Yôhan 6
6
Yêsu Čem Rơma Rơbâo Čô Mơnuih
(Mat 14:13-21; Mar 6:30-44; Luk 9:10-17)
1Giơ̆ng anŭn Yêsu găn nao pơ hang gah dih ia rơsĭ Galilê, anăn pơkŏn dơ̆ng ia rơsĭ Tibêrias. 2Sa phung mơnuih lu đuaĭ tui Ñu, yua kơ gơñu hmâo ƀuh gru tơlơi mơsêh mơyang Yêsu pơsuaih ƀing mơnuih duăm ruă. 3Yêsu đĭ pơ čư̆ laih anŭn dŏ ber pơ anŭn hrŏm hơbĭt hăng ƀing ding kơna Ñu. 4Hrơi phĕt Tơlơi Găn ƀing ană Yuđa jĕ truh yơh. 5Tơdang Yêsu angak mơta Ñu ƀuh phung mơnuih lu rai pơ Ñu, Ñu laĭ kơ Philip: “Pơpă ƀing ta či blơi ƀañ tơpŭng, kiăng brơi ƀing mơnuih anai ƀơ̆ng?” 6Yêsu laĭ tui anŭn kiăng lông lăng Philip, yua kơ Ñu thâo laih hơgĕt Ñu či ngă.
7Philip laĭ glaĭ: “Dua rơtuh đơniê blơi ƀañ tơpŭng wơ̆t dah pha brơi rĭm čô ƀơƀiă đôč ăt ƀu djŏp mơ̆n.”#6:7 Sa đơniê jing nua apah kơ sa hrơi mă bruă.
8Sa čô amăng ƀing ding kơna Ñu, Andrê adơi Simôn Pêtrôs, laĭ kơ Yêsu, 9“Hmâo sa čô čơđai đah rơkơi hmâo rơma klŏ ƀañ tơpŭng pơdai ôrgơ hăng dua drơi akan; samơ̆ hyư̆m dưi djŏp kơ mơnuih lu lĭn anai?”
10Yêsu laĭ: “Brơi ƀing ană plei dŏ ber bĕ.” Ƀơi anŭn hmâo lu rơ̆k. Tui anŭn ƀing gơñu dŏ ber. Hmâo năng ai rơma rơbâo čô đah rơkơi. 11Yêsu mă ƀañ tơpŭng, giơ̆ng Ñu bơni hơơč kơ Ơi Adai, Ñu pơpha brơi ƀing dŏ ber ƀơi anŭn. Ñu pơpha wơ̆t akan mơ̆n tui hăng hơdôm gơñu kiăng. 12Giơ̆ng gơñu ƀơ̆ng trơi laih, Yêsu laĭ kơ ƀing ding kơna Ñu: “Duñ bĕ čơđeh meh ƀañ tơpŭng, akan rơbeh, anăm pơrơngiă hĭ đôč đač ôh.” 13Hnŭn yơh gơñu duñ abih čơđeh meh anŭn hmâo bă pluh dua bai čơđeh meh mơ̆ng rơma klŏ ƀañ tơpŭng pơdai ôrgơ anŏ arăng hmâo ƀơ̆ng laih.
14Tơ ƀing ană plei ƀuh tơlơi mơsêh mơyang Yêsu hmâo ngă, gơñu laĭ: “Sĭt yơh Pô anai jing Pô laĭ lui hlâo, jing Pô khŏm rai amăng lŏn tơnah!” 15Hlăk anŭn Yêsu thâo gơñu či pơgŏ Ñu ngă pơtao, tui anŭn Ñu hơdeč đuaĭ pơ čư̆ dŏ hơjăn Ñu.
Yêsu Rơbat Ƀơi Jơlah Ia
(Mat 14:2-33; Mar 6:45-52)
16Tơ klam truh, ƀing ding kơna Yêsu trŭn nao pơ ia rơsĭ, 17đĭ amăng sa boh sŏng hăng čơdơ̆ng găn ia rơsĭ kiăng nao pơ plei Kapernum. Adai mơmŏt laih, samơ̆ Yêsu ăt aka nao truh pơ gơñu ôh. 18Ia rơsĭ čơdơ̆ng poh yă yua kơ hmâo angĭn thut kơtang. 19Tơ gơñu waih sŏng nao năng ai rơma ƀôdah năm kilômet,#6:19 Boh hră phŭn blŭng: 25 ƀôdah 30 stat; sa stat mơdơ̆ hăng 185m. gơñu ƀuh Yêsu rơbat ƀơi jơlah ia hăng rai jĕ pơ sŏng. Gơñu hwĭ. 20Samơ̆ Yêsu laĭ kơ gơñu: “Anăm hwĭ ôh; Kâo gơ̆ yơh.” 21Laih anŭn gơñu mơak jum Yêsu đĭ amăng sŏng. Tañ mơtam sŏng truh pơ hang pơ anih gơñu kiăng nao.
Ană Plei Tui Sem Yêsu
22Hrơi tơdơi ƀing ană plei ăt dŏ ƀơi hang gah adih ia rơsĭ kơnơ̆ng ƀuh sa boh sŏng pơ anŭn, laih anŭn gơñu thâo Yêsu ƀu đĭ amăng sŏng hrŏm hơbĭt hăng ƀing ding kơna Ñu ôh kơnơ̆ng hơjăn ƀing ding kơna Ñu đôč nao. 23Hmâo lu boh sŏng mơ̆ng plei Tibêrias rai dŏ jĕ ƀơi anih gơñu hmâo ƀơ̆ng ƀañ tơpŭng, giơ̆ng kơ Khua Yang bơni hơơč kơ Ơi Adai. 24Tơ ƀing ană plei thâo Yêsu ƀu dŏ pơ anŭn dơ̆ng ôh, ƀing ding kơna Ñu kŏn dŏ pơ anŭn lơi, tui anŭn ƀing ană plei đĭ sŏng nao pơ plei Kapernum kiăng sem Yêsu.
Yêsu Jing Ƀañ Tơpŭng Tơlơi Hơdip
25Tơ gơñu ƀuh Yêsu ƀơi hang gah adih ia rơsĭ, gơñu laĭ kơ Ñu: “Ơ Nai, hơbin Ih truh pơ anai?”
26Yêsu laĭ glaĭ: “Kâo laĭ kơ ƀing gih sĭt biă mă, ƀing gih hyu sem Kâo, ƀu djơ̆ yua kơ ƀing gih hmâo ƀuh tơlơi mơsêh mơyang ôh, samơ̆ yua ƀing gih hmâo ƀơ̆ng ƀañ tơpŭng trơi laih. 27Anăm mă bruă kơ mơnơ̆ng ƀơ̆ng huă thâo răm rai ôh, samơ̆ mă bruă bĕ kơ mơnơ̆ng ƀơ̆ng huă ăt dŏ tơl truh kơ tơlơi hơdip hlŏng lar. Mơnơ̆ng ƀơ̆ng huă anŭn Ană Mơnuih či pha brơi kơ ƀing gih; yua kơ Ñu yơh jing Pô Ơi Adai Ama hmâo kơđŏm gru pơsĭt tŭ ư Ñu laih.”
28Gơñu laĭ kơ Yêsu: “Hơgĕt gơmơi khŏm ngă, kiăng mă bruă kơ Ơi Adai?”
29Yêsu laĭ glaĭ: “Bruă Ơi Adai anŭn jing brơi ƀing gih đaŏ bĕ kơ Pô Ñu hmâo pơkiaŏ rai laih.”
30Gơñu laĭ kơ Yêsu: “Tui anŭn hơgĕt gru kơnăl mơyang Ih ngă kiăng kơ gơmơi ƀuh laih anŭn đaŏ kơ Ih? Hơgĕt bruă Ih ngă lĕ? 31Ƀing ơi adon gơmơi hmâo ƀơ̆ng laih ƀañ tơpŭng mana amăng tơdrŏn har, tui hăng tơlơi hmâo čih laih: ‘Ñu brơi kơ ƀing gơñu ƀơ̆ng ƀañ tơpŭng mơ̆ng adai.’”#Nêh 9:15; Tơb 16:4,15; Adoh 78:24; 105:40.
32Laih anŭn Yêsu laĭ kơ gơñu: “Kâo laĭ kơ ƀing gih sĭt biă mă, ƀu djơ̆ Môis ôh hmâo brơi laih kơ ƀing gih ƀañ tơpŭng mơ̆ng adai; samơ̆ Ama Kâo hmâo brơi laih kơ ƀing gih ƀañ tơpŭng mơ̆ng adai. 33Yua kơ ƀañ tơpŭng Ơi Adai jing ƀañ mơ̆ng adai trŭn rai pha brơi tơlơi hơdip kơ lŏn tơnah.”
34Gơñu laĭ: “Ơ Khua, rơkâo kơ Ih brơi kơ gơmơi ƀañ tơpŭng anŭn nanao.”
35Yêsu laĭ kơ gơñu: “Kâo jing ƀañ tơpŭng kơ tơlơi hơdip, hlơi pô rai pơ Kâo ñu ƀu či rơpa ôh, laih anŭn hlơi pô đaŏ kơ Kâo ñu ƀu či mơhao ôh. 36Samơ̆ Kâo hmâo laĭ laih kơ ƀing gih, ƀing gih hmâo ƀuh laih Kâo, samơ̆ ƀing gih ăt ƀu đaŏ ôh. 37Abih bang ƀing mơnuih Ama brơi kơ Kâo, či rai pơ Kâo; laih anŭn hlơi pô rai pơ Kâo, Kâo ƀu či puh pơđuaĭ ñu ôh. 38Yua kơ Kâo trŭn rai laih mơ̆ng adai, ƀu djơ̆ ngă tơlơi Kâo pô kiăng ôh, samơ̆ ngă tui hăng tơlơi Pô pơkiaŏ rai Kâo kiăng. 39Anai jing tơlơi kiăng kơ Pô pơkiaŏ rai Kâo: Kâo ƀu dưi pơrơngiă hĭ ôh sa čô amăng abih bang mơnuih Ñu hmâo brơi laih kơ Kâo, samơ̆ Kâo khŏm ngă pơhơdip glaĭ ƀing gơñu ƀơi hrơi đŭt tơdơi. 40Yua kơ anai jing tơlơi Ama kâo kiăng: Hlơi pô ƀuh Ană laih anŭn đaŏ kơ Ană, ñu anŭn či hmâo tơlơi hơdip hlŏng lar, Kâo či brơi kơ pô anŭn hơdip glaĭ amăng hrơi đŭt tơdơi.”
41Ƀing Ană Yuđa pơhiăp brŏk kơ Yêsu yua kơ Yêsu laĭ: “Kâo jing ƀañ tơpŭng trŭn rai mơ̆ng adai.” 42Gơñu laĭ: “Ƀu djơ̆ ôh hă anai jing Yêsu ană Yôsep, amĭ ama Ñu ƀing ta thâo soh sel? Tui anŭn hyư̆m ră anai Ñu laĭ: ‘Kâo trŭn rai mơ̆ng adai?’”
43Yêsu laĭ kơ gơñu: “Anăm pơhiăp brŏk tơdruă ƀing gih ôh. 44Ƀu hmâo hlơi dưi rai pơ Kâo ôh, tơdah Ama, Pô hmâo pơkiaŏ rai Kâo ƀu dui pô anŭn rai pơ Kâo, laih anŭn Kâo či pơhơdip glaĭ ñu ƀơi hrơi đŭt tơdơi. 45Amăng hơdrôm hră ƀing pô laĭ lui hlâo hmâo čih: ‘Ơi Adai či pơhrăm abih bang gơñu,’ Rĭm čô hlơi pô hmâo hmư̆ hăng hrăm laih mơ̆ng Ama, gơñu rai pơ Kâo.#Êsai 54:13. 46Aka hmâo hlơi ƀuh djơ̆ Ama ôh, kơnơ̆ng pô hmâo rai laih mơ̆ng Ơi Adai, Ñu yơh ƀuh laih Ama. 47Kâo laĭ sĭt biă mă kơ ƀing gih, hlơi pô đaŏ hmâo tơlơi hơdip hlŏng lar. 48Kâo jing ƀañ tơpŭng tơlơi hơdip. 49Ƀing ơi adon ƀing gih hmâo ƀơ̆ng laih ƀañ tơpŭng mana amăng tơdrŏn har, giơ̆ng anŭn gơñu ăt djai mơ̆n. 50Anai jing ƀañ tơpŭng trŭn rai mơ̆ng adai, kiăng kơ hlơi pô ƀơ̆ng ñu ƀu djai ôh. 51Kâo jing ƀañ tơpŭng tơlơi hơdip trŭn rai mơ̆ng adai. Tơdah hlơi pô ƀơ̆ng ƀañ anai, ñu či hơdip hlŏng lar; ƀañ tơpŭng Kâo či pha brơi yua kơ tơlơi hơdip kơ lŏn tơnah, anŭn jing asar Kâo pô.”
52Yua kơ tơlơi anŭn ƀing ană Yuđa pơrơjah tơdruă gơñu hăng laĭ: “Hyư̆m mơnuih anai dưi brơi ƀing ta ƀơ̆ng asar ñu lĕ?”
53Yêsu laĭ kơ gơñu: “Kâo laĭ kơ ƀing gih sĭt biă mă, tơdah ƀing gih ƀu ƀơ̆ng ôh asar Ană Mơnuih hăng mơñum drah Ñu, ƀing gih ƀu hmâo tơlơi hơdip hlŏng lar amăng ƀing gih ôh. 54Hlơi pô ƀơ̆ng asar hăng mơñum drah Kâo, hmâo tơlơi hơdip hlŏng lar, laih anŭn Kâo či pơhơdip glaĭ ñu ƀơi hrơi đŭt tơdơi. 55Yua kơ asar Kâo jing mơnơ̆ng ƀơ̆ng huă sĭt, laih anŭn drah Kâo jing mơnơ̆ng mơñum sĭt. 56Hlơi pô ƀơ̆ng asar Kâo hăng mơñum drah Kâo, ñu anŭn dŏ amăng Kâo laih anŭn Kâo dŏ amăng ñu, 57Kar hăng Ama, Pô hơdip, hmâo pơkiaŏ rai Kâo laih anŭn Kâo hơdip yua kơ Ama, ăt kar hăng anŭn mơ̆n hlơi pô ƀơ̆ng asar Kâo ñu či hơdip yua mơ̆ng Kâo. 58Anai jing ƀañ tơpŭng trŭn rai mơ̆ng adai, ƀu djơ̆ hrup hăng ƀañ tơpŭng mana ƀing ơi adon ƀing gih ƀơ̆ng laih anŭn ăt djai mơ̆n; hlơi pô ƀơ̆ng ƀañ tơpŭng anai ñu či hơdip hlŏng lar.”
59Yêsu pơhiăp hơdôm tơlơi anai tơdang Ñu pơtô amăng sang bơjơnum pơ Plei Kapernum.
Boh Pơhiăp Tơlơi Hơdip Hlŏng Lar
60Lu ƀing ding kơna Ñu hmư̆ tơlơi anai, gơñu laĭ “Boh pơhiăp anai tơnap đơi thâo hluh. Hlơi pô dưi hmư̆ tơlơi anŭn?”
61Samơ̆ Yêsu thâo yơh amăng pran jua Ñu kơ ƀing ding kơna Ñu pơhiăp brŏk kơ tơlơi anŭn, hnŭn yơh Yêsu laĭ kơ gơñu: “Djơ̆ mơ̆ tơlơi anai ngă tơhnač ƀing gih? 62Tui anŭn, hơgĕt tơlơi ƀing gih pơmĭn tơdah ƀing gih ƀuh Ană Mơnuih đĭ nao pơ anih Ñu dŏ laih mơ̆ng hlâo? 63Yang Bơngăt Ơi Adai yơh jing pô brơi tơlơi hơdip, asar ƀu yom ôh; khul boh pơhiăp Kâo hmâo pơhiăp hăng ƀing gih jing Yang Bơngăt laih anŭn tơlơi hơdip. 64Samơ̆ hmâo đơđa mơnuih amăng ƀing gih ƀu đaŏ ôh.” Yua kơ Yêsu thâo laih mơ̆ng blŭng hlâo hlơi jing ƀing mơnuih ƀu đaŏ, laih anŭn hlơi jing pô či pơblư̆ lui Ñu. 65Laih anŭn Ñu laĭ: “Yua kơ anŭn kâo hmâo laĭ laih kơ ƀing gih, ƀu hmâo ôh hlơi dưi rai pơ Kâo tơdah Ama ƀu brơi tơlơi dưi kơ ñu.”
66Mă mơ̆ng anŭn, lu ƀing ding kơna Ñu đuaĭ glaĭ ƀu nao hrŏm hăng Yêsu dơ̆ng ôh. 67Yêsu laĭ hăng pluh dua čô ding kơna: “Bơ ƀing gih, ƀing gih či lui kâo mơ̆n hă?”
68Simôn Pêtrôs laĭ glaĭ: “Ơ Khua, kơ hlơi ƀing gơmơi či đuaĭ tui? Ih yơh hmâo boh pơhiăp kơ tơlơi hơdip hlŏng lar.#Mat 16:16; Mar 8:29; Luk 9:20. 69Ƀing gơmơi hmâo đaŏ laih hăng thâo krăn Ih jing Pô Rơgoh Hiam mơ̆ng Ơi Adai.”
70Yêsu laĭ glaĭ: “Ƀu djơ̆ ôh hă Kâo hmâo ruah laih ƀing gih jing pluh dua čô ding kơna, samơ̆ sa čô amăng ƀing gih jing yang sat?” 71Ñu pơhiăp djơ̆ kơ Yudas ană đah rơkơi Simôn Iskariôt, yua kơ ñu jing sa čô amăng ƀing pluh dua čô ding kơna, pô či pơblư̆ lui Yêsu.
Արդեն Ընտրված.
Yôhan 6: JRA2016
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2016 United Bible Societies. All rights reserved.