Shitatiko 3
3
Kubipisha kwa Muntu
1 #
Kuh 12:9; 20:2. Hakati ka bibumbwabumbwa biya alengele Nyambi ya Ngula, liyoka wengile wa kushoshoka shikuma. Liyoka wepwile mukazi ngayi, “Kati mu kupwisha Nyambi unamikanishi kulya ku mikabo ya ku mitondo nimwayo yili muno mu mfuba ndi?”
2Mukazi wakumbwile liyoka ngayi, Tukutwesha kulya mikabo yaku mitondo nimwayo ya mu mfuba, 3ngoboni Nyambi ya Ngula wambile ngayi, “Hinga mukalya ku mukabo wa mutondo uli mukati ka mfuba, hinge kukwatako.” Ndi tukutenda noho pe tukafwa.
4Ngoboni liyoka wakumbwile uya mukazi ngayi, “Eshe kaliha sha kupwisha, kukafwa mufwako. 5Ndaba walimukile ngayi mutena mwakalyako, meho wenu akatona, pe mukafweka nehe Nyambi#3:5 Nyambi hinge banyambi. mukalimuka byabiwahe na byabibi.”#3:5 Penza 2:9.
6Oho mukazi amonene ngayi uya mutondo wengile wawuwahe kami na mikabo yawo ku lyayo yiku fwanina kwinga yayiwahe, wabalikile kwikala na nyumwa ya ku lyako, ngayi ekale wangana. Niho abuyile mikabo yawo pe walile. Niho apanineko mikabo yimo mukokwendi pe naye kami walile. 7Oho balile tuhu, bekalile na ngana kami balimukile ngayi bekalile muhelengwa. Nohobene batungile mabizi a mutondo wa mukuyu na kuwanikawo hamo pe niho bavwalile.
8Ku mazolo mulume na mukazendi bayuvwile Nyambi ya Ngula henda mu mfuba, pe nibo baholamine mukati ka mitondo kutina abamona. 9Ngoboni Nyambi ya Ngula wehanine uya mulume ngayi, “Kati ulikuti?”
10Mulume wakumbwile ngayi, “Nakuyuvwu mu mfuba, niho natini na kuholama ndaba nili muhelengwa.”
11Nyambi ya Ngula wamuyipwile ngayi, “Yani nakutongweze ngayi uli muhelengwa? Kati unali ku mukabo uya nakutongwezele ngayi hinga ulyako ndi?”
12Mulume wakumbwile ngayi, “Mbuyama ou wampanine ngayi ekale hamo na nami wampanika mukabo wa mutondo, pe nalya.”
13 #
2Koli 11:3; 1Tim 2:14. Niho Nyambi ya Ngula epwile mukazi ngayi, “Shumangani unatendele eshe?” Pe mukazi wakumbwile ngayi, “Liyoka wanyongeza niho nalya.”
Nyambi ukwamba bya ku shushula
14Niho Nyambi ya Ngula ambile ku liyoka ngayi,
“Ndaba unatende eshe haya ukashushuliwilasho,
haya tuyamana nimwato obe ninkayobe unatambulu shikuto eshe.
Ku balika hano kwenda kwobe ukalikokanga na livumo,
kami ukalyanga limvu mu matena akuyoya kwobe nimwako.
15 #
Kuh 12:17. Nikayaka nzimbo mukatikobe na mukazi,
pe mbuto yendi na mbuto yobe bakalizimba,
mbuto yendi yika cancola mutwe wobe,
na nobe ukamuhumina ku ncinzino yendi.”
16Niho Nyambi ya Ngula ambile kuli mukazi ngayi,
“Nikavulisha makando wobe ha kwimita,
kami ukayuvwanga kukola ha kubeleka.
Mu wukalu ou nimwawo ukashinga mukokwobe,
kami niye ukekala na ngovu hahobe.”
17 #
Bah 6:8. Niho Nyambi ya Ngula ambile kuli Andama ngayi, “Ndaba unayuvwilili mukazobe, pe unali mukabo ou nakutongwezele ngayi hinga ulya, ndaba ya neshe unatende,
limvu likukutiwa,
ukatenda milimo ya kukwangisha shikuma, mu kuyoya kwobe nimwako ngayi,
mwanga limvu likatutwishe byakulya bya kukulingana.
18Likamenesha nyawe na mihongela
kami obe ukalyanga mikabo ya mu lishaka.
19Mukutenda milimo ya kukwangisha shikuma na kutengela,
niho ukalye byakulya,
hantu noho wakaboka,
ku limvu oku wafumine,
watendiwile ku limvu,
pe ukaboka ku limvu kami.”
20Andama#3:20Andama: Hinge ngayi muntu. watumbile mukazendi ngayi, “Eva,”#3:20Eva:Lizina elye likulifweka na lizu lyamu Shihebelu likutontolola ngayi, “Kuyoya,” munebye byatikitiwa ngayi, Bantu. ndaba ukenga manda bantu nimwabo. 21Niho Nyambi ya Ngula atendelele Andama na mukazendi, bivwalo bya kutenda ha myayi pe wabavwalikile.
Andama na Eva ba kubatanda mu mfuba
22 #
Kuh 22:14. Niho Nyambi ya Ngula ambile ngayi, “Haya muntu unafutuku kwinga ngonehe etu, ndaba unalimuku byabiwahe na byabibi, ngoboni ku fwanina kwitabilishiwa kulya ku mukabo waku mutondo uya ukupana wumi ngayi ayoyenga mwaya myaka wufwako.” 23Niho Nyambi ya Ngula amutandile mu mfuba ya Endeni, kuya mu kulima limvu oku afumine. 24Niho Nyambi ya Ngula abatandilile ku mushamuko wa mfuba ya Endeni, wayakileko Likelumbi #3:24 Likelumbi, shilengwalengwa sha kuyoya shikwimanina wunene wa ngovu za Nyambi na kwikala kwendi. na mpoko ya mukwale ya mulangi wa mundilo eye yekalile na kuzinguluka nimwako mwako, kulama nzila ya ku mutondo wa wumi.
Արդեն Ընտրված.
Shitatiko 3: LLK
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Libuka Lya Kuyela © Bible Society of Zambia, 2020.