Génesis 15
15
Junab Ku Yuumtzile' cu beetic nup t'aan yéetel Abram
1Cu dzo'ocol lela' Yuumtzile' tu t'anaj Abram ichil jun p'éel náay ca tu ya'alaj ti':
Abram, ma' a ch'i'ic sajaquil tumen teen a aj canan. Bíin a kam nojoch utzil.
2-3Ba'ale' Abrame' tu núucaj ti':
Ku Yuumtzil, ¿ba'ax u biilal teen ca a dzáa teen bo'olal, wa jach a wojel mina'an in paalal? Tu yo'olal ma' a dzáa teen mix jun túul in paali', Eliezer le j damascoil, jun túul ti' in palitzilo'ob leti' bíin ti'altic tuláacal ba'ax yaan teen.
4Yuumtzile' tu núucaj ti':
Le máax bíin ti'altic ba'ax yaan teche' jach a paal ma' yanal máaqui'.
5Yuumtzil túune' tu bisaj Abram táancab ca tu ya'alaj ti':
Pact ma'alob le ca'ano', xoc le eeko'ob, wa cu páajtal a xoquico'ob. U'uye, bey bíin ya'abac a ch'i'ilancabilo'.
6Abrame' tu yocsaj óoltaj u t'aan Yuumtzil, tu yo'olal lelo' j ka'am Abram tumen Yuumtzil bey aj ti'ibil beel wíinique' 7Ca j a'ala'ab ti':
Teen le Yuumtzilo'; teen jóokesech Ur u caajal le j caldeoilo'obo' u ti'al in dzáic teech le lu'uma' ca a ti'alinte.
8Ba'ale' Ku Yuumtzil, ¿bix je'el u páajtal in wojéeltic wa teen bíin in ti'alint le lu'uma'? Bey tu núuquilac Abram.
9Ca j a'ala'ab ti' tumen Ku:
Taas teen jun túul chan wacax, jun túul x yuuc yéetel jun túul j taman, ca yanac ti'ob óox ja'ab tu jujun túulil, bey xan jun túul mucuy yéetel jun túul chan sacpacal.
10Abrame' tu taasaj ti' Ku tuláacal le aalako'obo', tu kupaj táan chúumuc tu jujun túulil ca tu dzaj jun búuj actáan ti' u láak, ba'ale' ma' tu kupaj le ch'íich'o'obo'. 11Le j ch'oomo'obo' cu yéemelo'ob ca'ach yóokol u wíinclil le j quimen ba'alche'obo', ba'ale' Abrame' cu p'u'ujsico'ob ca'achi. 12Le ca j áakabchaje' Abrame' j t'úub u wenel. Ich jun súutuquile' téec bakpachta'ab tumen jun p'éel sen eekjo'och'e'enil, ca tu sen ch'a'aj sajaquil. 13Ca túun j a'ala'ab ti' tumen Yuumtzil:
Unaj a wojéeltic, a ch'i'ilancabilo'obe' bíin cajlaco'ob táanxel lu'umil, te'elo' bíin palitzilta'aco'ob, bíin loobilta'aco'ob xan cuatro cientos ja'abo'ob. 14Ba'ale' tene', bíin xan in jadz le múuch' caajo'ob cu bin palitziltico'obo', cu dzo'ocole' a ch'i'ilancabe' bíin jáalkabta'aco'ob, bíin xan u ti'alintajo'ob nucuch ayikalilo'ob. 15Teche', le quéen sen nuxibaqueche' bíin quíimiquech ichil jéedzel óolal, bey bíin a much'abáa yéetel a máanja'an ch'i'ibalo'ob. 16Cu dzo'ocol u máan can yáal ch'i'ibale', a ch'i'ibalo'obe' bíin suunaco'ob ti' le cúuchila', tumen ma' u chuc u máan tip'a'anil u loobilo'ob le j amorreobo'.
17Le ca j áakabchaje' tuláacal j p'áat sen eekjo'och'e'enil, chíicpaj jun p'éel chujcab cu buudzilanquil yéetel jun p'éel tajche' t'aba'an cu káatbal chúumuc le ba'alche'ob buja'antaco'obo'. 18Ti'ili'e' kiino' Yuumtzile' tu beetaj nup t'aan yéetel Abram, ca tu ya'alaj ti':
Le lu'uma' bíin in dzáa ti' a ch'i'ilancab, líikbal tu yáalcab ja'il Egiptoe' tac tu nojoch áalcab ja'il Éufrautes. 19U káat u ya'ale' u lu'umo'ob le j ceneob, j cadmoneob, 20j hititaob, j ferezeob, j refaitaob, 21j amorreob, j cananeob j gergeseob yéetel le j jebuseob.
Արդեն Ընտրված.
Génesis 15: MAYADC
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Biblia Maya de Yucatán © Sociedades Bíblicas Unidas, 1992.