Génesis 41
41
U wayako'ob faraón u ajawil egipcio
1Máan ca p'éel ja'abo'ob. Jun p'éel kiine', le faraono' tu wayaktaj, ti' wa'alacbal tu jáal u yáalcab ja'il Niloe', 2ichil u wayake' tu yilaj u jóokol ca'ach ti' le áalcab ja'o' siete x ch'upul wacaxo'ob jadzutz poloctaquilo'ob, táan ca'ach u jaantico'ob xíiw ichil jalalo'ob. 3Paachil ti'obe' j jóoko'ob u láak siete x ch'upul wacaxo'ob kaastaco'ob yéetel dzoya'antaco'ob, ca j yanji'ob xan tu jáal le áalcab ja'o', naadz ti' le u láako'obo'. 4Cu dzo'ocole' le x wacaxo'ob kaastaco'ob, dzoya'antaco'ob xano' tu jaantajo'ob le siete x wacaxo'ob jadzutztaco'ob yéetel poloctaco'obo'.
Le faraono' j aaji, 5ba'ale' j ween tu ca'a téen, ca tu wayaktaj u láak náay: tu yilaj siete u yi'ijo'ob trigo chuuptaco'ob yéetel jadzutztaco'ob, táan u ch'íijilo'ob ti' jun p'éelili' sakab. 6Paachil ti'obe' j jóoko'ob u láak siete i'ijo'ob, tiquintac yéetel tóoca'ano'ob tumen j lakin iik, 7le j tiquin i'ijo'oba' tu jaantajo'ob le siete i'ijo'ob t'a'ajtaco'ob yéetel chuuptaco'obo'.
Le faraono' j aaje' ca tu yilaj chéen wayak, 8ba'ale' tu ja'atzcabil u láak kiine' t'aan u sen tuucul ca tu ya'alaj ca taalaco'ob tuláacal le máaxo'ob cu na'ato'obo' yéetel u j ca'anal na'atilo'ob Egipto. Le faraono' tu tzicbaltaj ti'ob u wayako'ob, ba'ale' mix jun túul páatchaj u ya'alic ti'e' ba'ax u káat u ya'alo'ob. 9Le túun u nojchil le máaxo'ob dzáic u yo'och vino le faraono' tu ya'alaj ti' faraón:
Bejela'e' cu ka'ajal teen in si'ipilo'ob. 10Le ca j kuuxilnaj a tzicbe'enil yéetel u nojochil le máaxo'ob beetic le waaj yéetel xan le a palitzila', ta túuxtajo'on j kalbil tu kalab najil u nojochil le máaxo'ob cu canano'obo'. 11Jun p'éel áakabe' u nojochil le máaxo'ob beetic le waajo' j yanchaj jun p'éel wayak ti', teen xane' u láak, tu jujun p'éelil le wayako' yanchaj ba'ax tu taasaj. 12Ti' le cúuchilo' ti' yaan xan t éetel ca'ache' jun túul j táanquelem hebreo, leti'e' u palitzil u noojoch le j canano'obo'. T tzicbaltaj ti' le c wayako'ob, leti' túune' tu tzolaj to'on ba'ax cu taasic. 13¡Tuláacal j úuch je'el bix tu ya'alajilac to'one'! tene' j suunajen tu ca'a téen tin meyaj, u láako' j ji'ich' u caal.
14Le faraón túuno' tu túuxtaj t'anbil Josee', ca jóoksa'ab tu séeblaquil ti' le kalab najo'. Josee' tu kosajubáa, tu kexaj xan u nook ca j bin tu táan faraón. 15Ca j a'ala'ab ti' tumen faraón:
Dzo'oc u yantal teen jun p'éel náay mina'an mix máac ca páatac u ya'alic teen ba'ax cu taasic, ba'ale' dzo'oc in wojéeltique', teche' le quéen a wu'uy in tzolic in náaye' je'el u páajtal a wa'alic ba'ax cu taasique'.
16Ca tu núucaj José: Lelo' ma' ba'al cu páajtal in beetic teni', ba'ale' Ku cu bin u dzáa u núuquil ti' a tzicbe'enil u ti'al a wutzil.
17Faraone' tu ya'alaj ti' José: Ichil in wayake' tin wilaj wa'alacbalen tu jáal u yáalcab ja'il Nilo, 18ichil le ja'o' j jóok siete x ch'upul wacaxo'ob jadzutz poloquilo'ob, táan u jaantico'ob xíiwo'ob ichil le jalalo'obo'. 19Pachal ti'obe' j jóoko'ob u láak siete x ch'upul wacaxo'ob sen kaastaco'ob yéetel dzoya'antaco'ob. ¡Mix jun téen in wilma ca'ach tu lu'umil Egipto x wacaxo'ob táaj kaastac je'el bix lelo'obo'! 20Le dzoya'an kaas x wacaxo'obo' tu jaantajo'ob le yáax siete x ch'upul wacaxo'ob poloctaco'obo'; 21ba'ale' quex tu jaantajo'obe', mix máac cu bin u yojéelte, tumen j p'áato'ob táaj dzoya'antaco'ob je'el bix ca'ache'.
J aajene', 22ba'ale' j yanchaj teen jun láak wayak, ichile' tin wilaj siete u yi'ij trigo chuuptac yéetel jadzuctac, tuláacal nuucchajo'ob ti' jun p'éelili' sakab. 23Pachal ti'obe' nuucchajo'ob u láak siete i'ijo'ob tiquintaco'ob yéetel bekechtaco'ob, tóoca'ano'ob tumen j lakin iik. 24Le j tiquin i'ijo'oba' tu lukajo'ob le j qui'ichquelem i'ijo'obo'. Tene' tin wa'alaj ti' le aj na'ato'obo', ba'ale' mix máac páatchaj u ya'alic teen ba'ax cu taasic le náayo'oba'.
25Josee' tu núucaj ti' faraón:
Le ca'a p'éel wayako'ob yanji ti' a tzicbe'enilo', chéen jun p'éelili' ba'al cu taasic, Kue' dzo'oc u ye'esic teech ba'ax cu bin u beete'. 26Le siete x wacaxo'ob jadzutztaco'obo', siete ja'abo'ob, bey xan le siete jadzutz i'ijo'obo'. Jun p'éelili' le náayo'. 27Le siete x dzoya'an wacaxo'ob kaastaco'ob j jóoko'ob pachal ti' le u láako'obe' láili' xan siete ja'abo'obe'; bey xan le siete j tiquin i'ijo'ob tóoca'an tumen j lakin iiko', u siete ja'abilo'ob wi'ij. 28Bey u nu'uquil je'el bix dzo'oc in wa'alic techo': Kue' dzo'oc u ye'esic ti' a tzicbe'enil ba'ax cu bin u beete. 29Yaan u taalo'ob siete ja'abo'ob ma'alob joocho'ob ti' tuláacal u lu'umil Egipto, 30cu dzo'ocole' bíin taalac siete u ja'abilo'ob wi'ijil. Ti' mix máac cu bin j ka'ajal le ya'abcach jochajo'ob yanji ca'ach tu lu'umil Egiptoo', tumen le óotzililo' yaan u xu'ulsic le múuch' caajo'oba' 31Sen nojoch le óotzilil bíin taalaco', let o'olale' ma' bíin p'áatac u chíiculalil le ayikalil yanchaj ca'acho'. 32Ti' a tzicbe'enile' yanchaj ca'a téen le wayako', tumen Kue' u dzaamaj tu yóol u beetic lela', bin u ca'aj túun u beet tu séeblaquil.
33Let o'olale' ma'alob ca u caxant a tzicbe'enile' jun túul máac yaan kaj óolal yéetel na'atil ti'e', u ti'al ca u bis táanil u baluba'ob le múuch' caaja. 34U beet a tzicbe'enil lela': U dzáa méektáano'ob ca xi'ico'ob ti' tuláacal le múuch' caajo'oba' u ti'al ca u molajo'ob cinco u jaatzul ti' tuláacal u yich le paakalo'ob cun yantal ti' tu lu'umil Egipto ichil le siete ja'abo'ob ma'alob joocho'. 35Ca u much'quinto'ob tuláacal u trigoil le ma'alob ja'abo'ob bíin taalaco', ca u dza'ob ti' jun p'éel cúuchil tu yáanal u canan a tzicbe'enil, ca u líikeso'ob te j noj caajo'obo' u ti'al u tzéenta'al le máaco'obo'. 36Beyo' le trigo cu p'áatal líiksa'an te j noj caajo'obo', u ti'al ma' u quíimil le máaco'ob ti' le siete ja'abo'ob wi'ijil cu bin j mukyajtbil Egiptoo'.
Josee' cu dza'abal u beet u j méektáanil Egipto
37Le ba'ax tu dzaj José u na'atil ca beeta'aco' j u'uya'ab ma'alobil tumen le faraono' bey xan tumen u nuuquilo'obo', 38Bey túuno' le faraono' tu ya'alaj ti'ob:
¿Je'el wa u páajtal c nactáantic u láak máac ca yanac u pixan Ku ti' je'el bix leti'a'?
39Ti' josee' tu ya'alaj: Mina'an u láak máac asab yanil u kaj óolal yéetel u na'at ti' teech, tumen Kue' dzo'oc u dzáic teech a wojéelt tuláacal le ba'ala'. 40Teche' yaan a ch'a'ic tu yáanal a canan in jalach najil, tuláacal in caajale' yaan u yu'ubaj t'antic ba'ax ca bin a wa'alej. Chéen teen asab nojochen ti' teech, tumen teen ajawen. 41Ile, tene' quin dzáiquech aj méektáanil tu yóokol tuláacal u lu'umil Egipto.
Le ca tu ya'alaj lela', 42faraone' tu lukesaj tu kab le x dzipit tu'ux yaan u dzalab u ajawile' ca tu dzaj tu kab José. Cu dzo'ocole' ca tu túuchi'itaj ca búucbesa'ac yéetel lino nooko'ob jach mamayqui, ca j dzaab xan jookenjok oro tu caal. 43Cu dzo'ocole' tu beetaj u na'acal ti' jun p'éel bolan#41.43 Bolan: jun p'éel nu'ucul beeta'an yéetel che' yaan ca'a p'éel can p'éel u x sutubilo'ob wa peten che'ob u ti'al ca páatac u jíilta'al tumen tzíimin dza'an jun p'éel pixib yóokol u ti'al ma' u chu'ulul máaxo'ob cu bino'ob ichil. cu bin ca'ach mantadz tu paach u ti'ale', ca tu túuchi'itaj ca awat a'ala'ac tu táan: tzelaba'ex te j bejo'. Bey úuchic u p'áatal José u méektáant tuláacal u lu'umil Egiptoo'.
44Cu dzo'ocole' j a'ala'ab ti' tumen faraón: Quex tumen teen faraone' mix máac cu páajtal u péecsic wa ba'ax wa ma' tu yo'olal a t'aan.
45Faraone' tu dzaj u kaaba'int Zafnat-panea ti' José, jun p'éel kaaba' j egipcio, tu dzo'ocsaj u beel xan yéetel Asenat u x ch'upul paal Potifera u aj kiinil u caajil On. Bey p'áatic José u méektáant Egiptoo'. 46José yaan ca'ach treinta ja'abo'ob ti' ca j bisa'ab tu táan u ajawil Egipto.
José jóok tu táan le faraone' ca tu cáajsaj u xíimbal ti' tuláacal u lu'umil Egipto. 47Ti' siete ja'abo'obe' le lu'umo' tu sen dzaj ich 48Josee' tu molaj tuláacal le trigo yanchaj ti' múuch' caajo'ob ichil le siete ja'abo'obo'; tu líiksaj te j noj caajo'obo', ca tu p'ataj ti' jujun p'éel caaje' le trigo tu molaj ti' le lu'umo'ob yaan tu bakpacho'obo'. 49Josee' tu molaj trigo bey je'el bix u ya'abil u sa'am lu'umil le ka'anabo'. Sen ya'ab le trigoo', tu p'ataj tac u p'isic tumen ma' j páatchaj u xo'ocol buca'aji'.
50Ma'ili' cáajac u ja'abilo'ob le wi'ijo', Josee' j yanchaj ca'a túul u paalal yéetel Asenat u yantan. 51Le yáax jun túulo' tu dzaj u kaaba'int Manasés, tumen tu ya'alaj: Kue' tu beete in tu'ubsic tuláacal in mukyaj, tu beetaj xan in tu'ubsic in láaktzilo'ob. 52U ca'a túule' tu dzaj u kaaba'int Efraín, tumen tu ya'alaj: Kue' dzo'oc u beetic u yantal in paalal ti' jun p'éel lu'um tu'ux mukyajnajen.
53Máano'ob u siete ja'abilo'ob sen ya'abcach jooch tu lu'umil Egiptoe', 54ca j chu'unpaj u siete ja'abilo'ob wi'ij je'el bix tu ya'alajilac Josee'. J yanchaj wi'ij ti' tuláacal le múuch' caajo'obo', ba'ale' Egiptoe' ma', tumen te'elo' yaan ba'al u ti'al jaantbili'; 55le ca jo'op' u yu'ubico'ob wi'ij u cajnáalilo'ob Egiptoe', j bino'ob u káato'ob trigo ti' faraón. Le faraón túuno' tu ya'alaj ti' tuláacal le j egiciobo': Xeene'ex a wile'ex José, beete'ex le ba'ax cu bin u ya'al te'exe'.
56Le ca tu ki'itbesubáa le wi'ij ti' tuláacal le múuch' caajo'obo', josee' tu je'aj tuláacal le ch'iilo'ob tu'ux yaan le trigoe', u ti'al u conic ti' le j egiciobo'; tumen le wi'ijo' táan u bin u sen yajchajal. 57Cu taalo'ob túun ca'ach u cajnáalilo'ob tuláacal u múuch' caajilo'ob Egipto, u mano'ob trigo ti' José, tumen ti' mix jun p'éel u láak múuch' caaj yaan ba'al jaantbil ca'achi.
Արդեն Ընտրված.
Génesis 41: MAYADC
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Biblia Maya de Yucatán © Sociedades Bíblicas Unidas, 1992.