JOHON 2
2
Kana tauno kái lai panda
1Nokha salnwini ulo Galilini Kana tauno kái lai panda tongmani. Jisuni buma a kái lai panda-o tongo, 2Jisu bai bini sagrirokbo aro kobokjak kha 3Angur bwtwi thwk li ya wngwi Jisuni buma bono hai hwnwi sa kha, “Káilai pandani angur bwtwi páiwi tháng kha.”
4Jisu hai hwnwi sa kha, “Ama, abo nini ba tamo, ani ba tamo? Ani jora tabuk phano phai ya kho.”
5Hakhe Jisuni buma selengrokno hai hwnwi sa kha, “Bo sama hai’-no norok khlai di.”
6Aro holongni marua tháidok tongo, abórok wng kha Judairokni tongmung rwksaui súchana bagwi tonjakmani. Marua tháisa tháisa-o gola tháichi twi chago. 7Jisu selengrokno “O maruarokno twi supung di,” hwnwi sa kha. Hakhe bórok rwtaui supung kha. 8“Tabuk oroni twi kisa khógwi bandarini thani tlang di,” hwnwi Jisu sa kha. Hakhe bórok tlang kha. 9Aphuru bandari a twini khamani angur bwtwino chánaiwi nai kha. A angur bwtwi biyangni sók phai kha bo saui man ya, twi khóknai selengrok le saui mano. Aboni bagwino bo káijaknaisano ringwi 10hai hwnwi sa kha, “Jotono angur bwtwi kaham rw gra-o; kái lai panda-o phainairok abono kwbángma nung laima ulo ham thayano rw phai-o. Nwng tabuk suda se kahamno narwgwi ton kho!”
11Galilini Kana tauno Jisu omo’-no puila soidomni samung khlai gramani; aro bo bini chẃngsachano phunuk kha; hakhe bini sagrirok bono poito khlai kha.
12Aboni ulo buma bai bini takhukrok bai tei sagrirok bai Jisu Kapharnaumo tháng kha, aro nokha salnwi saltham se tong lang si-o.#Mat 4.13.
Jisu noktharo bania thwngnairokno rwkhlaimani
(Mat 21.12-13; Mar 11.15-17; Luk 19.45-46)
13Judairokni Yókma Ter samphama bagwi Jisu Jerusalemo tháng kha.#Lam 12.1-27. 14Bo noktharo thángwi musuk, mera, pharuk phalnairokno nugwi kha, rang sláinairoknobo songphango achuk laiwi tongmani nugwi kha. 15Hakhe bo dwkhwini chemuksa snamwi bebakno’-no musuk-mera bai baksa noktharni rwkhlaiwi rohor bai kha, rang sláinairokni songphangnobo philsaui rangrok sar hor bai kha. 16Pharuk phalnairokno bo hai hwnwi dagi kha, “Omorokno oroni tlangwi tháng bai di! Aphani nokno bania thwngjaknai nok ta khlai di!” 17Elembakni o kókno bini sagrirok muitu manjak kha, “O Kaitor, nini nokni bagwi ang kwsrang wngmani abo ano kobor cha rwnai.”#Lob 69.9.
18Aboni bagwino Judai hodarok bono hai hwnwi sẃng lai kha, “Omorokno khlaimani phan tongo hwnwi saui man rwna bagwi nwng bubo tẃi soidom phunugui man ba?”
19Jisu bórokno hai hwnwi sa kha, “O noktharno swbai di, omono ang nokha saltham bai’-no tisa phir anw.”#Mat 26.61; 27.40; Mar 14.58; 15.29.
20“Nwng bahai khe nokha saltham bai omono tisanai?” hwnwi bórok bono sẃngwi hai hwnwi sa kha, “O noktharno tisanani nokha bisi brwichidok nang kha!”
21Jisu samani nokthar le bini bwsak se. 22Aboni bagwino bo kwthwini mwthangwi tisajak phuru bini sagrirok bo samani o kókno muitu manjak kha. Hakhe bórok Elembaknobo poito khlai kha, Jisu samanobo poito khlai kha.
Jisu borokni bwkhano saui mano
23Jisu Yókma Tero Jerusalemo tong phuru bo soidomni samung khlaima nugwi aswk bororok bono poito khlai kha. 24Hai phano bebak bororokno kaham khe saui manma bai Jisu bórokno poito khlaiwi man ya. 25Borokni kók bono sana nang ya, tamni hwn khe borokni bwkha bisingo tamo tong bo kaham kheno saui mano.
Արդեն Ընտրված.
JOHON 2: KOKBSI
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.