Genesis 7
7
Iqmoeq 7
Ulcuvq deq pheeq-a nail ganl
1A bhai nee ngal-aq, Heeqphaq Miqyail Nol-avq bhai ge bhiq-a nail: "Naol dai khi naoq nail phaqyaq ma yaq iqsanl mail, laovq nail lavqkhoel bha aol lai yaoq. Miltsaq kovtavq bhai naol teevq gaq taivq-ail tsaq nail daol nail gaq pevq nail dai, ngal hel daiq moel nail ngaol.
2Naoq-ai nee mail teevq gaq khe-ai haol nail jaiqyaq juq bhai aqphoil aqma teevq phaq nail sivq gu dai, khul bhoel yaoq. Maq haol nail jaiqyaq juq neq, teevq phaq nail teevq gu taivq-ail, khul bhoel yaoq.
3Keivq-avq juq gail aqphoil aqma teevq phaq nail sivq gu bhee dai, khul bhoel yaoq. Jaiqyaq juq dai khi keivq-avq juq neq, miltsaq kovtavq bhai aqdoevq doevq khi bhi jeq bhi el lal nail galduq, thail hai nl yaoq.
4Sivq n bhee lal haq neq, ngal-i mail teivq-a nail aqdoevq khal doevq nail juq iqsanl mail bhai lav peivq gil nail galduq, miltsaq kovtavq bhai 40 n 40 kivq bhee dai, maq ceiv lai dai, ngal maoq-aol bhi aol lee nail ngaol" dai, ge bhiq-a nail ngaol.
5Nol-avq gail, Heeqphaq Miqyail-i mail daoq khal bivq-a nail khe-ai, nl-a nail ngaol.
6Miltsaq kovtavq bhai ulcuvq bhi deq pheeq-u phao, Nol-avq nail aqkovq 600 kovq bhee-aiq nail ngaol.
7Nol-avq dai khi aivq nail khaqma maqkhaiq, aivq nail yaqyov juq dai khi aqyu juq nail khaqma juq maqkhaiq, ulcuvq deq pheeq nail nee ya jel-ail nail galduq, laovq lavqkhoel bha aol gil lai-a nail ngaol.
8Jaiqyaq aqhaol juq nail aqgu juq maqkhaiq, maq haol nail jaiqyaq nail aqgu juq maqkhaiq, keivq-avq juq maqkhaiq, miltsaq bhai soiq soiq-ail tsao nail jaiqyaq juq maqkhaiq,
9jaiqyaq aqphoil aqma juq iqsanl mail, Miqyail-i mail daoq bivq-ai thaq nail khe-ai, Nol-avq jaol nail bha lal khi, laovq laovq ma nail lavqkhoel bha aol gil lai-a nail ngaol.
107 n bhee lal-al ngal-aq, miltsaq kovtavq bhai ulcuvq deq pheeq lee-a nail ngaol.
11Nol-avq nail aqkovq 600 kovq bhee lal khi, nvq heeq heeq 17 n bhai, miltsaq daoqthaoq nee mail ulcuvq dov lal-a nail nee ovqtavq, nqtavq khe ulcuvq nail lolgov juq iqsanl mail, phao ha gil khi, maoq-aol aol dee dee lee-a nail ngaol.
12Miltsaq kovtavq bhai 40 n bhee dai, nqkiv n-gaol maq naq dai, maoq-aol aol lee-a nail ngaol.
13Aq-u n-gaol, Nol-avq neq aivq nail khaqma dai khi, aivq nail yaqyov hail gaq pevq nail Seiqmav, Haqmav, Yaqphai khi mail aqyu juq nail khaqma nee mail teevq gaq khe-ai, laovq laovq ma nail lavqkhoel bha aol lai-a nail ngaol.
14Tsu nail jaiqyaq mao dai phaq maqkhaiq, haqtsoiq jaiqyaq mao dai phaq maqkhaiq, soiq soiq-ail tsao nail jaiqyaq mao dai phaq maqkhaiq, keivq-avq mao dai phaq maqkhaiq, aqyu juq nee mail teevq gaq khe-ai, laovq laovq ma nail lavqkhoel bha aol lai-a nail ngaol.
15Teevq phaq nail nvq maol nvq maol dai, aqdoevq khal doevq nail jaiqyaq juq iqsanl mail Nol-avq jaol nail bha lal khi, laovq laovq ma nail lavqkhoel bha aol lai-a nail ngaol.
16Miqyail-i mail Nol-avq bhai daoq bivq-ai thaq nail khe-ai, jaiqyaq juq aqphoil teevq maol aqma teevq maol aol gil lal-u phao, Heeqphaq Miqyail neq, lolgov pheeq thaiq bhiq-a nail ngaol.
1740 n 40 kivq bhee dai, maoq-aol maq ceiv lai dai, aol nail ngel-i mail, laovq laovq ma al laovq miltsaq nee mail daqmoe bha dil lal-a nail ngaol.
18Ulcuvq deq dav lal dee dee-u phao, laovq laovq ma al laovq gail ulcuvq nail kovtavq bha bhoe nail ngaol.
19Ulcuvq al jaiq-ail deq dav lal-a nail ngel-i mail, daqmoe khal moe nail gaoqjaoq juq iqsanl mail, ulcuvq-i mail deq pheeq gil-a nail ngaol.
20A bhai nee ngal-aq, gaoqjaoq uqhuq nee mail pultavq, 15 cav bhee dai, ulcuvq deq dav lal-a nail ngaol.
21Aq-u phao, miltsaq kovtavq khe jaol nail tsaol-aq juq maqkhaiq, tsu nail jaiqyaq juq maqkhaiq, haqtsoiq jaiqyaq juq maqkhaiq, soiq soiq-ail tsao nail jaiqyaq juq maqkhaiq, keivq-avq juq maqkhaiq, khal jaol nail iqsanl mail sil gil-a nail ngaol.
22Al heel ngel-i mail, miltsaq kovtavq khe aqhaq gaol khi aqdoevq khal doevq nail juq iqsanl mail sil gil-a nail ngaol.
23Miqyail neq tsaol-aq yaq juq bhai maqkhaiq, tsu nail jaiqyaq juq bhai maqkhaiq, haqtsoiq jaiqyaq juq bhai maqkhaiq, soiq soiq-ail tsao nail jaiqyaq juq bhai maqkhaiq, keivq-avq juq bhai maqkhaiq, khal doevq nail yaoq phaq yaoq-ao nee bhai miltsaq kovtavq nee mail lav peivq gil bhiq-a nail ngaol. Laovq laovq ma nail lavqkhoel khe, Nol-avq nee mail teevq gaq khe-ai jaol nail juq taivq-ail jel ail-a nail ngaol.
24Miltsaq kovtavq bhai teevq 150 n bhee dai, ulcuvq deq pheeq khi jiav nail ngaol.
Արդեն Ընտրված.
Genesis 7: aeu
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2016, Wycliffe Bible Translators, Inc. All rights reserved.