Matiu 8
8
NA SOPENA 8.
1Tau mosumai majuri me na vuti tau, ra tajua ra tari ra tari telaho tahuna. 2Tau te tajua itea, na taha leper, monumai mea, molotu mea, moaso, Moli, va omejeia, opinisa veau aimauri. 3Tau mosehe na havena, motielia, moaso, Inau amejeia; oimauri. Tau na sena rojo leper mosori vileahi. 4Tau Iesu moaso ta mea, Oitena vetia ta me ra tajua; maa oivano, oipiseho ta me na varese hi na lotu, oirahu na rahuvuso Moses moaso mine, sura pisera.
5Tau moruhusahe me Kapernaam tau, te varese hi ra tajua hi na jumu na tarivahatea itea monumai mea, motuhatuha mea, 6moaso, Moli, na tajua hi na pilau varao tomosinavu ine na pea, morojo hi na have mate, morojo tahajia. 7Tau moaso ta mea, Ainumai, aivei mauri nie. 8Na varese hi ra tajua hi na jumu na tarivahatea motami, moaso, Moli, inau asatahonae suriho oiruhusahamai me na peau: oiaso na aso hina hasa, tau na tajua hi na pilau varao imauri. 9Suria inau na tajua na leo hiu mono mohauhaua, na pilau tajua hi na jumu ae: aaso ta me tea, Oivano, tau ivano; aaso ta me tea, Oinumai, tau inumai; aaso ta me na tajua hi na pilau varao, Oive na sanu naa, tau ivea. 10Tau Iesu morohoe tau, mouloulo, moaso ta me ra tajua telaho tahuna, Aaso taharahu ta mea-miu, Asapasua na rohoroho hauhaua pale a, mojoa, asapasuae me ra Israel. 11Aaso ta meamiu mono, Ra tari ra tari tinumai pa majuri me ra vanua na maso momaraha ae, tinumai pa majuri me ra vanua na maso momajojore ae mono, tisihesivo valui Epraham me Aisak me Jekop me na tailahi: 12maa tiputuhe ra uluo hi na vanua i Israel tana pohipohitupu: na tahi tahajia ae, na mamahanu tahajia ae. 13Tau Iesu moaso ta me na varese hi ra tajua hi na jumu na tarivahatea, moaso, Oilaho; orohoroho meau sura sanu naa, motahonae mopaletuha suria. Tau na tajua hi na pilana varao momauri me na rani hina.
14Tau Iesu moruhusahamai me na pea i Piter tau, moreni tina i tupuna mosinavu hi na rojo hi na jae luluvahi. 15Tau motielahavena, tau na j ae luluvah i mosori; tau momaraha, momata hire. 16Tau me na ravi telavi ra tajua ra tari ta mea ra tamate tetetoho me na lolora; tau morahurahara tamate hi na aso, movei mauri ra taha rojo: 17suria, na leo hi Aisaia na provet mine momalua, moaso, Isinie molavi ra seja malumu-lumu, molavi ra seja rojo.
18Tau Iesu moreni ra tajua ra tari ra tari me na valuna tau, moaso ta mera tivano me na vala tasi. 19Tau te tajua hi na uli pepe itea monumai, moasota mea, Moli, inau ailaho tahumu me ra vanua vunuvunu iniho oivano ae. 20Tau Iesu moaso ta mea, Na vokis na moru hira ae, na manu na unu hira ae; maa Matu i tajua mosaite vonae hi na navu ae. 21Tau motea maa hi ra uluo hina moaso ta mea, Moli, oijuriau aivuna japovi tamau. 22Maa Iesu moaso ta mea, Oinumai tahuu; oijuri ra taha mate tejapovi ra sipilara taha mate.
23Tau moruhusahe me na ovo motea tau, ra uluo hina tevano tahuna. 24Tau na tasi molosu tahajia, na navo hi na tasi tevaevae na tanovihoro na ovo suria: maa inie monavu toho. 25Tau tenumai mea, tevataleleia, teaso, Moli, oituiturituaja; vahatea timajuju. 26Tau moaso ta mera, Surasava otoine, O amiu ra taha rohoroho taiti? Tau momaraha, moaso hauhaua ta me na lahi me na tasi; tau na tasi momate. 27Tau hire teuloulo, teaso, Na tajua naano mopala sava, suria na lahi me na tasi isihire terohoe?
28Tau monurnai me na vala tasi tau, me na vanuara Katarin, ra tajua morua, ra tamate tetetoho me na lolorarua, teralaho varipahoi mea, teraruhusumai me na vonae hi ra taha mate, teraila, saite tajua ilaho me na rio neeno suria. 29Tau teraore, teraaso, Amamurua arameje nasava meho, Matu i Atuh? Onumai nai sura losiamamurua, na rani hina mojoareji, e mojoa? 30Paravu mena vanua neeno ra poe ra tari tetehani ae. 31Tau ra tamate tetuhae, teaso, Va oirahuraha i amamu, oisula i amamu airuhusahe me na lolora poe. 32Tau moaso ta mera, Otoruhusaheara. Tau teruhusumai mea tau, teruhusahe me na lolora poe: tau ra poe vunuvunu terovosivo me na tasi, temate me na tasi. 33Tau ra taha mata hire terovo, tevano me na vanuara, tevetia ta me ra tajua, tevetia ta mera mono na sanu monumai me ra tajua morua ra tamate tetetoho me na lolorarua. 34Tau hire vunuvunu me na vanua teruhusumai ae sura lahovaripahoi me Iesu: tau terenia tau, tetuhae ilaho ture na vanuara.
Արդեն Ընտրված.
Matiu 8: TLM9109
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
This is a historic text maintained by the British and Foreign Bible Society.