Matius 24
24
“Allah ago palek akoni amberek nen mondok miyalugun o,” yiluk yogisasike wene
(Markus 13:1-2; Lukas 21:5-6)
1At Yesus Allah ago palekma nen dukisikesik lagonem, at agoromi ane waganggo laguka mende yomenogo oba wagukasik, men yogokuka,
“Allah ago palek eti kilenggen lakan,” yiluk yogokuka. 2Esigit diluk yogokukama, at nen,
“Kit o palek etoma taʼbokogonat kegep a? Nggit oba sapmbalmbal palek etoma omanggi togot digidek, mondok taʼbokogo miyak-dambukogo laʼbiyagun o, yiluk, eberogonat yokisigi,” yiluk yogisasike.
“Alebagik esigit diluk weyak kagat kinabugun,” yiluk yogisasike wene
(Markus 13:3-13; Lukas 21:7-19)
3Esigit diluk yogisalok, ndom Zaitun unggul oba
dagisikesik korek werekma, at ane waganggo laguka mende yomenogo oba wagukasik inarligat dogolik, men yogokuka,
“Kat nen yoknisegen etnogo, ngginem kagat lasigin? Kat kebe wagik, o ilugun oba kagat lagik, arat kagat lasigiluk kagako nggorlek, nena mende ndak kagat lagonem nit ninendainggen engget lasugun. Wene dikogo yoknisan,” yiluk yogokukama, 4at Yesus nen,
“Akoni nen nuket dinagunogo yiluk, kinobabut kwalogo dogoni o. 5Akoni inebe dogalegat nen inendaga an nendaga mende salogo nen men yilik wisugun,
Kristus etnogo nebe wagi yiat o, yiluk, inane eberogonat salek akoni dogalegat nukerinabi wisugun o. 6Esigit diluk kagat lago nggorlek, wim nggagal diluk korogat akonem inane kinasuk kolkik, walegat akonem inabok kolkik, kagako dogolik, kinendainggen aborlok yugup o. Esigit diluk kagat lasigin mende, o ilugun kurli paga kagat lasigin mende eti awanat o. 7Yi Akoni ndi akoni inunggulowak endaga dombok wim nggagalkik, ap inendaganggok inagoromi inapma mende dombok wim nggagalkik, o yi ai ndi ai kimbiri no agik, yugul aborlok luk-lak yigik, kagasigin o. 8Mende, eti kumi elege endaginabuwogoluk kenet warigogi kak, alebagik kugun o.
9Etinem, it akoni inunggulowak endaga dombok nen, an nendaga yiluk,
Kit, at agoromi, yiluk kinebe inaʼit mondok kagat kinatluk kinebe pakinabiluk, it amberek nen ndugi kinakik, kinebe mondok kinakik, kagasuwagaluk inoba wokisek lago dogogun o. 10Esigit diluk kagako nggorlek, it akoni amberek inendainggen Allah oba panggot disuka mende, inebe dogalegat inakla mbuk atluk, togot diyalok dukiluk, at omanggi nen omanggi wasuwagaluk wolok lagik, omanggi nen omanggi aʼit nen anini oba ʼbigik, kagasugun o. 11Nen, it amberek inenggalat Allah wene yogisiligogi mende salek kagat latluk kinoba witluk nen, akoni mondok dogalegat nukerinabugun o. 12Esigit diluk mondok kagat larik wago dogumo, it akoni inobabut mondok nggorlo kagat latluk, it-it inaʼbuwarogo dogogun mende eti yabunggane inendainggen nggoʼbot arik wisugun o. 13Mende, ta nen endainggen sebekogo obakanini kambuk yiluk mondok dogogin kalok, o ilugun kurli paga Allah nen ndiligin o. 14Nen, Allah nen apma ʼbiyagin mende pano wene yi, yi akoni ndi akoni mondok inilu asuwagaluk o yi ai ndi ai yogisilik lago kalok, o ilugun kurli paga arat kagat lasigin o,” yiluk yogisasike.
“Mondok weyak kugun,” yiluk yogisasike wene
(Markus 13:14-23; Lukas 21:20-24)
15Esigit diluk yogisasikesik, yabunggane omanggi men yogisasike,
“Kit nen kolal mbalek yi endaga wenako dogolik, panorogo didisi dogoni o. Ap Daniel Allah wene yogisasi lagike mende etnogo nen yisi dogolik,
Akoni nen inalilo mende kagakonem agorlerogo lo lugun mende o Allah enggaerek ago melago kalok, (Dan. 9:27; 11:31; 12:11)
16akoni o Yudea mende etoma lo ndom obangge daguwak o. 17Lo daguwogoluk kalok, akoni amberek o warlengge paga dagiluk werekma, iniyogoba wusa witluk nen inamende yi mende ndi mende uma wagani unggusak dek o. Lo mbiyokogo daguwak o. 18Nen, it akoni amberek wen andomngge nen, kimbiringgamangge nen, iniyogoba uma iniyom wagani unggigidek etoma nenat mbiyokogo daguwak o. 19Esigit diluk dagasi dogolik, it kumi ineyak aburla mende eti inom, ineyagi ngget endago irlak awan niligogi mende eti inom, weyak kugun eti, iya! Inaʼbuwa a! 20Kit lo lugun eti, o weyak oba a? Kininggi 7 paga Hari Sabat Allah ake werlegat werek nggorlek a, launogo yiluk, sembayan yisi dogoni o. 21O etinem weyagat asigin eti, ebe-alep Allah nen yi mende ndi mende walkasike eti kurli nen logat, o yogondak ya kurli, eti paga esigit diluk omanggi kagat lagidek. Nen, yabunggane omanggi mondok kagat lasigin dek mende, omanggi pasigat etiat weyak nggok kagat lagonem kugun o. 22Weyak kagat lagonem kugun eti, at Allah nen,
Kurli yi kurli arat o, yiluk yigidek togot dilepma, akoni taʼbokogonat ndil inakidek weyagat atlep o. Mende, at aʼburi miginakike mende inakeat,
Yogo. Weyak arat kegep o, yiluk, kurli wasigin werek o. 23-24Etinem, it akoni amberek inenggalat yisi dogolik,
Kristus etnogo nebe anat o, yigik, nen, it amberek nen,
Allah wene yokisiligogo mende etnogo nebe anat o, yigik, yi wisugun o. Witluk nen,
Akoni Allah nen miginakike mende yomenogo nuket diyawok yiluk, nuket diyawogoluk inane eberogonat salek ambawagaluk kagasusak dek mende elalin mende kagarik wisugun o. It amberek nen,
Kristus etnogo yi waga yi ʼbikani, yigik, it amberek nen,
Kristus etnogo eli waga eli lakani, yigik, yisinem kit kinakla nen eberogonat yiluk ambagup o. 25Wene eti awan kagat lagidek werek nggorlek kusumbi ndak yokisigi eti panorogo didisi dogoni o. 26It akoni amberek nen yokisasi dogolik,
Lakani! At etnogo o limo eloma werek o, yisi kalok, kinilenggen laka lagup. Nen, it amberek nen,
Lakani! At etnogo uma aberama limago werek o, yisi kalok, kinakla nen eberogonat yiluk ambagup o. 27Eti, an abat endak lasi wagagi etnogo wisigin, o yabok o mo dagi wirigogoma eloma nen omanggi pasigat yibakasinem, o mo unggiligogoma yibaka liligogo eti kak wisigin o,” yiluk esigit diluk yogisasikesik,
28“Warek mende werekma, sewe warek niligogo mende eti etoma nandorli liligogi o,” yiluk yogisasike.
“An abat endak lasi wagagi etnogo yabunggane wisigiluk kagako nggorlek, yigit diluk kagat lasigin,” yiluk yogisasike wene
(Markus 13:24-27; Lukas 21:25-28)
29At Yesus nen esigit diluk yogisasikesik, yabunggane omanggi men yogisasike,
“Weyak nggok esigit diluk kalok oba nen ininggi dogalegat dogoluk dek,
O mulinggi amum agik, sut yakidek puk agik, kusagal mbogot oba nen nggilelogo wusa wagik, mbogot oba inobatneyak dogoligogo mende eti Allah nen inaborlogot digik, kagasigin o. (Yes. 13:10; 34:4)
30Esigit diluk kagako nggorlek, an abat endak lasi wagagi etnogo arat wisigin yiluk, akoni inendainggen enggerlogo diduwagaluk mbogot oba omanggi kagat latluk oba nen, akoni inunggulowak endaga dombok denggu mako nggorlek nobatnerogonat oisa akla wusa wagonem, inilenggen niyalok nggokogonat pogot nabugun o. (Dan. 7:13)
31Esigit diluk wago dogolik, an nen it malaikat Allah mbogot oba nen yonggo wusa ʼbiya wirigogo mende yomenogo yonggo laʼbiyasi dogolik, nabinggon ane nggogat ʼbukakogo yisinem, it nen akoni an nen miginakigi mende yomenogo, o wema elomangge, ombo elomangge, ilingge, yingge, o mbogot erlomangge eloma nen mondok nandorinabugun o,” yiluk yogisasike.
Wene o ara oba lisogo yogisasike wene
(Markus 13:28-31; Lukas 21:29-33)
32At Yesus nen esigit diluk yogisasikesik, yabunggane omanggi men yogisasike,
“Wene yi o ara oba lisogo yokisagin yi didini o. O engga dabeligiluk kagarigogo mende etnogo mende oba lisogo yokisak. O ara eti engga lologo wusalok nen yabunggane asiʼbat dagigik engga dabelkik, kagakonem, kinilenggen kalok kinakla nen,
Yogo. O arat kibi asigin kigi, yiluk kinakla didiligogi eti kak, an nen,
33Esigit diluk kagat lasigin, yiluk yokisigi etnogo, ebe taʼbokogonat kagat lagonem kinilenggen kalok nen,
Yogo. O ilugun oba kagat lasigin etnogo korok asi waga kigi, yiluk, kinakla ambano o. 34Yigit diluk kagat lasigin, esigit diluk kagat lasigin, yiluk yokisigi eti, akoni o yogondak werek mende inebe amberek dek agidek awan werek nggorlegat ebe taʼbokogonat kagat lasigin o, yiluk, eberogonat yokisigi. 35Mbogot inom, agat inom, eti dek asigin mende, an nane eti dek asigin mondok dek o,” yiluk yogisasike.
“Ngginem kagat lasigin nit taʼbokogonat ninonggodek eti paga, kinobabut kwalogo dogono,” yiluk yogisasike wene
(Markus 13:32-37; Lukas 17:26-30, 34-36)
36At Yesus nen esigit diluk yogisasikesik, wene omanggi men yogisasike,
“An wisigin, o etinem, jam eti paga wisigin yiluk, akoni mondok inonggodek. Nen, malaikat Allah mbogot oba nen yonggo wusa ʼbiya wirigogo mende yomenogo inonggodegat. Nen, an nebe Allah aʼburat mende, nonggodegat. An nombae Allah arligat ilu o. 37It akoni ap Nuh werek oba eta kagako laguka ndak-ndagat, an abat endak lasi wagagi etnogo yabunggane esigit dilugat kagakonem wisigin o. 38I ukike eti, awan ukidek werek nggorlek, it akoni etoma nen kimbiri iyago ninggik, i ninggik, ap nen kumi woginakik, it amberek nen yigisigik, kagako nggorlek, at Nuh etnogo nggu akla unggisike. 39Nggu akla unggiluk werek nggorlek, it akoni yomenogo inonggodegat werekma, i arat utluk dagasi dogolik mondok kotnokogo inakike. Eti kak, an abat endak lasi wagagi etnogo yabunggane wisigin amot-amot, esigit dilugat kagat lasigin o. 40Etinem ap inebe mbere wen waganggonem omanggi waganggo dogolik, omanggi togot digin o. 41Nen, kumi inebe mbere inagumbak gandum mende werasuwogoluk sagalkonem, omanggi waganggo dogolik, omanggi togot digin o. 42Esigit diluk kagat lasigin eti paga kit nen,
Ninewe Endaganggok ngginem wisigin, kinonggodek eti paga, kinobabut kwalogo dogoni o. 43Nen, ap aguma indewerek mende omanggi akla nen,
O yogondak kibanggo, jam eti paga naguma yoma ap omanggi inggi abusak waganigiluk unggi wisigin, yiluk, ilu dogolepma, at ebe aguma eti anggorlem mondok werekma, aguma o ndalogo inggi abusak wagani unggilep dek, yiluk, kiniluat ambigi. 44Eti kak, kit kinakla nen,
At etinem wisigin, yiluk ambigidek akerak werek nggorlek, an abat endak lasi wagagi etnogo, arat wisigin eti, kit kinebe nggarelogo dogoni o,” yiluk yogisasike.
Ap nggok nen anduwanengge mende obabut mot kalok, nggorlo kalok, kagarigogo mende oba lisogo yogisasike wene
(Lukas 12:41-48)
45At Yesus nen esigit diluk yogisasikesik, yabunggane omanggi men yogisasike,
“Ap nggok mende omanggi anduwanengge inanggorlem dogolik inambiri wogisausak ndak-ndagat wogisasi dogowagaluk, at anduwanengge mende omanggi ayonggo ʼbisinem, at akla nggagalek dogolik obabut ewe ane yigin mende ndak-ndagat kagarigogo mende eti ta ambegep. At eti ewe eti nen mendiluk liligogo o. 46Mendiluk lagonem, anduwanengge etnogo esigit diluk motogo kagakonem ilenggen ʼbika wago kalok, anduwanengge mende etnogo akla arlenggen mondok kagin o. 47Esigit diluk pano kagakonem, ʼbika witluk, ewe etnogo nen,
An namende yoma taʼbokogonat kat kinggi pago dogonok o, yiluk mendigin o, yiluk, eberogonat yokisigi. 48Mende, at anduwanengge mende eti, obabut weyak kalok, akla nen,
Newe etnogo ibat wirigogo dek. Dogoluk nen wisigin kigi, yiluk, 49agarlagi inom inewe nggok etnogo anduwanengge mende amberek ndugi inakik, it ap anggur ambusu kunu-gunu asuwogoluk niligogi mende inom dambukogo dogolik, kimbiri inom, anggur ambusu eti mende inom, ninggik, 50kagako dogolik, at nen,
Newe etnogo etinem, jam eti paga wisigin, yiluk, onggodek mondok akeragat werekma ewe nggok etnogo wisigin o. 51Esigit diluk werekma ewe etnogo witluk nen, at anduwanengge etnogo mbirok oba ebe mondok obake ʼbogokogo warogo, it akoni inowado pagaat pano salek inendainggen mbere dogolik kagarigogi mende laʼbiyiligogoma etoma laʼbiyamo, etoma dogolik, aik nggirlim mak-mak kagako dogolik di ako de ako kagako dogogin o,” yiluk yogisasike.
Արդեն Ընտրված.
Matius 24: DNA
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք