Kub 3
3
Okwohebwa n'okugwa kw'omuntu ow'okubanza
1 #
Ama 2:24; Kus 12:9; 20:2. Enjoka ekaba eri ncwangya okukira ebihangwa ebindi byona eby'omu kisaka, MUKAMA Ruhanga ebi akaba ahangire. Enjoka yakaguza omukazi: “Mazimakwo Ruhanga akabatanga kulya ebijuma eby'emiti yoona ey'omurugonjo runu?” 2Omukazi yagarukamu enjoka ati: “Ebijuma eby'emiti ey'omurugonjo runu, nitwikirizibwa kubirya; 3baitu Ruhanga akagamba ati: ‘Mutalirya ebijuma eby'omuti ogunyakuli hagati y'orugonjo runu, nobukwakuba kugukwataho kwonka, mutaliija kufa.’ ” 4Enjoka yagambira omukazi eti: “Okufa timulifa. 5Habwokuba Ruhanga amanyire, obu mulirya ebijuma byagwo, amaiso gaanyu galiiguka, nainywe mulisisana Ruhanga, mumanye oburungi n'obubi!” 6Omukazi obu yarozire ebijuma by'omuti nkooku biri birungi kuliibwa, nibisemeza amaiso g'abantu, kandi omuti ogu nigwetaagwa kufoora omuntu w'amagezi, yanoga ha bijuma byagwo yalya, ebimu yahaho iba na uwe yalya. 7Aho amaiso gaabo bombi gaiguka, baamanya nkooku bali busa; baabaziira amababi g'omuti omutini, baayekorra eky'okweswekerra.
8Omu mabeho ag'orwebagyo omusaija na mukazi we bakahurra MUKAMA Ruhanga naarubata omu rugonjo, baayesereka omu miti ey'omu rugonjo oru, MUKAMA Ruhanga aleke kubarora. 9MUKAMA Ruhanga yayeta omusaija, yamukaguza ati: “Oli nkaha?” Omusaija yagarukamu ati: 10“Mpuliire noorubata omu rugonjo, natiina, habwokuba mbaire ndi busa; nayesereka.” 11Ruhanga yamukaguza ati: “Nooha anyakukugambiire nkooku oli busa? Oliire ebijuma by'omuti ogu nakutangire?” 12Omusaija yagarukamu ati: “Omukazi ou wampaire kwikara na nyowe, nuwe ampaire ebijuma by'omuti ogu, nanyowe nalya.” 13#2Kor 11:3; 1Tim 2:14.Aho MUKAMA Ruhanga yakaguza omukazi ati: “Kiki eki, okozire?” Omukazi yagarukamu ati: “Enjoka niyo embiihabiihire, na nyowe nalya.” 14MUKAMA Ruhanga yagambira enjoka ati:
“Habwokuba okozire kinu,
okyenerwe kukira ente zoona,
n'okukira ebisoro byona eby'omu kisaka;
orayekuruzaaga enda
kandi ecuucu niyo oralyaga obwomeezi bwawe bwona!
15 #
Kus 12:17. Ndaataho obunyanzigwa hagati yaawe n'omukazi,
hagati y'oruzaaro rwawe n'orwe;
oraarusasanguraga omutwe,
kandi rwo ruraakutemaga ekikongoijo.”
16Ruhanga yagambira omukazi ati:
“Omu kuzaara abaana ndakusaalizaaga muno;
oraazaaraga noosaalirwa,
oraikaraga nooyegomba baro
kandi nuwe araakulemaga.”
17 #
Baheb 6:8. Hanyuma Ruhanga yagambira Adamu ati: “Habwokuba ohuliire ebigambo bya mukazi wawe, walya ebijuma by'omuti ogu, ogu nakutangire, ningamba nti: ‘Otalirya ekijuma kyagwo’; itaka likyenerwe habwawe; ebiro byona eby'obwomeezi bwawe, oraalyaga ebirukulirugamu nootalibana muno; 18itaka liraakumerezaaga amahwa n'amatojo; kandi oraalyaga ebimera eby'omu kisaka. 19Oraalyaga ebyokulya omazire kubituutukira okuhika obu oligaruka omu itaka habwokuba niryo waihirwemu; oli cuucu kandi omu cuucu numwo oligaruka.”
20Omusaija yaruka mukazi we ibara Eva, habwokuba nuwe yabaire nyina abantu boona. 21MUKAMA Ruhanga yakorra Adamu na Eva ebyokujwara by'empu yabajweka.
Adamu na Eva nibabingwa omu rugonjo
22 #
Kus 22:14. Aho MUKAMA Ruhanga yagamba ati: “Habwokuba omuntu afookere nk'omu hali itwe, naamanya oburungi n'obubi, kandi hati taikara kunoga ebijuma eby'omuti ogunyakwomeeza akabirya, akoomeera ebiro byona.” 23Nahabweki MUKAMA Ruhanga yamwiha omu rugonjo rwa Edeni, agende alime itaka eri yaihirwemu. 24Yabingamu omusaija ogu; ha Buturukaizooba obw'orugonjo orw'Edeni, yatayo bakerubbi n'empirima erukumyalikya kulinda omuhanda ogurukugenda ha muti ogunyakwomeeza.
Արդեն Ընտրված.
Kub 3: BRR2008
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Bible in Runyoro/Rutooro Interconfessional Translation © Bible Society of Uganda, 2008.