Gɔwɔ tɔɔi 3
3
Yálá ə hulɔnu da nɛ̨ɛ̨nu di kpɛ Eden ɲɛa
1Ɉuwɔɠaa ŋɛ̨i Yai-Laa ə bɛli, kaalə ɓə kɛ gbąnąą di lɔwai, gaaləi tii ɓə nɛ̨ɛ̨nu mąąnikɛ, yɛ mą: «Akɛtii, Yálá ə kɛ kpɔ diɛ: ‹Nwuluɠaai gaa ɓɛ ɲɛa, ka hvə gəlee ɓa mį́i?›»
2Nɛ̨ɛ̨nu yɛ kaalə ɓa: «Kwa pɛli mą, nwuluɠaai gaa ɓɛ, ku gəlee ɓa ta mį́i. 3Kɛlaa, yii ɓaa nwului ŋɛ̨i tɔɔni ɲɛa hamąi, Yálá ə kɛ kuɔ: ‹Ka hvo mą ta mį́i, ka hvə kpɛli tunwɔ̨n gbinį ɓa, əgɛ, ka hvo pa haa.›»
4Kaalə ə pənə yɛ mą: «Ka hva haa kpɔ tɔ̨nɔ̨ kpɛli. 5Kɛlaa, Yálá kili kaa ɉu, yɛ diɛ: Yələi ka da mį́i la, ka mɛ̨nį kəlee mąąkpɛɛ a nɛlɛɛ, ɛlɛɛ, ka kɛ yɛ yaa, kaa pɛli mɛ̨nį lɛlɛɛ da mɛ̨nį ɲɔ̨nwɔ̨ɔ̨ di kulɔ nɔwai kɔ́lɔn ɉi.»
6Nɛ̨ɛ̨nu ə nwului tii ma kaa, ə mąąkpɛɛ, nɛlɛɛ, ɛlɛɛ, ə mį́i wɛli too mą, ə gaa, yɛ kɛ, yii, a pɛli ə nu kili too ɲəi. Nɛ̨ɛ̨nu ə nɛɛ mą, ə nwulu ɓai tii ta kulɔ, ə mį́i; yili pulu, ɉilɛ yɛ ɓo tɔɔni gwɛlɛ, ə da tɛɛ yili pɔ, yili yaan, ə nwɛi mį́i. 7Di kəlee hveelɛi di di kpɔɔ kaa kɛa a di kpuwulu, di nɛɛ mą, di ɓɔ́laa wulu laa kulɔ mą, di gɛ a lɛnɛ̨, di ɲili diɛ.
8Yələwulii pɔ hvaŋą tɛɛi lɔwai, hulɔnu da nɛ̨ą, di Yai-Laa woo mɛ̨n yɛ hiɛ ɲɛa. Di nɛɛ mą, di li, di di loo nwuluɠaa pulu. 9Yai-Laa ə hulɔnu təli, yɛ mą: «Nu! Ə́ kaa mį?»
10Nu yɛ mą: «Ŋą́ą́ ə́ woo mɛ̨n, ŋą́ą́ ɲɔw, ɛlɛɛ, ŋą́ą́ noo. Mąąhɔlɔɓo, gáá a gbúwulu.»
11Yai-Laa yɛ mą: «Gbɛɛ ɓə kɛ yɛ́, ə́ kaa a ə́ kpuwulu? Akɛtii, nwului ŋɛ̨i ŋį́ kɛ yɛ́: ‹Hvó ma ta mį́i›, yáá da mį́i?»
12Nu yɛ Yálá ɓa: «Nɛ̨ɛ̨nu ŋɛ̨i ə́ gɛ a ɉíɛ gee pulu, ya ɓə nwului tii ma ta tɛɛ bɔ́, ɲą́ą́n, ŋį́ mį́i kɛa.»
13Nąąlɔwai, Yai-Laa ə mo nɛ̨ɛ̨nu ɓa, yɛ mą: «Nɛ̨ɛ̨nu! Lə mɛ̨nį ɓa ə́ yili kɛ tii?»
Nɛ̨ɛ̨nu yɛ mą: «Kaalə ɓə mówo, ya ɓə gɛ, gɛ́ da mį́i.»
14Yai-Laa ə mo kaalə ɓa kɛa nąąlɔwai, yɛ mą: «Yɛ bələi yáá gɛ la tii, ə́ nɛ̨ŋɛ̨n naai, huwɔɠaa lɔwai, ə mą kɛ, lɔwɔ huwɔɠaa lɔwai, ə́ kaa pai kɛi hiɛi ə́ koo mɛ̨i, muluun gbala ɓə pai kɛi a ə́ kɔ̨nɔ̨n, ə́ yii hvóló kəlee hu. 15Gáá pai yowolaa tooi yɛ́ ka nɛ̨ɛ̨nu ka lɔwai, ŋį́ doo ə́ huwu da nɛ̨ɛ̨nu huwu di lɔwai. Nɛ̨ɛ̨nu huwu kaa pai ə́ nwun nwoloi, ə́ kaa pai nɛ̨ɛ̨nu huwu ɲin ɉii dunwo ɓa.»
16Yai-Laa yɛ nwɔ̨nɔ̨ nɛ̨ɛ̨nu ɓa: «Ya mɔ̨nɔ̨ mį́i koonɛ̨ą lɔwai, ə́ ə́ laanɔ̨nwɔ̨ ɓo ə́ wɔ kwəinwąną kɛi lɔwai, ə́ liiɓa mɛ̨nį kəlee nwun maa pai kɛi a ə́ hilɛ, ɛlɛɛ, yili kaa pai heei ə́ mɛ̨i.»
17Yai-Laa yɛ kɛa hulɔnu ɓa: «Yii kpɔ ə́ ə́ wəli tɔɔ ə́ nɛ̨ą woo ɓa, ɛlɛɛ, nwului ŋɛ̨i ŋą́ kɛ yɛ́: ‹Hvó má ta mį́i›, ə́ da mį́i, ə́ hɔn tii mąąi mɛ̨nį ɓa, lɔi kaa pai kɛi a nɛ̨ŋɛ̨n naa. Ə́ kaa pai kɛi mɔ̨nɔ̨ mį́i ə kɔ̨nɔ̨n gwɛliɛ hu, lɔi ɓa, ə́ yíi hvóló kəlee hu. 18Lɔi kaa pai ɲąąlən da ɲąąlən nwuluɠaa kulɔi ə́ mąą mɛ̨nį ɓa. Tíi kɛɛ ɓə, ə́ kɔ̨nɔ̨n a kulɔ ɉu. 19Ya wala hvɔnɔ̨ ya tee ə́ tɔwɔla, hva kɔ̨nɔ̨n ɉɔlɔɓo, ɛlɛɛ ɉu, ə́ tinɛ̨n ə́ too pɔlɔ hu, ɓɛi di ə́ kulɔ laa. Hvo gaai, pɔlɔ ɓaa yɛ́, mąąnɛ̨ɛ̨, ə́ pənə ə́ too pɔlɔ hu.»
20Hulɔnu ə nɛ̨ą laa hee a Ɛvə, yili mukulaa ɓaa: Yɛnɛ̨ɛ̨. Mąąhɔlɔɓo, ya ɓə gaa a yɛnɛ̨ɛ̨ nuą kəlee di lee. 21Yai-Laa ə Adamə da nɛ̨ą di mąą həɠə pɛli a huwɔ kɔ́lɔ, ə doo di kwaną. 22Yili pulu, Yai-Laa yɛ gbɔwɔ ɓa: «Nu ka ŋɛ̨i aa kɛ kɛa yɛ gu ta, mɛ̨nį ɲɔ̨nwɔ̨ɔ̨ da mɛ̨nį lɛlɛɛ di kɔ́lɔn ŋąą hu. Yii hu kɛa, mąą hvo nɛ̨ɛ̨li kɛa, hvo ɲɛnɛ̨ɛ̨ kɛ wulu ɓa ta mį́i, akɛ a da mį́i, hva kɛa haa.»
23Yai-Laa ə nu kpɛ Edɛn ɲɛai tii hu, əgɛ, ə li, ə tíi kɛ lɔi ɓa, ɓɛi di kulɔ laa. 24Ɓɛlɔwai kɛa Yálá ə nu kpɛ la Edɛn ɲɛa, Ə nɛɛ mą ə, mąąkpɛ malakaɠaa tɔɔ bələ nwun na, ɓɔwa kwɛa yɛ ɓo di yəi, yɛ nwɔ̨n, diɛ ɲɛnɛ̨ɛ̨ kɛ wului tii mąąkpɛ la.
Արդեն Ընտրված.
Gɔwɔ tɔɔi 3: BKPDCG
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք