मत्ती 8
8
जे-ने़ह थेन्ग्योगी मिह टा़हक्यो
(मर्क १:४०-४५; लूक ५:१२-१६)
1येशू काहङलेगी माहर फाप नाङगेमु मिह मिह-माहङ छ्यिम्बुज्यी येशूला ताहदा क्याहप्ती ओहङसीन। 2ओहजेला जे-ने़ह थेन्ग्योगी मिह च्यी़ ओहङदी येशूगी दिनला पी़मु च़ूदी, “ओ़ चो़वो ला़ह, चो़वोगी थुला ठुङदी येहसीमाना ङाहला टा़ह च्य़ू थुप्कें!” म़ेदी स्युहसीन। 3ओहले येशूगी राहङगी छ्या़ खो थो़ला ज़्या़दी सुङ नाङसीन, “ख्ये टा़हज्यु म़ेदी ङाहगी सेमला क्ये़दी येहबा।” ओ़हजेलाराङ ओ़ह जे-ने़ह थेन्ग्योगी मिह टा़हसीन। 4ओहले येशूगी खोला सुङ नाङसीन, “दि केच्या सुॱलाङ माहस्ये। यिहॱनाङ राहङला पूजाहारीसाला काहल्दी तेन्दोङ, ओहले मोशागी का तेरक्यो डेल्बा फुल्दी थाम्ज्यीला ख्ये टा़हक्योगी दास्यी तेर्तोङ” म़ेदी सुङ नाङसीन।#८:४ ओ़ह ती़हजीला यहूदीया़की ठिमला जे नाहजा थेन्ग्यो मिहया़ राहङसा मिहया़ ङ्याम्बु तेहच्ये मेहयोहङगो येहकें। खुङया़ युहललेगी फिला मिह म़ेहबा ग्या़ला तेह कोहगो येहकें। ओ़ह मिहया़ टा़हदी ओ़ह युहलला डोज्येकी तेहन्दाला पूजाहारीगी ङ्याहम च्ये कोहगो येहकें, ओहले टा़हक्यो यिहन्सीमाना पूजाहारीगी छ्योखाङला डेल्बा फुल्दी पाङबु तेरकोहको येहकें। #लेवी १४:१-३२
रोमी माक्पेनगी योक्पु टा़हक्यो
(लूक ७:१-१०)
5येशू कफर्नहुम क्याहसाला लेप नाङगेमु रोमी माक्पेन च्यी़ ओहङदी येशूला थाल्मु च्याहर्ती स्युहसीन, 6“ओ़ चो़वो छ्येवा, ङाहगी योक्पु ज़ुबु कुहल मी़हखुएँगी नाहजा क्याहप्ती खाङबाला ङ्याहल्साला छ्यिती येहबा।” 7ओहले येशूगी, “ङाह ओहङदी खोला टा़ह च्य़ूगे” म़ेदी सुङ नाङसीन। 8यिहॱनाङ रोमी माक्पेनगी स्युहसीन, “ओ़ चो़वो, राहङला ङाहगी खाङबाला फेप स्य़ूहज्येला ङाह सी़हज्ये म़ेह। यिहॱनाङ राहङगी काच्यीराङ नाङसीमाॱनाङ ङाहगी योक्पु टा़हज्ये येह। 9च्यिबेमाना ङाहॱआङ गोबा छ्यिम्बुया़गी चो़ला ज्युल्दी तेहको येहबा। ङाहगी चो़ॱलाङ माक्मीया़ येहबा। च्यी़ला ‘सोङ’ मासीमाना, खो डोएँ ओहले राहङसाला ‘स्यो’ मासीमाना खो ओहङगे ओहले ङाहगी योक्पुॱलाङ ‘दि ल़ेहमु पेह’ मासीमाना खोगी पेहकें” म़ेदी मासीन।
10दि केच्या सेन्दी येशू ह्अ ल़ेह नाङसीन ओहले राहङ तिङला ताहदा क्याहप्ती ओहङग्यो मिहया़ला सुङ नाङसीन, “तेहम्बाराङ ङाह ख्याया़ला माएँ, देजे छ्यिम्बु तेहपा पेहकेन मिहनी ङाहगी इस्राएल क्याहल-खाप नाहङॱलाङ च्य़ेह सिहन्दी म़ेह। 11ङाह ख्येला माएँ, स्यार दाङ नुहपलेगी लेहमेन क्यिहपागी मिहया़ माहङबुराङ ओहङज्ये येह ओहले अब्राहाम, इसहाक, दाङ याकूब ङ्याम्बु स्यिहङगामकी क्याहल्सीकी डेन साहज्येला तेहच्ये येह। #लूक १३:२९ 12यिहॱनाङ किन्ज्योगी क्याहल्सीला ओहङ कोहकेन्गी इस्राएलीया़दी फिला ना़-जुबेला क्युर चाहङज्ये येह ओहले ओ़हला मिहया़ सो मुहर्ती खेलाङ पेहती तेहच्ये येह!” म़ेदी येशूगी सुङ नाङसीन।#मत्ती २२:१३; २५:३०; लूक १३:२८
13ओ़ह तिङला येशूगी माक्पेनला सुङ नाङसीन, “ओहङगे, ता़ह ख्ये सोङ, ख्येगी यिह-छ्य़े पेहक्यो ल़ेहमुराङ ओहङज्ये येह।” ओ़हजेलाराङ माक्पेनगी योक्पु टा़हसीन।
येशूगी मिह माहङबुलाराङ टा़ह च्य़ू नाङग्यो
(मर्क १:२९-३४; लूक ४:३८-४१)
14ओहले येशू पत्रुसकी खाङबाला फेप नाङसीन। ओ़हला येशूगी पत्रुसकी क्यू़हमु छावा क्ये़दी ङ्याहल्साला छ्यिक्यो ज़ी़ नाङसीन। 15ओहले येशूगी मोहगी लाहक्पाला ज़ुङ नाङ फान्ज्यो मोहला छावागी ताङसीन, ओहले मोह लाहङदी खुङ फे़बेया़ला डोम्बो क्योङसीन।
16नाहम से़ज्ये पेहकेमु मिहया़गी ल्हेन्डी स्य़ूहक्योगी मिहया़ला येशूसाला ख्योङसीन, ओहले येशूगी राहङगी स्याहलगीॱराङ ल्हेन्डीया़ला तेन नाङसीन, ओहले नेहपा थाम्ज्यीलाराङ टा़ह च्य़ू नाङसीन। 17दि ल़ेहमु पेहती यशैया लुहङतेम्बागी सुङ नाङग्योकी स्याहल तेहन्दा डुप्सीन–
“मिहरोगी ओहराङगी तुहक्पु दाङ
नाहजाया़ नोम्दी राहङगीराङ खुर नाङसीन।” #यशै ५३:४
येशूला ताहदा क्याहप्केमु खुर कोहकेन्गी तुहक्पुया़
(लूक ९:५७-६२)
18ओहले येशूगी राहङगी साहर-सुहरला मिह मिह-माहङ जोम्ग्यो ज़ी़दी राहङगी स्याहप्च्यीया़ला, “डो, ता़हनी ओहराङ छोगी फार्केन देपला डोएँ” म़ेदी सुङ नाङसीन। 19ओ़हजेलाराङ छ्य़े-ठिमकी लोबेन च्यी़ ओहङदी येशूला स्युहसीन, “लोबेन लाह, राहङ काहल फेपॱनाङ ङाहॱआङ राहङ ङ्याम्बुराङ डोएँ।” 20येशूगी खोला ल़ेहन क्याहप नाङसीन, “ते़, लिहन्दीया़दी यिहप्केन्गी फुक्पा येह, च्याह-च्यिहवाया़दी छाङ येह, यिहॱनाङ मिहगी स़ेबुदीनी गो़ ज़्या़सा ग्या़ च्यिॱआङ म़ेह!”
21ओहले स्याहप्च्यीया़ नाहङगी लेहमेन स्याहप्च्यी च्यी़गी स्युहसीन, “लोबेन लाह, तोहङले ङाहला काहल्दी ङाहगी आबागी फुङबु तो़ह च्य़ू नाङदोङ।” 22यिहॱनाङ येशूगी खोला सुङ नाङसीन, “रोहगीॱराङ खो राहङगी रोह तो़हज्यु, ख्येदी ङाहला ताहदा क्याहप्ती स्यो!” म़ेदी सुङ नाङसीन।
येशूगी ल्हा़बा लुङजीला छ्येबे तेह च्य़ू नाङग्यो
(मर्क ४:३५-४१; लूक ८:२२-२५)
23ओहले येशू टुह-छ्युङला ज़्य़ू नाङ फान्ज्यो स्याहप्च्यीया़ॱआङ येशूला ताहदा क्याहप्ती काहल्सीन। 24याहङमे-याहङलाराङ छोला ज्यी़ज्ये ल़ेहमु ल्हा़बा लुङजी ओहङसीन। ओहले छ्यु-पाहलापगी पेहती टुह-छ्युङ नुप्च्ये पेहसीन। यिहॱनाङ येशू नाल जेती येहकें। 25ओहले स्याहप्च्यीया़ येशू पोहला काहल्दी येशूला नाल साङ च्य़ूदी, “ओ़ चो़वो ला़ह!, ङ्यिहला थार च्य़ू नाङदोङ, ङ्यिहया़नी स्यिज्येॱराङ पेहसीन!” म़ेदी स्युहसीन। 26ओहले येशूगी खुङया़ला सुङ नाङसीन, “ख्याया़ च्यिबे दि ल़ेहमु पेहती का क्याहल्गेन? खोइ ख्याया़गी यिह-छ्य़े?” देजे सुङदी येशू ज़्याङ नाङसीन ओहले ल्हा़बा लुङजी दाङ छ्यु-पाहलापया़ला काप्क्येन नाङसीन ओहले ल्हा़बा लुङजी छ्येबे तेहती थाम्ज्यीराङ छ्यु-पाहलापया़ ङ्योमे काहल्सीन। 27“दि मिहनी काहन्डुमु यिहम्बानी, च्यिबेमाना ल्हा़बा लुङजी दाङ छो-क्याहम्जोगीॱआङ मिहरोगी का ङ्यिहन्गु दु” म़ेदी ओ़ह मिहया़ ह्अ ल़ेहसीन।
ल्हेन्डी स्य़ूहक्योगी मिह ङ्यी़ टा़हक्यो
(मर्क ५:१-२०; लूक ८:२६-३९)
28ओहले येशू छोगी फार्केन देपकी गदरिनीया़गी#८:२८ गदरिनीयाला गेरासेनस दाङ गदराॱआङ म़ेदी माउ येहबा। लुहङबाला लेप नाङगेमु ल्हेन्डी स्य़ूहक्योगी मिह ङ्यी़ तुहर्साले ओहङगेॱराङ पेहकेमु येशूला थ़ूसीन। खुङ ङ्यी़ ज्यिबुराङ ज्यी़ज्ये ल़ेहमु येहकें सोङबे ओ़ह लाहमलेगी पेहती सुॱआङ फार छुर मेहबेएँ येहकें। 29ओहले खुङ ङ्यी़गी क़े तेन्दी मासीन, “ओ़ किन्ज्योगी स़ेबु, राहङगी ङ्यिहला च्यि जे नाङज्ये म़ेदी फेप नाङग्यो? ठिम ताङगे ङ्यिहमा माहलेपालाॱराङ ङ्यिहला तुहक्पु नाङज्येला फेप नाङग्यो यिहम्बा?”
30ओ़हगी फाच्चीला फा़ बा़ल च्यी़ छ़े तेहती येहकें। 31ओहले, “ङ्यिहला तेनॱराङ तेन नाङसीमाना ओ़ह फा़ नाहङला स्य़ूह च्य़ू नाङदोङ!” म़ेदी ओ़ह ल्हेन्डीया़गी येशूला स्युहसीन। 32ओहले येशूगी, “सोङ आहना!” म़ेदी सुङ नाङगेमु ओ़हजेलाराङ ल्हेन्डीया़ ओ़ह मिह ङ्यी़लेगी थेन्दी फा़ नाहङला स्य़ूहसीन ओहले फा़ बा़ल प्रा़हले माहर छ्योङदी छोला नुप्ती स्यिसीन।
33फा़ छो़एँ कोहरोवाया़ प्रे़हदी क्याहसाला फार काहल्सीन। ओहले क्याहसाला लेप्ती खुङगी थाम्ज्यीराङ ताम दाङ ल्हेन्डी स्य़ूहक्योगी ओ़ह मिह ङ्यी़ काहन्डुमु पेहती टा़हबा माएँ ताम स्ये तेर्सीन। 34दि केच्या थे़-लुहङ मे़हबाराङ युहल्बाराङ लाहङदी येशूला थ़ू ओहङसीन। ओहले खुङया़गी येशूला “दि ङ्यिह युहललेगी थेन्दी फेप्तोङ!” म़ेदी स्युहसीन।
Jelenleg kiválasztva:
मत्ती 8: HYLM
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2023 (Active), Wycliffe Bible Translators, Inc. All rights reserved.
