GÉNESIS 12
12
Dios Abramta cayashcamanta
1Mandac Diosca Abramtaca: «Cambac allpamantapish, familiamantapish, cambac taitapac huasimantapish llucshishpa, ñuca ricuchigricuc allpaman ri. 2Cambac huahua huahuacunataca shuc jatun llactatami ruhuasha. Canta bendiciashpami, cambac shutitapish tucuipac alli nishcata ruhuasha. Canmantami bendiciashca cangacuna. 3Canta alli niccunataca alli nishami, mana alli niccunataca mana alli nishachu. Canmantami tucui cai pachapi causaccunaca bendiciashca canga» nirca.
4Mandac Dios nishca shinami, Abramca Haranmanta rirca. Lotpish paihuanmi rirca. Abramca canchis chunga pichca huatayuc cashpami, Haranmantaca llucshirca. 5Abramca paipac huarmi Saraitapish, huauquipac churi Lottapish, chaipi randishca runacunatapish pushashpa, Harán llactapi imata ruhuashcamanta japishcatapish apashpa, Canaanman chayarca. 6Abramca chai llactata rishpami, Siquem llactacaman chayashpa, Moré nishca encina yura ladoman chayarca. Chai llactapica cananeocunami causarca. 7Chaipimi Mandac Dios Abramman ricurishpaca: «Cambac huahua huahuacunamanmi cai allpataca cusha» nirca. Chaipimi Abramca paiman ricurishca Mandac Diosman shuc altarta ruhuarca. 8Chaimantaca Bet-el pueblomanta inti llucshic lado urcuman rishpami, shuc carpa huasita shayachirca. Chaipica Bet-el puebloca inti tigrana ladoman, cutin Hai llactaca inti llucshina ladomanmi saquirirca. Chaipimi cutinllatac shuc altarta ruhuashpa, Mandac Diosta mañarca. 9Chaimantaca Abramca ashancaman rishpami, Neguev llactaman chayarca.
Abram Egiptoman rishcamanta
10Chai llactapi yalli yarcai tiyashcamantami Abramca Egiptopi causangapac rirca. 11Abram Egiptoman chayagricushpami, paipac huarmi Saraitaca: «Riqui, canca sumac huarmimi cangui. 12Egipto runacuna canta ricushpaca: “Cai huarmica paipac huarmimi” nishpami, ñucataca huañuchishpa, cantaca mana huañuchinga. 13Cunanca, canmanta tucui alli cachun, shinallatac ñucata ama huañuchichunca canca: “Ñucaca paipac panimi cani” ningui» nirca.
14Abram Egiptoman chayacucpica, Egipto runacuna Sarai huarmita ricushpaca, mai sumac cashcatami ricurca. 15Jatun mandac Faraón churashca mandaccunapish: “Mai sumac huarmimi” nishpami, Saraitaca Faraonpac huasiman pusharca. 16Faraonca Saraimantami Abramtaca cuyarca. Chaimantami ovejacunatapish, vacacunatapish, burrocunatapish, camellocunatapish, servic caricunatapish, servic huarmicunatapish curca.
17Ashtahuanpish Mandac Diosca Abrampac huarmi Saraimantami Faraontapish, paipac huasi ucupi causaccunatapish llaquichirca. 18Chaimantami Faraonca Abramta cayashpaca: «¿Ima nishpatac caita ruhuangui? ¿Ima nishpatac cai huarmitaca cambac huarmi cashcata mana huillarcangui? 19¿Ima nishpatac canca: “Ñuca panimi” nircangui? Chaimantami ñuca huarmi cachun munarcani. Cunanca cambac huarmita pushashpa rilla» nirca. 20Chaimantami Faraonca Abramtapish, paipac huarmitapish, tucui pai charishcacunandi llucchishpa cachachun paipac gentecunata mandarca.
Արդեն Ընտրված.
GÉNESIS 12: QCA10
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.