Matta 4
4
Sheɗan wa Buu Yesu
(Mar 1:12-13; Luk 4:1-13)
1Kom tu̱ Jiimbi shakhshakhndi mbu nu̱ Yesu tu̱ ndu̱ mbu̱ gaari ma ku̱ Sheɗan a buuri nda. 2Tu̱ Yesu shi zhumti me qaandi ɗyin vat ndu̱ piti ɗyin vat, tu̱ yang tu̱k meeri maɗyi, 3Tu̱ Sheɗan nu̱ buurang a ɓa she nda za, “Mbu̱ to Yi ɓu̱ Magham, ze ndogdiku nang ku̱ gaɓ ma ɗye zu̱mndi.”
4Tu̱ Yesu tlogha za, “A nje bu̱laran mbu̱ ɓalar ɓu̱ Magham za, ‘Ɗye zu̱m ɗyenda ka ku̱rki nduk ɓa kope aa nyi ɓalar nu̱ ɗa viki she Magham.’ ”
5Tu̱ Sheɗan ɗu̱ ndu̱ chin viɗi nggwotang ɗyin du̱ndi dangkali Rafti ɓu̱ Magham nu̱ke a Urshalima ghai shakhshakhndang. 6Tu̱ ze nda za, “Mbu̱ to Yi ɓu̱ Magham, ku̱m ji to nggu̱ɗ yaghai, ku̱me a nje bu̱laran za, ‘Chin ka ze nu̱ ru̱ktiku ɓaran ku̱ kangga ku, ka gaɗa ndu̱ khar wora ku̱me ghwat na saaror nu̱ ve ndooga ɓa.’ ”
7Tu̱ Yesu tlogha yenda za, “A nje bu̱laran tu̱k za, ‘Ku̱ buu na Zhinkir gwaanji Maghamndi ɓaa ɓa.’ ”
8Tu̱ yang Sheɗan da nda tu̱k, tu̱ ɗu̱ ndu̱ chin ɗyine dleng nggur kirkandi maɗyi, tu̱ wuɗ kwaaɗar larji ndu̱ zhaaji ɓaran kap yenda. 9Tu̱ ze nda tu̱k za, “Ngga vu̱r ɗyikunang yor kap mbu̱ ta kurum gha gumera to ghar ghai ya.”
10Tu̱ Yesu ze nda za, “Ju ya ɓar fan Sheɗan! Ai a nje bu̱laran za, ‘Ghor ghai ye Zhinkir gwaanji Maghamndi ɓaaro, to mbu zu̱r ɓaran chin ɗyenda.’ ”
11Kom tu̱ Sheɗan njigti nda, tu̱ nu̱ ru̱ktiku ɓu̱ Magham a ɓa tu̱ shi shaatar yenda.
Yesu wa nggaasi Tlu̱nar ɓaran Galili
12Nu̱ Yesu tu̱kki za wa khi Yokhana gha zhaaru̱m, tu̱ ji ta gaɓ nu̱ mbu̱ dlar ghai Galili. 13Tu̱ njig Nazaret ta gu̱r nu̱ Kaparnakhum nu̱ke a me ɗyim chitndi ve me koɗokh maa ɓu̱ Zebulun ndu̱ Naptali tu̱ khan nje. 14Ma ku̱ nyel ɗyi nu̱ annabi Yishaya zu̱ki za, 15“Maa ɓu̱ Zebulun ndu̱ Naptali, nu̱ke a me njiv Gaawu Urdun, ndu̱ dlar ghai Galili nu̱ke ɗya ghai ɓu̱ Yakhudeku ɓa. 16Nduki nu̱ke kharan ku mbu̱ zhum wa na yarang gwaanji, yarang a vi ye nduki nu̱ke kharan mbu̱ jiimbi mu̱ti.”
17Ji ye sarchi nang tu̱ Yesu nggaasi wopa ɓalar ɓu̱ Magham a zu̱ran za, “Nggoɗ ma tun njig solar ɓaanu ku̱me kwaaɗar viɗi a shi bing ɓari.”
Yesu wa qa nu̱ Dumndiku wor vat
18Yesu a yir ve me gu̱mndi gaawu Galili, tu̱ na khachinkirku wor rap, Siman nu̱ka qaki nda za Biturus, ndu̱ khachin dlu̱man za Andu̱rawus, a zu̱ lem nu̱ mbu̱ gaawang ku̱me ɗya nu̱ dumndiku. 19Tu̱ Yesu ze wor za, “A ɓa ma, tun mbuuri nga, ngga gaɓ ndu̱ tun ma nu̱ dumndi nduki ya.” 20Fan ndu̱ fan tu̱ njig lemku ɓaanda, tu̱ mburi nda ku.
21Nu̱ songki nu̱ guma, tu̱ na khachinkirku nggur wor rap tu̱k, Yaqub yi ɓu̱ Zabadi ndu̱ khachin dlu̱man za Yokhana. A mbu̱ du̱mbu̱l ɗyim ku su̱yen ndu̱ ku̱maandi ɓaanda a kwaɗa lem ɓaanda. Tu̱ Yesu qa wora. 22Fan ndu̱ fan, tu̱ njig du̱mbu̱lang ndu̱ ku̱maandi ɓaanda, tu̱ mbuuri nda ku.
Yesu wa Shaata Nduki khang
23Tu̱ Yesu baara mbu̱ dlar ghai Galili ɓar kap, a shogar ye nduki mbu̱ kib tabar ɓaanda. A wopa labar mbarkandi nu̱ kwaaɗar ɓu̱ Magham. Kom ndu̱ shaanar nduki nu̱ke var wor mu̱n ɓa ndu̱ aa nyi pooni khaati nu̱ke a damta wora. 24Tu̱ labar ɓaran dlu̱ maarang mbu̱ dlar ghai Siriya kap. Tu̱ ndukyang a ɓa ndu̱ kap nduki nu̱ke var wor mu̱n ɓa. Kom ndu̱ nduki nu̱ke a bonye ndu̱ khaatiku zum zum, ndu̱ nduki nu̱ke a tu̱k vaanda ndu̱ nu̱ khu̱kheetiku, ndu̱ nu̱ muɗyirku, ndu̱ zu̱ɓtiku. Tu̱ yang shaana wor nu̱gha kap. 25Tu̱ tabar nduki khang na viki Galili, ndu̱ dlar ghai Dikapolis (mban za ghaiku gwang), ndu̱ ghai Urshalima, ndu̱ dlar ghai Yakhudiya, kom ndu̱ dlar ghai nu̱ke a dlar Gaawu Urdun a mburi nda ku.
Արդեն Ընտրված.
Matta 4: ttrNT
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016