MATTHAI 17
17
Jesuh Muei Thawlengna
(Mk. 9:2-13; Lk. 9:28-36)
1Hinruk a diw raih coengah Jesuh lawng Piter, Jeem oen Johan te tlaangsawm la a luui puei tih amami bueng te huen ah awm u, 2Tevengah ahimi mik huh ah Jesuh kah a muei te thawleng u: a mik-hai tah khawmik angla aang tih a bai a naak khaw bawk tih aang rawngtheng. 3Tecoengah Mosi oen Elijah tah Jesuh oen ah awl a thui u te a hubang pathum hue lawng a huh. 4Tedawngah Piter lawng Jesuh nala “Bawipa, he huen ah mami awm ham theen tangkiik. Na kawngaih atah im pathum: nang ham pakhat, Mosi ham pakhat, Elijah ham pakhat he ah ka sa u ai,” a tina.
5Piter lawng awl a thui lii vengah ahimi te aka bawk tangkiik muui lawng a thiing khoep u tih muui khuikah awl lawng, “He tah ka lungvatna ka Capa ni, ahih sawah ka kaw hoe, a awl ngaai pe uh,” tila a thui.
6Te awl te a hubang hue lawng a yaak vengah a rih tangkiik u dawngah dilai ah a mik-hai a buengkhuem tih kawpp u. 7Jesuh lawng ahimi tengla law tih ahimi te a tek. “Tho u loeih, rih u boel!” a tina. 8Tedawngah ahimi lawng a bueh vengah, Jesuh bueng nawh tah a-u khaw hu u tlaih nawh.
9Tlaangsawm kalawng a rum thuk u vengah, ahimi te, “He kah na huh u huhthlaam he Thlaanghing Capa duekna kalawng a thawh thlantoe thui u boel,” tila awl a uen.
10Tecoengah a hubang hue lawngah, “N'tu dawngah phungawl cangpueikung thli lawng Elijah he lamhacuekla law ai a ti u kai? tila Jesuh te a doet u.
11Jesuh lawng, “Elijah tah lamhacuekla law tangtang vetih soeprep boeih te aroek abah oepsoeh ai. 12Tede kavan thui u, Elijah tah law coeng poen de thlaang lawng a ming u nawh dawngah amami ngaikhuekla ahih te a thena u. Tetih van angla Thlaanghing Capa he khaw a thekhana u ai,” a tina.
13Tecoengah a hubang hue lawng Baptisma pekung Johan kawng ni ahimi tengah avan thui tila a yaakming u.
Jesuh Lawng Raaithe Aka Khueh Tawngpaca A Hoeih Sak
(Mk. 9:14-29; Lk. 9:37-43a)
14Ahimi lawng thlaangping tengla a mel koep u vengah, Jesuh tengla thlaang pakhat law tih a haiah khuklu oen cuengkueng tih, 15“Bawipa, ka capa he van reen lah! Ahih tah raaihum tlawhna a khueh tih patang a khang tangkiik. Hai dawngah khaw, tui dawngah khaw tlim taitu. 16Na hubang hue tengah ka khuen de, ahimi lawng hoeih sak thai u nawh,” a tina.
17Jesuh lawng, “Oengna aka khueh nawh nangmi thlaangthe hue! Metuek toe nangmi he kan awm puei u hun ai? Meveng tue toe kan nueh u hun ai? Camaw te ka tengla van khuen u lah,” a tina. 18Jesuh lawng raaithe te awl a peek tih camaw kaw khui kalawng raaithe te co, kawlkalh ah ahih tah hoeih pahoei.
19Tecoengah a hubang hue amami bueng Jesuh tengla law u tih, “N'tu dawngah kaimi lawng raaithe ka hek thai u nawh?” tila a doet u.
20Jesuh lawng, “Nangmi lawng oengcakna na khueh u nawh dawngah ni, Atak tang kavan thui u, antammu teh maimah oengna na khueh u kawinih nangmi lawng he tlaang he, he kalawng ke la thoeih lah na tina u a tah thoeih ai, nang mi lawng soeprep boeih na sai u thai ai. 21Tede, he ang raaithe tah thangthuina oen buh yehna bueng nawh atah atloe n'tu oen khaw hek thai la awm nawh,” a tina.#17:21 Khatsut caciim dawng atah 17:21 he thut u nawh.
Jesuh lawng A Duekna Kawng A Thui Koep
(Mk. 9:30-32; Lk. 9:43b-45)
22A hubang hue Galili la a law boeih u vengah Jesuh lawng ahimi tengah, “Thlaanghing Capa he thlaang kut dawngah a peek u ai. 23Ahih te a ngawn u ai, tede athum hin ah tho koep ai,” tila a thui. A hubang hue tah a kaw the u tangkiik.
Tempal bok-im Kah Mangmu Peekna Kawng
24Jesuh oen a hubang hue Kapernaum a pha u vengah, Tempal bok-im kah mangmu cawikung hue Piter tengla law u tih, “Na saya lawng Tempal bok-im kah mangmu a peek van aw? tila a doet u.
25Piter lawng, “Oeih, a peek,” a tina. Piter te im khuila a kuun vengah Jesuh lawng a voem lamha tih, “Simon, metila na poek? A-u lawng he dilai sengpahrang tengah ram tloe kah thaihu khuen phu oen mangmu a peek? Ram khuikah thlaang lawng aw? Tihnawhtah ram tloe thlaang lawng aw?” a tina.
26Piter lawng, “Ram tloe thlaang lawng a peek ai,” a tina. Jesuh lawng, “Theen, ram khuikah thlaang lawngtah peek ham ngoe nawh,” a tina. 27Tede he thlaang hue he a thinsa sak ham ka ngaih nawh. Tedawngah tuilii la cet lang nga vaih lah. Lamhacuek la na tuuk nga kah a kaa khuiah nang oen kai ham Tempal mangmu peek khoek tangka na dang ai. Te tangka te lo langtah mahih kah mangmu la ahimi te pe hawn, a tina.
Արդեն Ընտրված.
MATTHAI 17: MCNT2006
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Matu Chin New Testament © Bible Society of Myanmar, 2006.