Matta 7
7
Kuma nu aaki ɓa
(Luk 6:37-38, 41-42)
1“Na nu zop ɓu̱ aaki ɓa, nduk ɓu̱ na zop ɓaanu zum ɓa. 2Ku̱me kumar no kumaki nduki si nang ke kumar nu̱ke ka ɓa kumaki si. Du̱ɓ zhiiri no zhiiki ye nduki mban, ka ɓa zhi yor ba si.
3“Nu̱m saki ta nggu̱t ye wuzu̱ndi nu̱ke a mbu̱ yiti mu̱dlo yang no damta ndu̱ kodong qu̱far nu̱ke a mbu̱ ɓaa yitorang ɓa? 4Yang tu̱k, to ka ze mu̱dlo no za bu fed nga ye wuzu̱ndi ɓar yor mbu̱ yitora kikimnda, nu̱ke kodong qu̱fara nje mbu̱ yitorang na? 5To nu̱ mu̱na, fed kodong qu̱far nu̱ke a mbu̱ yitorang ɓar dong, kom to ka na njiv fet ye wuzu̱ndi nu̱ke a mbu̱ yiti mu̱dlwang ɓar mbari.
6“Vu̱r nu ɗyi shakhshakhndi ye yiɗaku ɓa. Yang vu̱r nu ndogdi nu̱ zhaaji ye aledeku ɓa. Ku̱me ka khatl nu̱gha ku, tu̱ yang gaɓ nu̱ ɗyinonu tu̱ ruɓa nun gha.
Khuɗ ma, Laɓ ma, Ghwaɗ ma
(Luk 11:9-13)
7“Ku̱s ma khutan ka vu̱r ye nu, ku̱s ma laɓtan tun ka gwa. Ku̱s ma ghwatan ka qu̱n ye nu. 8Ku̱me aaki khuɗki ka vu̱r yenda, aaki laɓki ka gwa, njif nu̱ ghwaɗki ka qu̱n yenda.
9“Woɗye ki chele ɓaanu woi ɓaran ka khuɗki ɗye zu̱mndi khanda tu̱ yang vu̱r ndogdi yenda? 10Wanang tu̱k, mbu̱ woyang khuɗ kya yurvu, ka vu̱r su̱ti yenda mu? 11Mbu̱ yang tunu aa nu̱ke tun nu̱ mu̱narku yang tun wa zu̱n ɗyi mbarkandi nu̱ke tun ka vu̱rki ye qusonggi ɓaanu, yang Zhinonu nu̱ke a mbu̱ viɗi ɗa, ai ka vu̱r ɗyi mbarkandi ye nduki nu̱ khuɗki nda! 12Kap ɗyi nu̱ke tun a shim ku̱ nduk shi ye nu tun shi ye wor tu̱k, ku̱me nang ke ɗyi nu̱ Wopar ɓu̱ Musa ndu̱ annabikwang shogaki ɓara.
Me vi Ɓorɓorndi
(Luk 13:24)
13“Vi ma ve me vi ɓorɓorndang, ku̱me me vi nu̱ka ɗu̱ki ndu̱ nduk giɗim ɓai dlamdlam. Ku̱me mburi njivanang ndolndol, nu̱ mburan ku khang. 14Yang me vi nu̱ka ɗu̱ki ndu̱ nduk ye maa nyifi ɓorɓor, mburi njivanang bonye si. Nu̱ mburan khang ku ɓa.
Nduk ka zu̱n Qu̱fa nu̱ ve Khar Yen
(Luk 6:43-44)
15“Ku̱r ma vaanu ndu̱ kotame annabiku nu̱ka ɓa ki she nu mbu̱ shipar ɓu̱ ndu̱ɓangku yang wa ɗya yiɗi gaari nu̱ke a tu̱k meeri maɗyi ku. 16Tun ka zu̱n wor nu̱ ku̱nshe ɗye shir ɓaanda. Woɗye nduk wa ka ɗakh ye ɓaawu ve nggoɗuma mu, yang tu̱k nduk wa ka ɗakh ye suga ve qu̱far daanggir mu? 17Wanang tu̱k, aa nyi qu̱far mbarkandi wa ka kha qusonggi mbarkandi, yang qu̱far malkandi ka kha kya qusonggi malkandi. 18Qu̱far mbarkandi nu̱ka kha qusonggi malkandi ɓa, wanang tu̱k qu̱far malkandi nu̱ka kha qusonggi mbarkandi zum ɓa. 19Kap qu̱far nu̱ke nu̱ kha qusonggi mbarkandi ɓa, ka ku̱m nu̱gha tu̱ mbuk nu̱ ɓai. 20Ku̱me nang tun ka zu̱n annabi wollo ku nu̱ ku̱nshe ɗye shir ɓaanda.
Sar da nang zu̱ndo nu ɓa
(Luk 13:25-27)
21“Kap nduki nu̱ka qaki nga ‘Zhinerem gwaanji, Zhinerem gwaanji’ ka viki nu̱ mbu̱ kwaaɗar ɓu̱ Magham ɓa, kope njif nu̱ shiki ɗyi nu̱ke Zhinkir ɓang nu̱ke a mbu̱ viɗi a shimndan. 22Ye fu̱ɗar naandang nduki khang ka zu̱ ya ku za, ‘Zhinerem gwaanji, Zhinerem Gwaanji! Chem wopaki ɓalar ɓu̱ Magham mbu̱ dlu̱mor ɓa goma? Nyem komba khu̱kheeti ku mbu̱ dlu̱mor de? Nyem shi ɗye lazhamku khang mbu̱ dlu̱mo ɓa?’ 23Kom yang ngga ze wor nga za, ‘Sar da nang zu̱ndo nu ɓa, ɗu̱ ma ya ɓar fan, tun nu̱ tlu̱nar malkandi.’
Nu̱ Du̱ndiku Rap
(Luk 6:47-49)
24“Ku̱me nang, njif nu̱ tu̱kki ɓalar ɓang nang tu̱ shi tlu̱nar si, ka kha wa nu̱ kaɗari nu̱ du̱nki rafti ɓaran nu̱ ɗyin tandal. 25Nu̱ romnda ɓa ki, tu̱ zoɗarku nyedli, tu̱ khu̱kheeti a gu̱ri tu̱ ɓu̱tl nu̱ ve raftang, yang nu̱ gu̱ɗa ɓa, ku̱me sa saari du̱ndang nu̱ ɗyin tandal.
26“Yang tu̱k kap njif nu̱ tu̱kki ɓalar ɓang nang, tu̱ yang zhang tlu̱nar si gha a khar wa nggu̱bu̱ng nggur nu̱ du̱nki rafti ɓaran nu̱ ɗyin wuɗyiri. 27Nu̱ khiiki romndi, tu̱ zoɗarku nyedli, tu̱ khu̱kheetang gu̱ri tu̱ ɓu̱tl nu̱ ve raftang, tu̱ raftang gu̱ɗa, gu̱ɗar malkandi.”
28Nu̱ Yesu woɗaki zu̱ ɗyikunang, tu̱ tabar ndukikwang shi lazham ɓu̱ pooni shogar ɓaranang. 29Ku̱me shi shogarang ye wor wa njif nu̱ zalala, wa ngga yen ndu̱ Maalu̱m Taurete kwang.
Արդեն Ընտրված.
Matta 7: ttrNT
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016