Matta 5
5
Siḏiṯneɣ Ƹisa ḏ useȓmeḏ nnes ḏeg uḏrar
1Wami iẓra qaƹ ȓɣaci nni, yuȓi ɣar uḏrar iqqim usin-d ɣares imeḥḍaren nnes. 2Ibḏa iseȓmaḏ-iṯen inna-asen:
3"Ssaƹḏ nsen i yinni iǧan ḏ ȓmusakin ḏeg arruḥ nsen, aqa ȓmulk ujenna i niṯni.
4Ssaƹḏ nsen i yinni itrun, aqa aḏ twacejjƹen.
5Ssaƹḏ nsen i yinni iǧan ḏ drawec, aqa aḏ warṯen ddunect.
6Ssaƹḏ nsen i yinni iǧuzen iffuḏen ɣar min iǧan nican, ȓaḥeqqac niṯni aḏ jjawnen.
7Ssaƹḏ nsen i yinni ireḥḥmen, aqa aṯen irḥem Arebbi uȓa ḏ niṯni.
8Ssaƹḏ nsen i yinni ɣar iǧa wuȓ ḏ acemȓaȓ, aqa aḏ ẓren Arebbi.
9Ssaƹḏ nsen i yinni iṣeǧḥen iwḏan, aqa niṯni aṯen semman amecnaw ṯarwa n Arebbi.
10Ssaƹḏ nsen i yinni itwaƹeddaben x ssabab n min iǧan nican, aqa ȓmulk n ujenna i niṯni.
11Ssaƹḏ nwem meȓa tzawaren-kenniw, ƹeddben-kenniw, niɣ nnan ḏaywem ȓƹib s ixarriqen x ssabab inu. 12Ḍeḥceṯ, farḥeṯ. Aqa ɣarwem ijjen n lʼajar ḏ ameqqran ḏeg ujenna ȓaḥeqqac amenni iy twaƹeddben lʼanbiya tuɣa iǧan qbeȓ nwem.
Ȓemȓeḥ ḏ ṯfawṯ
13Ḏ kenniw iy iǧan ḏ ȓemȓeḥ ṯaṣebḥant n ṯmurṯ. Walakin meȓa iruḥ-as lmaḏaq nnes, mamc ḏas ɣa negg aḏas ṯiḏ narr? Ataf war ṯṣeǧaḥ i walu, ɣir at nḍaren ɣar barra waha axas ƹeffsen yiwḏan. 14Kenniw ḏ ṯfawṯ n ddunect. Ijjen n ṯendint iy iǧan x uḏrar war ṯzemmar aḏ teqqim ṯnuffar. 15Iwḏan war sreqqin ca ȓqendiȓ ḥima axas qeȓben aqnuc; Lla, teggen-ṯ x ȓmarfaƹ ḥima aḏasen yuc ṯfawṯ i marra ug iǧan ḏi ṯeddarṯ. 16Ammu, jjeṯ ȓqendiȓ nwem iceƹƹeȓ i yiwḏan ḥima aḏ ẓren ȓexḏayem nwem ṯiṣebḥanin aḏ ḥemḏen Babaṯwem iǧan ḏeg ujenna.
Ccariƹa
17War tfekkareṯ ca belli usiɣ-d bac aḏ qḍiɣ x Ccariƹa n Musa niɣ x min nnan lʼanbiya; Lla, war d usiɣ ca axasen qḍiɣ, usiɣ-d bac aḏ kemmȓeɣ x wawaȓ nsen. 18Aqa tesȓam ȓḥaqq: War itekkes ijjen n ȓḥarf niɣ ḏ ijjen n ṯneqqiṭ zi ccariƹa aȓ ɣa itwakkes ujenna ḏ ṯmurṯ aȓ ɣa itwakemmeȓ kuȓci. 19Marra uw ɣa iḥarfen ijjen n ȓuṣiyeṯ ḏ ṯamezyant zi ccariƹa, ssenni aḏ iseȓmeḏ i yiwḏan x min itegg netta, ataf aḏ yiȓi ḏ amezyan s waṭṭas ḏi ȓmulk ujenna. Walakin wenni ɣa iṭaƹen i ccariƹa igga zzayes, ssenni aḏ iseȓmeḏ i yiwḏan aḏ ggen am netta, ataf aḏ yiȓi ḏ ameqqran s waṭṭas ḏi ȓmulk ujenna. 20Aqa qqareɣ-awem: Meȓa war ṯṭiƹim ca i min iqqar Arebbi ktar zi min teggen imseȓmaḏen n ccariƹa ḏ ȓḥizeb n ifarrisiyen, ataf ƹemmarṣ aḏ taḏfem ȓmulk ujenna.
Aƹeṣṣeb
21Aqa ṯesȓim ḏi Lkitab belli itwanna-yasen i ȓejḏuḏ nwem: War neqq ca, aqa marra wenni iy ɣa inɣen ḥadd ataf aḏ itwaḥkem. 22Walakin nec qqareɣ-awem: Marra uw ɣa iƹaṣben x wumas ataf aḏ itwaḥkem. Wenni ɣa yinin i wumas: Ay aɣyuȓ, ataf aḏ itwaḥkem ḏi lmaḥkama ṯameqqrant. Ḏ wenni ɣa yinin i wumas: Ay afɣuȓ, ataf isḏaheǧ aḏ iraḥ ɣar ṯmessi n jahennama.
23Meȓa ṯruḥeḏ aḏ tqeddmeḏ dbiḥeṯ i Arebbi uca ṯfekkareḏ ijjen n wumac ixeyyeq xac, 24ejj dbiḥeṯ nni ḏinni ɣar ȓmeḏbaḥ, ruḥ ḏ amezwaru aḏ tṣeȓḥeḏ ak wumac. Ƹaḏ iy d ɣa ṯḏewȓeḏ aḏ tqeddmeḏ dbiḥeṯ nnec i Arebbi.
25Meȓa ithem-icek ca ḥadd menbaƹd uwin-ac-d lʼistidƹa ḥima akiḏes ṯraḥeḏ ɣar lmaḥkama, ƹḏeȓ akiḏes ḏeɣya ḏeg ubriḏ bac war c isiwwiḍ ca ɣar ȓqaḍi, ȓqaḍi nni aḏ iʼamar amxazni, amxazni nni ac inḍar ḏi ȓeḥbes. 26Aqa tesȓiḏ ȓḥaqq: War ssenni d teffɣeḏ ca aȓ ɣa ṯxeǧseḏ ṣuldi aneggaru.
Azna
27Ṯesȓim ḏi Lkitab belli itwanna ḏeg yijjen n zman: War zenna ca. 28Walakin nec qqareɣ-awem: Marra wenni ixezzaren ɣar can ṯemɣarṯ s wuȓ nnes, ataf itwaḥsab izna. 29Meȓa ṯiṭṭ nnec ṯafusiṯ tsebbab-ac ḏi can ȓefḍiḥeṯ, qȓeƹ-it zaƹma nḍar-it xak. Ḥsen i cek aḏ texsareḏ ijjen n ṭṭarf zi ddat nnec zi meȓa ṯmenḍar ddat nnec amen-ṯekmaȓ ḏi jahennama. 30Meȓa fus nnec afusi itsebbab-ac ḏi can ȓefḍiḥeṯ, qess-iṯ zaƹma nḍar-iṯ xak. Ḥsen i cek aḏ texsareḏ ijjen n ṭṭarf zi ddat nnec zi meȓa ṯruḥ ddat nnec amen-ṯekmaȓ ḏi jahennama.
Aǧaf
31Aqa itwanna ḏeg yijjen n zman ḏi Lkitab ƹaweḏ: Wenni ɣa iǧfen i ṯemɣarṯ nnes, ataf aḏas yuc ṯabrat nnes. 32Walakin nec qqareɣ-awem: Marra wenni ɣa iǧfen i ṯemɣarṯ nnes, nettaṯ war ṯezni ca, ataf itarra-t ṯezna iƹni meȓa ṯƹaweḏ ȓemȓac. Wenni iy ɣa imeȓcen ak ṯenni iǧfen, ataf izna.
Ṯijaǧiṯ
33Aqa ṯesȓim ḏi Lkitab ƹaweḏ belli itwanna i ȓejḏuḏ nwem: Qa war txalaf bu ṯjaǧiṯ nnec, kemmeȓ ṯjaǧiṯ nnec iy ṯejjuǧeḏ zzaṯ i Siḏi Arebbi.#5.33 Xzar Lƹadad (Nombres) 30:2. 34Walakin nec qqareɣ-awem: War tjaǧam ca ƹemmarṣ: waxxa s ujenna ȓaḥeqqac netta ḏ lƹarc n Arebbi; 35uȓa s ṯmurṯ ȓaḥeqqac xas itmarsen iḍaren nnes; waxxa s ṯendint n Lquds ȓaḥeqqac nettaṯ ḏ ṯandint n Uzeǧiḏ ameqqran. 36War tjaǧa bu s uzeǧif nnec, ȓaḥeqqac war ṯzemmareḏ ca aḏ tarreḏ can n uzuṭṭu ḏ acemȓaȓ niɣ ḏ abercan. 37Aḏ yiȓi wawaȓ nwem wah niɣ lla. Marra min ɣa ṯinim ḏ zzyada, ataf aẓwer nnes zi Cciṭan.
Xseṯ ȓƹaḏyan nwem
38Aqa ṯesȓim ḏi Lkitab min itwannan ḏeg yijjen n zman: Wenni ɣa ikksen ṯiṭṭ i can yijjen, ataf aḏas kksen ṯiṭṭ. Wenni ɣa ikksen ṯiɣmest i can yijjen, ataf aḏas kksen ṯiɣmest. 39Walakin nec qqareɣ-awem: War tƹarraḍem ca i wenni iǧan ḏ aƹeffan. Wenni c ɣa iseqqȓen ɣar uɣembub jjiheṯ ṯafusiṯ ḏewwaȓ-as jjiheṯ nneɣni. 40Wenni ixsen ac yawi ɣar craƹ ḥima aḏac yawi ṯaqmijat, uc-as uȓa ḏ azeǧab nnec. 41Meȓa can yijjen zi ȓmexzen igga xak bezzez aḏ teysiḏ ȓeḥmeȓ ijjen n kilumit, ysi-ṯ cek ṯnayen kilumit. 42Wenni ḏac ɣa ittaren can ṯmesȓayṯ, uc-as-t. Wenni d ɣa yasen ɣarek irezzu aḏ irḍeȓ war ṯ tarra ca ixwa.
43Aqa ṯesȓim ḏi Lkitab min itwannan ḏeg yijjen n zman: Aḏ texseḏ ajjar nnec, aḏ tƹiffeḏ ȓaƹḏu nnec. 44Walakin qqareɣ-awem nec: Xseṯ ȓƹaḏyan nwem, ttareṯ i Arebbi x yinni kenniw itƹeddaben, 45ḥima aḏ tiȓim ḏ ṯarwa n Babaṯwem iy iǧan ḏeg ujenna. Ȓaḥeqqac itsummur-d ṯfuct x yinni iṣebḥanen ḏ yinni iƹeffanen. Iticc anẓar i yinni iteggen ȓxir ḏ yinni iteggen ccarr. 46Meȓa kenniw texsem ɣir yinni iy kenniw itexsen, man lʼajar iy ɣarwem kenniw? Ma war iǧi amenni iy teggen uȓa ḏ iƹeccaren?#5.46 Iƹeccaren niṯni ḏ israʼiliyen xeddmen ak lmexzen n arrumanus jemmƹen ȓaƹcur. Israʼiliyen nneɣni qqaren iƹeccaren ƹlaḥsab min teggen ƹeṣṣan aṭṭas. Ƹaweḏ azyen ameqqran n iƹeccaren arennin ci ḥaja ḥima aṯent ysin i yixef nsen. 47Meȓa tseǧamem ɣir x imeddukaȓ nwem, iwa min teggem ḏ zzyada? Aqa uȓa ḏ ȓkuffar teggen manaya! 48Iȓiṯ nican qaƹ, amecnaw mamc iǧa Babaṯwem ḏeg ujenna.
Արդեն Ընտրված.
Matta 5: RIF
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք