Genesis 8
8
Iqmoeq 8
Ulcuvq sivq kha ail-a nail ganl
1Thail hai ngaol-aoq, Heeqphaq Miqyail neq, Nol-avq dai khi aivq nee mail teevq gaq khe-ai laovq laovq ma nail lavqkhoel bha jaol nail haqtsoiq jaiqyaq juq bhai khi tsu nail jaiqyaq juq bhai, maq nioil peivq-ail. Al heel ngel-i mail, miltsaq kovtavq bhai lilmoel bhi bhoe lal khi, ulcuvq sivq kha ail-a nail ngaol.
2Miltsaq kov-uvq nee mail ulcuvq dov lal nail juq naq lai khi, nqtavq khe lolgov nee mail maoq-aol aol nail juq gail naq lai-a nail ngaol.
3Ulcuvq deq pheeq nail gail, 150 n bhee dai, teevq n micil micil dai sivq ail-a nail ngaol.
4Sivq la bhala 17 n bhee lal-u n-gaol, laovq laovq ma al laovq neq, Aqlaqlav nail gaoqjaoq juq bhai naq lai-a nail ngaol.
5Ulcuvq sivq kha lee nail lavqkhoel, tsel la bhala teevq n-gaol bhai, gaoqjaoq uqhuq moel lal-a nail ngaol.
640 n gaoq jaiq ail-u phao, Nol-avq neq, laovq laovq ma bhai lav sav-ai thaq nail lolgov gov yaq phao khi,
7ovngavq teevq maol phaiq dov gai-aivq-a nail ngaol. Ovngavq al maol ulcuvq maq khal gee lai-u phao kev dai, maq kovq lal mail, bhail bhail-ail jaol-a nail ngaol.
8Haoqnao teevq pov ulcuvq sivq-ail khi, miltsaq moel lal-aoq thaq-al laiq dai, ya heeq kivq nail haqbhoil, Nol-avq neq, khaoqkhoiq teevq maol, gaoq phaiq dov gai-aivq daiq thaq nail ngaol.
9Thail hai ngaol-aoq, miltsaq teevq heeq heeq lao, ulcuvq deq pheeq-ai haq nail ngel-i mail, khaoqkhoiq al maol naq nail jaolduq maq moel nia-ail. Al heel ngel-i mail, laovq laovq ma bha, bhail kol lavq-u phao, Nol-avq neq, aivq nail aqlavq tsaoq dov bhiq khi mail laovq lavqkhoel bha bhi aol lal-a nail ngaol.
10Sivq n bhee dai daonq khi, khaoqkhoiq al maol bhai teevq pov gaoq phaiq dov gai-aivq-a nail ngaol.
11Kivqhail lailma phao, khaoqkhoiq al maol neq, saqloq aqpavq tuv khi, Nol-avq jaol nail bha kovq lal thaq nail ngaol. Aq-u phao, miltsaq bhai ulcuvq sivq ail-aoq thaq nial dai, Nol-avq heeq nia thaq nail ngaol.
12Nol-avq neq, sivq n bhee dai, gaoq daonq khi mail pultavq, khaoqkhoiq al maol bhai, gaoq phaiq dov gai aivq-u phao, khaoqkhoiq al maol maq kovq lal-aoq thaq-al.
13Nol-avq nail aqkovq, 601 kovq bhee lal-u phao, teevq la bhala teevq-n n-gaol, miltsaq kovtavq bhai ulcuvq gee lai-a nail ngaol. Nol-avq neq, laovq laovq ma nail khaolpoiv phao khi, lavqniil phao hel daiq dov gai-aivq-u phao, miltsaq aqgee gee lai thaq nail bhai, ya moel-a nail ngaol.
14Nvq la bhala nvq tsel sivq n n-gaol neq, miltsaq aqmeeq dai, gee gil lai-a nail ngaol.
15Aq-u phao, Miqyail Nol-avq bhai ge bhiq-a nail:
16"Naol naoq nail khaqma, yaqyov juq dai khi mail khiqma juq nee mail teevq gaq khe-ai, laovq laovq ma nee mail dov-ail yaoq.
17Aqdoevq khal doevq nail yaoq phaq yaoq-aol nee, keivq-avq juq maqkhaiq, haqtsoiq jaiqyaq juq maqkhaiq, tsu nail jaiqyaq juq maqkhaiq, soiq soiq-ail tsao nail jaiqyaq juq maqkhaiq, miltsaq kovtavq bhai, bhi jeq bhi el-ail nail galduq, aqyu juq bhai naoq-ai nee mail teevq gaq khe-ai, bhi dov lee yaoq" dai, ge bhiq-a nail ngaol.
18Al heel ngel-i mail, Nol-avq neq, aivq nail khaqma, yaqyov juq dai khi mail khiqma juq nee teevq gaq khe-ai, laovq laovq ma nee mail dov ail-a nail ngaol.
19Keivq-avq juq maqkhaiq, jaiqyaq maol ma maol yaq juq maqkhaiq, aivq nail phaq aivq, aivq nail laovq laovq ma nee mail dov gil lee-a nail ngaol.
20Aq bhai nee ngal-aq, Nol-avq neq, Heeqphaq Miqyail bhai laol bhiq nail haqbhoil, laolduq lav sav khi, aqhaol haol nail jaiqyaq juq dai khi, aqhaol haol nail keivq-avq juq nail lavqkhoel khe nieivq dov-a nail nee ovqtavq, laolduq kovtavq bhai, miqjaq kheq poiv khi laol bhiq-a nail ngaol.
21Heeqphaq Miqyail bhai laol bhiq-u phao, huqbhiq nil nail bhai ya lai bhiq nail ngel-i mail, aivq bhai aivq ge nail: "Tsaol-aq yaq neq, yaqnoil-ail jiav-u nee, neema neenoeq nee dul al jaiq-ail doil khi ngaol-aoq, aqyu juq bhaq da nee, yaqhao teevq pov miltsaq bhai ivqkhail maq yavq yaoq-aol. Ngal aqdoevq doevq nail juq yaoq phaq yaoq-ao nee bhai niil aq-il khe-ai, yaqhao teevq pov maq bhi sil gil yaoq-aol.
22Miltsaq khal jiav-u phao kev dai, kha jaq nail aqyanq jiav-u khe-ai, gaiq kovq oil kovq nail aqyanq gail bhi jiav nail ngaol. Aqcoevq dai khi aqlaol, aqlaol laol nail yanq dai khi, aqcoevq coevq nail yanq, nqkiv n-gaol maq ceiv lai dai, bhi jiav nail ngaol" dai, ge ceiv gai-aivq-a nail ngaol.
Արդեն Ընտրված.
Genesis 8: aeu
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2016, Wycliffe Bible Translators, Inc. All rights reserved.