Jɔɔnn 19
19
1Li yoo na ki Pailat te ki bi boo Yisa kpaasir. 2Ki lanjimanba na luu kunkonii fokirik ki yirimɔ, ŋaan gbabinɔ baanmuŋ nna, 3ki nyi baat ki gbaa u tɔɔnn, ki yeen a “Juu teeb kpanbar, ti foonta,” ŋaan pebitɔ tanpakii.
4Ŋanne ki Pailat bia ŋamm ki daa nyii nanyer ki bet yudamm na, “Gotir man, n baat nanɔ i boor, ki yin bann nan n ki la u biiti.” 5Ŋanne ki bi baar nan Yisa, niib na boor ni, ki u yir kunkonii fokirik na nan baanmuŋ na. Ki Pailat betib a “Gotir man, nirɔ maŋe na.”
6Yennu jiantu yudamm nan bi toontunna nba lau na, ki bi tian tintianii, ki yaa a “Kpaamɔ dapunpunn paak! Kpaamɔ dapunpunn paak!”
Ki Pailat betib a “Yimm jiimɔ man ki kpaau dapunpunn paak i mɔŋ, kimaan min ki la u biiti.”
7Ki Juu teeb yudamm na jiin yaa a “Ti mɔk sennsau, ki sennu maŋ want nan u kpan lek tee wun kpoe, kimaan u yaa a u tee Yennu Bijae.”
8Pailat nba din gbat nna, ki jaŋmaanii ji soorɔ bonchiann; 9ki u ŋmat kɔɔ ŋaan yiin Yisa, ki tan boiɔ a “A nyii lee?” Ŋaan Yisa din ki jiinɔ siari. 10Ki Pailat bia boiɔ a “A kan pak jiinimii? A ki mi nan n mɔk yikoo ki sa te ki bin ŋaa-a, ki bia mɔk yikoo ki sa te ki bin kpaa-a dapunpunn paak ki kpianii?” 11Ki Yisa ji jiinɔ a “Yennu-i bo-i kii chaba yikoo, a bo kii mɔk n yikoo. Li paak, daanɔ nba soorin ki jiin kubina na, u biit yab bonchiann ki gar a yara.”
12Pailat nba gbat nna maŋ, ki u lek ji loon ki wun ŋaau nan nunmɔnn, ŋaan ki Juu teeb yudamm na yakii kpayakit ki yaa a “Li-i tee ki a ŋaau, ŋann a ji ki tee kpanbara yudaanɔ Siisa yɔɔ kaa, kimaan daanɔ nba pur u mɔŋ kpanbar, u tee kpanbara yudaanɔ na dataake.” 13Pailat nba gbat nna, ki u nyii nan Yisa nanyer po, ki kar u buut kaanu paak, ki bi yir Binbintir. (Juu teeb maan ni, bi yir Gabata na.)
14Li din tee kut munnloob yoo sanyiɔk nie, ki li sa yent ki yukitgar tiaru jaamm-n di. Ki Pailat yet Juu teeb yudamm na a “I kpanbarii na!” 15Ki bi yakii kpayakit ki yaa a “Kpimɔ! Kpimɔ! Kpaamɔ dapunpunn paak.”
Ki Pailat boib “I loon ki n kpaa i kpanbar ki kpiu-uu?”
Ki Yennu jiantu yudamm na jiin a “Ti ki mɔk kpanbarsɔɔ see kpanbara yudaanɔ Siisa kuukɔɔ.”
16Ki Pailat ji chab a bin kpaa Yisa ki kpiu.
Ba kpaa Yisa ki tabinɔ dapunpunn paak biaŋinba
(Matiu 27.32-44; Mak 15.21-32; Luk 23.26-43)
Ŋanne ki Rom teeb lanjimanba na ji gaar Yisa, 17ki nyii nanɔ doo na kpiŋ; ki u jii u kuun dapunpunn. Ki bi saa baar siaminba ki bi yir “Yukpabuk” na. (Juu teeb maan ni, bi yi ŋanne “Golgota” na.) 18Leŋe ki bi kpaau dapunpunn paak; ki bia kpaa niib bannlee dapunpuna paak ki pukin Yisa po, ki yenɔ be u chianu ki lɔɔ mun be u chianu, ŋaan ki Yisa be sinsuuk ni. 19Ki Pailat sɔb sɔbu ki bi tabin Yisa dapunpunn na yur paak, ki li yaa a “Nasaret nirɔ Yisa wunba tee Juu teeb kpanbarii na.” 20Ki Juu teeb bonchiann din karin sɔbu maŋa, kimaan siaminba ki bi din kpaa Yisa dapunpunn paak na, li din ki fɔk nan Jerusalemi. Sɔbu na, li din sɔb Juu teeb nan Rom teeb nan Griik teeb maan nie.
21Ŋanne ki Juu teeb Yennu jiantu yudamm saan Pailat boor ni, ki saa betɔ a “Li bo ki ŋan ki a sɔb a ‘Juu teeb kpanbarii na.’ Li bo ŋan ki a sɔb a ‘Jɔɔ na pur u mɔŋ a u tee Juu teeb kpanbare.’ ” 22Ki Pailat jiin a “Ma sat sɔb linba, n sɔbe.”
23Lanjimanba nba kpaa Yisa na poorpoe, ki bi jii u tiat ki chentir taar munna, ki lanjimanba na kur din gaar tor. Li poorpoe biak ki bi jii u tiŋ po liatfouk, linba ki bi luur bonmunn, ki li ki mɔk nyarmu na; 24ki bi yet bi leeb a “I daa pati. Ŋaant ki ti tɔ tiatia ki laan wunba sa yentir.” Li din teen nna, a Yennu gbouŋ nba din yet nna, lin fit lian gbee a
“Bi chent n tiat,
ki bia tɔ tiatia n tiŋ po liatfouk paak.”
Nnee ki lanjimanba na set din tun.
Yisa nba chabit u naa ki kubintɔ sɔɔ biaŋinba
25Ki Yisa naa din see kpia u dapunpunn na; ŋɔɔ nan u niipoo, ki bi yiu Mari wunba tee Klopas ŋaapoo, nan Mari Magdaliin, ki bi lakin see leŋ. 26Ki Yisa la u naa, ki bia la u poorpoweitɔɔ nba ki u mantik loonɔ na, ki u mun see leŋ, ki Yisa yet u naa a “N naa, a bijai na jik,” 27ŋaan bet u poorpoweitɔɔ maŋ a “A mun, a naai na jik.” La din nyii li yoo na ki u poorpoweitɔɔ na ji din jii Yisa naa ki kun nanɔ u ŋaak ni.
Yisa kuun labaar
(Matiu 27.45-56; Mak 15.33-41; Luk 23.44-49)
28Li poorpoe, Yisa din mi nan bonsiar kur nba ki u din tuun na, li ji gbenna, ŋaan yet a “Nyunyukiru mɔkin.” U yet nna a lin gbeen linba sɔb Yennu gbouŋ ni na. 29Ŋmaŋ din see nan damiituk leŋ, ki bi jii saapo ki tun damiituk maŋ ni, ki jii daauk ki fin saapo na, ki teen u mɔb ni, 30ki u fɔɔnt ki nak, ŋaan yet a “Li gbenna,” ŋaan tibin ki chab u seek ki tur Yennu, ki kpo.
Biaŋinba ki bi jii kpann ki ŋmuu Yisa lokir ni
31Tɔn, Juu teeb yudamm na din ki loon niib na ki bii be dapunpuna paak foon daari; la sa yent ki li tee foon daar na. Foondasiar nba din sa yent maŋ din tee dajaanne. Li paak, ki bi din saan Pailat boor, a wun chab ki bin kɔnn kɔnn niib na taa, ki bin kpo yian, ki bin fit kpaatib dapunpuna maŋ paak. 32Li paak, ki lanjimanba na saan ki saa kɔnn binba lakin kpaa nan Yisa na taa, 33ŋaan baar Yisa boor ni, ki sɔɔ ki u kpoa. Li paak bi din ki kɔnn u taa. 34Ki lanjimanba yenɔ jii kpann ki ŋmuu Yisa lokir ni. Li taakpaak ni ki sɔn nan nyun ji nyi.
35Min nba sɔbin gbouŋ nee la ba teen biaŋinba na nan n mɔŋ ninbina, ki teen siara nan li tee mɔniie, ki n mi nan n siara maŋ tee barmɔniie, ki n sɔbin linba tee barmɔnii na a i fit lian teen yada. 36Li din teen Yisa nna a lin gbeen linba sɔb Yennu gbouŋ ni a “Bi kan yeer u kpaba nan yennkɔɔwa.” 37Ki Yennu gbouŋ bia yet siar po a “Niib tan sii gorii ba ŋmuu wunba kpann na.”
Yisa gbanant piinu labaar
(Matiu 27.57-61; Mak 15.42-47; Luk 23.50-56)
38Li poorpoe ki Josef, wunba tee Arimatea nirɔ na, saan Pailat boor ni, ki saa miarɔ Yisa gbanant. Josef din tee Yisa poorpoweitɔɔe, ŋaan u din waau woonin nie, kimaan u din tiin Juu teeb yudamme jaŋmaanii. Ki Pailat chabɔ; ki u saan ki saa kpaat Yisa ki jiiu. 39Ki Nikodemus mun baar, wunba din poŋ mi ki baar Yisa peŋ nyiɔk na; ki u dia tulaarii nba sa teen Yisa gbanant, ki li yab bonchiann. (Bi din jii bonsiar nba ki bi yir mir nan bonsiar nba ki bi yir alos ki ŋmat ki nan tulaarii maŋ.) 40Ki bi jii Yisa ki pɔbinɔ chinchenŋana ni nan tulaarii na, kaman nan Juu teeb kupiinu kaar nba tee biaŋinba na. 41Ba din kpaa Yisa siaminba na, kpaab din be leŋ, ki kapaauŋ poŋ be leŋ, ki bi din daa ki pii sɔɔ kaauk maŋ ni. 42Juu teeb foon daar nba per na, ki kaauk na bia ki fɔk na, ki bi pii Yisa leŋ.
Արդեն Ընտրված.
Jɔɔnn 19: BIM
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք