मत्ती 9
9
येशूगी ओङबु स्योरक्यो मिह च्यी़ला टा़ह-च्यू़ नाङग्यो
(मर्क २:१-१२; लूक ५:१७-२६)
1ओहले येशू येहपाराङ टुह-छ्युङला स्य़ूहदी छोगी फार्केन देपला राहङ ज़्य़ू नाङग्योकी क्याहसाला लो़ह फेप्सीन।#९:१ “राहङ ज़्य़ू नाङग्योकी क्याहसाला” म़ेदी माक्योदी “कफर्नहुम” क्याहसा यिहम्बा। 2ओहले मिहया़गी ज़ुबु कुहल मी़हखुएँ मिह च्यी़ला तेङगो छ्याप्क्याङराङ खुर्ती येशूसाला ख्योङसीन। ओ़ह मिहया़गी यिह-छ्य़े ज़ी़दी येशूगी ओ़ह नेहपाला सुङ नाङसीन, “ए पुह, ख्ये तुहङाल माहबे। ख्येगी तिहक्पा कोहङदा ज्योर्ती येह।” 3येशूगी सुङ नाङग्योकी दि स्याहल थे़दी काहजे छ्य़े-ठिमकी लोबेनया़गी सेम सेमलाॱराङ दि ल़ेहमु म़ेदी साम्लु ताङसीन, “दिगीनी किन्ज्योला गा स्ये़हन्डील पेहकु दु।” 4ओहले खुङगी सेमगी ताम ङोह ख्येन्दी येशूगी सुङ नाङसीन, “च्यिबे ख्याया़गी सेमला दि रोहवा साम्लु चोक्पा ताङगे? 5ता़ह म़ेदोङ ले, दि मिहला ‘ख्येगी तिहक्पा कोहङदा ज्योर्सीन’ म़ेदी माज्ये दाङ ‘लाहङदी सोङ’ म़ेदी माज्येला का़हन्दी तेहमु ओहङडो? 6यिहॱनाङ त़ेदोङ, दि जाम्बुलीङला मिहगी स़ेबुला मिहगी तिहक्पा ता़ह च्य़ूज्येला ओङ थोप्ती येह।” ओहले येशूगी ओ़ह नेहपाला सुङ नाङसीन, “ता़ह लाहङदोङ, राहङगी तेङगो खुर्ती खाङबाला सोङ।” 7ओहले ओ़ह मिह ह्ओप लाहङदी खाङबाला फार काहल्सीन। 8दि रोहवा याहम्जेम्बागी छ्या़ले थोङदी ओ़ह मिहया़ ज्यी़सीन ओहले मिहया़ला दि ल़ेहमु ओङ नाङगे किन्ज्योला त़ेरा तेच्या फुल्सीन।
येशूगी मत्तीला क़े क्याहप नाङग्यो
(मर्क २:१३-१७; लूक ५:२७-३२)
9येशू ओहलेगी फेप नाङगेमु मत्ती माएँ मिह च्यी़ला ठाल तुहएँगी खाङबाला तेहक्यो ज़ी़ नाङसीन, ओहले खोला येशूगी सुङ नाङसीन, “ङाहला ताहदा क्याहप्ती स्यो।” ओहजेला मत्ती लाहङदी येशूला ताहदा क्याहप्ती काहल्सीन।
10येशू स्याहप्च्यीया़ ङ्याम्बुराङ मत्तीगी खाङबाला डेन छ्येच्येला ज़्य़ू नाङसीन। ठाल माहङबु तुहएँ मिहया़ दाङ लेहमेन तिहक्च्येम्बा मिहया़ॱआङ ओहङदी खुङ फ़ेबेॱया ङ्याम्बु साहज्येला तेहसीन।#लूक १५:१,२ 11दि थोङदी फरिसीया़गी येशूगी स्याहप्च्यीया़ला, “च्यिबे ख्याया़गी लोबेन ठाल तुहएँ मिहया़ दाङ लेहमेन तिहक्च्येम्बा मिहया़ ङ्याम्बु ज़्य़ूदी सोल छ्येके?” म़ेदी टी़हसीन। 12दि केच्या सेन्दी येशूगी सुङ नाङसीन, “थाङबु मिहलानी आम्ज्यी मेहकोएँ, यिहॱनाङ नेहपाला गा आम्ज्यी कोहकें। 13ख्याया़गी छ्य़ेला प्रुहक्योगी दि स्याहलगी तेहन्दा ङोह स्ये़ज्ये छोल्दोङ– ‘ङाहला सेम्ज्येनया़गी मार्च्ये मिहम्बा, ख्याया़गी चेवा पेहच्यु म़ेदी ङाहगी सेम्बा येह।’ च्यिबेमाना ङाह टाहङबुया़ला मिहम्बा, यिहॱनाङ तिहक्च्येम्बाया़ला गा थार च्य़ूज्येला ओहङग्यो यिहम्बा” म़ेदी येशूगी सुङ नाङसीन। #मत्ती १२:७; होशे ६:६
ङ्युङने तेहकेन्गी तेहन्दाला टी़हदाप
(मर्क २:१८-२२; लूक ५:३३-३९)
14ओ़ह तिङले बप्तिस्मा तेर्केन यूहन्नागी स्याहप्च्यीया़ येशूसाला ओहङदी येशूला दि ल़ेहमु म़ेदी टी़हसीन, “ङ्यिह दाङ फरिसीया़ ङ्युङने तेहकें, यिहॱनाङ राहङगी स्याहप्च्यीया़दी च्यिबे ङ्युङने मेहतेहकें?” 15येशूगी खुङया़ला सुङ नाङसीन, “माहक्पा साम्बा खुङया़ ङ्याम्बु तेहकेमु च्यि जन्तीबाया़गी तुहङाल पेहती ङ्युङने तेहकें ले? यिहॱनाङ दि ल़ेहमु ती़हजी च्यिॱआङ ओहङज्ये येह, माहक्पा साम्बाला खुङया़ ङ्याम्बु खा फ़ेदी ख्येर्केमु गा खुङया़ ङ्युङने तेहच्ये येह।”
16 “येहपाराङ सुज्यीगीॱआङ काप्च्या निङबाला काप्च्या साम्बागी ल्हेम्बा मेहक्याहप्केन। मिहन्नानी साम्बा ल्हेम्बा कुङदी काप्च्या राहल्गे, ओहले तोहरोङ छ्यिम्बु ओम गा जे तेर्के।”
17 “ओ़ह ल़ेहमुराङ पेहती सुगीॱआङ निङबा को़बाकी क्याल्बाला साम्बा कुहन्डुमकी-निङगु मी़हलुएँ! का़हलेॱआङ लू़ॱराङ लू़सीमानानी को़बाकी क्याल्बा फोङदी कुहन्डुमकी-निङगुॱआङ पुङगे। ओ़ह सोङबे साम्बा कुहन्डुमकी-निङगुदी साम्बा को़बाकी क्याल्बालाराङ ल़ूगे ओहले ङ्यिकाराङ थोरो मेहन्डोएँ” म़ेदी सुङ नाङसीन।
यहूदी पोम्बोकी पोहमो दाङ पी़हमी-पेहजा च्यी़ टा़हक्यो
(मर्क ५:२१-४३; लूक ८:४०-५६)
18ओहले येशूगी खुङला दि स्याहल सुङगे सुङगेमुराङ, छो़खाङगी पोम्बो च्यी़ ओहङदी येशूगी दिनला पी़मु च़ूदी स्युहसीन, “लोबेन लाह, ङाहगी पोहमो नाहरे च्यी़राङ स्यिसीन, यिहॱनाङ राहङ फेप्ती ङाहगी पोहमो थो़ला राहङगी छ्या़ ज़्या़ नाङदोङ ओहले मोह सोम्बो लो़हज्ये येह!” म़ेदी स्युहसीन। 19ओहले येशू ज़्याङदी खो ङ्याम्बु फेप नाङसीन, ओहले स्याहप्च्यीया़ॱआङ खुङ फे़बे ङ्याम्बुराङ काहल्सीन।
20ओ़ह ती़हजीलाराङ लोह च्यिङ्यी़ यिहन्ज्यु ज़ुबु ली़ह-ठा़ माहङबु थेन्गेन्गी नाहजा क्याहप्क्योगी पी़हमी च्यी़ येशूगी क्याहप ङो़ले ओहङदी येशूगी नाहम्सागी सुहर च्यी़ला दे़सीन। 21च्यिबेमाना मोह राहङगी सेमला दि ल़ेहमु सेम क्ये़दी येहकें, “ङाहगी येशूगी नाहम्सा च्यी़ला च्यी़राङ दे़ ङ्युहङसीमाना ङाह टा़हगे” 22ओहले येशूगी ल्होक लो़हदी ज़ी़ नाङगेमु ओ़ह पी़हमीला ज़ी़सीन ओहले येशूगी ओ़ह पी़हमीला सुङ नाङसीन, “पोहमो ख्ये मा-फाम्बु माहबे। ख्येगी तेहपागी ख्येला टा़ह च्य़ूदी येह।” ओ़हजेलाराङ ओ़ह पी़हमी टा़हसीन।
23ओहले येशू ओ़ह पोम्बोगी खाङबाला लेप नाङगेमु येशूगी लेमु फुएँ मिहया़#९:२३ यहूदीया़की पे-ठिमला मिह स्यि फान्ज्यो ङुहप्रा तिहङरा पेहती लेमु फुएँ ठिम येहकें। दाङ ङुहप्रा तिहङरा पेहती तेहक्यो मिहया़ला ज़ी़ नाङसीन। 24येशूगी खुङया़ला सुङ नाङसीन, “ख्याया़ फिला सोङ, च्यिबेमाना दि पोहमो स्यी़दी म़ेह, ङ्यि च्यी़राङ लो़हक्यो यिहन।” येशूगी स्याहल थे़दी खुङया़ क़ेहमु क्याहप्सीन। 25मिह मिह-माहङला फिला तेन नाङ फान्ज्यो येशू नाहङला स्य़ूह नाङसीन, ओहले येशूगी ओ़ह पोहमोगी लाहक्पा ज़ुङ नाङसीन, ओहले ओ़ह पोहमो ह्ओप लाङसीन। 26ओ़ह तिङले ओ़ह केच्या लुहङबा काहने थेतेराङ टाहम्सीन।
येशूगी मी़ मेहथोङगेन मिह ङ्यी़ दाङ लेम्बा मिह च्यी़ला टा़ह-च्यू़ नाङग्यो
27येशू ओ़ह ग्या़लेगी फेप नाङगेमु मी़ मेहथोङगेन मिह ङ्यी़गी “ओ़ दाऊदकी स़ेबु, ङ्यिहला निङज्यी जे नाङदोङ” म़ेदी क़े तेन्गेॱराङ येशूला ताहदा क्याहप्ती काहल्सीन। 28ओहले येशू खाङबाला लेप फान्ज्यो ओ़ह मी़ मेहथोङगेन मिह ङ्यी़ॱआङ ओ़हलाराङ लेप्सीन। येशूगी खुङला टी़ह नाङसीन, “च्यि ङाहगी ख्याया़ला टा़ह च्य़ू ख़ूएँ म़ेदी ख्याया़गी यिह-छ्य़े पेहकें?” ओहले खुङगी, “लाहसो चो़वो छ्येवा, ङ्यिह यिह-छ्य़े पेहकें” म़ेदी स्युहसीन। 29ओहले येशूगी खुङ ङ्यी़गी मी़ला दे़ नाङदी, “ख्याया़गी यिह-छ्य़े पेहक्यो ल़ेहमुराङ ओहङज्यु!” म़ेदी सुङ नाङसीन। 30ओहले खुङ ङ्यी़गी मी़ थोङगेन काहल्सीन। ओहले येशूगी खुङला, “दि केच्या सुॱलाङ छोर मा़हच्यु” म़ेदी का नाङसीन। 31यिहॱनाङ खुङ ङ्यी़ ओ़ह ग्या़लेगी काहल्दी येशूगी तेहन्दाला ग्या़ थाम्ज्यीलाराङ स्ये तेर्सीन। 32खुङ ङ्यी़ काहल फान्ज्यो मिहया़गी ल्हेन्डी स्य़ूहदी लेम्बा काहल्ग्योगी मिह च्यी़ला येशूसाला ख्योङसीन। 33येशूगी ओ़ह ल्हेन्डी तेन नाङ-लुहङ मे़हबाराङ ओ़ह मिह ताम मा ख़ूएँ काहल्सीन ओहले मिह थाम्ज्यीगी ह्अ ल़ेहदी मासीन, “दि ल़ेहमुनी ङ्यिहगी इस्राएलला नाहमॱआङ थोङदी म़ेह।” 34यिहॱनाङ फरिसीया़गी येशूला दि ल़ेहमु मासीन, “खोलानी ल्हेन्डीगी क्याहल्बुगीराङ ल्हेन्डी तेन्गेन्गी ओङ तेरक्यो यिहन” म़ेदी मासीन। #मत्ती १०:२५; १२:२४; मर्क ३:२२; लूक ११:१५
ल़ेहमीया़ ङ्युहङा येह
(मर्क ६:३४; लूक १०:२)
35येशू क्याहसा क्याहसा दाङ युहल युहलगी छो़खाङया़ला सुङदेन ख्येप्टा नाङगेनॱराङ किन्ज्योगी क्याहल्सीकी तेहन्दाला या़हबु लेहङगुगी केच्याया़ स्ये नाङसीन, ओहले मिहया़दी नामे-नाजो नाहजाया़ दाङ नेहपाया़ला टा़ह-च्यू़ नाङसीन। #मत्ती ४:२३; मर्क १:३९; लूक ४:४४ 36मिह मिह-माहङला ज़ी़दी येशूगी थु निङज्यीगी काहङसीन च्यिबेमाना खुङया़नी कोहरोवा म़ेहबागी ल़ूहया़ ल़ेहमुराङ आला ख्याम्दी लिहते येहकें। #गन्ती २७:१७; १ राज २२:१७; २ लुहक १८:१६; इज ३४:५; मर्क ६:३४ 37ओहले येशूगी सुङ नाङसीन, “त़ेदोङ, तुह कोहकेन्गी डुया़नी माहङबुराङ येहबा, यिहॱनाङ ल़ेहमीया़दी ङ्युहङा येहबा। 38ओ़ह सोङबे ख्याया़गी डुगी ताहक्पु ङ्याम्बु डु तुहज्येला ल़ेहमीया़ ताङ नाङदोङ म़ेदी सोल्वाङ ताप्तोङ!”#लूक १०:२
Jelenleg kiválasztva:
मत्ती 9: HYLM
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2023 (Active), Wycliffe Bible Translators, Inc. All rights reserved.
