Génesis 18
18
Dios tsi' wʌn alʌ mi caj i yilan pañimil Isaac
1Lac Yum tsi' pʌsʌ i bʌ ti' tojlel Abraham ba'añ jiñi alʌ te'el ya' ti Mamre, che' ya' buchul Abraham ti ti' pisil bʌ i yotot, che' wen c'uxix q'uiñ. 2Tsi' can q'uele pañimil, tsi' q'uele ya' wa'al uxtiquil wiñicob ti' tojel i wut. Che' bʌ tsi' q'uele, orajach tsa' loq'ui ti pisil bʌ i yotot, tsa' majli i taj tilel cha'añ mi' ch'ʌm ti' wenta, tsi' ñuc choco i bʌ ti lum. 3Abraham tsi' yʌlʌ:
—C yum, mi tsa' c taja i yutslel a pusic'al, mach yomic ñumel jach ma' ñumel ba'añon come x'e'telon a cha'añ. 4Mi caj c choc ti ch'ʌmol tilel ts'ita' ja' cha'añ mi la' poc la' woc, ti wi'il mi' la' c'aj la' wo ti' ye'bal te'. 5Mi caj ch'ʌm tilel ja'el ts'ita' waj cha'añ mi la' cha' p'ʌt-an, ti wi'il mi' mejlel la' cha' majlel; jiñi cha'añ tsa' juliyetla tilel ba'añ la' wiñic.#18.5 Abraham mach yujilic majqui jiñi uxtiquil wiñicob pero tsi' ch'ʌmʌyob ti' wenta che'ʌch bajche' i tilel mi' melob ya' ti jochol bʌ lum (Heb 13.2).
Jiñi uxtiquilob tsi' yʌlʌyob:
—Mele che' bajche' tsa' wʌlʌ.
6Che' jiñi Abraham tsa' majli ti ora ti yotot ba'añ Sara, tsi' su'be:
—Xʌc'ʌ junc'al kilo trigo wen juch'bil bʌ cha'añ ma' mel waj.
7Ti ajñel tsa' majli Abraham ba'añ i wacax, tsi' yajca jujp'em bʌ alʌ wacax, tsi' yʌq'ue jiñi x'e'tel i cha'añ, che' jiñi tsi' chajpa ti ora. 8Ti wi'il tsi' ch'ʌmʌ majlel mantequilla yic'ot i ya'lel i chu' wacax yic'ot jiñi alʌ wacax tsa' bʌ i chajpa, tsi' yʌq'ueyob i c'ux jiñi wiñicob. Tsa' cʌle Abraham ba' añob, tsi' c'uxuyob waj ya' ti ye'bal te'.
9Ti wi'il tsi' c'ajtibeyob:
—¿Baqui añ Sara a wijñam?
Abraham tsi' jac'ʌ:
—Ya'añ ti pisil bʌ otot.
10Che' jiñi tsi' yʌlʌ:
—Isujm ti yam bʌ ja'b mi caj c cha' tilel ba'añet,#Gn 17.21; 2 R 4.16-17 ti jimbʌ q'uiñ Sara a wijñam mi caj i yilan pañimil ch'itoñ bʌ i yalobil.
Sara woli' ñʌch'tan ya' ti ti' yotot che' woliyob ti t'añ Abraham. 11Ñoxobix Abraham yic'ot Sara. Jiñi Sara tsa'ix lajmi i q'uel i c'am-ʌjel. 12Jiñi cha'añ Sara tsi' cha'le tse'ñal, tsi' yʌlʌ ti' pusic'al: “Che' ñoxoñix yic'ot che' ñoxix c yum,#18.12 Sara tsi' pejca i ñoxi'al ti' yum. Q'uele 1 P 3.6. ¿mu' to ba caj c taj i tijicñʌyel c pusic'al?” 13Jiñi cha'añ lac Yum tsi' su'be Abraham:
—¿Chucoch tsi' cha'le tse'ñal Sara? Come tsi' yʌlʌ: “¿Isujm to ba mi caj cʌc' ti pañimil calobil che' ñoxoñix?” 14¿Am ba chuqui wocol mach bʌ mejlic i mel Dios? Che' mi' ts'ʌctiyel i yorajlel mi caj c cha' tilel ba'añet, ti jim bʌ ora Sara mi caj i yilan pañimil ch'itoñ bʌ i yalobil.#Jer 32.17,27; Lc 1.37; Rm 9.9
15Jiñi cha'añ Sara tsa' caji ti bʌq'uen, tsi' yʌlʌ:
—Ma'añic tsa' c cha'le tse'ñal.
Lac Yum tsi' yʌlʌ:
—Mach isujmic, tsa'ʌch a cha'le tse'ñal.
Abraham tsi' pejca Dios cha'añ Sodoma
16Jiñi wiñicob tsa' wa'leyob, tsi' q'ueleyob ti' tojel Sodoma, jiñi cha'añ Abraham tsi' poj lac xʌñʌ majlel yic'otob. 17Lac Yum tsi' yʌlʌ ti' pusic'al: “¿Mu' ba i mejlel c mucben Abraham jiñi mu' bʌ caj c mel, 18che' mi caj i yochel Abraham ti ñuc bʌ tejclum, p'ʌtʌl bʌ yic'ot ba' mi caj i tajob i yutslel c t'añ pejtelel wiñicob x'ixicob año' bʌ ti pañimil? 19Come cujil mi caj i su'beñob i yalobilob yic'ot pejtelel año' bʌ ti' yotot, cha'añ mi' cha'leñob xʌmbal ti' bijlel lac Yum, cha'añ mi' melob chuqui tac uts'at yic'ot chuqui tac toj, cha'añ che' jiñi mi caj c ts'ʌctesan c t'añ tsa' bʌ cʌlʌ ti' tojlel Abraham.” 20Jiñi cha'añ lac Yum tsi' su'be:
—Woli' cʌlʌx p'ojlel t'añ ti' contra jiñi año' bʌ ti Sodoma yic'ot ti Gomorra cha'añ ti' caj wen ca'bʌlob i mul.#18.20 Jiñi mulil am bʌ ti Sodoma yic'ot ti Gomorra jiñʌch cha'añ tsi' laj bʌ pi'leyob i bʌ wiñicob (Jd 7). Jiñi x'alt'añob tsi' yʌlʌyob cha'añ jiñi wiñicob tsi' cha'leyob ti' chajp ti' chajp mulil ti' tojlel i pi'ʌlob. Ti Is 1.10-17; 3.9, mi yʌl cha'añ ma'añic tsi' cha'leyob toj bʌ meloñel ti' tojlel i pi'ʌlob; ti Jer 23.14 mi yʌl cha'añ añ ts'i'lel, añ lot, yic'ot yan tac bʌ jontolil; ti Ez 16.49 mi yʌl cha'añ tsi' q'ueleyob i bʌ ti ñuc, yic'ot ma'añix tsi' chʌn ña'tayob i wenlel jiñi p'ump'uño' bʌ. Q'uele nota am bʌ ti Gn 19.5. 21Wʌle mi caj c ju'bel majlel#Gn 11.5; Ex 2.25 j q'uel mi' isujm tsi' cha'leyob mulil che' bajche' c'amel woli cu'bin; ya'ʌch mi caj q'uel mi' isujm.
22Jiñi wiñicob tsi' tʌts'ʌyob i bʌ ba'añ Abraham, tsa' majliyob ti Sodoma; pero Abraham tsa' to cʌle yic'ot lac Yum. 23Abraham tsi' lʌc'tesa i bʌ, tsi' c'ajtibe:
—¿Mu' ba caj a jisan jiñi tojo' bʌ yic'ot jiñi jontolo' bʌ? 24Ixcu mi añ lujuntiquil i yuxc'al (50) tojo' bʌ ti jiñi tejclum: ¿Mu' ba caj a jisan jiñi tejclum che' jiñi? ¿Mach ba añic mi caj a coltañ cha'añ jiñi lujuntiquil i yuxc'al (50) tojo' bʌ ti jiñi tejclum? 25Mach uts'atic ma' wʌc' ti chʌmel jiñi tojo' bʌ yic'ot jiñi jontolo' bʌ, mach che'ic yom mi' melbentelob jiñi tojo' bʌ che' bajche' jiñi jontolo' bʌ. ¡Mach che'ic yom ma' mel! Jiñi xMeloñel mu' bʌ i mel pejtelel año' bʌ ti pañimil, ¿mach ba yomic mi' mel chuqui toj?
26Che' jiñi lac Yum tsi' jac'ʌ:
—Mi tsa' c taja ti Sodoma lujuntiquil i yuxc'al (50) tojo' bʌ ti jiñi tejclum, mi caj c ñusʌbeñob ti' pejtelel jiñi tejclum cha'añ i c'uxbintel jiñi tojo' bʌ.
27Abraham tsi' cha' cha'le t'añ, tsi' yʌlʌ:
—Ti wocol t'añ mi c pejcañet c Yum, u'bibeñon c t'añ, anquese ts'u'bejñon yic'ot i tʌñʌlon jach c'ajc. 28Ixcu mi añ to yom jo'tiquil cha'añ mi' tajtʌl jiñi lujuntiquil i yuxc'al (50) tojo' bʌ: ¿Mu' ba caj a jisan pejtelel jiñi tejclum cha'añ ma'añic tsa' tajle jo'tiquil?
Lac Yum tsi' jac'ʌ:
—Ma'añic mi caj c jisan jiñi tejclum mi tsa' c taja jo'tiquil i yuxc'al (45) tojo' bʌ.
29Abraham tsi' cha' pejca lac Yum:
—¿Ixcu mi añ jach tsa' tajle cha'c'al?
—Ma'añic mi c jisan cha'añ i c'uxbintel jiñi cha'c'al (40) —che'en lac Yum.
30Abraham tsi' cha' su'be lac Yum ti wocol t'añ:
—Mi c pijtan c Yum cha'añ ma'añic ma' mich'an che' mij c'ajtibeñet: ¿Ixcu mi añ jach lujuntiquil i cha'c'al (30)?
—Ma'añic mi c jisan mi tsa' c taja lujuntiquil i cha'c'al (30) —che'en lac Yum.
31Abraham tsi' cha' wersa c'ajti:
—Mux c cha' wersa c'ajtibeñet c Yum che' bajche' iliyi: ¿Ixcu mi añix to junc'al ya'i?
Lac Yum tsi' jac'ʌ:
—Ma'añic mi c jisan cha'añ i c'uxbintel jiñi junc'al.
32Abraham tsi' cha' alʌ:
—Mi c pijtan cha'añ ma'añic ma' mich'an c Yum; cojax junyajl mij c'ajtibeñet: ¿Tic'ʌl mi añ jach lujuntiquil ya'i?
Lac Yum tsi' jac'ʌ:
—Ma'añic mi c jisan cha'añ i c'uxbintel jiñi lujuntiquil.
33Che' bʌ tsa' ujti ti t'añ lac Yum yic'ot Abraham, lac Yum tsa' majli, ixcu Abraham tsa' sujti majlel ti yotot.
Արդեն Ընտրված.
Génesis 18: NTCH
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Biblia de Estudio en Ch´ol de Tumbalá, Chiapas, México © Sociedad Bíblica de México A.C. Active Translation in Process