GÉNESIS 11
11
Babel shuti torretami ruranajushca
1Cai pachapi causajcunaca, tucuicunami shujlla rimaita chai shimicunatalla rimanajurca. 2Indi llujshimuj ladomanda llujshimushpaca, cashnami ruranajurca: Sinar shuti llactapi tiaj shuj jatun pambata tarishpami, chaipi causai callarinajurca. 3Chaipimi, caishuj chaishuj cashna ninajurca: “Jacuchi, ladrillocunata rurashpa ninapi cusashunchi” ninajurcami. Paicunaca, rumipaj randica ladrillohuan, turupaj randica, asfaltohuanmi ruranajurca. 4Chai jipaca, cashnami ninajurca: “Jacuchi, shuj pueblotapash, shuj torretapash rurashunchi. Chai torrepaj umapash, jahua pachaman chayajta rurashunchi. Tucui cai pachapica, caita chaita cachai tucuipajpash canchi. Shina rurashpami, tucuicuna rijsishca tucushunchi” ninajurcami.
5Shinamandami Mandaj Diosca pueblota, torreta, huañuna aichayu runacuna ruranajujta ricungapaj uriajumurca. 6Mandaj Diosca, cashnami nirca: “Ricuichi, cai runacunaca shujllashnallami causanajun, shinallata shujlla rimaitami rimanajun. Paicunaca, ñami caita rurai callarishca. Cunanga, paicuna rurangapaj yarinajushcataca, imapash na saquichi ushangachu. 7Shina cashcamanda cunanga, paicunapaj rimaita chaipillata pandachingapaj uriajushunchi. Shina rurajpimi paicunapaj cumbacuna rimanajujtaca, pipash na entendi ushanajunga” nircami.
8Chashnami Mandaj Diosca, chai pambamandaca tucui cai pachaman, caiman chaiman cacharca. Chashna cachajpimi, pueblota ruraitaca saquinajurca. 9Shinamandami chai pambataca, Babel shutita shutichirca. Mandaj Diosca, tucui cai pachapi causajcunapaj rimaita chaipi pandachishcamandami, chashna shutichirca. Chai pambamandami paicunataca, tucui cai pachapi causanajuchun, caita chaita cacharca.
Sem shuti runapaj miraicunatami villajun
(1 Crón. 1:24-27)
10Sem shuti runapaj miraicunaca, caicunami: Sem shuti runaca, patsaj huatata charishpami, ninanda tamiashca ishcai huata jipaca, Arfaxad shuti churita charirca. 11Sem shuti runaca, Arfaxad shuti churita charishca jipapash, picha patsaj huatata causajushpami, shuj churicunata, ushicunata charircara.
12Arfaxad shuti runaca, quimsa chunga picha huatata charishpami, Sala shuti churita charirca. 13Arfaxad shuti runaca, Sala shuti churita charishca jipapash, chuscu patsaj quimsa huatata causajushpami, shuj churicunata, ushicunata charircara.
14Sala shuti runaca, quimsa chunga huatata charishpami, Heber shuti churita charirca. 15Sala shuti runaca, Heber shuti churita charishca jipapash, chuscu patsaj quimsa huatata causajushpami, shuj churicunata, ushicunata charircara.
16Heber runaca, quimsa chunga chuscu huatata charishpami, Peleg shuti churita charirca. 17Heber runaca, Peleg shuti churita charishca jipapash, chuscu patsaj quimsa chunga huatata causajushpami, shuj churicunata, ushicunata charircara.
18Peleg shuti runaca, quimsa chunga huatata charishpami, Reu shuti churita charirca. 19Peleg runaca, Reu shuti churita charishca jipapash, ishcai patsaj iscun huatata causajushpami, shuj churicunata, ushicunata charircara.
20Reu shuti runaca, quimsa chunga ishcai huatata charishpami, Serug shuti churita charirca. 21Reu shuti runaca, Serug shuti churita charishca jipapash, ishcai patsaj canchis huatata causajushpami, shuj churicunata, ushicunata charircara.
22Serug shuti runaca, quimsa chunga huatata charishpami, Nacor shuti churita charirca. 23Serug shuti runaca, Nacorta charishca jipapash, ishcai patsaj huatata causajushpami, shuj churicunata, ushicunata charircara.
24Nacor shuti runaca, ishcai chunga iscun huatata charishpami, Taré shuti churita charirca. 25Nacor runaca, Taré shuti churita charishca jipapash, patsaj chunga iscun huatata causajushpami, shuj churicunata, ushicunata charircara.
26Taré shuti runaca, canchis chunga huatata charishpami, Abram, Nacor, Harán shuti churicunata charirca.
Taré shuti runapaj miraicunatami villajun
27Taré shuti runapaj miraicunaca, caicunami: Taré shuti runaca: Abram, Nacor, Harán shuti churicunatami charirca. Harán shuti runaca, Lot shuti churitami charirca.
28Harán shuti runaca, Taré shuti paipaj taitapash nara huañujpillatami, pai huacharishca llactapi, caldeocunapaj Ur shuti pueblopi huañurca.
29Abrambash, Nacorpashmi, huarmicunata cazararca. Abrambaj huarmica, Sarai shutimi carca. Nacorpaj huarmica, Milca shutimi carca. Milca shuti huarmica, Harán shuti runapaj ushimi carca. Harán shuti runaca, Milca shuti, Isca shuti huarmicunapajpash taitami carca. 30Ashtahuangarin Sarai shuti huarmica, huahuata tarinata na yachaj huarmi cashpami, huahuata na charirca.
31Taré shuti runaca, paipaj churi Abramdapash, paipaj churi Harán shuti runapaj churi Lot runatapash, Abrambaj huarmi paipaj jachun Saraitapash pushashpami llujshirca. Shina llujshishpami, caldeocuna causanajuj Ur pueblomandaca, Canaán llactaman ringapaj paicunandi llujshirca. Shina rinajushpami, Harán shuti puebloman chayashpaca, chaipi causangapaj quedanajurca. 32Taré shuti runaca, ishcai patsaj picha huatata causashpami, Harán pueblopi huañurca.
Արդեն Ընտրված.
GÉNESIS 11: QUII
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Quichua Imbabura Bible © United Bible Societies, 1994.