A Luk Sõng 24
24
A Zezi vʋʋgre
(Mt 28,1-10; Mk 16,1-8; Zã 20,1-10)
1At daar yibeoog pĩnda, pagba kẽnga yaoogẽ wã ne tɩdarã la yũ-noodã b sẽn da seglã. 2B taa n mikame tɩ b ra bilga kugrã n zãag ne yaooga noore. 3B kẽeme la b ka yãe Soaala Zezi yĩnga ye. 4B ra ka mi b sẽn na n tags bũmb ninga yell kãng poorẽ ye. La ade, dap a yiibu sẽn yer fut sẽn pɩnd waa n yaasa bãmb taoore. 5Pagba yɛɛsame n kõs b neng tẽnga. La rapa yeel-b lame: «Bõe yĩng la y baood kɩɩms sʋka sẽn kẽnda ne vɩɩma? 6B ka le be ka ye! B vʋʋgame! Tẽeg-y b sẽn da yeel bũmb ninga tɩ b nan ket Galile: 7#Mt 16,21; 17,22-23; 20,18-19; Mk 8,31; 9,31; 10,33-34; Lk 9,22; 18,31-33. ‹Yaa pakre tɩ b yõk Ned Biiga n kɩs yel-wẽn-maandba tɩ b ka-b pika, tɩ b vʋʋg dasma a tãab daare.› » 8La Wakat kãnga pagba sɩd tẽega a Zezi goama.
9Pagba yii yaoogẽ n lɛɛg n tɩ togs rẽ fãa (Tʋʋm-tʋmdb) piig la a ye wã la neb a taaba. 10Da yaa Magdala Mari, a Zan, a Mari, a Zak ma wã. Pagb a taaba sẽn da tũud bãmba, bãmb me togsa Tʋʋm-tʋmdba boto. 11La b pa tẽ b goama n yet tɩ b zʋbsdame.
A Piyɛr rabda yaoogẽ
12A Pɩyɛr yikame n wudg n kẽng yaoogẽ wã la a sẽn tɩ zõond n gese, a yãee pɛɛla bal sẽn da rɩge. La a lɛɛg n kula yiri, n yɛɛsd wʋsgo ne bũmb ninga sẽn maana.
Emmayus karen-biis a yiibu
13Badaare me, karen-biis a yi n da rabd tẽng a ye sẽn boond tɩ Emmayus; tẽnga ra zemsa wakata yiib kẽnd ne Zerizalɛɛm. 14Yaa bũmb ning fãa sẽn maam pẽem-pẽema la b ra gomd ne taaba. 15La bãmb sẽn da wa n yẽsdẽ la b wẽed no-koɛɛma ne taaba, a Zezi kolgame n kẽnd ne bãmba. 16La yɩɩ wa b ra luda b nina tɩ b ka tõe n bãng-b ye. 17A Zezi yeel-b lame: «Yãmb kẽndame la y yẽsd bõe yell ne taaba?» Tɩ b na n yaas ne sũ-sãanga.
18La bãmb nin-yend sẽn boond t'a Kleopas, leok-b lame: «Yãmb y ye bala n be Zerizalɛɛm n zɩ bũmb ning sẽn maan dasem kãensã?» T'a Zezi yeel-a: 19«Bõe yelle?» Tɩ b yeel-ba: «Nazarɛt Zezi wã yelle. Bãmb sẽn yɩ bãngda, pãng soaba b goamẽ la b tʋʋmnẽ, Wẽnnaam la neba fãa taoore. 20Tɩ maan-kʋʋdba kãsẽm dãmba la nanamsã yõk ba n kɩs tɩ b kao b kũum bʋʋdo n paalg-ba, n ka-b pika. 21Tõnd da tẽedame tɩ bãmb n da na n fãagẽ Israyɛl, la ade, yaa dasma a tã rũnna, la yell bãmba maan yã. 22Yaa sɩda, pagb kẽer sẽn be tõnd sʋka n waa n yɛɛs tõnd al wʋsgo; b yeelame tɩ b kẽnga yaoogẽ wã tõd-beoogo, 23n pa tɩ yãe-b ye, tɩ b lɛɛg n wa yeel tɩ malɛk rãmba m n lik bãmba, n togs tɩ b vɩɩme. 24Tɩ tõnd neb kẽer kẽng yaoogẽ wã n tɩ yãe bũmba fãa wala pagba sẽn togsã, la b mengã, b sɩd pa yãe-b ye.»
25T'a Zezi na n yeel-ba: «Yam kɩds rãmba, y sũura maaga zãnga tɩ y pa tẽed bãngdba sẽn yeel ye. 26Da ka pakr tɩ Krista nams woto n yaool n kẽ b pẽgr pʋgẽ bɩ?» 27La b sɩnga ne a Moyiiz n saag bãngdba fãa n vẽnegd bũmb ning fãa sẽn gʋls bãmb poorẽ.
28B sẽn waa n kolg tẽng ning b sẽn da rabdã, a Zezi maana wa b rat n yõsg n taa taoore. 29La neb a yiiba pẽdg-b lame n yetẽ: «Bɩ y kell n pa ne tõndo tɩ lebga zaabre la wĩndg rat n kẽeme!» A Zezi kẽeme n zĩnd ne bãmba. 30La b sẽn da zĩi n dɩt ne bãmba, b rɩka buri n pʋʋs bark pʋʋsgo, n kaoog n kõ-ba. 31Dẽ marsã la b nin yaool n puki tɩ b na n bãng ba; la a Zezi menema b nifẽ. 32Tɩ b yeel taaba: «Tõnd sũura ra tʋʋla wa bugum b sẽn waa n sõsd ne tõnd sor zugu la b wilgd tõnd sebr sõnga võore.»
33Wakat kãng bala b yikame n leb Zerizalɛɛm la b tɩ mika piig la a ye wã, ne b tũud-n-taase, sẽn tigim taaba, 34la sẽn yeel-ba: «Sãmbg ka ye, Soaala vʋʋgame; b lika b meng a Simo!» 35Karen-biisa me wẽneg n togs-b la bũmb ning sẽn maan sor zugu ne bãmb b yiibã la b sẽn yɩlẽ n bãng a Zezi, bura kaoogr wakato.
A Zezi likda b Tʋʋm-tʋmdba
36Bãmb sẽn da gomd woto ne taaba, a Zezi meng waa bãmb sʋka la b yeel-b lame: 37«Laafi zĩnd ne yãmba!» La b yɛɛsame tɩ rabeem kãseng yõk-ba tɩ b ra tẽedame tɩ yaa kɩɩma la b sẽn ne wã. 38A Zezi yeel-b lame «Yaa bõe tɩ yãmb yɛɛsdẽ la yaa bõe tagsgo n wat yãmb sũurẽ? 39Ges-y mam nus la m nao. Sɩd yaa maam! Bɩ y sɩɩs-m n ges; kɩɩm pa tar nemd la koaba wala yãmb sẽn ne tɩ m tara ye.» 40La b sẽn yeel woto b wilga b nus la b nao. 41B sẽn da ket n pa tẽed, sũ-noog keelem yĩnga, la b ket n yɛs ne pɛlen-yɩka, 42a Zezi yeel-b lame: «Yãmb tara bũmb ka sẽn na n dɩ bɩ?» B kɩs b la zĩm sẽedgo la sɩ-vaka 43tɩ b reeg n dɩ bãmb taoore.
44T'a Zezi yaool n yeel-ba: «Yaa woto la mam sẽn da togs yãmb, m sẽn da waa n ket ne yãmba, da yaa modgre, tɩ b pids sẽn gʋls bũmb ning fãa mam poorẽ, a Moyiiz noora sebrẽ, bãngdba sɛbẽ la yɩɩla sebrẽ.» 45Dẽ poore a Zezi vẽnega b yam tɩ b wʋm sebr sõng võore. 46La b yeel-b lame: «B gʋlsa woto tɩ Krista na n namsame la b vʋʋg kɩɩms sʋka dasem a tã daare. 47Gʋlsame yɛsa tɩ tuubg ning sẽn wat-a ne yel-wẽna sugrã, bɩ b moon-a bãmb yʋʋr yĩnga ãndunĩ rãmba tẽnsẽ la sɩngda Zerizalɛɛm. 48Yãmb tara rẽ fãa kaseto.
49 #
Tv 1,4. La ade, mam na n tʋma yãmba m Ba sẽn kãab yamb a soabã. La yãmba, kell-y n yaas-y tẽnga pʋga al tɩ b wa sudg-y yĩngri pãnga.»
A Zezi arzãn dʋʋbo
50A Zezi peeg-b lame n tees Betani sẽne la b zẽka b nus n ning-b barka. 51#Tv 1,9-11. La b sẽn waa n ningd-b barkã, b bas-b lame n dʋ yĩngri. 52Bãmb wõgemdame n waoog-ba la b leba Zerizalɛɛm ne sũ-noog kãsenga, 53la wakat buud fãa b ra bee wẽnd doogẽ wã n pẽgd Wẽnde.
Արդեն Ընտրված.
A Luk Sõng 24: SSDC98
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
SEBR SÕNGO © Alliance Biblique du Burkina Faso, 1998.