Luɔi 3
3
Ŋɔl ee Lim acï tɔ Dem
1Na wën, ke Petero kekë Jɔn ke ke lɔ ë Luaŋdïtic ëtök ë thaar ë lɔ̈ŋ, yen aye thaar ë dhoŋuan. 2Ku ade raan ëtɛ̈ɛ̈n, raan ë dhiëth ke ye aduany, ku aaye kɔc jɔt e aköölnyïïn kedhie lek tääu ë kal ë Luaŋdït thok, kal thoŋ cɔl Läkëläk, ke ye lip ë käŋ tëde kɔc ee lɔ Luaŋdït ë Nhialic. 3Na wën, ke tïŋ Petero kekë Jɔn ë ke lɔ luaŋdït ë Nhialic, go ke lip. 4Go Petero raan toom guöp, ayï Jɔn aya, ku yöök an, “Woi wook!” 5Go keek woi, ke ŋɔ̈th an, de kë bï yiɛ̈n yök tëde keek. 6Go Petero lueel an, “Yɛn cïn nɔm ateek ku ciën nɔm adhääp, yïn miaac tei në kë cath ke yɛn: në rin ke Yecu Kërtho de Nadhareth, jɔt rɔt cathë!” 7Go ciin cuëc dɔm, jɔt nhial: na wën, ënɔnthiin manë ke cökke ku yom ke awodhoor nyïïn ke ke yök riɛl. 8Na wën, ke gɔp rɔt nhial, ku kɛ̈ɛ̈c, ku ciɛth, go lɔ ë Luaŋdïtic ke keek ëtök, ke cath ku ye kɛɛc nhial, leec Nhialic. 9Ago kɔc tïŋ kedhie ke cath ke lec Nhialic: 10ku aŋickï nɔn ee yen raan wään ë rëër ke lip ë kal ë luaŋdïït ë Nhialic thok, kal thoŋ cɔl Läkëläk: agokï gäi arëët abïk nïïm mum në kë cï tïc tëde ye.
Wëët de Petero në Luaŋdïtic
11Ago raan wën cï dem go Petero dɔm kekë Jɔn, ago kɔc kedhie kat ëtök lek ë gɔ̈ɔ̈lic të nu kek, gɔ̈ɔ̈l cɔl Göl ë Tholomon, ke ke gäi arëët. 12Na wën, aacï Petero ke tïŋ, ke yöök kɔc an, “Week, wek röör ke Yithriɛl, eeŋö gäi wek ee kënë? Ku eeŋö tuɔɔm wek wogup wäkya, abï ciët wok ë tɔ ee raanë cath në riɛlda wogup, ku në riëëu ee wok Nhialic riëëu? Acie yen. 13#Bɛ̈n 3:15. Nhialic de Abraɣam ku Yithaak ku Jakop, Nhialic de kuarkuɔ, yen acï wëndɛn Yecu gäm dhuëëŋ, raan wään cäk yiɛ̈n miric, ku cäk rɛɛc ë Pilato nɔm, wään cï en löŋde teem an, pɛ̈l. 14#Math 27:15-23; Mak 15:6-14; Luk 23:13-23; Jɔn 19:12-15. Ee raan ɣeric en acäk rɛɛc, Raan piɛthpiɔ̈u, ku raan cï raan däŋ luc yen acäk lɔ̈ŋ an, bï yiɛ̈n week. 15Bɛ̈nydït ë Wëi acäk nɔ̈k, raan cïï Nhialic jɔ̈t bei ë kɔc cï thou yiic, ku wok ee cäätɔɔ në cöökë. 16Ku rin ke yen, në gäm cï wo rinke gam, yen aa tɔ raanë ril, raan wɔikï ku ŋiɛckï: yeka, gäm bɔ̈ tëde yen acï raanë gäm guöp cï dikëdik ë wenyïïn wedhie.
17“Ku ënɔɔnë, mïthëkɔckuɔ, aŋiɛc nɔn cä wek kënë looi në kuny kuöc wek en, ayï bänykun aya. 18Ku kakë, ka cïï Nhialic tɔ luel tueŋ në thook ke tïtke kedhie an, bï Kërtho käŋ dhil guum, kek acï ke tɔ ye yith. 19Yen ja wek wepiɔ̈ɔ̈th puk, ku bɛkï wepiɔ̈ɔ̈th wɛ̈l Nhialic, ke bï karɛckun cuöth bei, ago akööl bɛ̈n ë Nhialic nyin akööl ke döm ë wëi ke kɔc, 20ago Kërtho tooc, raan wään cï kɔn guiëër week, yen Yecu: 21raan bï dhil ceŋ paannhial aɣɔ̈l kööl ë puŋ bï käŋ puk nïïm kedhie, kööl cïï Nhialic tɔ luel në thook ke tïtkɛn ɣeriic kedhie, gɔl ɣɔn thɛɛr ciɛkë piny. 22#Nyöŋ 18:15,18 (LXX). Mothe ë kuarkuɔ yɔ̈ɔ̈k ë yic an, tiët tök abïï Bɛ̈nyduöndït Nhialic jat nhial ë mïthëkɔckun yiic, acït man ë yɛn,#3:22: acït man cï yen a tooc; nɔn cït ɛn. jamde abäk piŋ, jam bï lɛ̈k week ëbɛ̈n. 23#Nyöŋ 18:19. Ku ëyic, raan ëbɛ̈n raan bï këde tiët rɛɛc piŋ, ka bï määr ëtaiwei ë kɔc yiic. 24Yeka, ku tït kedhie aya, gɔl ë Thamwɛl kekë tït biɔth e, tït ɣɔn ee wël lueel, acïk kɔn lueel ë këde aköölkë, keek kedhie. 25#Cäk 22:18. Wek ee mïth ke tït, ku yak mïth ke löŋ, löŋ cïï Nhialic mac kekë kuarkuɔ, wään yöök en Abraɣam an, ‘Ku në käu de yïnguöp abï dhiëën ke piny nɔm aa thieei kedhie.’ 26Ku Nhialic, luɔi cï en Wëndɛn Yecu jat nhial, acï kɔn tuöc week, bï week bɛ̈n thieei, në döŋ bï en we dak wei ë luɔiduön racic, week wedhie.”
Արդեն Ընտրված.
Luɔi 3: dip-JPB
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
The Bible in Jieeng de Padang © The Bible Society in South Sudan, 2011.