Mbụlembu 3
3
Adada madzụ
1Agwọ bụ anụ, shi kakọta ẹregede l'iphe, bụ anẹgu-ẹgbudu, Ojejoje, bụ Nchileke meshiru l'ọ ha. Ya ndono; yọ jị nwanyi ono: “Nchileke; ?ọ sụru t'ẹ b'ọ dụshi akpụru oshi, nọ lẹ mgbabu-wa, unu e-rije tọo?”
2Nwanyi ono asụ agwọ ono: “Lẹ Nchileke sụkwaru t'ayi rije iphe, bụ akpụru, shi l'oshi, nọ lẹ mgbabu-a. 3Obenu lẹ Nchileke sụkwanuru t'ayi be erikwa akpụru oshi, shi l'oshi ọphu nọ l'echi mgbabu ono. Mbụ t'ayi be edenyikwa iya ẹka edenyi lẹ phuu; l'ayi denyiwa iya ẹka bẹ ayi a-nwụhukwa.”
4Agwọ asụ nwanyi ono: “Ẹ tọ dụkwa anwụhu, unu a-nwụhu. 5Iphe gbe mechia nụ bụ lẹ Nchileke marua l'unu -ria ya; bẹ ẹnya a-sahụ unu; unu adụ l'ọ bụ Nchileke; maru iphe, dụ mma; mẹ ọphu dụ ẹji.”
6Nwanyi ono abya elee ẹnya l'akpụru oshi ono; phụ l'ọ dụ mma k'eriri; l'amakwaphu mma ole ẹnya. Yọ gụkfuru iya tẹ ya ria akpụru oshi ono; maru mmamiphe. Yọ bya awọta iya taa; bya awọtakwaphu nụ nji iya, yẹle iya tụko nọdu l'ẹke ono; yọ takwaaphu. 7Ẹnya abya asahụkota ẹphe; ẹphe abya amaru l'ẹphe gba ọtu. Ẹphe abya adzụkobewaphu mkpẹkwo figu weru.
8Ẹphe abya anụa ụkporo Ojejoje, bụ Nchileke l'ẹke oojephe lẹ mgbabu ono lẹ gẹrigeri urẹnyashi; je eworu onwẹphe domishia l'azụ oshi, nọtsua lẹ mgbabu ono tẹ Ojejoje, bu Nchileke ba aphụ ẹphe. 9Ojejoje, bụ Nchileke abya ekua Ádamu; sụ iya: “?Bụ awe b'ị nọ?”
10Ádamu asụ iya: “Lẹ ya nụkwaru ụkporo ngu lẹ mgbabu ono; je eworu onwiya domia l'ẹke ya atsụ egvu; kẹle ya gba ọtu.” 11Ojejoje asụ iya: “?Bụ onye sụru ngu l'ị gba ọtu? ?Ti riakwa nụ akpụru oshi ono, ya sụru t'ẹ b'i ri ono?”
12Ádamu asụ iya: “L'ọ kwa nwanyi-a, i doberu iya l'ẹka-wa bẹ wọtaru iya nụ iya; ya ataa ya.”
13Ojejoje, bụ Nchileke abya ajị nwanyi ono: “?Nanụ ẹge ọ dụ b'i meru iya ẹge ono?”
Nwanyi ono asụ iya: “L'ọ kwa agwọ deru iya ye; ya eje eria ya.”
14Ojejoje, bụ Nchileke asụ agwọ:
“Lẹ keshinu ọphu i meru
egbe iphe ọwaa; bẹ:
Bụ nggụbedua nwẹnkinyi ngu;
b'a tụru ọnu l'iphe, bụ elu;
mẹ anẹgu-ẹgbudu l'ọ ha.
Ịi-wata ọwu l'ẹpho.
Yọ bụru ẹja, nọ l'alị bẹ ịi-nọdu eri
gbururu jeye ẹge ịi-nọ-bebe.
15Ya mewaru tẹ nggu lẹ
nwanyi-a nọdu l'okfu.
Awa ngu yẹle kẹ nwanyi-a
a-nọdukwaphu l'okfu.
Ọo-dzọpyaje ngu ishi;
nggụbedua emeka iya
iphe l'ichirukfu.”
16Nwanyi ono b'ọ sụru:
“Ya e-me tẹ ọpa ẹpho-ime
karụ ngu ẹhuka.
Ii-jenwuje ẹhu
tẹmanu nggu amụa nwa.
Obenu lẹ nji ngu
a-nọdujele-e agụ ngu ẹgu.
Yọ bụru nji ngu ono
a-bụru ngu onye ishi.”
17Ádamu b'ọ sụru: “Keshinu ọphu i kwetaru ngabẹru nyee ngu nchị; je eria akpụru oshi ono, ya sụru tẹ b'i rishi ono bẹ
Ya gudeekwa okfu ẹka ngu tụ alị ọnu.
Ii-jeje ntakfuru;
tẹmanu nggu esebuta iphe, ii-ri.
Yọ bụru ẹge ịi-nọduje eje iya ndono
gbururu jeye ẹge ịi-nọ-bebe.”
18“Alị a-wataru ngu ofushiru
ẹjo ẹgbudu; mẹ ogvu.
Yọ bụru akpụru iphe, mịtaru l'ẹgu
a-bụjeru ngu nri.
19Ii-gbutaje ẹphuru phee
tẹmanu nggu eria nri;
gbururu jeye teke ịi-lata azụ l'alị;
keshinu ọphu ọ bụ l'ẹja b'i shi;
yọ bụru ẹja b'ị bụ.
Ọ bụkwaphu l'ẹja ono;
bẹ ịi-laphu azụ.”
20Tọ dụ iya bụ; Ádamu agụa nyee ya ono Ívu; kẹ l'ọo-bụru nne ọha mgburumgburu.
21Ojejoje, bụ Nchileke abya eworu akpọ anụ mee ẹkwa webe Ádamu yẹle nyee ya. 22Ya ndono; Ojejoje, bụ Nchileke asụ: “Nta-a bẹ madzụ dụwa l'ọ bụ ayịbedua; mbụ l'ọ mawaru iphe, dụ mma; maru ọphu, dụ ẹji. Ẹ ta ahakwa iya t'ọ wọtafua akpụru oshi, emeje t'a nọdu ndzụ ria; nọdu ndzụ ojejoje.” 23Tọ dụ ya bụ; Ojejoje, bụ Nchileke achịfu iya lẹ mgbabu Ídẹnu; t'o je ejeje ozi l'alị, bụ ẹke e shiru wota ẹja kpụa ya. 24Yọ chịfutsulephu nwoke ono lẹ mgbabu ono; bya eworu ojozi-imigwe, bụ Cherobu dobe l'ụzo ẹnyanwu-ahata mgbabu ono; bya eworu ogu-mbeke, enwu ọku; l'egbu ifu l'azụ dobe t'o cheje ụzo, e shi eje l'oshi-ndzụ phụ nche.
Արդեն Ընտրված.
Mbụlembu 3: Ikwo
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2014 Wycliffe Bible Translators, Inc. in cooperation with Abakaliki Literacy and Translation Trust