Rkaa̱ 4
4
Bi̱ tsꞌén kachjatꞌayákón Kjisoo̱
(Matioo̱ 4:1-11; Markoo̱ 1:12-13)
1Kó Kjisoo̱ kisꞌikitsié maá A̱si̱énni̱xtjii̱n Néná nga kjindibáni ndejèꞌ Jorndaa̱n, sꞌe̱ A̱si̱énni̱xtjii̱n kijíjo̱ nangi kixií, 2kó yichán ni̱xtjin kisꞌijña ki̱a̱a̱, sꞌe̱ xindajín ndiabloo̱ askotꞌayákón. Kó jmí ni iskjiniejín kui ni̱xtjii̱n, kó ngije jaꞌa kui ni̱xtjin xi yichaán, kamábojoó. 3Kósꞌe̱ xindajín ndiabloo̱, bi̱ katsoó:
–Tsi ja̱koxi̱ nga ji xi ndií Néná, bo̱a̱ tꞌíi̱n kui ndi̱jo̱o̱ nga pan ngatama.
4Kó Kjisoo̱, bi̱ katsoó:
–Jè kjitꞌa xo̱jo̱n eén Néná nínga bi̱ tsoó: “Jmí tsi ta̱ pan tsí xi kꞌuijñáni ngo xota̱, chjiénrií ngayeje ni xi tsó eén Néná.”
5Kó kui xindajín ndiabloo̱, kijíjo̱ Kjisoo̱ ngo tji̱ngi̱ xi ꞌniú nkꞌa, kó akoó ngotjón chií ngayeje ngi̱ndie nínga botíxoma xi tjín nga̱sondiee̱. 6Kó xindajín ndiabloo̱, bi̱ katsoó:
–Ji tsjaa ngayeje kui ngaꞌniuú ko̱jo kjo̱a̱jee̱ kui na̱xi̱ńdaá, ngatꞌa̱ an jè katseꞌéna, kó ka̱ma tsjàa̱ ta̱ ꞌyání xi mejénna nga tsjàa̱, 7tsi ko̱si̱ntꞌénítikóo̱ nga si̱ꞌindikínní, ngayeje kui nii̱ xi tse̱ ka̱ma.
8Kó Kjisoo̱, bi̱ katsoó:
–Chjéndi̱yáa̱ xindajín Satana̱, ngatꞌa̱ jè kjitꞌa xo̱jo̱n eén Néná, nínga bi̱ tsoó: “Ndi̱a̱ xi Ne tse̱ xí ti̱ꞌindikín jí, kó ta̱kuítsí xi si̱ꞌinxétꞌée̱.”
9Kó kui xindajiín kijíjo̱ Kjisoo̱ na̱xi̱ńdáꞌniú Jerusale̱n, kó ki̱a̱ asién són nkꞌaa̱ na̱ngo̱xi̱i̱, kó bi̱ katsoó:
–Tsi ja̱koxi̱ nga ndií Néná jí, tjajmingí ji yojòo̱, 10ngatꞌa̱ jè kjitꞌa xo̱jo̱n eén Néná, nínga bi̱ tsoó:
Néná sa̱ngíyá ndítsjiee̱ tiña nínga tindyin ji, tsi̱ꞌe̱ nga skoón.
11Kó tsja ko̱óꞌniúnií, tsi̱ꞌe̱ nga ngojín ndi̱jo̱ stingí ndsa̱ki ji.
12Kó Kjisoo̱, bi̱ katsoó:
–Ti̱ bi̱ ti̱ tsó xo̱jo̱n eén Néná: “Ka̱májín chjátꞌeyékín ji Ndi̱a̱a̱, kui xi Nèe̱.”
13Kó kui xindajín ndiabloo̱ ngije kasakojiín kótsꞌèn skótꞌayákón ngase Kjisoo̱, kjín ni̱xtjin katsꞌénkjii̱n yojoo̱.
Bi̱ tsꞌén ítsꞌi̱yanii̱ Kjisoo̱ nga katsꞌén xaá
(Matioo̱ 4:12-17; Markoo̱ 1:14-15)
14Kó Kjisoo̱ kijí nginí nangi Ngalilea̱ ngije ꞌniú tjíjii̱n A̱si̱énni̱xtjii̱n Néná, kó ngayeje xota̱ xi síndo nangi Ngalilea̱ tsíchji̱a̱ kjo̱a̱a̱ kui. 15Kó Kjisoo̱ akóyá xki̱ ndiꞌa nínga ndokjo̱a̱ eén Néná xí tjín ki̱a̱a̱, kó ngayeje xota̱ xi kijíndikoón ni xi katsꞌén.
Bi̱ tsꞌén kijíndikoón xotaa̱ kjo̱a̱a̱ Kjisoo̱
(Matioo̱ 13:53-58; Markoo̱ 6:1-6)
16Kó Kjisoo̱ jachó na̱xi̱ńdáꞌniú Nasaree̱t, ki̱a̱ nínga kamáxchá, kó ngo ni̱xtjin ndikón tsꞌasꞌien ngi̱ya ndiꞌa nínga ndokjo̱a̱ eén Néná, xikótsꞌèn ngaá, kó kasasienkixi̱ nga katsꞌényà xo̱jo̱n eén Néná. 17Kó katseꞌeé nga katsꞌényà ngo chꞌo̱ xo̱jo̱n xi katsꞌénda nda̱ chji̱ni̱e̱ꞌe̱én Néná xi ꞌmí Isayaa̱, kó nga iskjíxꞌá xo̱jo̱o̱n, ki̱a̱ má kasakoo̱, nínga bi̱ tsó:
18A̱si̱énni̱xtjii̱n Ndi̱a̱a̱ tikónjinna, ngatꞌa̱ jè katsjáxána,
tsi̱ꞌe̱ nga an xi kꞌuini̱jmìi̱ éntjatsi̱e̱e̱ ngayeje xota̱ ni̱ma̱,
katsangiyana nga sa̱ꞌindaya an xota̱ xi oo̱n ini̱ma̱a̱,
ko̱jo nga xiyàa̱ nga je kꞌuitsómandé xota̱ xi ndyi̱a̱ꞌya ndo̱bo̱a̱yà
ko̱jo nga tsjàa̱ nga ka̱matsijee̱n xota̱ xi ti̱ka̱,
ko̱jo nga kꞌuindondé án xota̱ xi ndajín tjíniꞌánjo̱,
19ko̱jo tsi̱ꞌe̱ nga kꞌuini̱jmìi̱ ngayeje xotaa̱ kui nó ndaa̱ Néná.
20Kó ngije íchjá kui chꞌo̱ xo̱jo̱o̱n, katsjaá nda̱ xi tikónnda ndiꞌa nínga ndokjo̱a̱ eén Néná, kósꞌe̱ kisꞌijña, kó ngayeje xota̱ xi síndo ki̱a̱a̱ askotsijen ndá ndaá Kjisoo̱. 21Kó ítsꞌi̱yanii̱, nga bi̱ katsoó xotaa̱:
Ngotꞌe̱ ꞌne̱ nga ngindyikónjnú, nga je jatjosón ni xi tsó xo̱jo̱n eén Néná.
22Kó ngayeje xotaa̱ nda tsíchji̱a̱ kjo̱a̱a̱ Kjisoo̱, kó kijíndikoón kjo̱a̱a̱ kui én tsjatsó xi tsíchji̱a̱, kó bi̱ katsó nga asíyá ja̱kꞌi̱e̱ ja̱ngajaán xkjín:
–A kuijín xi̱ꞌbi̱ xi ndií Kosiee̱.
23Kó Kjisoo̱, bi̱ katsoó kui xotaa̱:
–Ja̱koxi̱ nga jún bi̱ra̱ ndyi̱ꞌmìjnúu̱ xikó tsó kui énkjiín: “Chji̱ni̱e̱ndiki, ti̱ jii ti̱ꞌindaye ji yojòo̱.” Kó ti̱ bi̱ra̱ ndyi̱ꞌmìjnú nga: “Ti̱ ti̱ꞌin ji kꞌi̱e̱ nangìi̱, ni xi kandaꞌyá ji̱n kjo̱a̱a̱ ngayeje ni xi kamá na̱xi̱ńdáꞌniú Kapernau̱n.”
24Kó bi̱ katsó ngase Kjisoo̱:
–Ja̱koxi̱ ni xi xiánjnúꞌun nga ngojín nda̱ chji̱ni̱e̱ꞌe̱én Néná xi nda tsꞌén xcha̱ ti̱ ki̱a̱a̱ nangii̱. 25Ta̱nga ja̱koxi̱ ni xi xiánjnúꞌun nga achichí má ínchjín kꞌán xi je kꞌien xi̱ꞌii̱n xi kisꞌie Israee̱l kui ni̱xtjin nga kisꞌijña nda̱ chji̱ni̱e̱ꞌe̱én Néná xi ꞌmí Eliyaa̱, kjiꞌanga jmí stsé tsaꞌájín ján nó ko̱jo jun sá, kó achichí kjindiá kisꞌie ngayeje nga̱sondiee̱, 26kó nde ngojín kui ínchjín kꞌán xi chji̱a̱ni Israee̱l xi kanangiyachoo̱n Eliyaa̱, ta̱ ngo tsí chjo̱on kꞌán xi asíko̱jo xi chji̱a̱ni na̱xi̱ńdá Sarepta̱, nangi xi tiña manii̱ nangi Sindo̱n. 27Kó ti̱ bo̱a̱ ti̱ tsꞌén ki̱a̱ Israee̱l kjín má xota̱ xi tjiín chiꞌin xi tsꞌénkjátsón tji̱xin yojoná kisꞌie kui ni̱xtjin jàn, nga kisꞌijña nda̱ chji̱ni̱e̱ꞌe̱én Néná xi ꞌmí Eliseoo̱, ta̱nga nde ngojín kui jaá xi kamátsjiejón, ta̱kuítsí nda̱ xi ꞌmí Naamaa̱n xi chji̱a̱ni nangi Siria̱.
28Kó nga tsintꞌié kuí nii̱ kui xota̱ xi síndo ngi̱yaa̱ ndiꞌa nínga ndokjo̱a̱ eén Néná, achichí katsꞌénxchán. 29Kó jastjíe̱n kui xotaa̱ nga tsangatji̱ngii̱ Kjisoo̱ ngi̱jin na̱xi̱ńdáꞌniuú, kó kijíjo̱ ngo tji̱ngi̱ nkꞌa nínga tikón xoó kui na̱xi̱ńdáꞌniuú, tsi̱ꞌe̱ nga ki̱a̱ kꞌo̱jmingí. 30Ta̱nga Kjisoo̱ jaꞌájin masien masiee̱n ngi̱jii̱n kui xotaa̱, sꞌe̱ kijí.
Bi̱ tsꞌén katsꞌéndaya Kjisoo̱ ngo nda̱ xi tjíjii̱n a̱siénni̱xtjin xi ndajín
(Markoo̱ 1:21-28)
31Kó Kjisoo̱ kijí Kapernau̱n, ngo ndí na̱xi̱ńdáꞌniú xi chji̱a̱ni nangi Ngalilea̱, kó nga ni̱xtjin ndikón akóyaá xotaa̱. 32Kó xotaa̱ kijíndikoón xikótsꞌèn akóyá Kjisoo̱, ngatꞌa̱ tsíchji̱a̱ xikó maá tsi xá tjiín.
33Kó ki̱a̱ ndiꞌa nínga ndokjo̱a̱ eén Néná, kisꞌijña ngo nda̱ xi tikónjii̱n ngo a̱siénni̱xtjin xi ndajín, kó ꞌniú askjandáyà, nga bi̱ katsó:
34–Mí xí tjiín kjo̱a̱a̱ ji̱n, Kjiso̱ xi chji̱a̱ni Nasaree̱t. A jè kjoéꞌe̱ niꞌínkjiéjne̱. Jè be an nga jí boá xi xota̱ tsjiee̱ Néná.
35Kó Kjisoo̱ katsꞌénxchánjo̱ kui a̱siénni̱xtjin xi ndajiín, nga bi̱ katsoó:
–¡Se niꞌín ji, kó ti̱tjaxi̱e̱jin yojoo̱ kui nda̱a̱!
Kó kui xindajiín tsꞌajmitójó kui nda̱a̱ ngindyi̱ko̱n ngayeje xotaa̱, kósꞌe̱ jatjoxiejii̱n ngi̱jin yojoo̱, kó katsꞌénꞌónjiín. 36Kó ngayeje xotaa̱ nga kijíndikoón, kó ja̱kꞌi̱e̱ ja̱ngaján, bi̱ katsoó xkjín:
–Mí eén xi̱ꞌbi̱, nga kui nda̱a̱ tjiín xá, kó tjiín ngaꞌniú nga botixómaá a̱siénni̱xtjin xi ndajín, kó fotjo.
37Kó ngayeje ngi̱ndie xi síndotꞌa kui nangii̱ nga kandokjo̱a̱ kjo̱a̱a̱ Kjisoo̱.
Bi̱ tsꞌén katsꞌéndaya Kjisoo̱ ṉchiꞌyaá Peé ko̱jo kjín xota̱ xi oo̱n
(Matioo̱ 8:14-15; Markoo̱ 1:29-31)
38Kósꞌe̱ Kjisoo̱ jastjíe̱n, kó jatjo ndiꞌa nínga ndokjo̱a̱ eén Néná, sꞌe̱ kijí ndiꞌaa̱ nda̱ xi ꞌmí Ximoo̱. Ṉchiꞌyaá Ximoo̱ achichí ṉtꞌe̱ ndyi̱a̱a̱, kó ꞌniú kichjiáꞌaá Kjisoo̱ nga sa̱ꞌíndaya kui xota̱chjo̱on. 39Kó Kjisoo̱ kixixtien nga̱són nínga kjiꞌijña kui xota̱chjo̱on, kó katsꞌénxchánjo̱ ṉtꞌe̱e̱, sꞌe̱ katjoꞌóxín, kó tji̱e̱nmá jastjíe̱n kui xota̱chjo̱on, sꞌe̱ katsꞌénseén kui jaá.
Kjisoo̱ bi̱ tsꞌén katsꞌéndaya kjín xota̱ xi oo̱n
(Matioo̱ 8:16-17; Markoo̱ 1:32-34)
40Kó nga tsꞌatjé tsꞌueé, ngayeje xota̱ xi tjín xkjín xi tjiín chiꞌin xi kꞌi̱e̱ xi ngaján jachóchinií Kjisoo̱, kó kuí katsꞌénjo̱ nga ngo nga ngo kui xotaa̱, kó kamándayaa̱. 41Kó kjín má kui xotaa̱ xi jataxiejin ngi̱jin yojoo̱ xindajín, xi askjandáyà má nga bi̱ katsó:
–¡Jí xí ndií Néná jí!
Ta̱nga Kjisoo̱ katsꞌénxchánjo̱, kó katsjandièjiín nga tsíchji̱a̱, ngatꞌa̱ kui xindajiín, ja̱bo̱a̱ jè be nga Kjisoo̱ xi Kristoo̱.
Bi̱ tsꞌén íni̱jmì Kjisoo̱ eén Néná nangi Ngalilea̱
(Markoo̱ 1:35-39)
42Kó nga kisisie̱èn, jataxie Kjisoo̱, kó kijí ngo ngi̱ndie tꞌaxín, kó xotaa̱ tsangase, kó nga jachókoón nínga tikón, kamámejeén íjñaꞌniú tsi̱ꞌe̱ nga ku̱i̱ꞌíjñámasienjín kui xotaa̱. 43Ta̱nga Kjisoo̱, bi̱ katsoó:
–Ti̱ chjiéngá kꞌuini̱jmì an kje̱ꞌe na̱xi̱ńdá kuí éntjatsi̱e̱ xi chji̱a̱ kjo̱a̱a̱ nínga botixómá Néná nga, ngatꞌa̱ kuí xá kanangiyana.
44Kó bo̱a̱ tsꞌén Kjisoo̱ íni̱jmì eén Néná ki̱a̱ ndiꞌa nínga ndokjo̱a̱ eén Néná xí síndo nangi Jundea̱.
Արդեն Ընտրված.
Rkaa̱ 4: MAIX
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014