Juan 21
21
Sa Pagpaahà Hi Jesus Duun Ku Danaw
1Su maiwas en haena mig-isab pa gayed migpaahà si Jesus duun hu mga tinun-an din diyà ta Danaw ta Tiberias. Iyan haini naul-ulahan. 2Naamul diyà si Simon Pedro daw si Tomas ha tagngaranan hu Saleping, si Natanael ha taga-Cana ha sakup ta Galilea daw sa daruwa ha batà hi Zebedeo, daw amin pa daan daruwa ha tinun-an hi Jesus. 3Si Simon Pedro uminikagi duun hu mga duma din, “Agpamaling a.” Aman saena ha mga duma din minikagi daan, “Agduma kay ikaw.” Dayun namanlulan sidan duun hu barutu daw pamaling, ba bisan ku luminam-ag sidan hurà gayed sidan makatimù.
4Su maselem en si Jesus tagtiyadeg diyà ta kilid taena ha danaw ba hurà kakilala hu mga tinun-an din.
5Dayun ininsaan sidan hi Jesus, “Nakatimù kaw ba?”
Tuminubag sidan, “Hurà kay gayed.”
6Sinugù sidan hi Jesus, “Ilabya dà sa baling nuy diyan ta kawanan dapit ta daw makatimù kaw.” Dayun binuhat dan haena. Ba su butwaen dan su baling harì dan en agkahenat ta madakel tungkay sa nakatagù duun ha sedà.
7Dayun su tinun-an ha pinalanggà hi Jesus minikagi diyà ki Pedro, “Ay, iyan man diay hayana sa Ginuu taw.” Su mapaliman haena hi Simon Pedro sagunà migpinaksuy ta miglebas haena, dayun uminagbul diyà ta wahig payanaen diyà ki Jesus. 8Sa mga duma din ha tinun-an ha taglulan duun ku barutu luminupug kandin ha tagguyud en ku baling ha napunù-punù hu sedà. Ubay dà sidan diyà ta kilid, mga nanggatus dà ha mitrus sa pig-elangan dan.
9Su makagaun en sidan naahà dan sa supas daw sa baga ha amin en duun sedà ha inanag. 10Inikagiyan sidan hi Jesus, “Uwita en dini sa natimù nuy ha mga sedà.”
11Aman duminuun si Simon Pedro ku barutu daw guyuda su baling ha napunù hu mga adagi ha sedà, sa kadakelen taena nanggatus daw kalimahan daw tatulu. Bisan ku madakel tungkay sa sedà ha natimù dan ba hurà gayed kayahà su baling dan. 12Dayun inikagiyan sidan hi Jesus, “Pamangaen kaw en.” Hurà sidan makaamel hu pagpanginginsà kandin ku sin-u ta natun-an dan ha iyan en sa Ginuu. 13Tinimù hi Jesus su supas daw su nalutù ha sedà daw saada kandan. 14Saena ikatulu en ha pagpaahà hi Jesus duun hu mga tinun-an din sugud hu pagkabanhaw din.
Si Jesus Daw Si Pedro
15Su makapenga en kumaen si Jesus daw sa mga tinun-an din ininsaan din si Simon Pedro, “Simon ha batà hi Juan, labaw ba sa pagpalanggà nu kanak dì taini ha mga duma nu?”
Tuminubag si Pedro, “Ginuu, natun-an nu ha palanggà ku ikaw.”
Aman inikagiyan hi Jesus, “Alimahi nu sa mga nati ku ha karniru.”
16Dayun minisab minikagi si Jesus diyà ta kandin, “Simon ha batà hi Juan, palanggà a ba ikaw?”
Tuminubag si Pedro, “Hee, Ginuu, natun-an nu ha palanggà ku ikaw.”
Aman inikagiyan hi Jesus, “Alimahi nu sa mga karniru ku.”
17Duun hu ikatulu ininsaan dà paman hi Jesus, “Simon ha batà hi Juan, palanggà a ba gayed ikaw?”
Suminakit sa gahinawa hi Pedro ta katulu en insai ku palanggà din ba si Jesus. Ba tuminubag gihapun, “Ginuu, natun-an nud sa alan aman natun-an nu ha palanggà ku gayed ikaw.”
Dayun inikagiyan hi Jesus si Pedro, “Alimahi nu sa mga karniru ku. 18Laus gayed sa ag-ikagiyen ku ha su batan-en ka pa pakabaluy kad en tagpinaksuy hu kaugalingen nu daw bisan hindu ka duun agpayanaen agkabaluy nu. Ba ku malaas ka asem makapangindedepa ka daw lain en sa magpinaksuy ikaw daw uwiten ka duun hu agtambagan nu ha lugar.” 19Saena pag-ikagi hi Jesus mahitenged hu kamatayen hi Pedro ha makadayè hu Dios. Dayun inikagiyan hi Jesus si Pedro, “Sunud ka kanak hangtud en hu kamatayen nu.”
20Luminingì si Pedro daw naahà din ha taglupug kandan su tinun-an ha palanggà hi Jesus daw iyan abay din su anay duun hu pagpanihapun dan daw iyan daan nanginginsà, “Ginuu, sin-u kanay sa maglimbung ikaw?” 21Aman ininsaan hi Pedro si Jesus, “Ginuu, inu gid sa maul-ulahan tayana ku malugay?”
22Ba si Jesus tuminubag, “Ku iyan ku pagbayà sa bubuhay pa hayana ku lumikù a dini ta kalibutan hurà nu duun labet. Bà ka dà sunud kanak.” 23Tumenged taini ha inikagi hi Jesus nakalekep sa tultul duun hu alan ha mga sumusunud din ha su palanggà din ha tinun-an harì en matay. Ba kenà iyan inikagi hi Jesus ha harì en matay ta iyan inikagi din sa, “Ku iyan ku pagbayà ha bubuhay pa hayana ku lumikù a dini ta kalibutan hurà nu duun labet.”
24Iyan a su tinun-an ha tagsubayen hi Jesus daw iyan a daan migsulat taini. Natun-an day ha laus gayed haini ta naahà day gayed.
25Madakel pa sa binuhat hi Jesus na ku iamin haena isulat harì maaul dini ta kalibutan sa mga libru ha masulatan duun.
Արդեն Ընտրված.
Juan 21: bkd
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2015, Wycliffe Bible Translators, Inc. All rights reserved.