Juan 9
9
Sa Etaw Ha Daan En Buta Su Ibatà
1Su taghipanaw en si Jesus naahà din sa etaw ha daan en buta su ibatà. 2Ininsaan si Jesus hu mga tinun-an din, “Manunudlù, sin-u haini ha salà ta imbà man daan en buta su ibatà? Kandin ba hu mga laas din daw ku kandin en ba ha salà?”
3Tuminubag si Jesus, “Sa ingkabuta din kenà tumenged ta amin din salà daw ku nakasalà ba sa mga laas din, ba iyan ingkayanaen din ta daw maahà sa gahem hu Dios pinaagi kandin. 4Ku aldaw pa kinahanglan ha buhaten taw sa mga buluhaten hu Dios ha migsugù kanak dini, ta ku daleman en harì kuy en makagtrabahu. 5Ku dini a pa ta kalibutan iyan a sulù ha makailaw hu henà-henà hu kaet-etawan.”
6Su maikagi hi Jesus haena uminileb diyà ta bugtà daw timua sa pisà ha nalemeg hu ileb din daw ipahid duun hu mata taena ha nabuta. 7Dayun inikagiyan din, “Pangulam-us ka diyà ta Linaw ta Siloe” ha sa kahulugan taena Sinugù. Aman duminiyà haena sa buta daw pangulam-us dayun likù ha pakaindan en.
8Sa mga silingan din daw sa mga etaw ha nakakilala kandin ha tagpakilimus nanginginsà, “Kenà ba iyan hayana su etaw ha iyan dà buhat din su anay sa pagpinuuwà daw magpakilimus?”
9Sa duma kandan tuminubag, “Iyan en labi” ba sa duma minikagi daan, “Kenà man gid ta bà su bà dà agkailing kandin.”
Ba uminikagi su nakaindan en, “Iyan ad en su buta.”
10Dayun ininsaan hu mga etaw, “Nainu-inu sa impakaindan nu?”
11Tuminubag haena, “Saena ha tagngaranan ki Jesus uminileb diyà ta bugtà daw ipahid sa pisà ha nalemeg hu ileb din dini ta mata ku. Dayun inikagiyan a kandin ha mangulam-us a diyà ta Linaw ta Siloe. Aman duminuun a daw pangulam-us dayun sagunà a nakaindan.”
12Nanginginsà sidan, “Hindu en man haena?”
Su nakaindan tuminubag, “Hanaw ta gid ku hindu en.”
Sa Pagbistiga Hu Mga Parisiyu
13Inuwit ku mga etaw su nakaindan en duun hu mga Parisiyu. 14Duun hu aldaw hu Sabadu haena sa pagpamulung hi Jesus pinaagi hu pisà ha nalemeg hu ileb din. 15Aman ininsaan en paman ku mga Parisiyu su nakaindan, “Nainu-inu sa impakaindan nu?”
Tuminubag haena, “Inugsakan hi Jesus hu pisà sa mata ku daw nangulam-us a aman sagunà a nakaindan.”
16Sa duma ha mga Parisiyu minikagi, “Harì mahimu ha sinugù hu Dios sa agpamulung duun hu Aldaw hu Paghimlay ta saini supak hu Kasuguan.”
Ba sa duma tuminubag daan, “Ku masinupaken pa ha etaw harì din ngaay mabuhat sa mga belenganen ha iling taena.” Aman hurà makag-iling sa mga henà-henà dan.
17Dayun inisaban dan ininsaan su nakaindan, “Inu sa maikagi nu mahitenged taena ha migbulung hu mata nu?”
Tuminubag haena, “Iyan en gayed haena prupita.”
18Sa mga agalen hu Judio harì en paman agtuu ha su etaw laus gayed ha buta su anay ba nakaindan en, aman pinaelegan dan sa mga laas din 19daw insai, “Inyu ba haini ha batà? Laus ba ha daan en haini buta su ibatà? Imbà man pakaindan en iman?”
20Tuminubag sa mga laas din, “Agkakilala day haini ha iyan gayed su batà day daw laus ha daan en haini buta su ibatà. 21Ba hurà day katun-i ku nainu-inu sa pagpakaindan din daw ku sin-u sa migbulung kandin. Iyan nuy en insaan ta magulang en daan daw iyan en makaikagi inyu.” 22Iyan haena inikagi hu mga laas din ta agkahaldek sidan hu mga agalen hu Judio tumenged ta nauyunan en ku mga agalen ha bisan sin-u sa umikagi ha si Jesus iyan su Misiyas harì gayed ipaseled duun hu simbahan. 23Aman bà dà minikagi sa mga laas din, “Iyan nuy en insaan ta magulang en daan.”
24Inisab en paman inumaw ku mga agalen su nakaindan daw ikagiyi, “Isaad nu duun hu Dios ha harì ka gayed magbidù ta natun-an day en ha sa migbulung ikaw masinupaken ha etaw.”
25Ba su nakaindan minikagi, “Harì ku agkatun-an ku masinupaken ba haena daw ku kenà. Iyan dà agkatun-an ku ha su anay buta a ba iman pakaindan ad en.”
26Dayun uminisab nanginginsà su mga agalen, “Pig-inu-inu din hu pagbulung sa mata nu?”
27Ba saena tuminubag, “Inikagiyan kud gan inyu ba harì kaw tagpaliliman. Imbà nuy igpasublì dà kanak? Agkabayà kaw en ba daan agsunud kandin?”
28Dayun tinameyes dan su etaw daw ikagiyi, “Iyan ka dà sumusunud din ba sikay mga sumusunud kay hi Moises. 29Natun-an day ha su anay migpakiglalang sa Dios ki Moises, ba saena ha migbulung ikaw hurà day katun-i ku hindu duun napuun.”
30Tuminubag haena sa etaw, “Agkabelengan ku gayed sa inikagi nuy. Harì nuy agkatun-an ku hindu haena napuun ba iyan migbulung hu mata ku. 31Natun-an taw en ha harì agpalilimanan hu Dios sa masinupaken ha etaw, ba saena ha tagsimba hu Dios daw tagtuman hu agkabayaan din iyan agpalilimanan din. 32Sugud dà hu katanghagaa ta kalibutan daw taw pa iman napaliman ha amin nakaulì hu mata hu daan en buta su ibatà. 33Ku hurà pa haena sugua hu Dios harì din ngaay mahimu.”
Sa Laus Ha Buta
34Tuminubag haena sa mga agalen, “Agtudluan kay ba daan ikaw sikaw sa masinupaken sugud dà su ibatà?” Dayun inabug dan haena diyà ta guwa.
35Su mapaliman hi Jesus ha inabug dan su etaw, pinan-ahà din dayun haena. Su maahà din en ininsaan din, “Agtuuwan nu ba sa Batà hu Etaw?”
36Tuminubag su etaw, “Ikagiyi a ikaw ku sin-u haena ta daw makatuu a kandin.”
37Inikagiyan hi Jesus, “Naahà nud en ta saini ha pakiglalang iman ikaw iyan en.”
38Dayun tuminubag su etaw, “Ginuu, agtuu a gayed ikaw” daw sagunà haena suminimba ki Jesus.
39Minikagi si Jesus, “Sa pagdini ku ta kalibutan iyan sa paghukum hu mga etaw ta daw saena ha agkailing hu buta makaindan ba sa tag-ikagi ha pakaindan en buta diay.”
40Amin mga Parisiyu ha nakapaliman hu inikagi din aman nanginginsà, “Buta kay ba diay?”
41Tuminubag si Jesus, “Ku buta kaw pa hurà nuy ngaay salà, ba iman ta kagi nuy ha pakaindan kaw en tagpamatuud haini ha makasasalà kaw gayed.
Արդեն Ընտրված.
Juan 9: bkd
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2015, Wycliffe Bible Translators, Inc. All rights reserved.