JENESIS 46
46
U Jakob bad la ki khun ki kti ki leit sha ka ri Ijipt
1Ynda kumta, u Israel u la mih noh bad baroh katba u la don, bad u la wan poi ha Beer-sheba, bad u la ainguh da ki jingkñia ïa U Blei jong u Isaak u kpa jong u. 2Bad U Blei u la kren ha u Israel da ki jingithuhpaw mynmiet, bad u la ong, “Ko Jakob, Jakob.” U ruh u la ong, “Ha khmih ma nga.” 3Bad u la ong, “Nga long U Blei, U Blei u kpa jong me: wat sheptieng ban leit hiar sha ka ri Ijipt; naba ngan pynlong ïa me ka jaid bynriew bakhraw hangta. 4Ngan leit hiar ryngkat bad me sha ka ri Ijipt; bad shisha nangta ruh ngan ïalam noh artet pat ïa me: bad u Joseph un ïoh buh ïa la ka kti halor ki khmat jong me.” 5Bad u Jakob u la mih noh na Beer-sheba: bad ki khun shynrang u Israel ki la wallam ïa u Jakob u kpa jong ki, bad la ki khun rit jong ki, bad ïa ki tnga jong ki, ha kita ki kali ïa kiba u Pharaoh u la lah phah lam ïa ka ban kit ïa ki. 6#Ki Kam. 7:14-15.Bad ki la shim ïa la ki jingri ruh, bad ïa la ki jingbuh jingsat, ïa kiba ki la lah kamai ha ka ri Kanaan, bad ki la ïawan sha ka ri Ijipt, u Jakob, bad u symbai jong u baroh ryngkat bad u; 7ki khun shynrang jong u bad ki khun shynrang jong ki khun shynrang jong u ryngkat bad u, ki khun kynthei, bad ki khun kynthei jong ki khun shynrang jong u, bad u symbai jong u baroh keiñ, u la ïalam bad u sha ka ri Ijipt.
8 #
Eks. 1:1-4; Jkñ. 26:4-50. Bad kine ki long ki kyrteng ki khun shynrang u Israel, kiba la wan sha ka ri Ijipt, u Jakob bad ki khun shynrang jong u: u Reuben, u khun nyngkong u Jakob. 9Bad ki khun shynrang u Reuben: u Hanokh, bad u Pallu, bad u Hesron de, bad u Karmi. 10Bad ki khun shynrang u Simeon: u Jemuel, bad u Jamin, bad u Ohad, bad u Jakhin, bad u Sohar, bad u Shaul de, u khun ka kynja Kanaan. 11Bad ki khun shynrang u Lebi: u Gershon, u Kohath, bad u Merari. 12Bad ki khun shynrang u Judah: u Er, bad u Onan, bad u Shelah, bad u Phares, bad u Serah: hynrei, ki la ïap u Er bad u Onan ha ka ri Kanaan. Bad ki khun shynrang u Phares ki la long u Hesron bad u Hamul. 13Bad ki khun shynrang u Issakhar: u Tola, bad u Puah, bad u Job, bad u Shimron. 14Bad ki khun shynrang u Sabulon#46:14 Sabulon: Ha ka Hebru kane ka kyrteng ka dei Sebulun.: u Sered, bad u Elon, bad u Jahlil. 15Kine ki long ki khun shynrang ki jong ka Leah, ïa kiba ka la kha ïa u Jakob ha Padan-Aram, bad ka Dinah ka khun jong ka: ki mynsiem baroh, ki khun shynrang bad ki khun kynthei jong u ki la long laiphew lai ngut. 16Bad ki khun shynrang u Gad: u Siphion, bad u Haggi, u Shuni, bad u Esbon, u Eri, bad u Arodi, bad u Areli de. 17Bad ki khun shynrang u Asher: u Jimnah, bad u Ishuah, bad u Isui, bad u Beriah, bad ka Serah ka para jong ki: bad ki khun shynrang u Beriah de; u Heber, bad u Malkhiel. 18Kine ki long ki khun shynrang ka Silpah, ïa kaba u Laban u la ai ïa ka Leah ka khun jong u, bad ka la kha ïa kine ïa u Jakob, khathynriew ngut ki mynsiem keiñ. 19Ki khun shynrang ka Rakhel, ka tnga u Jakob: u Joseph, bad u Benjamin. 20#Jen. 41:50-52.Bad ïa u Joseph ha ka ri Ijipt la kha ïa u Manasseh, bad ïa u Ephraim, ïa kiba la kha ka Asenath ka khun u Potipherah, u lyngdoh ka shnong On, ïa u. 21Bad ki khun shynrang u Benjamin: u Bela, u Bekher, bad u Ashbel, u Gera, bad u Naaman, u Ehi, bad u Rosh, u Muppim, bad u Huppim, bad u Ard. 22Kine ki long ki khun shynrang ki jong ka Rakhel, ïa kiba la kha ïa u Jakob: baroh ki la long khatsaw ki mynsiem. 23Bad ki khun shynrang ki jong u Dan: u Hushim. 24Bad ki khun shynrang u Naphtali: u Jahsil, bad u Guni, bad u Jeser, bad u Shillem. 25Kine ki long ki khun shynrang ka Bilhah, ïa kaba u Laban u la ai ïa ka Rakhel ka khun jong u: bad ka la kha ïa kine ïa u Jakob; baroh ki la long hynñiew ki mynsiem. 26Baroh kiba la leit bad u Jakob sha ka ri Ijipt, kiba la mih na ka syngkai jong u hi, bad ki tnga ki khun shynrang u Jakob de, baroh keiñ ki la long hynriewphew hynriew ki mynsiem. 27#Ki Kam. 7:14.Bad ki khun shynrang u Joseph, ïa kiba la kha ïa u ha ka ri Ijipt, ki la long ar ngut: kumta ki mynsiem baroh kiba dei ïa ka ïing u Jakob kiba la leit wan sha ka ri Ijipt, ki long hynñiewphew ngut.
U Jakob bad la ki khun ki kti ha ka ri Ijipt
28Bad u Jakob u la phah ïa u Judah sha shuwa jong u sha u Joseph, ba un ïalam lynti ha khmat jong u sha ka ri Goshen; bad kumta ki la ïapoi sha ka ri Goshen. 29Bad u Joseph u la pynkhreh ïa la ka kali, bad u la leit kiew ban tan ïa u Israel u kpa jong u, sha ka ri Goshen, bad u la pynpaw ïa lade ha u; bad u la noh ha ka ryndang jong u, bad u la ïam slem ha ka ryndang jong u. 30Bad u Israel u la ong ha u Joseph, “To ngan wat ïap mynta, ynda nga la ïohi ïa ka khmat jong me, ba me dang im shisha.” 31Bad u Joseph u la ong ïa la ki para, bad ïa ka ïing u kpa jong u, “Ngan leit kiew ban ïathuh ha u Pharaoh, bad ngan ong ha u, ‘Ki hynmen hynbew jong nga, bad ka ïing u kpa jong nga, kiba la ju don ha ka ri Kanaan, ki la poi ha nga; 32bad kine ki briew ki long ki nongsharai langbrot, naba ki la ju long kiba buh jingri; bad ïa la ki kynhun, bad ïa la ki jingri, bad ïa baroh katba ki don, ki la ïawallam ryngkat bad ki.’ 33Bad kan jia ruh haba u Pharaoh un khot ïa phi, bad ba un ong de, ‘Kaei ka kam jong phi?’ 34Te phin ïathuh, ‘Ki shakri jong me ki la ju long kiba ri jingri naduh ba ngi dang long samla haduh mynta, ma ngi ruh bad ki kpa tymmen jong ngi:’ ba phin ïoh shong duh keiñ ha ka ri Goshen; naba u kynja nongsharai langbrot baroh u long ka jingijli ha ki Ijipt.”
Արդեն Ընտրված.
JENESIS 46: KHB
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
The Bible Society of India