unguvallengepiigllequq. 34Ungipaatamsi, Ighnegha Yugem tagikan, tawani unugmi, maalghuk qavaallequk ataasimi qavaghvigmi. Aallgha tugulleqaa, ilanga uneglleqaa. 35Maalghuk aghnak qerngaagmek kagimtillequk grain‑meng. Aallgha tugulleqaa, ilanga uneglleqaa. 36Maalghuk yugek piitesighaghvigmellequk. Aallgha tugulleqaa, ilanga uneglleqaa.”
37Maligsaaghtet aaptekaat, “Ataneq, nani tamaakut piyaghqaagwat?”
Jesus‑em kiimsiqii, “Nani alngunak kemegkwaalgukan qawaagpaget qerngughfikelleqaat.”
Արդեն Ընտրված.
Luke 17: ess
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2018, Wycliffe Bible Translators, Inc. All rights reserved.