Máfìù 21
21
Zízɛ̀ e dà Zùlúsàlɛ̀‐pɛlɛí géli wà kpɛ̀ɛ ká
(Máà 11.1-11; Lúù 19.28-40; Zɔ̃̀ɔ̃́ 12.12-19)
1Lɛ̀ o kɛ ɓɔpìà Zùlúsàlɛ̀ ká kɔ̀ɛ́ɛ, o nu lɛ̀ lɛ́ ò si Bɛ́fézì, lɛ́ e tɔ̃̀ũ̀ lɛ́ ò si Ɔ́lèa dĩ́ mɔ̀ɔ mɔ̀. Zízɛ̀ e là tòà‐píé‐mìàa pèèlɛ vɔ, 2áà gèè o lɛ̀ɛ, “Kà lo pɛ́lɛ lɛ́ e ka líé yia yí. Yé kaà ɓɔ nɔ́ yia, káà lo sòofàné gɛ̃̀ɛ̃̀ dɔ̀á e yèleèe zɛ̀ ká. À nyɔ̀nɔ́ lɛ́ɛ̀ lo kɛɛ̀ à píé. Kà o fóló, ká nu o ká m píé. 3Yé mi dò aà wɔ̃́ nɔ́ɔ fé gèe ka lɛ̀ɛ, kà gèe à lɛ̀ɛ kélɛ̀, ‘Ko Dàa‐mì láà nàà o ká.’ Yé aà kɛ nɔ́ kília, lɛ́ɛ̀ lo kã́ã̀ o mɔ̀.”
4À kɛɛ̀ e kɛá kíli kɛɛ wɔ̃́ lɛ́ dɔ̀‐Wálà‐lé‐là‐mìa a gèea é kɛ wánà zɛ̀. Wɔ̃́ a gèea lɛ́ e kélɛ̀,
5“Kà gèe Záyɔ̃̀‐pɛ̀lɛ̀ lɛ̀ɛ kéèé,
Lɛ̀ gɛ̃̀, i líé‐sí‐mì lɛ nupìà i píé.
Lɛ kpóló‐kpɔ̀‐mɔ̀ zɛ̀, ɛ̃́ɛ̃́ à yàà lɛ sòofàné là.
Sòo e kília lɛ sòo gbɔ̃̀ũ̀ ká. Ɛ́ɛ̃́ lɛ sòofàné nyɔ̀nɔ́ ká.”
6Là tòà‐píé‐mìà o ló, o wɔ̃́ lɛ́ Zízɛ̀ a gèe o lɛ̀ɛ ó kɛɛ kɛ. 7O nu sòofànéa wà e nyɔ̀nɔ́ o ká. Míáa o wà sɔ‐là‐sɔ̀ káá sòoa là. Zízɛ̀ e yà gbaa à là. 8Mia kù gbùò zɛ̀ o wà sɔ káá píé zi gbùò mɔ̀. Mia dò bɛ̃̀ɛ̃ o yílí‐kɔ̀ kã́ píé, wáà o kàà zi gbùò mɔ̀. 9Mia kù lɛ́ o kɛ líéa, wà míá o kɛ tópìà à píé zízàáa, o gbɛ́ɛ́ wáà gèè, “Dèɓé Gbe, i sɛ́nɛ́ò. Lúà é kpɔ́ mi lɛ́ è nu ko Dàa‐mì tɔ́ yía mɔ̀. Kɔ̀à Wálà zúo gèe.”
10Lɛ̀ Zízɛ̀ e ɓɔ Zùlúsàlɛ̀ɛ, mia séĩ́ zò dɔɔ̀ e kɛá e gã̀ mɔ̀, wáà gèè, “Dé e ké ɓɛ?”
11Mia kùa o à yí zṹ weeá kélɛ̀, “Dɔ̀‐Wálà‐lé‐là‐mì Zízɛ̀, lɛ́ è go Názàlɛ̀ lɛ́ e Gálàlíìa lɛ́ ɓɛ.”
Zízɛ̀ e ló Wálà‐kà wì
(Máà 11.15-19; Lúù 19.45-48; Zɔ̃̀ɔ̃́ 2.13-22)
12Zízɛ̀ e wàà sálà‐ɓò‐Wálà‐lɛ̀ɛ‐kà wì. E mia séĩ́ lɛ́ o kɛ pɛ lɔ̀ɔ̀ dɔpìà, ɛ̃́ɛ̃́ o yé o kɛ pɛ lɔ́pìà Wálà‐kà e kília wìa yí lúó. E téɓò lɛ́ mia o kɛ pɛlèe mɛ́ vɔ̀ɔpìà à làa nìɛ̀ à gã̀ e dɔ lɛ̀í. E pɛ nɔ́ doóa kɛ pɛ lɛ́ o kɛ yàpìà là, wáà tèŋè lɔ̀ɔ̀ dɔ̀ɔ ká. 13A gèe o lɛ̀ɛ, “À bɛ̃̀ɛ̃ɛ̃̀ lɛ Wálà là kíía yí kélɛ̀, ‘M̀ ká ɓɛ, óò lo à síì sɛ̀nɛ‐ɓòà‐wì‐kà.’ Kɛɛ ka à kɛpìà gbaa kã̀ã‐mìà bĩ̀ĩ̀pìà ká.”
14Mia nyìɛ káàa zɛ̀ wà mia kpɔ́lɔ̀ɔ zɛ̀ o nu à píé Wálà‐kàa wì, áà o là. 15Sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ Wálà kii‐dɔ‐mìàa o wɔ̃́ kpàlézɛ̀ lɛ́ e kɛ à kɛpìàa gɛ̃̀. Ɛ́ɛ̃́ o nɔ́ɔ̀ɓé gɛ̃̀ Wálà‐kàa wì, wáà gbɛ̀ɛ̀ weeá kélɛ̀, “Dèɓé Gbe, i sɛ́nɛ́ò.” Lɛ̀ o wɔ̃́ nì e kília gɛ̃̀ɛ, wɔ̃́ e o wàa à mɔ́ɔ̀ wɔ̃̀ mɔ̀.
16Lɛ̀ e kɛ kília, wa gèe Zízɛ̀ lɛ̀ɛ, “Wɔ̃́ ò gèea, ɓáà ma?”
Zízɛ̀ a gèe kélɛ̀, “M̀m̀, ḿm̀ ma. Kéa, kàá Wálà kii yé e kéa gèe do? Ye lɛ́ e kélɛ̀, ‘Ƃaà nɔ́ɔ̀ɓé wà nɔ́ɔ̀ɓé dɛɛ nì tòlò, kɛ ó tɔ́‐ɓɔ nɔ Wálà lɛ̀ɛ lɛ̀ zí wáá nɔɔ̀áa lɛ́ ɓe.’ ”
17Zízɛ̀ e gó gbaa o píé pɛ́lɛɛ yí, e ló gbaa Bɛ́fénì, kɛ é yìì yi.
Zízɛ̀ e náá tó féè‐yìlì mɔ̀
(Máà 11.12-14, 20-24)
18Lɛ̀ e kɛ nupìà e mɛ̀ĩ́ làapíé sɛ́lɛɛ yía, lɔ̀ɔ e kɛ à kɛpìà. 19E féè‐yìlì doó gɛ̃̀ dɔ̀á zi sɛ̃́ĩ́, e ló à píé. Kɛɛ lɛ̀ɛ́ gbaa pɛ gbɛɛ gɛ̃̀ à mɔ̀, é kã́ à lɛ́ɛ́ dòló mɔ̀ɔ ká. Lɛ̀ e kɛ kília, a gèe à lɛ̀ɛ, “Yékɛ̀ í ɓa gbɛɛ ɓo gbaa.” Lɛ̀ e kɛ nɔ́ kília, féè‐yìlìa e kpáa kṹ.
20Lɛ̀ là tòà‐píé‐mìàa o wɔ̃́ sùua gɛ̃̀ɛ, o lé kpó‐kpó paà e kɛá, wáà gèè, “E dɔ kpɛɛ̀ lɛ́ féè‐yìlìa e ga nɔ́ ké wànà le ɓe?”
21Zízɛ̀ a gèe o lɛ̀ɛ, “Wánà‐wɔ̃̀ lɛ́ m̀ gèe ka lɛ̀ɛ ɓɛ. Zò‐dɔ̀à‐mɔ̀ é kɛá ka yí, lɛ́ zò pèèlɛ wá ka géa, bɛ̀i lɛ́ɛ̀ lo kɛɛ̀ ka mɔ̀ kɛ ká wɔ̃́ lɛ́ ma kɛ yílí e kéa káa kɛ. Ye wá bɛ̃̀ɛ̃ wɔ̃́ e kéa doó ká. Kɛɛ káà lo vɔ̀ à gèeè tɔ̃̀ũ̀ e kéa lɛ̀ɛ, ‘Wɛ̀lɛ̀ í ló, í i dìè dùò mɛ̀ĩ́ bà,’ tó áà ka wéè kɛ̀. 22Pɛ nɔ́ɔ fé lɛ́ kà pɛ̃, ɛ̃́ɛ̃́ lɛ́ kà sɛ̀nɛ ɓo à wɛ̃́ĩ̀a, káà lo à sɔ̀lɔ̀ ɓoò, é kɛ̀á zò‐dɔ̀à‐mɔ̀ lɛ ka yía ká.”
O wɛ̃́ĩ́‐lɔ̀ɔ kɛ Zízɛ̀ là yíkɛ̀ gáàa mɔ́ɔ̀ wɔ̃̀ mɔ̀
(Máà 11.27-33; Lúù 20.1-8)
23Zízɛ̀ e yɛ́ e zí, e nu sálà‐ɓò‐Wálà‐lɛ̀ɛ‐kàa wì. Lɛ̀ e kɛ pɛ zɔ̃̀ɔ̃̀pìàa, sálà‐ɓò‐Wálà‐mɔ̀‐mìà kpànazɛ̀ ɛ̃́ɛ̃́ Zúù‐mìà dìè‐dìè vɔ̀ o nu à píé, wáà wɛ̃́ĩ́‐lɔ̀ɔ kɛ̀ kélɛ̀, “Yíkɛ̀ gáàa kpɛɛ̀ zɛ̀ lɛ́ e i kɛ̀lɛ̀, lɛ́ ì wɔ̃́ sùu e kéa kɛ̀á ɓɛ? Deĩ̀ lɛ́ e yíkɛ̀ gáàa sùua nɔ i lɛ̀ɛ?”
24Zízɛ̀ e à yí ɓo o lɛ̀ɛ kélɛ̀, “Kà tó ḿ wɛ̃́ĩ́‐lɔ̀ɔ kɛ ka yee ka kɛ̀lɛ̀. Káà à yí ɓòá m lɛ̀ɛ, ḿm̀ lo yíkɛ̀ gáàa lɛ́ m̀ wɔ̃́ sùu e kéa kɛ̀ à káa, zɔ̃̀ɔ̃̀ ka lɛ̀ɛ. 25Dé a gèe Zɔ̃̀ɔ̃́ lɛ̀ɛ é mia bàtáì kɛ? Wálà lɛ, ɛ̃́ɛ̃́ mia lɛ?”
O gbɛ̃̀ gbaa, wáà tèé dà o kíe nì ká weeá kélɛ̀, “Yé kɔaà gèe Wálà lɛɛ, lɛ́ɛ̀ lo à gèeè ko lɛ̀ɛ, ‘Mɛ́ mɔṹ e kɛ lɛ́ kàá wɔ̃́ lɛ́ Zɔ̃̀ɔ̃́ a gèea gɛ̃̀ wánà ká?’ 26Ɛ́ɛ̃́ kòó bɛ̀i à gèeè mia lɛ, ɓii kóò tùò wɔ̃́ lɛ́ míáa ò lo à kɛɛ̀ ko káa mɔ́ɔ̀ wɔ̃̀ mɔ̀. Ƃii o séĩ́ o kɛɛ̀ lɛ, wáà yí dɔ̀ kélɛ̀ Zɔ̃̀ɔ̃́ e kɛ dɔ̀‐Wálà‐lé‐là‐mì ká wánà ká.” 27Yé e kɛ kília, wa gèe Zízɛ̀ lɛ̀ɛ, “Kòó à yí dɔ.”
A gèe o lɛ̀ɛ, “M̀ḿ ló mɔṹ yíkɛ̀ gáàa lɛ́ m̀ wɔ̃́ sùu e kéa kɛ̀áa, zɔ̃̀ɔ̃̀ ka lɛ̀ɛ.
Pĩ̀ã̀ lɛ́ à gbɛ̃̀ɛ̃̀ lɛ gɔ̃à nɛ̀ĩ́ pèèlɛ mɔ̀ɔ
28“Ka bɛ̃̀ɛ̃, káà ka yɛ́lɛ́ tàà kpɛ? E kɛ gɔ̃ doó lɛ́ à gbe nì o kɛ pèèlɛɛ ká. E ló e gbe gbùò‐mìa píé, áà gèè à lɛ̀ɛ, ‘M gbe, lo pɛ́nɛɛ yɛɓo kɛɛ̀ nyɛ́nɛ̀ĩ̀.’ 29A gèe e dàa lɛ̀ɛ kélɛ̀, ‘M̀ḿ zṹ.’ Kɛɛ lɛ̀ e kɛɛ, e e wúú mɛ́ vɔ̀ɔ, e ló gbaa. 30Gɔ̃́ɛɛ e ló e gbe nyɔ̀nɔ́‐mìa bɛ̃̀ɛ̃ píé, e wɔ̃́ nɔ́ doóa gèe à lɛ̀ɛ. À bɛ̃̀ɛ̃, a gèe e dàa lɛ̀ɛ, ‘M̀m̀, m dàa, ḿm̀ lo lóò.’ Kɛɛ lɛ̀ɛ́ gbaa ló. 31Mia pèèlɛ o kília, dé e wɔ̃́ lɛ́ à dàa a naa à káa kɛ?”
Wa gèe kélɛ̀, “Mi dìè‐mìa lɛ.”
Zízɛ̀ a gèe o lɛ̀ɛ, “Wánà‐wɔ̃̀ lɛ́ m̀ gèe ka lɛ̀ɛ ɓɛ. Ƃo‐pɛ̀ ɓo‐mìà wà nɛ́ĩ̀‐zɛ‐lòà o dɔpìà líé ka mɔ̀, wáà kɛ̀ Wálà zì tò‐mia‐là wì. 32Ƃii Zɔ̃̀ɔ̃́ e nu ka píé, áà zi lɛ́ lɛ kpeĩ ká tó à píéa zɔ̃̀ɔ̃̀ ka lɛ̀ɛ, kɛɛ kàá gbaa à wéè gɛ̃̀ wánà ká. Kɛɛ ɓo‐pɛ̀ ɓo‐mìà wà nɛ́ĩ̀‐zɛ‐lòà o à wéè gɛ̃̀ wánà ká. Yé bɛ̃̀ɛ̃ ka wɔ̃́ e kília gɛ̃̀ɛ, kàá gbaa ka yɛ́lɛ́‐táá mɛ́ vɔ̀ɔ, kɛ ká à wéè gɛ̃̀ wánà ká.
Pĩ̀ã̀ lɛ́ à gbɛ̃̀ɛ̃̀ lɛ mia lɛ́ o kɛ o nyìɛ kɛpìà nyɛ́nɛ̀ĩ̀ mɔ̀ɔ mɔ̀ɔ
(Máà 12.1-12; Lúù 20.9-19)
33“Kà ka tóó dɔ pĩ̀ã̀ dò mɔ̀ zeĩ́. E kɛ gɔ̃ lɛ́ luú e kɛ à kɛ̀lɛ̀ɛ ká. E ɓɛ̀lɛ̀‐wɛ́lɛ́ lɛ́ ò à ɓɛɛ yíí mia nyɛ́nɛ̀ĩ̀ kpɔ́. E gàlà ɓo à mɔ̀. E gùlù dò kã́ lɛ̀ lɛ́ ò lo taa‐pɛ̀ e kília ɓɛɛ yíí ɓoò à lɛ̀ mɔ̀ɔ mɔ̀. E kàmà ɓo. E nyɛ́nɛ̀ɛ kpɔ́ mia dò kɔ̀ là, kɛ ó o nyìɛ kɛ à mɔ̀. Yé e kɛ kília, e ló gbaa táá mɔ̀ lɛ̀ gbèkèni mɔ̀. 34Lɛ̀ pɛ́ e kília ɓa‐lùò e ɓɔɔ, gɔ̃́ɛɛ e là lùò nì vɔ mia lɛ́ o kɛ o nyìɛ kɛpìà nyɛ́nɛ̀ɛ mɔ̀ɔ píé, kɛ ó nu à zì ká. 35Nyìɛ‐kɛ̀‐nyɛ́nɛ̀ɛ‐mɔ̀‐mìàa o lùò vɔ̀ɔ kṹ, o o doó‐mì mɛ̀, ɛ̃́ɛ̃́ wa doó‐mì zɛ, tó wa doó‐mì bɛ̃̀ɛ̃ pá gɛ̀lɛ̀ ká. 36Zéniía, gɔ̃́ɛɛ e lùò vɔ̀ búnùzɛ̀ vɔ zeĩ́, é dieá míá e o vɔ kpáa là. O wɔ̃́ nɔ́ doóa kɛ o ká. 37À líé‐nyɛ‐mɔ̀ɔ gɔ̃́ɔ e e gbe vɔ o píé. A gèe kélɛ̀, ‘Óò lo ɓɛ̀lɛyà nɔɔ̀ m gbéa lɛ̀ɛ.’ 38Kɛɛ yé nyìɛ‐kɛ̀‐nyɛ́nɛ̀ɛ‐mɔ̀‐mìàa o à gbéa gɛ̃̀ɛ, wa gèe o kíe nì lɛ̀ɛ, ‘Mí à dàa là pɔɔ̀ è lo tóò à kɛ̀lɛ̀ɛ, lɛ́ e kéa. Kɔ̀à à zɛ wɛ̀. Yé aà kɛ kília, pɛ́ è lo tóò à kɛ̀lɛ̀ɛ, kóò lo à sɔ̀lɔ̀ ɓoò.’ 39Yé e kɛ kília, wa kṹ, o gó à ká nyɛ́nɛ̀ɛ mɔ̀, wa zɛ.
40“Yé nyɛ́nɛ̀ĩ̀ e kília dàa‐mì aà nua, lɛ́ɛ̀ lo à kɛɛ̀ kpɛ nyìɛ‐kɛ̀‐nyɛ́nɛ̀ɛ‐mɔ̀‐mìàa ká?”
41Wa gèe à lɛ̀ɛ, “Lɛ́ɛ̀ lo mia kɛ‐pɛ̀ yɔɔ zɛ̀ o kília zɛɛ̀ wɛlɛ yɔɔ zɛ̀. Ɛ́ɛ̃́ lɛ́ɛ̀ lo gbaa nyɛ́nɛ̀ɛ kpɔ́ɔ̀ mia yé lɛ́ ò lo à zì pɛ ɓɛɛ nɔɔ̀ yé aà ɓaa káa lɛ̀ɛ.”
42Zízɛ̀ a gèe o lɛ̀ɛ, “Wɔ̃́ lɛ́ Wálà là kíía à gèea, kàá wɔ̃̀ gèe do? Ye lɛ́ e kélɛ̀,
‘Gɛ̀lɛ̀ lɛ́ ká dɔ‐mìà wa dà o kɔ̀ mɛ̀ĩ́a,
aà kɛ gbaa gɛ̀lɛ̀ kpànazɛ̀ ká, é dieá gɛ̀lɛ̀ séĩ́ là.
Wɔ̃́ e kéa, ko Dàa‐mì lɛ́ e à kɛɛ.
Lɛ wɔ̃́ kpàlézɛ̀ ká ko lɛ̀ɛ.’
43“À mɔ́ɔ̀ wɔ̃̀ mɔ̀ɔ, ḿm̀ gèe ka lɛ̀ɛ, óò lo lɛ̀ lɛ́ Wálà tóò lɛ mia là yia kṹũ̀ ka kɛ̀lɛ̀, tó wa nɔ mia lɛ́ ò lo dɔɔ̀ à là, áà ɓà e ɓɛɛ káa kɛ̀lɛ̀. [ 44Mi lɛ́ è lo pèlè gɛ̀lɛ̀ e kéa làa, mí e kília lɛ́ɛ̀ lo wɛ̃̀ĩ‐wɛ̃́ĩ̀, e gó e kíe lé. Ɛ́ɛ̃́ yé gɛ̀lɛ̀ e kília aà dà mi dò làa, lɛ́ɛ̀ lo à tɛ̀lɛ‐tɛ́lɛ̀, tó e mùnú kã́.]”
45Sálà‐ɓò‐Wálà‐mɔ̀‐mìà kpànazɛ̀ ɛ̃́ɛ̃́ Fálásíì‐mìàa o pĩ̀ã̀ lɛ́ Zízɛ̀ a vɔɔ ma. Wa yí dɔ kélɛ̀ e kɛ wéépìà o gbĩ mɔ̀. 46Lɛ̀ e kɛ kília, wa kɛ‐zì naa ó à kṹ. Kɛɛ o kɛ túópìà mia gbũa lɛ̀ɛ, ɓii míáa o Zízɛ̀ sí dɔ̀‐Wálà‐lé‐là‐mìa mɔ́ɔ̀ wɔ̃̀ mɔ̀.
Արդեն Ընտրված.
Máfìù 21: MNT
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Mann New Testament © Bible Society in Liberia, 1978.