Noo Mian 14
14
CAB. XIV
1Ec y traa shen cheayll Herod yn Tetrarch jeh goo Yeesey, 2As dooyrt eh rish e ir‐oik, Shoh Ean Bashtey, te’h er n’irree veih ny merriu, as er‐yn‐oyr shen ta mirrillyn er nyn obbraghey liorish.
3Son va Herod er ghoaill Ean, as er choyrt eh ayns geulaghyn ’sy phryssoon, er coontey Herodias ben e vraar Philip. 4Son va Ean er ghra rish, Te noi yn leigh, ee dy ve ayd son ben. 5As tra baillish v’er choyrt eh gy‐baase, v’eh ayns aggle roish y pobble, er‐yn‐oyr dy row ad dy ghoiall eh son phadeyr. 6Agh er y laa v’er ny reayll corrym rish y laa ruggyr Herod, ghaunse inneen Herodias ayns yn enish oc, as ghow Herod lane boggey j’ee. 7Er shen ghiall eh lesh breearrey, dy choyrt jee cre‐erbee hir‐ragh ee. 8As dooyrt ish, myr va e moir e chur ro‐ee, Cur dou ayns shoh kione Ean Bashtey er claare: 9As by‐hrimshey lesh y ree: ny‐yeih er coontey yn vreearrey, as y vooinjer, v’ec gien mârish, doardee eh [yn kione] dy v’er ny livrey huic. 10As hug eh fys yn kione dy ve giarit jeh Ean ayns y phryssoon. 11As va’n kione er ny choyrt er claare, as livreit gys y ven‐aeg, as hug ish lh’ee eh gys e moir. 12As haink e ynseydee, as hrog ad y corp, as doanluck ad eh, as hie ad, as dinsh ad da Yeesey.
13Tra cheayll Yeesey jeh, ghow eh lhuingy’s, as jimmee eh veih shen gys ynnyd faasagh er‐lheh: as tra cheayll y pobble jeh, deiyr ad er ry nyn gosh ass ny ard‐valjyn. 14As hie Yeesey magh, as honnick eh chaglym mooar dy leih, as v’eh er veiyghey lesh chymmey orroo, as laanee eh adsyn va ching.
15As tra va’n fastyr er, haink e ostyllyn huggey, gra, She boayl faasagh shoh, as te nish lesh yn anmys: lhig y raad da’n cheshaght, dy vod ad goll roue gys ny baljyn‐cheerey, as beaghey y chionnaghey daue hene. 16Agh dooyrt Yeesey roo, Cha lhiass daue goll roue, cur‐jee shiuish beaghey daue. 17As dooyrt ad rish, Cha vel ain ayns shoh agh queig bwilleenyn, as daa eeast. 18Dooyrt eshyn, Cur‐jee lhieu ad ayns shoh hym’s. 19As doardee eh yn pobble dy hoie sheese er y faiyr, as ghow eh ny queig bwilleenyn as y daa eeast, as yeeagh eh seose gys niau, as vannee eh, as vrish eh, as hug eh ny bwilleenyn da ny ostyllyn, as hirveish adsyn ad er y pobble. 20As ren ad ooilley gee, as v’ad jeant magh: as hrog ad jeh’n fooilliagh daag ad, lane daa vaskad jeig. 21As adsyn v’er n’ee va’d queig thousane dooinney, cheu‐mooie jeh mraane as cloan.
22As chelleeragh hug Yeesey er e ostyllyn goaill lhuingys, as goll harrish gys y cheu elley roish, choud as v’eshyn lhiggey yn raad da’n pobble. 23As tra v’eh er chur y pobble ersooyl, hie eh hene er‐lheh seose er slieau, dy ghoaill padjer: as tra va’n fastyr er jeet, v’eh ayns shen ny lomarcan. 24Agh va’n lhong nish ayns mean ny marrey, eiyrit noon as noal lesh ny tonnyn: son va’n gheay nyn ’oï. 25As ayns y chiarroo arrey jeh’n oie, haink Yeesey huc, shooyll er y cheayn. 26As tra honnick ny ostyllyn eh shooyll er y cheayn, v’ad atchimagh, gra, She scaan t’ayn; as deï ad magh ayns aggle. 27Agh chelleeragh loayr Yeesey roo, gra, Bee‐jee dy yien mie, she mish t’ayn, ny gow‐jee aggle. 28As dreggyr Peddyr eh gra, Hiarn, my she oo t’ayn, abbyr rhym cheet hood er yn ushtey. 29As dooyrt eh, Tar royd. As tra va Peddyr er jeet neose ass y lhong, huill eh er yn ushtey, dy gholl gys Yeesey. 30Agh gennaghtyn yn gheay rastagh, v’eh agglit: as aarloo dy gholl fo, dyllee eh, gra, Hiarn saue mee. 31As ayns y tullogh, heeyn Yeesey magh e laue, as haare eh eh, as dooyrt eh rish, O ghooinney faase‐chredjuagh, cre’n‐fa v’ou mee‐ouryssagh? 32As tra v’ad er n’gholl er‐board y lhong, huitt yn gheay. 33Eisht haink yn cheshaght‐lhuingey, as hug ad ooashley da, gra, Ayns firrinys oo Mac Yee.
34As tra v’ad er jeet harrish haink ad gys cheer Ghennesaret. 35As tra hoig cummaltee yn voayl shen quoi v’eh, hug ad fys magh gys ooilley yn cheer mygeayrt, as hug ad lhieu huggey ooilley adsyn va doghanit. 36As ghuee ad er, ynrycan dy ventyn rish oirr e gharmad: as whilleen as venn rish, v’ad er nyn lheihys.
Արդեն Ընտրված.
Noo Mian 14: CON1810
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© British and Foreign Bible Society 1810, 2019