Luɔi 2
2
Bɛ̈n de Wëidït
1 #
Leb 23:15-21; Nyöŋ 16:9-11. Na wën, aacï kööl ë Thiërdhïc guɔ bɛ̈n, ke ke tɔ̈u tëtök kedhie. 2Ago awuööu dap bɛ̈n ëthiäu paannhial, acït awuööu de yom dïït put, ku thiëëŋ ɣöt ëbɛ̈n ɣön rëër kek thïn. 3Na wën, ke liëp ë ke tul, liëp cït mac, cï keyiic tek: ku jɔkï nyuc ë kegup kedhie. 4Agokï thiäŋ në Wëidït ɣer kedhie, ku jɔkï jam në thok lei, acït man cï Wëidït ɣer e gäm keek bï kek jam.
5Ku ade Judai rɛ̈ɛ̈r ë Jeruthalem, kɔc riëëu Nhialic, kɔc ë bɔ̈ bei ë juöör yiic juöör ke pinynɔm ëbɛ̈n. 6Na wën, aacï jamë piŋ ë kɔc, ke kut ë kɔc ë guëër, gokï nïïm mum, raan ëbɛ̈n ë keek piŋ ke ke jam ë thoŋde guöp. 7Ago ke liääp nïïm kedhie ku gɛ̈ikï, ku jɔkï lueel kapäc an, “Tiëŋkï kɔckë, kɔc jam ënɔɔnë, cïkï ye kɔc ke Galili kedhie? 8Ku eeŋö piŋku ënɔɔnë, raan ëbɛ̈n, ŋɛk ë thoŋ ë dhiëëth ë ye thïn piŋ? 9Wo Parthoi, ku Medo, ku Eelam, ku kɔc tɔ̈u ë Methopotamia, ku Juda, ku Kapadokia, ku Ponto, ku Athia, 10ku Purugia, ku Pampulia, ku Rip, ku bɛ̈i ke Libya thiɔ̈k ke Kurene, ku kamaan ë bɔ̈ Roma, ayï Judai ayï kɔc ë cï röt tɔ ye Judai, 11ku kɔc ke Keret, ku kɔc ke Arabia, kek a piŋku ke ke jam në thookkuɔ ë kagöök ë looi Nhialic!” 12Agokï gäi kedhie, acï ke dhal, ku thiëckï röt kapäc an, “Ee käŋö ee kënë?”
13Ku lueel kɔ̈k agɛɛt an, “Kɔckë acïk kuɛth ë mɔ̈n ë piac dhiim!”
Jam de Petero
14Na wën, ke Petero jɔt rɔt kekë kɔc kathiëër ku tök, ku jiëëm keek ë röl dït, an, “Wek juöör ke Judai, ku wek kɔc rɛ̈ɛ̈r ë Jeruthalem wedhie, jakï kënë ŋic, ku piɛŋkï wëlkï. 15Kɔckë akën mɔ̈u ke wit, në ke wën cäk lueel, ee thaar kadiäk aköl tei, 16ku kënë ee kë ɣɔn lueel ë tiët Jowɛl,
17 #
Jol 2:28-32 (LXX). An, ‘Acï Nhialic lueel an, Miäk wadäŋ, Wëikï abä ke luööŋ ë kɔc gup kedhie.
Ku wɛ̈ɛ̈tkun ku nyïïrkun abïk käŋ aa caar,
ku röörkuöndït abïk aa nyuöth ë käŋ.
18Acakaa lïïmkun aya,
Wëikï abä ke luööŋ ë kegup në aköölkë,
Lïïmkuön röör ku lïïm duet, agokï käŋ aa caar.
19Ku kake gäi abä ke tɔ tiëc tënhial,
Ku ta göök tiëc ë piny nɔm,
Riɛm, ku mac, ku toltool ë piny:
20Akɔ̈l abï rɔt puk aye cuɔlëpiny,
ku bï pɛɛi rɔt puk aye riɛm,
Të ŋoot ëkööldïït ë Bɛ̈nydït ke kën bɛ̈n, kööl bï tïc ëgɔk:
21Ku ë yic, raan ëbɛ̈n raan ë Bɛ̈nydït cɔɔl rin, ka bï dhil kony wëi.’
22“Wek röör ke Yithriɛl, piɛŋkï wëlkë: Yecu de Nadhareth, raan cï nyuöth week nɔn ë bïï yen tëde Nhialic në luɔi dït ku kake gäi ku göök cï Nhialic ke looi në yen ë weyiic, acït man ŋiɛc wek en ayadäŋ, 23#Math 27:35; Mak 15:24; Luk 23:33; Jɔn 19:18. yen acäk nööm, të cï e yiɛ̈n week në këde löŋ cïï Nhialic lueel ë yepiɔ̈u, ku në ŋïny cï en e kɔn ŋic, aguɔkï piäät ë tim cï rïïu nɔm kɔ̈u në ciin rac, ku näkkï abï thou. 24#Math 28:5,6; Mak 16:6; Luk 24:5. Yen acïï Nhialic jat nhial, të cï en e luöny bei ë thuɔɔuwic: luɔi dhɛlë thuɔɔu muŋ bï en e muk. 25#Diɛt 16:8-11 (LXX). Ku Debid ë jam luel në këde an,
‘Yɛn aaye Bɛ̈nydït tïŋ ë a nyin tueŋ ëcaŋɣɔn,
ke ye tɔ̈u ë baŋ cuënydï, ke ya cïï bï nyaai tëdï.
26En acä yɛn piɔ̈u miɛt,
abä piɔɔny ë liemdï,
ku guöpdï aya abï yök
ke lɔ̈ŋ në aŋäth ŋääth:
27Luɔi cïï yïn wëikï bï nyääŋ paan ë thuɔɔu,
ku cïï raanduön ɣeric bï tɔ tïŋ dhiap.
28Yïn cï a tɔ ŋic kuɛɛr ke pïïr,
Yïn bï a tɔ mit piɔ̈u në nyindu abä piɔ̈u a yum.’
29“Wek wäthii mïthëkɔckuɔ, acïn kë pën ɛn guiëër guiëër ɛn week në këde Debid kuɛɛrdan thɛɛr an, abï thou, ku acï thiɔ̈k, ku raŋde atɔ̈u kekë wook aɣet cï ëköölë. 30#Diɛt 132:11; 2 Tham 7:12,13. Ku yen aaye tiët, ku aŋic nɔn cï Nhialic e lɛ̈k en, abï gutguut lueel an, Në mïth ke thardu yïguöp, yɛn bï Kërtho jat nhial, raan bï rëër ë thöönydu nɔm. 31Ago Debid, luɔi cï en kënë kɔn tïŋ, ago jam në këde jön bï Kërtho rɔt jɔt, an,
‘Wëike akënë ke nyääŋ paan ë thuɔɔu,
ku kën guöpde dhiap tïŋ.’
32Yen Yecu manë, yen acïï Nhialic jat nhial, ku wook wodhie wok ee cäätɔɔ në ee cöökë. 33Ku ënɔɔnë, nɔn cï e tɔ dït ë ciin cuëny de Nhialic, ago Wëidït ɣer nööm ku cï Wun kɔn lueel an, bï ke gäm en, yen a luuŋ en ee kënë piny, ke wɔikï ku piɛŋkï ënɔɔnë. 34#Diɛt 110:1. Ku Debid akën guɔ lɔ paannhial: yenguöp, yen aa lueel en an,
‘Bɛ̈nydït ë Bɛ̈nydiëndït yɔ̈ɔ̈k an:
Nyuc ë baŋ cuënydï,
35Aɣet kööl bän kɔc dɛ wek ater tɔ ye kën ee yïn yïcök dhɔ̈ɔ̈r.’
36“Na ënɔɔnë, tɔ baai de Yithriɛl ëbɛ̈n tɔ ŋic cöökë ëgɔk an, Yecu manë, raan wään cäk piäät ë tim cï rïïu nɔm kɔ̈u, yen acïï Nhialic tɔ ye Bɛ̈nydït ku tɔ ye Kërtho aya!”
37Na wën, aa cïk jamë piŋ, ke ke guutë piɔ̈ɔ̈th, ku thiëckï Petero kekë kɔc kɔ̈k ë piööcë an, “Wäthii mïthëkɔckuɔ, eeŋö buk looi?”
38Go Petero ke yɔ̈ɔ̈k an, “Pɔ̈kkï wepiɔ̈ɔ̈th, ku takï röt baptith wedhie në rin ke Yecu Kërtho, ke bï karɛckun pɔ̈l, ke we bï miɔɔc në Wëidït ɣer. 39Kë cï lueel an, bï gäm kɔc, ee këdun week, ku ye këde mïthkun, ku ye këde kɔc nu tëmec kedhie, kɔc bïï Bɛ̈nydït Nhialicda cɔɔl.”
40Ago ke lɛ̈k wël juëc kɔ̈k ku guïïr kek an, “Kuɔnykï röt ee remë rem cï piɔ̈u ŋɔl.” 41Go kɔc cï wëlke gam ë piɔ̈nmit ago ke baptith, aake cït aguum kadiäk de kɔc. 42Agokï aa cool ë tɔ̈u ë wëëtic wëët ë tuuc, ku yek cool ë abärɔ yic, ku wäŋ ee kuïn wökic, ku lɔ̈ŋic.
Pïïr në Kɔc cï Gam Yiic
43Ago riɔ̈ɔ̈c kɔc dɔm kedhie: ku tuuc acïk ka ke gäi juëc looi, ayï göök. 44#Luɔi 4:32-35. Ku tɔ̈u kɔc cï gam ëtök, agokï kaken rɔm ëtök kedhie. 45Go kɔc duumken ɣaac ayï kaken, gokï ke tɛ̈k kɔc kedhie, të de yen raan dɛkë käŋ. 46Agokï aa cool ë Luaŋdïtic aköölnyïïn kedhie në piɔ̈n tök, ku yek kuïn wääkic ɣönë ku ɣönë, ku yek këden cam në piɔ̈nmit cïnic ruëëny, 47ke ke ye Nhialic leec, ku mit kɔc piɔ̈ɔ̈th kedhie në keek. Go Bɛ̈nydït ɣön ë Nhialic ŋuak nyin ë kɔc ë aköölnyïïn kedhie kɔc kony wëi.
Արդեն Ընտրված.
Luɔi 2: dip-JPB
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
The Bible in Jieeng de Padang © The Bible Society in South Sudan, 2011.