GÉNESIS 9
9
Dios Noehuan ari nishcamanta
1Diosca Noetapish, paipac churicunatapish bendiciashpaca: «Achca huahuacunayuc tucushpa, mirarishpa, tucui cai pachapi jundarichic. 2Cai pachapi tiyac tucui animalcunami manchashpa chucchunga. Volac animalcunapish, allpapi causacuc animalcunapish, mama cuchapi causac challuacunapish cancunapac maquipimi canga. 3Tucui causaita charic animalcunatapish, verdinlla quihuatapish, llullu micunatapish cancuna micuchunmi saquini. 4Aichataca ama yahuarndi micunguichicchu. Yahuarmi causaitaca cun. 5Causaita cuc yahuarmantaca huañuchishcami canga. Maijan huañuchictaca huañuchishcami canga. Maijan animal huañuchicpica, chaitapish huañuchishcami canga.
6Diosca pai shinatacmi
runataca ruhuarca.
Chaimanta maijan shuc runata
huañuchictaca huañuchishcami canga.
7Ashtahuanpish cancunaca
achca mirashpa, achca tucushpa,
cai pachapi jundaichiclla» nirca.
8Dios Noetapish, paipac churicunatapish rimashpaca: 9«Riquichic, canhuanpish, cancunapac huahua huahuacunahuanpish, 10huambuc huasimanta llucshic animalcunahuanpish, volac animalcunahuanpish, sacha animalcunahuanpish, tucui cai pachapi causac animalcunahuanpish shuc ari ninacuitami ruhuagrini. 11Chaitaca pactachishatacmi. Cunanmantaca causaita chariccunataca manatac yacu juizhuhuanca tucuchishachu. Cutinca yacu juizhuca cai pachapica manatac tiyangachu» nirca.
12Chaimantami Diosca: «Ñucahuan, cancunahuanpish, cancunahuan cac causaita charic animalcunahuanpish huiñaicamanmi ari nishca señalta ruhuani. 13Ñucaca cuichitami puyupi churani. Caimi ñucahuan, cai pachahuan ari nishca señal canga. 14Cai pachaman ñuca puyuta cachacpica, ñuca churashca cuichitami ricunguichic. 15Chaita ricushpami cancunahuanpish, tucui causaita charic animalcunahuanpish, ñuca ari nishcata yuyarisha. Cai pachapi tucui causaita chariccunataca yacu juizhuhuanca manatac tucuchishachu. 16Ñuca puyupi cuichita ricushpaca, tucui cai pachapi causac gentecunahuanpish, animalcunahuanpish huiñaipac ari nishcatami yuyarisha» nirca.
17Dios Noetaca: «Caimi cai pachapi causac runacunahuanpish, animalcunahuanpish ari nishcata ricuchic señal» nirca.
Noemantapish, paipac churicunamantapish
18Huambuc huasimanta llucshic Noepac quimsa churicunaca Sem, Cam, Jafetmi carca. Cammi Canaanpac taitaca carca. 19Caicunami Noepac quimsa churicunaca. Paicunamantami cutinllatac cai pachapica jundarimurca.
20Noé allpapi trabajai callarishpaca, uvastami tarpurca. 21Chai uvas vinota ubiashpami Noeca machashpa, chai carpa huasi ucu pambapi lluchulla siricurca. 22Chaipimi Canaanpac taita Camca paipac taita lluchulla siricucta ricushpa, canzhapi cac caishuc ishcai huauquicunaman huillangapac rirca. 23Shina huillacpimi, Sempish, Jafetpish churanata rigra jahuapi churashpa, huashaiman rishpa, paicunapac taita lluchulla cashcata catachirca. Paicunaca shucman tigrarishca cashpami, taita lluchulla cashcata mana ricurca. 24Noé maillacyashpaca paipac quipa churi Cam imata ruhuashcatami yachac chayarca. 25Chaimantami paica:
«Canaán, mana alli nishcami cangui.
Cambac huauquicunata
serviccunamantapish yalli yanga
servicmi cangui» nirca.
26Cutinllatac rimashpaca:
«Ñucata Mandac Dioslla, ñuca
churi Semca alli nishca cachun.
Canaanca paita servic cachun.
27Diosca Jafettaca achcata
mirachishpa, jatun llactata ruhuachun.
Paipac aillucunaca Sem ruhuashca
carpa huasicunapi causachun.
Canaanca paita servic cachun» nirca.
28Yacu juizhu tiyashca quipaca Noeca quimsa patsac pichca chunga huatatami causarcarac. 29Noeca iscun patsac pichca chunga huatata causashpami huañurca.
Արդեն Ընտրված.
GÉNESIS 9: QCA10
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.