METHIU 2
2
Iniisuwhtah tanii Ihaesing ae
1Herot iruwng apaarlae Judia paam Bethlehem nache Jesu ajungom inuwna iniisuwhtah tanii ihaesing mee aeng Jerusalem nache theng aeka enriir, 2“Jehudi ae iruwng ijungomchu unakhenva? Kenuw ing iniisuwhtah yntongting aesii kemu khaena atakchu irum ithengsahpung.”
3Herot iruwng ing chongchu asii-tahna abarungriir jaasa vokhehkho Jerusalem mee vakhaekho nungae-mahsae; 4amana aanchung jaethiim vakhaere thiimthang aechu mang-kongka eningna Khrista enchiichu unakhe omvachiiva taka asii ae? 5Enuw ing embasang, Judia paam Bethlehem navaata; akhaechuve Jaephar ing abaziih vasah omna:
6“O Juda paamna om Bethlehem, nangve Juda sungna aasiingseh mahvachii; akhaechuve ki kamee Isrel aechu ipuhnii khaena mee yngkheh naning tanii hungsuwh vaata.” 7Amana Herot iruwng ing ihaesing aechu ynruwhjaeh ing eenka aesii yndangchu ynchii aphanava ichiichu ening tanii isajaeh ing amanghuwpa. 8Amana Herot ing eningna ariir, “Nenuw vasinuwna naeduungchu isajaeh ing vajongruw amanche nenuw ing naeduungchu tuwhtanuwve kaning nakho ihenriirpeehruw amanache ki ingkho vakningka varumsava kata.” 9Enuw ing iruwng chongchu ensiinuwna sisae vokhehkho iniisuwhtah tanii aesii inche naeduung aongnii aphamahri raentaangche emaana sika enjiipa. 10Enuw ing aesiichu emutah nache ariirfhuwchah ing enrotha irohsah. 11Amana vasiaeka evatungna naeduung jaarnii sungtingche envaruwh tahnache naeduungchu amnuw thohche emupa, amana enuw ing engkheerkhuwh mansin aeka enrumpa. Enuw ing engkikthuur buwrchu imong aeka sana, Gundru vokhehkho Gundras chu naeduung ningnache empeehpa. 12Amana entakchu Herot ningting ynrimahruw ichii enrumangna emutah nache, lam asikting rep aeka empaamting yngkaesae.
Ijeep ting Itaen ae
13Atii engaangkaenuwna, Aafhuw vaarmee ing Josep rumangna ariir, “Herot ing naeduung i ithehnii khaena ajongthongnah, chukhaenache hangiir nana naeduung re amnuw i ruwnana Ijeep lipah ting taenruw amanche ki ing kamanthang mahri raentaangchuw ama mapham nache ongjaehruw.” 14Amana Josep ing hangngiirka naeduung re amnuwchu jaen nache ruwka Ijeep lipah ting taensae, 15amana Herot athikmahri raentaang ama mapham nache ongsae. Havi Aafhuw ing Jaephar ajaarna amanriir vasahchu hungchumsa, “Ki ing kasapa chu Ijeep lipah tanii kavaruwpa.”
Herot ing Bethlehem Naepang ae Atheh
16Herot ing ihaesing aeng ymman-chaepae ichiichu amanghuw tahnache inempak athir fhuwrsa. Chukhaenache ihaesing ae tanii isajaeh ing amanghuw inuwzii ing Bethlehem na ong vokhehkho akuurpaang paamna om naeduung pasar kumnii aderchaap ithehnii khaena mee jebathenka amanthehpa. 17Jaephar Jeremia ing ariir chongchu hungchumsa: 18Amachuve, “Rama tanii ijaachaam ichap iruur kasiipa, Racher ing asitiae khaena chapna; asiti aechu enthiktah nache abarungriir ijaachu chenmah.”
Ijeep tanii Hunganri ae
19Herot athiknuwna, Aafhuw avaarmee ing Ijeep na Josep rumang nache yndangka ariir, 20“Hangiirla, naeduung re amnuw kha ruwnana Isrel paamting yngkaera, naeduung thehkenta achii mee aekha thiksae.” 21Amana Josep ing hangiirka naeduung re amnuw chu ruwka Isrel paamting yngkaesae, 22changvakonchu Herot sapa Aarkelos ing Judia paamna ampa changdenna iruwng vika paarna ichii chong asiitah nache, Josep hungkaevachii ynchikka arumangna ariirpeeh inuwzii ing lam repka Galili paamting sisa. 23#Mk 1.24; Luk 2.39; Jhn 1.45Chutahnache Nazaret khuwruung nache hungpaarsa; havi Jaephar ing ariir vasahchu hungchumsa, “Atak i Nazaret na ong ynthiing mee chuvaata.”
Արդեն Ընտրված.
METHIU 2: MOYO
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.