Juan 6
6
Jesusba 5.000 panuumaa kobiad̶a
Mateo 14:13-21; Marcos 6:30-44; Lucas 9:10-17
1Mau maad̶akare Jesús Galilea mar kĩaraa wãsii. Mau mar maud̶e Tiberias abadau.#6:1 Galilea. Mau mar Antiguo Testamentod̶e «Quinéret» maebʉrã «Cineret» trʉ̃ jarabachid̶au. Maud̶e b̶ʉ naka kub̶uu: Genesaret. Lucas 5:1. 2Jesusba ẽbẽrarãba ne poyaa waud̶akau wau b̶uud̶eeba ẽpermo nuree aribiabiabachii. Ẽbẽrarã ãreaba mau unu panasiid̶eeba ichi baara ãrea wãsid̶au. 3Maabae Jesús ichi baara nibabadaurã ome ead̶aa wãd̶aped̶a jeed̶a akʉ paneesid̶au. 4Mau ewarid̶e judiorã Pascua ewari ʉ̃rʉ ba b̶uasii. 5Maud̶e Jesusba ẽbẽrarã ãrea ichimaa needuu unusiid̶e, Felipemaa naka id̶isii:
—Pan ¿sama nedod̶aima joma naarã ẽbẽrarã kobiad̶ai baita?
6Jesusba kãare waui b̶uu kuitaa b̶uasii. Maud̶eeba maka jarasii Felipeba saka panaui kuitaayua. 7Felipeba panausii:
—Ab̶a año baidia trajad̶a bare paaped̶aad̶aba poyaa pan nedod̶aabai b̶uu, ẽbẽrarã ab̶aab̶aamaa b̶aꞌãra bid̶a kobiad̶ai baita.
8Maud̶e chi Jesús baara nibabarii Andrés, Simón Pedro ãbaba naka jarasii:
9—Warr nama b̶uuba cebada waud̶a pan jua ab̶a uru b̶uu maud̶e b̶eda ome uru b̶uu. Maamina ẽbẽrarã ãrea duanuu ome mau ¿sakaima?
10Aria sirua id̶aa b̶uasii. Maud̶eeba Jesusba jarasii:
—Jomaurãmaa jarásturu siruad̶e akʉ paneed̶amera.
Ara makʉd̶e jeed̶a akʉ duaneesid̶au. Maarã 5.000 mukĩrarã panuka duanasii. 11Jesusba pan juad̶e adauped̶a Dachi Akõremaa ichíturu kid̶ibai asii. Maabae ichi baara nibabadaurãmaa jarasii ẽbẽrarãmaa dead̶akad̶amera. B̶eda sid̶a ara mau kĩra wausii jomaurãba ãchi kʉ̃ria kod̶amera. 12Jomaurãba jãwaa kosid̶aud̶e Jesusba ichi baara nibabadaurãmaa jarakuasii:
—Chi ʉ̃rʉ b̶eed̶a joma araa pésturu ab̶a b̶istĩika bid̶a jirakuarãad̶amera.
13Ara makʉd̶e araa pesid̶au. 12 jab̶ara waabirubisid̶au mau pan cebada waud̶a ʉ̃rʉ b̶eed̶aba. 14Chi Jesusba ẽbẽrarãba ne poyaa waud̶akau waud̶a unusid̶aud̶e, ẽbẽrarãba naka jarasid̶au:
—Biawãra nau Dachi Akõre baita berreabarii mechiu nii, chi nau iujãad̶aa neei b̶uad̶a.#Deuteronomio 18:15-18.
15Maamina Jesusba kuitaasii ẽbẽrarãba ichi rey babid̶ai kʉ̃ria panuu. Maud̶eeba waya ichi du ab̶a ead̶e ʉtaa wãsii.
Jesús bania ʉ̃rʉ nibad̶a
Mateo 14:22-27; Marcos 6:45-52
16Kiusiid̶e Jesús baara nibabadaurã mar iikaad̶aa wãsid̶au. 17Jãbad̶e atausid̶aud̶e Jesús ãchimaa wabid̶a neewẽa b̶uasii. Maamina waa kĩaraa wã kopaneesid̶au Capernaum puurud̶aa wãd̶ai baita. Maka b̶uud̶e ãrea pãriu kob̶eesii. 18Maud̶e ãrea pũatu kob̶eesiid̶eeba chi mar ʉtʉ ʉ̃rape wã kob̶eesii. 19Mar kẽsa 5 maebʉrã 6 kilómetro baaduud̶e Jesús unusid̶au bania ʉ̃rʉ tʉa uruu jãba kaita. Ãchimaa uruud̶eeba ãrea perasid̶au. 20Maamina Jesusba jarasii:
—¡Mʉʉbʉ! ¡Perarã́sturu!
21Maud̶e ichi jãbad̶e kĩrajʉʉ irsibisid̶au. Ara makʉd̶e ãchi wãaduumaa neesid̶au.#6:21 Mau griego bed̶ead̶e nau sid̶a jara b̶uu «Maud̶e ichi jãbad̶e adoe kʉ̃ria panuud̶e ãchi wãaduumaa neesid̶au».
Ẽbẽrarãba Jesús jʉrʉped̶aad̶a
22Chi nuree wa kĩare paneesid̶au. Mau norema maarãba kuitaasid̶au chi Jesús baara nibabadaurã ãchi du ab̶a jãbad̶e wãsid̶au. Unusid̶au jãba ab̶a aria nub̶uasii maud̶e Jesús ãchi baara wãabasii. 23Maud̶e jãbarã maucha Tiberias puurud̶ebena topana chesid̶au Dachi Mechiuba Dachi Akõremaa bichíturu kid̶ibai aped̶a ẽbẽrarãmaa pan kobiad̶amaa. 24Ẽbẽrarãba kuitaasid̶au Jesús, ichi baara nibabadaurã sid̶a aria panuuwãe. Maud̶eeba ãchi mau jãbad̶e ataukuad̶aped̶a Capernaum puurud̶aa Jesús jʉrʉd̶e wãsid̶au. 25Jesús mar kĩare nii unusid̶aud̶e id̶isid̶au:
—Jaradeabarii, bichi ¿sakaed̶e nama neesma?
26Jesusba panausii:
—Mʉʉba biawãra jaraaruu: machiba kauwa ũrid̶awẽa panuu mʉʉba ẽbẽrarãba ne poyaa waud̶akau waud̶aba kuitaabi b̶uu. Bari Mʉ jʉrʉ panuu pan b̶i jãwaaduud̶aa kosid̶aud̶eeba. 27Trajarã́sturu chiko b̶eraabarii nedod̶ai baita. Maumaarã trajásturu chi Dachi Akõre ome ewaricha chokae b̶uabibarii chiko nedod̶ai baita. Mau mʉ, chi Ẽbẽra Ba B̶uad̶aba deai. Dachi Akõreba mʉ mau baita b̶usii.
28Maud̶eeba ãchiba id̶isid̶au:
—Daiba ¿kãare waud̶aima Dachi Akõre traju waud̶ai baita?
29Dachi Akõreba waubi b̶uu traju naubʉ: mʉ, chi ichiba bʉid̶ad̶e ijãad̶ai panuu.
30-31Maud̶eeba ãchiba Jesusmaa id̶isid̶au:
—¿Bichiba daimaa kãare unubiaima bichi bed̶ea ijãad̶amera? Dachi nabẽrarãba drua sirua wãꞌãe b̶uud̶e maná kosid̶au. Dachi Akõre bed̶ead̶e jara b̶uu: “Ichiba bajãad̶ebena pan deasii ãchiba kod̶amera”.#Éxodo 16:4,15; Salmos 78:24; Nehemías 9:15. ¿Bichiba kãare sãaima?
32Maud̶e Jesusba panausii:
—Mʉʉba biawãra jaraaruu, mau bajãad̶ebena pan Moisesba machimaa deabasii. Mʉ Chacháburu deasii. Mau awara bajãad̶ebena chi biawãra pan machimaa dea b̶uu. 33Mau Dachi Akõreba deabarii pan bajãad̶ebena need̶aba chi nau iujãad̶ebenarã chokae b̶uabiabarii.#6:33 Chokae b̶uabiabarii. Juanba jara b̶uu dachiba Jesusd̶e ijãaduubʉrã ewaricha chokae nuread̶ai, ichi Jauri uru nuread̶ai dachi aid̶ai baita maud̶e ichi bed̶ea uru nuread̶ai chi biawãra bed̶ea kuitaad̶ai baita.
34Ãchiba jarasid̶au:
—Dai Mechiu, mau pan daimaa ewaricha dea b̶uase.
35Jesusba jarasii:
—Mau Mʉʉbʉ. Mʉ chi chokae b̶uabibarii panbʉ. Maud̶eeba chi mʉʉmaa neeruu waa jarrbisia b̶uabai maud̶e chi mʉʉd̶e ijãa b̶uu waa obisia b̶uabai. 36Maamina mʉʉba jarad̶a kĩra, mʉʉba ẽbẽrarãba ne poyaa waud̶akau waud̶a machiba unusid̶amina ijãad̶akau. 37Chi mʉ Chachaba mʉʉmaa dea b̶uu ẽbẽrarã mʉʉmaa need̶ai; maarã duabʉikaabai. 38Mʉ bajãad̶ebena need̶awãe michi kʉ̃ria waui baita. Maumaarã neesii mʉ bʉid̶aba kʉ̃ria b̶uu waui baita. 39Mʉ bʉid̶aba kʉ̃ria b̶uu ichiba mʉʉmaa dead̶arã ab̶a bid̶a wãꞌãerãad̶amera. Kʉ̃ria b̶uu nau baribai ewarid̶e mʉʉba joma ãchi chokae jiradubiai. 40Mʉ Chachaba biawãra kʉ̃ria b̶uu ẽbẽrarãba mʉ ichi Warr kuitaad̶aped̶a ijãad̶ai ichi ome ewaricha chokae nuread̶amera. Makaburu mʉʉba ãchi nau baribai ewarid̶e chokae jiradubiai.
41Jesusba «mʉ chi pan bajãad̶ebena need̶a» asiid̶eeba, chi judiorã aria duanuurãba ichi ʉ̃rʉbena kachirua berreasid̶au. 42Naka jarasid̶au:
—¿Nau Jesús, José warrwãeka? Chi akõre, chi nawe dachiba unubadau. ¿Ichiba sakãe bajãad̶ebena neesii a b̶uma?
43Maka panuud̶e Jesusba jarasii:
—Waa kachirua berrearã́sturu. 44Ab̶au bid̶a poyaa mʉʉd̶e ijãabai mʉ Chacha, chi mʉ bʉid̶aba ichi mʉʉmaa eneewẽebʉrã. Maamina mʉ Chachaba eneeruubʉrã nau iujãa baribai ewarid̶e mau ẽbẽra mʉʉba chokae jiradubii. 45Dachi Akõre baita berreabadaurã kartad̶e naka jara b̶uu: “Dachi Akõréburu jomaurãmaa jaradeai”.#Isaías 54:13. Maka barikiuba mʉ Chacha bed̶ea ũriped̶a ichi ʉ̃rʉbena kuitaaped̶a mʉʉd̶e ijãad̶e neei.
46Mauba jarawẽa b̶uu ab̶aba Dachi Akõre unusii. Ab̶aburu mʉʉba Dachi Akõre unubarii ichimarebena neesiid̶eeba.
47»Mʉʉba biawãra jaraaruu: ẽbẽraba mʉʉd̶e ijãaruubʉrã Dachi Akõre ome ewaricha chokae b̶uai uru b̶uai. 48Mʉ chi panbʉ, chi chokae b̶uabibarii. 49Machi nabẽraed̶ebenarãba drua sirua wãꞌãe b̶uud̶e maná kosid̶amina biusid̶au. 50Maamina barikiuba nau pan bajãad̶ebena need̶a kooruubʉrã biubai. 51Mʉ chi panbʉ, chi chokae b̶uabibarii, chi bajãad̶ebena need̶a. Barikiuba mau pan kooruubʉrã ewaricha chokae b̶uai. Chi mʉʉba dea b̶uu pan mʉ kakuabʉ. Mʉʉba mʉ kakua deai, mauba ẽbẽrarã chokae nuread̶amera.
52Maka b̶uud̶e judiorã chiya kĩru berrea bara b̶eesii:
—¿Saka ichiba ichi kakua dachimaa kobiaima?
53Maud̶e Jesusba jarasii:
—Mʉʉba biawãra jaraaruu: machiba mʉ, chi Ẽbẽra Ba B̶uad̶a kod̶awẽebʉrã maud̶e mʉ oa dod̶awẽebʉrã, chokae panad̶aabai. 54-55Mʉ kakua chi biawãra chikobʉ. Mʉ oa chi biawãra dobadaubʉ. Maud̶eeba chi mʉ kooruu#6:54-55 Chi mʉ kooruu. Griego bed̶ead̶e naka b̶ʉ kub̶uu: mʉ kiuru kooruu. maud̶e chi mʉ oa dooruu Dachi Akõre ome ewaricha chokae b̶uai. Nau iujãa baribai ewarid̶e mʉʉba mau ẽbẽra chokae jiradubii.
56Chi mʉ kooruu maud̶e chi mʉ oa dooruu mʉ ome b̶uu maud̶e mʉ ichi ome b̶uu. 57Mʉ Chacha chokae b̶uabariiba mʉ bʉisii. Ara mau kĩra chi mʉ kooruu mʉʉd̶eeba chokae b̶uai. 58Mʉ bajãad̶ebena need̶a panbʉ. Machi nabẽraed̶ebenarãba maná kobachid̶amina joma biusid̶au. Maamina mʉ maná kĩra niiwãe. Chi nau pan ko b̶uu ewaricha chokae b̶uai.
59Jesusba joma mau Capernaumd̶e jaradeasii judiorã araa ãbua imibadau ded̶e.
Dachi Akõre ome ewaricha chokae panad̶ai ʉ̃rʉbena
60Mau jaradea b̶uu ũrisid̶aud̶e ãrea Jesús baara nureeba jarasid̶au: «Jãuba jarad̶a chaarea b̶uu. ¿Kaiba poyaa ijãaima?»
61Jesusba kuitaasii ichiba jaradead̶a ʉ̃rʉbena ãchi maka kachirua berrea panuu. Maud̶eeba jarasii:
—Machimaarã, mʉʉba jaradead̶a ¿chaarea b̶uka?
62Maka b̶uubʉrã machiba mʉ, chi Ẽbẽra Ba B̶uad̶a chi naa b̶uad̶amaa ʉtaa wãaruu unuuduubʉrã ¿saka kʉ̃risiad̶aima? 63Dachi Akõre Jauríburu chokae b̶uabiabarii. Nau kakuaba poyaa maka waukau. Mʉʉba machimaa jaradea b̶uu Dachi Akõre Jauriba dachi chokae b̶uabiabarii ʉ̃rʉbena. 64Maamina machid̶ebena chi nureeba wabid̶a mʉ bed̶ea ijãad̶awẽa panuu.
Jesusba maka jarasii ichiba arab̶aed̶eed̶e kuitaa b̶uad̶ad̶eeba kairãba ichi bed̶ea ijãad̶awẽa panuu, maud̶e kaiba ichi jidaubii b̶uu.
65Maud̶e Jesusba jarasii:
—Maud̶eeba mʉʉba jarasii: mʉ Chachaba ẽbẽra mʉʉmaa eneewẽebʉrã, mau ẽbẽraba poyaa mʉʉd̶e ijãabai.
66Maud̶eeba ãrea Jesús baara nibaped̶aad̶aba ichi ida b̶usid̶au. Waa ichi baara nibad̶aabasii. 67Maud̶eeba Jesusba ichiba 12 jʉrʉ adaud̶arãmaa jarakuasii:
—¿Machi sid̶a wãaduka?
68Simón Pedroba panausii:
—Dai Mechiu, dai ¿kaimaa wãd̶aima? Ab̶a bichiaburu daimaa jaradeabarii Dachi Akõre ome ewaricha chokae nuread̶amera.
69Daiba bichi bed̶ea biawãra ijãa panuu, maud̶e daiba biawãra kuitaa panuu bichi Dachi Akõreba Bʉid̶a Jipa Nii.#6:69 Dachi Akõreba Bʉid̶a Jipa Nii. Chi b̶ee kartad̶e griego bed̶ead̶e b̶u kub̶uu: Dachi Karibabarii deai jarad̶a, chi Dachi Akõre chokae nii warr.
70Jesusba jarasii:
—Machi 12 panuu mʉʉba jʉrʉ adausii mʉ baara nibad̶amera. Maamina machid̶ebena ab̶a jʉbawãe niid̶ebʉ.
71Jesusba Judas, Simón Iscariote warr ʉ̃rʉbena berrea b̶uasii. Mauba Jesús jidaubisii ichi baara nibabadaurã 12 panuud̶ebenamina.
Արդեն Ընտրված.
Juan 6: cmi
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2021, Wycliffe Bible Translators, Inc. All Rights Reserved