Piligu 4
4
Keen mini Ɛbɛl
1Ka doo maa min’ o paɣa Awa daa laɣim ka o niŋ pua n-dɔɣi Keen#4.1 KEEN: Hiburuli ni bɛ ni booni Keen shɛm ŋmanila bɛ ni booni “Deebu” bee “Bɔ n-nya shɛm”. ka yɛli, “N nya ninsala Yawɛ sɔŋsim zuɣu.” 2Ka o daa ti lan dɔɣ’ o tizo Ɛbɛl gba. Ɛbɛl daa nyɛla piɛgula, ka Keen mi nyɛ pukpara. 3Dahin shɛli ka Keen daa ti zaŋ o puu ni bindira na nti mali sara Yawɛ sani, 4#Hib 11.4 ka Ɛbɛl mi daa zaŋ o buzɔŋ ni piɛbil’ tuuli ni o kpam na nti mali sara, ka Yawɛ Naawuni nini daa tiɣi Ɛbɛl min’ o sara maa, 5amaa ka o nini daa bi tiɣi Keen ŋun’ min’ o sara maa. Dinzuɣu ka Keen suhu daa yiɣisi pam, ka o zuŋ o ninni. 6Ka Yawɛ daa bɔhi Keen, “Bɔ n-niŋ ka a chɛ ka a suhu yiɣisi, ka a zuŋ a ninni? 7A yi di niŋ din simdi, n naan ku deei li? Ka a yi bi niŋ din simdi, alahichi do a dunol’ ni m-bɔri ni di nyaŋ a, amaa di niŋ kamaata ni a nyaŋ li.”
8 #
Mat 23.35; Luk 11.51; 1 Jɔn 3.12 Dahin shɛli ka Keen daa ti yɛl’ o tizo Ɛbɛl, “Ti cham’ mɔɣu ni.” Bɛ ni daa ti be mɔɣu maa ni saha shɛli, ka Keen yiɣisi lu o tizo Ɛbɛl maa zuɣu n-ku o.
9Ka Yawɛ daa bɔhi Keen, “A tizo Ɛbɛl be ya?”
Ka Keen garigi yɛli, “M bi mi; mani n-nyɛ n tizo maa gula?”
10 #
Hib 12.24
Ka Yawɛ bɔh’ o, “Tuun’ bɔ ka a lee tum maa? A tizo maa ʒim kukoli kuhigu n-yi tiŋgban’ ni ka n sanna. 11Ka pumpɔŋɔ, noli yɛlibu ni yi tiŋgban’ shɛli din yaai di noli n-deeg’ a tizo maa ʒim a nuu ni maa na di a. 12Ka a yi lan ko puu tiŋgbani maa ni, di bindira ku lan niŋ viɛnyɛliŋga. A ni leei ŋun ka kpɛhili shee, ka leei ŋun dari gindi dunia ŋɔ ni.”
13Ka Keen yɛli Yawɛ, “N tibidarigibo maa galisiya gari ma. 14Nyama, a kari ma tiŋgbani ŋɔ ni, ka kari ma a sani; ka n leei ŋun ka kpɛhili shee, ka leei ŋun dari gindi dunia ŋɔ ni, ka ŋunkam ti nya ma ni ku ma.”
15Ka Yawɛ daa yɛl’ o, “Di ku niŋ lala. So yi ku nyin’ Keen, bɛn’ kum’ niriba ayopɔin yo a kubu maa samli.” Ka Yawɛ daa dalim Keen ni di chɛ ka so ti nya o, ka ku ku o. 16Ka Keen daa yi Yawɛ sani n-chaŋ ti be tiŋgban’ shɛli din be Idɛn puu la wulimpuhili polo, ka di yuli booni Nɔd la.
Keen zuliya
17Ka Keen min’ o paɣ’ daa laɣim ka o niŋ pua n-dɔɣi Inok. Ka Keen daa me o tiŋa n-zaŋ o bia Inok maa yuli m-bol’ li Inok. 18Ka Inok daa dɔɣi Irad; ka Irad daa nyɛ Mɛhujaɛl ba, ka Mɛhujaɛl nyɛ Mɛtushaɛl ba, ka Mɛtushaɛl mi nyɛ Lamɛk ba. 19Ka Lamɛk daa kpuɣi paɣiba ayi, ka yino yuli booni Ada, ka yino mi yuli booni Zilla. 20Ka Ada daa dɔɣi Jabal. Ŋuna n-daa nyɛ ninvuɣ’ shɛb’ bɛn be tanti suɣa ni ka guli niɣ’ la yaba. 21O tizo yuli n-daa booni Jubal. Ŋun’ mi n-daa nyɛ ninvuɣ’ shɛb’ bɛn ŋmɛri mɔɣilɔnim’ mini yupiɛbiriba yaba. 22Ka Zilla mi daa dɔɣi Tubalikeen ŋun daa nyɛ ŋun zaŋ daanya mini kuriti m-mali tuma nɛma balibu kam zaa la. Ka Tubalikeen tizɔpaɣ’ daa nyɛ Naama.
23Ka Lamɛk daa yɛl’ o paɣiba,
“Ada mini Zilla, wummiya:
Yinim’ Lamɛk paɣiba,
wummiya n ni yɛn yɛli shɛm ŋɔ:
N kula do’ so ŋun ti ma daŋa.
N kula nachimbil’ so ŋun ŋme ma.
24Bɛ yi daa yɛn ku niriba ayopɔin
n-yo Keen kubu samli,
so yi ku mani, yɛlimaŋli,
ninvuɣ’ pisopɔinnaayopɔin
ka bɛ yɛn ku n-yo
man’ kubu samli.”
Sɛt mini Ɛnɔsh
25Ka Adam min’ o paɣ’ daa lan laɣim ka o dɔɣi bidibiga m-bol’ o yuli Sɛt,#4.25 SƐT: Hiburuli ni Sɛt gbinni nyɛla “O tiya”. dama O daa yɛlimi, “Naawuni zaŋla bidib’ so ti ma ka o zani Ɛbɛl zaani, Keen ni daa ku Ɛbɛl la zuɣu.” 26Ka Sɛt daa ti dɔɣi bidibiga m-bol’ o yuli Ɛnɔsh. Di saha maa ka ninsalinim’ daa piligi jɛmdi Yawɛ.
Արդեն Ընտրված.
Piligu 4: DBwDB
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Dagbani Bible with Deuterocanonical Books © Bible Society of Ghana, 2011.