Génesis 28
28
1Isaac túune' tu t'anaj Jacob, ca tu qui' t'antaj, ca tu kuben t'antaj ti': Ma' u dzo'ocol a beel yéetel mix jun túul u co'olelil u lu'umil le Canaana'. 2Xeen Padan-aram tu yotoch Betuel u taata a maama. 3Le Ku yaan tuláacal páajtalil ti'o' u qui' t'antech yéetel ca u ya'abcunt a ch'i'ibalo'ob u ti'ala' ca jóokoc teech ya'abcach múuch' caajo'ob. 4Ca u dzáa ti' teech, bey xan ti' a ch'i'ibalo'ob, le qui' t'aan tu séeb chi'itaj ti' Abrahame', u ti'al a ca u ti'alintajo'ob le lu'um tu'ux cajacbalo'on beyo'on táanxel lu'umile', tumen bey tu séeb chi'itilac ti' Abraham.
5Bey úuchic u túuxta'al Jacob Padan-aram tumen isaac. Jacobe' j kuch tu yotoch Labán leti'e' u paal ca'ach Betuel le j aramile', u sucu'un x Rebeca, leti'e' u maama ca'ach Jacob yéetel Esaú.
Esaue' cu dzo'ocol u beel
6Esaue' tu yilaj bix úuchic u qui' t'anta'al Jacob tumen Isaac yéetel bix úuchic túuxta'abic Padan-aram u ti'al ca dzo'ococ u beel te'elo'. Bey xan tu qui' u'uyaj u t'aan u taata, le ca j dzo'oc u qui' t'anta'al Jacobe', bix úuchic u kuben t'anta'al ti' ma' u dzo'ocol u beel yéetel mix jun túul u x co'olelilo'ob Canaán. 7Bix úuchic u bin Jacob Padanaram bey je'el bix a'ala'abic ti' tumen u taata yéetel tumen u maamae'. 8Bey úuchic u yojéeltic ma' tu yóol u taata u x co'olelilo'ob Canaani'; 9Let o'olal bin u yila'a Ismael u paal Abrahame', ca tu ch'a'a u yatan u x ch'upul paalal Mahalat, íidzintzil ti' Nabaiot, u núupul u chuucáan atano'ob x Canaanilo'ob yaan ca'ach ti'e'.
Dioose' cu chíicpajal ti' Jacob tu caajil Beetel
10Jacobe' jóok Bersebae' ca tu ch'a'a u bejil Haran. 11J kuch ti' jun p'éel cúuchile' ca p'áat u máans áakab te'elo', tumen le kiino' dzo'oc ca'ach u t'úubul. Tu cha'aj u ti'al u káanjo'olt jun p'éel u tuunichilo'ob le cúuchilo', ca j chilaj wenel. 12Te'elo' tu wayaktaj jun p'éel náay, ichil u wayake' tu yilaj jun p'éel eeb t'alacbal u yooco'ob j lu'um, cu kuchul tac ca'an, yóokole' cu na'acalo'ob yéetel cu yéemelo'ob u ángelo'ob Ku. 13Tu yilaj xan wa'alacbal Yuumtzil tu yicnal ca j a'ala'ab ti': Teen Yuumtzil u Ku Abraham a nool, u Ku Isaac a taata. Ti' teech yéetel ti' a ch'i'ilancabo'ob bíin in dzáa le lu'um tu'ux chilicbalecha'. 14Leti'obe' bíin sen ya'abaco'ob bey je'el bix u ma'ay le sa'am lu'umo'; yaan u ki'itpajalo'ob j xaman, j noojol, j lakin tac j chikin; tuláacal xan le láaktzilo'ob ki'itpaja'ano'ob yóokolcaabe', ti' teech yéetel ti' a ch'i'ibalo'ob bíin qui' t'anta'aco'ob. 15Tene' ti' yanen ta wéetele'; bíin in canantech je'el tu'ux ca xi'iqueche', bíin xan in sut teech way te j lu'uma'. Ma' bíin in p'at teech tumen bíin in dzo'ocbes le ba'ax quin séeb chi'itic techa'.
16Le ca j aaj Jacob tu wayake', tu ya'alaj: Jach tu jaajile' Yuumtzile' ti' yaan ti' le cúuchila', ba'ale' tene' ma' in wojel ca'achi'. 17Tu sen ch'a'a sajaquil, ca tu tuclaj: Le cúuchila' sen quili'ich way yaan u yotoch Kue'. U jool u yoocbalil ca'an.
18Jacobe' líik jach ja'atzcabil u láak kiin, tu ch'a'aj le tuunich meyajnaj ti' u ti'al u káan jo'ol ca tu wa'acunsaj bey jun p'éel ocom pake', tu wecaj aceite yóokol bey úuchic u jun páaycuntico'. 19Te j cúuchilo' yaan ca'ach jun p'éel caaj cu kaaba'intic Luz, ba'ale' Jacobe' tu kexaj u kaaaba' ca tu dzaj u kaaba'int Betel.#28.19 Betel, le kaaba' ti' ca'a p'éel t'aan u taalbal: Beet yéetel El; Betel túune' u káat u ya'al: U yotoch Ku.
20Te'elo' tu séeb chi'itaj Jacob: Wa Ku cu láakintiquen yéetel cu canantiquen iquil in binbala', wa cu dzáic ba'al in jaant bey xan ba'al in búucbese', 21ca suunaquen toj in wóol tu yotoch in taatae', le Yuumtzil túuno' bíin in Kuintej. 22Le tuunich dzo'oc in dzáiic bey ocom pakila' Bíin otochquinta'ac tumen Ku; tuláacal u kiinilo'ob in cuxtal bíin in dzáa teech in Ku jun jaatz ti' u diez jaatzal ti' tuláacal ba'ax ca bin a dzáa ti' teen.
Արդեն Ընտրված.
Génesis 28: MAYADC
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Biblia Maya de Yucatán © Sociedades Bíblicas Unidas, 1992.