Shitatiko 9
9
Kulimama kwa Nyambi na Nowa
1 #
Shit 1:28. Nyambi wafuywelele Nowa na bana bendi babalume, wambile ngayi, “Hemenu bana babengi ngayi bazukulyenu mwanga bakenzalishe hano hanci nimwaho. 2Tuyamana nimwato, tuyoni na zinci bikekala na bowa kukwobe. Nimwabyo bili mu ngovu zobe. 3Haya ukutwesha kulya tuyamana nimwato, ngonehe walyanga mashiha nabipaniki kukwobe kwinga byakulya. 4#Bal 7:26-27; 17:10-14; 19:26; Nday 12:16, 23; 15:23. Ngoboni hinga wulya nyama yili na mukeza, ndaba wumi uli mu mukeza. 5Nimwendi ukuziha muntu, ukazihiwa. Kayamana nimwendi ukaziha muntu, ukazihiwa. Muntu nimwendi ukuziha minendi naniye kami azihiwe.” 6#Kut 20:13; Shit 1:26. Ou nimwendi wakuziha muntu naniye kami ukazihiwa ku minendi muntu, ndaba muntu walengiwile mushifwekesha sha Nyambi. 7#Shit 1:28. Haya mu ku fwanina kwikala na bana babengi, ngayi bazukulyenu mwanga bakenge babengi na kupanzanina hano hanci nimwaho. 8Nyambi wambile kuli Nowa naku bana bendi babalume ngayi, 9“Mona, wuluno nikulimama nanenu hamo na bazukulyenu, 10na bya kuyoya nimwabyo, tuyoni nimwato na tuyamana nimwato na nimwabyo binatutiki nobe mu wato. 11Nikulimama nanenu na mazu awa, Nikumikulupisha ngayi nifwako kami kukalobesha byuma bya kuyoya na libazi lyalinene, hinge kukalobesha kami hanci na libazi.” 12Nyambi wambile ngayi, “Eshe nisho shilimukisho sha kulimama kwami sha mwaya myaka, nikutenda nobe na bya kuyoya nimwabyo. 13Nikuyaka nkongolo wami mu makumbi, nisho shikenga shilimukisho sha kulimama kwami na bantu nimwabo ba hano hanci. 14Hashikati nimwasho oho nikafwika mbimbayilu na makumbi, pe nkongolo ukamoneka mu makumbi, 15niho nikanuka kulimama kwami nanenu na byalengiwa nimwabyo bya mishoboshobo bya hano hanci. 16Oho nkongolo akamoneka mu makumbi, nikamumona pe nikanuka kulimama kwami kwa mwaya myaka mukati kami nanenu na byuma nimwabyo byabyumi bili hanci.”
17Nyambi wambile kuli Nowa ngayi, “Eshe nisho shilimukisho sha kulimama okwe nikulimama na bya kuyoya nimwabyo bya hano hanci.”
Nowa na bana bendi babalume
18Bana ba Nowa atutikile nabo mu wato, bengile ba Shemu, Hamu na Yafweti. (Hamu wengile tata Kenaani) 19Aba bana ba Nowa bahatu babalume bengile bankaka za bantu nimwabo ba hano hanci.
20Nowa ou wengile ndimi, wengile muntu wakutatika kukuna mfuba ya shinyanca. 21Oho anwine ku waine ya shinyanca wakolwele, pe walivulile bivwalo byendi nimwabyo, niho alalile muntanda yendi muhelengwa. 22Hamu, tata Kenaani, oho amonene ngayi tatiyendi uli muhelengwa, wayile na kutongweza bayayizendi babili. 23Niho Shemu na Yafweti bashimbile likwiza ha bifuzi byabo. Niho bendele mantenganyima kwingina mu ntanda na kufwika tatiyabo, meho wabo hinga atilamina kwashenge kutinisha ku mona muhelengwa wa tatiyabo. 24Nowa oho waine yamumanine, wayuvwile ebye atendele mwanendi wakanuke. 25Pe wambile ngayi,
“Shikuto shikale hali Kenaani,
Ukenga ndungo ku bayayizendi.”
26Niho kami ambile ngayi,
“Yemezenu Nyambi ya Ngula,
Nyambi wa Shemu,
Kenaani ukenga ndungo wa Shemu.
27Nyambi atangamishe Yafweti#9:27Yafweti: Lizina elye linalifweke na lizu lyamu Shihebelu likutontolola “kuhanya.” Mwanga bazukulyendi,
bakekale hamo na bantu ba Shemu,
Kenaani ukenga ndungo wa Yafweti.”
28Kunyima ya libazi Nowa wekalile myaka 350, 29niho afwile hinga ekala na myaka 950.
Արդեն Ընտրված.
Shitatiko 9: LLK
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Libuka Lya Kuyela © Bible Society of Zambia, 2020.