Mateo 7
7
Sa Katudluanan Mahitenged Hu Paghukum
(Mateo 7:1-5; Lucas 6:37-38, 41-42)
1“Harì nuy aghukumi sa duma ha mga etaw ta daw harì kaw daan hukuman hu Dios. 2Ta ku inu sa ighukum nuy hu duma nuy iyan en daan haena ighukum inyu hu Dios, daw sa kabegat hu ighukum nuy iyan en daan haena kabegat hu ighukum inyu hu Dios.
3“Imbà nuy man tag-ahaaya sa puling hu duma nuy? Hurà nuy ba diay katun-i ha sa inyu ha puling iling kaadagi hu batang? 4Imbà kaw tag-ikagi ha ag-awaen nuy haena sa atiyuay ha puling hu duma nuy ha sa inyu ha puling bà daan su batang? 5Sinyu sa tagpasibù-sibù, unahen nuy gayed awaen sa puling nuy ha bà su batang na ku makaindan kaw en human nuy dayun awaa sa nakapuling duun hu duma nuy.
6“Harì nuy iila duun hu mga asu sa mga butang hu Dios ta bà kaw dà taena kagata, daw harì nuy daan iglambeg sa mahalen ha pirlas duun hu mga babuy ta bà dan dà haena takunai.
Sa Pagpanayù Duun Hu Dios
(Mateo 7:7-12; Lucas 11:9-13)
7“Panayù kaw duun hu Dios ta ilahan kaw gayed kandin, pan-ahà kaw daw makaahà kaw, pangumaw kaw daw puwaan kaw kandin. 8Ta bisan sin-u sa agpanayù ag-ilahan daw saena ha agpan-ahà makaahà daw sa agpangumaw agpuwaan. 9Ku amin inyu agpanayù sa batà nuy hu supas ag-ilahan nuy ba diay hu batu? 10Daw ku manayù hu sedà bunsalagan ba diay sa ig-ila nuy? 11Ku sinyu sa mga etaw ha makasasalà agkatuen kaw tag-ila hu maayad duun hu mga batà nuy, labaw pa gayed sa Amay nuy diyà ta langit ta ku manayù kaw ilahan kaw gayed kandin hu mga maayad ha agpanayuen nuy.
12“Ku inu sa agkabayaan nuy ha buhaten diyan ta inyu hu mga duma nuy iyan daan haena buhaten nuy diyà ta kandan, ta iyan haena Kasuguan daw lalang hu Dios pinaagi hu mga prupita.
Sa Dalan Ta Langit Daw Ta Impirnu
(Mateo 7:13-14; Lucas 13:24)
13“Duun kaw agi hu malig-et ha pultahan ta maluag sa pultahan daw malumu sa dalan payanaen diyà ta Impirnu aman madakel sa duun tag-agi. 14Malig-et sa pultahan daw malegen sa dalan payanaen hu kinabuhì ha hurà din katapusan aman atiyuay dà sa pakatulen duun.
Sa Bunga Hu Pamulahen
(Mateo 7:15-20; Lucas 6:43-44)
15“Mag-andam kaw hu mga manunudlù ha biduen ta saena dumiyan ta inyu ha bà su mga tumutuu ba sa mga tigtudlù dan makadaet inyu. 16Makilala nuy sidan ha biduen pinaagi hu tagbuhaten dan. Harì kuy makapanimù hu libas daw hu bugkà duun hu sampinit. 17-18Iling taena ha sa maayad ha kayu pulus dà gayed maayad sa bunga din, ba sa madaet ha kayu madaet en daan sa mga bunga din. 19Sa kayu ha madaet sa bunga din bà dà haena pilaya daw bigsuli. 20Aman sa etaw makilala nuy pinaagi hu tagbuhaten din.
Sa Harì Makalagkes Duun Hu Tagharian Hu Dios
(Mateo 7:21-23; Lucas 13:25-27)
21“Amin mga etaw ha tag-ikagi hu Ginuu a kandan ba hurà sidan makalagkes duun hu tagharian hu Dios, ta iyan dà pakaseled duun taena sa tagtuman hu agkabayaan hu Amay ku diyà ta langit. 22Duun asem hu Aldaw hu Paghukum madakel sa mag-ikagi, ‘Ginuu, pinaagi hu ngaran nu insaysay day sa impaikagi nu daw pigbugaw day sa mga busaw daw madakel pa gayed ha mga belenganen sa nabuhat day.’ 23Ba bà ku dà sidan ikagiyi, ‘Harì ku inyu agkakilala aman paman-awà kaw dini ta kanak sinyu sa mga madaet sa buhat din.’
Sa Daruwa Ha Migbalay
(Mateo 7:24-27; Lucas 6:47-49)
24“Bisan sin-u sa tagpaliliman hu lalang ku daw magtuman daan taena agkailing hu etaw ha migbalay hu tungkay malig-en. 25Su mamagyu daw mamahà hurà gayed haena kapilay sa balay ta tungkay nalig-enan. 26Ba saena ha tagpaliliman hu lalang ku ba harì tagtuman agkailing hu etaw ha bà dà miglawig. 27Su mamagyu daw mamahà napilay haena daw nakagas.”
28Su makapenga si Jesus magtudlù saena ha mga etaw nangabeleng 29ta sa kandin ha pagtudlù amin duun gahem dì ku mga manunudlù hu Kasuguan.
Արդեն Ընտրված.
Mateo 7: bkd
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2015, Wycliffe Bible Translators, Inc. All rights reserved.