YAPHANG 2
2
1Omo hai khe nokharokno tei hayungno tei aro bebak tongmarokno snam bai kha. 2#Hib 4.4,10.Salsnini salo khe Kaitor bini a snammani samungrok pái kha. Bo bebak tangmani thagwi salsnini salo khe lengla kha. 3#Lam 20.11.Bo salsnini salno hamari rw kha tei juda khe khak kha, tamni hwn ba Kaitor a salo bebak samung tangma#2.3: samung tangma: A salo bo bini snammano pái súk kha; eba orono bo bini snammani pái súk kha. mwthagwi lenglama sal. 4Omo hai khe’-no o nokharok tei hayung snammani láibuma.
Eden Tháiblwng
Subraiyung Kaitor nokha tei hayungno snam phuru 5ha saka-o buphang-uáphang mungsabo kwrwi kho, mungsa bwchlwibo pekhrup ya kho, tamni hwn ba Subraiyung Kaitor aphuru ha saka-o uatwi ua rw ya kho tei borok khoroksabo ha-o káimungrok kái ya kho; 6tamo khe ha bisingni twi choromsaui hano misiui rw kha.
7 #
1Ko 15.45. Aphuru khe Subraiyung Kaitor hani kisicha ha naui borokno#2.7: ha ... borok: Hibru kógo Borok hwnma tei Hakung hwnma khorang sol lai-o. tak kha tei bini bukungo subui mwthangnai rangma daui rw kha; hakhe borok kwthang wng kha.
8Hakhe Subraiyung Kaitor salkabai-o Eden hwnwi tháiblwng kaisa snam kha; tei bo takma a borokno aro ton kha. 9#Phu 2.7; 22.2,14.Bo aro naithok naithok tei kothok kothok bwthái buphangrok achai rw kha, tháiblwngni kwcharo khe langmani buphangno tei kaham hamya si rwnai#2.9: Kaham tei hamyano: Bubo kaham bubo ba simani tei bebakno simani. Simaphangbo achai rw kha.
10Eden tháiblwngni twima kaisa yorwi aro twi nang rw-o. Abo aro khakjagwi twima prak brwi wng kha. 11Swkangni kaisani mung khe Pison; abo Habilani bebak saka tẃi yorjak, aro rangchak tongo; 12a hani rangchak kaham; thok motom tei holong kaham monirokbo aro tongo. 13Tei kaisa twimani mung khe Gihon, abo ha Kus#2.13: Kus: Mesopotamia eba Sudan. gwnangwi yoro. 14Tei kaisa twimani mung khe Taigris, abo Asiriyani salkabai tẃi yoro. Phiya tei kaisa khe Uphratis.
15Subraiyung Kaitor a borokno tubu-ui Eden tháiblwng muphunna bagwi#2.15: muphunna bagwi: eba naikini khlaina bagwi. tei mwrwkna bagwi ton kha. 16Subraiyung Kaitor a borokno hai hwnwi dagiui sa kha, “Nwng o tháiblwngni bebak buphangni bwtháino cháui mano, 17tamo khe kaham hamya si rwnai buphangni bwtháino le ta chá di, tamni hwn khe nwng abono chámani salo’-no thwinai.”
18Aphuru khe Subraiyung Kaitor hai hwnwi sa kha, “Borok saichung susuk khe tongmani hamya; ang bo bai mwchang rwui bono chubanai khoroksa snamnai.” 19Hakhe Subraiyung Kaitor ha naui ha sakani bebak mal-matarokno tei nokhani bebak toksa-toluarokno snam kha hakhe mung pharna bagwi bini thani tubu kha. 20A borok bebak mal-matarokno toksa-toluarokno tei bolongni manwirokno mung phar kha; tamo khe abórokni bisingo kaisabo bono chubana bagwi bini mángsong mwchang li ya.
21Hakhe Subraiyung Kaitor a borokno sila charwi muktrwi tháng rw kha tei a borokni barani bekreng kongsa na kha tei abono bahan bai ból kha, 22Subraiyung Kaitor a borokni barani bekreng bai bwrwi khoroksa snamwi a borokni thani tubu kha. 23Hakhe a borok hai hwnwi sa kha,
“Páithago omo ani bekrengni bekreng
tei ani bahanni bahan;
bini mung Bwrwi#2.23: Bwrwi: Hibru kók bai khe 'Isha'. wngnai,
tamni hwn ba bo chwlani#2.23: Chwla: Hibru kók bai 'Ish'. aroni karijakma se.”
24 #
Mat 19.5; Mar 10.7-8; 1Ko 6.16; Epi 5.31. Aboni bagwi’-no borok ma-pha bai kagwi bini hik bai thansa wngo tei bórok mang kaisa wngo.
25Hakhe a chwla bai bihik khoroknwi’-no sago rí kwrwi tei labo lachi lai ya.
Արդեն Ընտրված.
YAPHANG 2: KOKBSI
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.