Genesis 16
16
Si Agar tan si Ismael
1Anggapoy anak nen Sarai ya asawa nen Abram. Walay aripen ton bii ya Egipsia a manngaray Agar, 2kanyan inkuantod kinen Abram, “Ag inyabuloy na Katawan a nawalaan ak na anak. Anta no akdulan mo may biin aripen ko? Nayarin makaanak na para siak.” Inmabuloy si Abram ed imbaga nen Sarai; 3kanyan inter nen Sarai ed sikato si Agar a piakdulan to. (Agawa ya nen samploy taon lan manaayam ed Canaan si Abram.) 4Inakdulan nen Abram si Agar, et nanlokun. Nen naamtaan nen Agar a malokun, nagmaliw a mapasirayew tan nilemlemew toy Sarai.
5Inkuanen Sarai ed kinen Abram, “Kasalanan mo so panlelemlemew nen Agar ed siak.#16:5 Kasalanan…mo; odino Manirap ka komun lapud sayan ginawam ed siak. Siak a dili so angiter ed sika na saman ya aripen ko, tan nanlapud naamtaan ton malokun la lelemlemewen to ak. Say Katawan lay manintinsia no siopay nalilingod sikatan dua.”
6Inmebat si Abram, “Aripen mo tan walad silong na pakayarim; gawam ed sikatoy labay mo.” Pinapairap nen Sarai si Agar, kanyan tinmaynan.
7Inabet na anghil na Katawan si Agar ed abay na sobul a walad kalawakan, diad dalan a mamaarap ed Sur, 8tan inkuanto, “Agar ya aripen nen Sarai, nanlapwan mo tan iner so laen mo?”
Inmebat, “Ibabatikan koy amok a bii a si Sarai.”
9Inkuanto may anghil sa Katawan, “Pawil ka, tan paaripen kad sikato.” 10Insan inyarum ton inkuan, “Itdan ta ka na saray kabyangay boleg mo a diad karakel da et anggapoy makabilang. 11Mananak kay sakey a laki, tan ingaran mo na Ismael,#16:11 ISMAEL: “Say Dios ondedengel” so kabaliksan to yan ngaran diad salitay Hebreo. ta nadngel na Katawan so tagleey mo. 12Balet mambilay a singa atap ya asno so anak mo; magmaliw a kalaban toy amin a too tan labanan dan amin. Siyanan to ray amin a kakanayon to, ta kabosul to ra.”
13Tinepet nen Agar ed sikaton dili, “Anengneng ko tan talaga so Dios, et mabilay ak ni?” Inngaran to sirin so Katawan ya akisalitad sikato na, “Dios a Mannenengneng.” 14Kanyan tatawagen na saray totoo imay bobun a walad nanleetay Cades tan Bered na “Say Bobun na Mabilay a Nanenengneng to Ak.”
15Nananak si Agar na sakey a laki, tan inngaran to na Ismael. 16Wa lomplo tan anem lay taon nen Abram nen naanakan to si Agar.
Արդեն Ընտրված.
Genesis 16: MBBPAN83
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Maung a Balita Biblia © Philippine Bible Society, 1983